Lesson 7: ఒప్పించబడిన పాపి

పాతనిబంధనలోని అనేకమైన ఆజ్ఞలు, నేటి ప్రజలకు వర్తించవు అన్నట్లుగా కనబడతాయి. ఇక్కడ కొన్ని ఉదాహరణలు ఉన్నాయి:

• శకునము చెప్పుదానిని బ్రదుకనియ్యకూడదు (నిర్గమకాండము 22:18).

• ఏడవ సంవత్సరం అంతంలో అప్పులన్నింటిని క్షమించాలి (ద్వితీయోపదేశకాండము 15:1-2).

• యెరూషలేములో ఏడు రోజుల పాటు పస్కా పండుగను జరుపుకోవాలి (ద్వితీయోపదేశకాండము 16:1-6).

కొంతమంది బైబిల్ పండితులు, పాత నిబంధన నియమాలను మూడు వర్గాలుగా విభజిస్తారు: శుద్ధీకరణ/ఆచార సంబంధ నియమాలు, పౌర సంబంధిత నియమాలు మరియు నైతిక నియమాలు.

ఆచారసంబంధ నియమాలు బలులకు సంబంధించినవి. ఇవి ఆరాధన స్థలం మరియు ఆరాధన పద్ధతుల కొరకు రూపొందించబడినవి. క్రీస్తు చేసిన కార్యం వలన ఆ వ్యవస్థ ఇప్పుడు వాడుకలో లేదు గనుక నేటి క్రైస్తవులు, ఆచార సంబంధమైన నియమాలను పాటించరు (కొలొస్సయులకు 2:17, హెబ్రీయులకు 10:1).

పౌర సంబంధ నియమాలు, ఒక దేశంగా ఇశ్రాయేలు కొరకైనవి. అవి వ్యాపారానికి నియమాలను, భద్రతనిచ్చే మానవ హక్కులను అందించి, చట్టాల అమలుకు విధివిధానాలను ఇస్తాయి మరియు ఇశ్రాయేలు యొక్క మతపరమైన గుర్తింపును భద్రపరుస్తాయి. ఈ పౌరనియమాలను అనుసరించడం నేటి క్రైస్తవులకు సాధ్యపడదు, ఎందుకంటే ఆ నియమాలు వారి దేశాలకు చెందిన నియమాలు కాదు. ఉదాహరణకు, పాతనిబంధన కాలంలో, విగ్రహారాధన నిమిత్తం ఒక వ్యక్తిని చంపాల్సి వస్తే, అది ఒక వ్యక్తి యొక్క వ్యక్తిగత నిర్ణయంపై చేయకూడదు. ఒక న్యాయమూర్తి ఆ వ్యాజ్యాన్ని వినాలి, అప్పుడు తీర్పు, ప్రజల చేత బలపరచబడాలి (ద్వితీయోపదేశకాండము 17:6-12).

► ప్రాచీన ఇశ్రాయేలు దేశపు పౌర నియమాలను/చట్టాలను అసలు విధానంలో పాటించడం ఒక క్రైస్తవునికి ఎందుకు సాధ్యం కాదు?

నైతిక నియమాలు, కొన్ని చర్యలను అన్ని కాలాలకు సరైనవిగా లేదా తప్పుగా గుర్తించాయి. ఉదాహరణకు, పది ఆజ్ఞలు విగ్రహారాధనను, దేవదూషణను, వ్యభిచారాన్ని మరియు దొంగతనాన్ని నిషేధిస్తాయి (నిర్గమకాండము 20:5, 7, 14, 15).

క్రైస్తవులు, ఆచార సంబంధమైన, పౌర నియమాల ద్వారా ఆజ్ఞాపించబడిన అసలైన నియమాలను యధాతధంగా పాటించరు. అయితే, ఆ నియమాలు ప్రాముఖ్యమైనవి ఎందుకంటే అవి మారని దేవుని స్వభావాన్ని వెల్లడి చేస్తాయి. మనం విగ్రహారాధన చేసే వారిని, వ్యభిచారులను చంపకపోయినా, అలాంటి పాపాలు దేవునికి హేయమైనవనే విషయాన్ని ఆ నియమాలు చెబుతాయి. మన పేదలకోసం, పొలాల్లో కంకులను విడిచిపెట్టకపోయినప్పటికిని, ఇతర మార్గాలలో పేదలపట్ల శ్రద్ధ తీసుకోవాల్సి ఉంటుంది. పశువులను బలి అర్పించడానికి ముందు, ఆరాధనా స్థలానికి తీసుకెళ్లకపోయినా, సమస్తం దేవునికి చెందినవని ఎరిగిన వారమై, మనకు కలిగిన వాటిని దేవునికి అర్పణగా ఇస్తాం. అసలు/ప్రాథమికంగా ఇశ్రాయేలు ప్రజలు చేసిన కార్యాలను మనం చేయకపోయినా ఆ నియమాలను/సూత్రాలను నెరవేర్చే నూతన కార్యాలను మనం కనుగొంటాం.

పౌర మరియు ఆచార నియమాలు ముఖ్యమైనవి కావడానికి మరొక కారణం ఏమిటంటే, అవి నిర్దిష్టమైన విధానాలలో వర్తించే నైతిక సూత్రాలను అందిస్తాయి. ఆ సూత్రాలను తృణీకరించడం, నైతిక నియమాలను తృణీకరించినట్లే అవుతుంది. ఉదాహరణకు, మన ఇంటిపైన వేరేవాళ్ళు నివసించడానికి గదులు నిర్మించకపోతే, దానిపై పిట్టగోడ కట్టవలసిన అవసరం లేదు (ద్వితీయోపదేశకాండము 22:8). కానీ ఈ ప్రాచీన నియమం, మన ఇళ్ళు మరియు భూమి ప్రజలకు సురక్షితంగా ఉండేలా నిర్మించుకోవాలని మనకు చెబుతుంది.

► ద్వితీయోపదేశకాండము 22:8లో చెప్పబడిన సూత్రాన్ని నెరవేర్చాలి అంటే మనం అనుసరించాల్సిన ఆధునిక విధానానికి ఒక ఉదాహరణ ఏమిటి?

అయితే, రోమీయులకు రాసిన పత్రికలో పౌలు మాట్లాడుతున్న దేవుని నియమం ఏమిటి? ఇది తన ఆజ్ఞల్లో (పాత నిబంధన మరియు క్రొత్త నిబంధన) వెల్లడిపరిచిన మానవుని పట్ల దేవుని చిత్తం. కొన్ని ఆజ్ఞలను ప్రాథమికంగా చెప్పబడిన విధానంలో నెరవేర్చకపోయినప్పటికిని, ప్రధానంగా మనిషి పట్ల దేవుని చిత్తం అలానే ఉంటుంది. దేవుని ధర్మశాస్త్రాన్ని అతిక్రమించడం పాపం (1 యోహాను 3:4).

ఈ పాఠములో, రోమా పత్రిక యొక్క నాల్గవ భాగంతో కొనసాగుతాం. గత పాఠములో రోమా పత్రిక 6వ అధ్యాయంలో పాపంపై విజయాన్ని గురించి మనం అధ్యయనం చేశాం.

ఈ పాఠములో మనం రోమా 7వ అధ్యాయంలో ఒప్పించబడిన పాపిని గురించి అధ్యయనం చేస్తాం. రోమా 6 మరియు 8 అధ్యాయాలు, విశ్వాసి యొక్క జయజీవితాన్ని వివరిస్తాయి. రోమా 7వ అధ్యాయం, పూర్తి భిన్నంగా, తాను అపరాధినని మరియు తనను తాను మార్చుకోలేనని ఎరిగిన పాపి జీవితాన్ని చూపిస్తుంది.

7వ అధ్యాయం యొక్క ప్రధానాంశం

దేవుని ధర్మశాస్త్రం తెలిసినా, కృపచేత రూపాంతరం చెందని వ్యక్తి పాపపు శక్తి నుండి మరియు ధర్మశాస్త్రపు శిక్షావిధి నుండి తప్పించుకోలేని నిస్సహాయ స్థితిలో ఉంటాడు.

7వ అధ్యాయం యొక్క సారాంశం

ఈ అధ్యాయం, ధర్మశాస్త్రం క్రింద ఉన్న వ్యక్తి స్థితిని వివరిస్తుంది. ధర్మశాస్త్రం క్రింద ఉండడం అంటే దేవుని ఎదుట నిలబడి, ధర్మశాస్త్రానికి విధేయత చూపడం ఆధారంగా తీర్పు పొందడానికి ఎదురు చూడడమని భావం. అందరూ పాపం చేశారు గనుక, ధర్మశాస్త్రం క్రింద ఉండడమంటే, శిక్షావిధి క్రింద ఉండడం అని అర్థం. ధర్మశాస్త్రం క్రింద ఉన్న వ్యక్తి ఇంకా నీతిమంతునిగా తీర్చబడలేదు.

7:1-6 వచనాలు, ఒక విశ్వాసి ధర్మశాస్త్రం విషయమై ఎలా మరణించాడో వివరిస్తుంది. మిగిలిన అధ్యాయమంతా ఇది ఎందుకు ఆవశ్యకమో చూపిస్తుంది (7:5లో ‘యుండినప్పుడు’, 7:6లో ‘ఇప్పుడైతే’ అనే మాటలను చూడండి). 7:7-13 వచనాలు, ధర్మశాస్త్రం మేలైనదే గాని, అది పాపాన్ని మరింత తీవ్రమైనదిగా/కీడైనదిగా చేస్తుందో చూపిస్తుంది. 7:14-25 వచనాలు దోషియైన, మారుమనసు పొందని పాపి యొక్క నిస్సహాయ స్థితిని చూపిస్తుంది.

► బృందం కొరకు ఒక విద్యార్థి రోమా 7వ అధ్యాయాన్ని చదవాలి.

వచనాల వారీ వివరణ

(7:1-3) ఈ వచనాలు, తరువాతి మూడు వచనాలలో చెప్పబోయే అంశానికి సిద్ధపరిచే వివరణ. వివాహం, ధర్మశాస్త్రానికి బద్ధులమై ఉండడాన్ని గూర్చి వివరిస్తుంది. ఒక స్త్రీ తన భర్తను విడిచి, మరొక వ్యక్తిని వివాహం చేసుకొకూడదు, అయితే ఒకవేళ భర్త చనిపోతే, ఆమె అతని అధికారం నుండి విడుదల పొందుతుంది. ధర్మశాస్త్రానికి బద్ధులై వుండడమనేది మోషే ధర్మశాస్త్రం క్రింద యూదులకు మాత్రమే వర్తించదు, కానీ ప్రతి వ్యక్తికి వర్తిస్తుంది, ఎందుకంటే మనం కృపచేత రక్షణ పొందకపోతే, దేవుని ధర్మశాస్త్రాన్ని బట్టి తీర్పు పొందుతాము.

మరణం సంబంధాన్ని మారుస్తుందనేది వివాహాన్ని గూర్చిన పౌలు దృష్టాంతంలో ప్రధాన అంశం. మనం క్రీస్తుతో ఐక్యపరచబడినప్పుడు. మన ప్రాచీన స్వభావం విషయమై మరణిస్తాం. ధర్మశాస్త్రం రద్దు చేయబడదు లేదా కొట్టివేయబడదు. అయితే, యేసు ప్రత్యామ్నాయ ప్రాయశ్చిత్తం ద్వారా ధర్మశాస్త్రాన్ని అతిక్రమించే వారిగా మనపై ధర్మశాస్త్రపు అధికారం పూర్తిగా చెల్లించబడింది. ఇప్పుడు మనకు క్రీస్తుతో వివాహమైంది. ఇది మనల్ని ధర్మశాస్త్రం లేనివారిగా చేయదు. మనమిప్పుడు క్రైస్తవులం గనుక ధర్మశాస్త్రాన్ని అతిక్రమించే వారిగా మనకు ఎలాంటి హక్కు లేదు. దానికి బదులు, మనం ధర్మశాస్త్రపు ప్రేరణయందు జీవించడానికి పరిశుద్ధాత్మ ద్వారా బలపరచబడ్డాం.

(7:4) ధర్మశాస్త్రాన్ని అతిక్రమించడంలో మరణపు శిక్ష ఉంది. క్రీస్తు మన స్థానంలో చనిపోయాడు. మనం ఆయనతో గుర్తింపు కలిగి ఉంటాం, తద్వారా క్రీస్తు శరీరం ద్వారా ధర్మశాస్త్రం విషయమై మరణించామని లేఖనం చెప్తుంది. ధర్మశాస్త్రానికి అవసరమైనవి నెరవేరాయి గనుక మనం దాని బంధకాల నుండి విడుదల పొందాం. శిక్షావిధిని గూర్చిన భయంతో మనం ధర్మశాస్త్రాన్ని నెరవేర్చకూడదు. ధర్మశాస్త్రం విషయమై మరణించడం అంటే మనం కృప ద్వారా నీతిమంతులుగా చేయబడ్డాం గనుక మనము నీతిమంతులుగా తీర్చబడుట కొరకు దానిని నెరవేర్చాల్సిన అవసరం లేదు.

(7:5) ధర్మశాస్త్రం, పాపం యొక్క రికార్డును నమోదు చేస్తుంది మరియు ఒక వ్యక్తి ధర్మశాస్త్రాన్ని తెలుసుకొని దానికి వ్యతిరేకంగా తిరుగుబాటు చేస్తే, అతను ఘోరమైన పాపి అవుతాడు అనే అర్థంలో ధర్మశాస్త్రం వల్ల పాపం జరుగుతుంది

► ఈ భాగంలోని అనేక వాక్య భాగాలను పరిశీలించండి, తద్వారా అంశాలను మీరు అర్థం చేసుకోగలుగుతారు.

లేఖనం, "శరీర సంబంధులై" ఉన్న వివిధ రకాల వ్యక్తులను సూచిస్తుంది. శరీర సంబంధులై ఉండటం అనేది సందర్భాన్ని బట్టి కనీసం రెండు వేర్వేరు అర్థాలను కలిగి ఉంటుంది

ఒక ప్రాథమిక అర్థం ఏమిటంటే మనిషిగా, మర్త్యత కలిగిన రూపంలో ఉండడం. ఈ భావనలో యేసు శరీరంలో ఉన్నాడు (1 తిమోతికి 3:16; 1 పేతురు 3:18). ఈ భావంలో పరిశుద్ధ జీవితాన్ని జీవించే వ్యక్తి కూడా శరీరంలో జీవిస్తున్నాడని చెప్పవచ్చు (2 కొరింథీయులకు 10:3; గలతీయులకు 2:30; ఫిలిప్పీయులకు 1:22, 24). ఈ పదాన్ని ఈ విధంగా ఉపయోగించినప్పుడు శరీరం నైతికంగా తటస్థమైనదిగా పరిగణించబడుతుంది. పౌలు గలతీయులకు చెప్పినట్లుగా, వారు కృప ద్వారా ప్రారంభించిన దానిని శరీరం ద్వారా (మానవ ప్రయత్నాలు) పరిపూర్ణంగా చేయలేరు.

రెండవ భావనలో, ఒక వ్యక్తి శరీరంలో ఉండడం అంటే పతనమైపోయిన, పాపపు స్వభావం చేత నియంత్రించబడడం. ఈ స్థితి, నూతనంగా జన్మించని వ్యక్తికి విలక్షణమైనది/ప్రత్యేకమైనది (ఎఫెసీయులకు 2:3). పడిపోయిన పాపపు స్వభావపు సహజ కార్యాలు, గలతీయులకు 5:19-21లో ఉన్నాయి. రోమా 8:1-13లో, శరీరంలో ఉండడం, రక్షించబడడానికి భిన్నంగా ఉంటుంది. శరీరానుసారమైన స్వభావం మరణం (8:6) మరియు దేవునికి విరోధమైనది (8:7). శరీరానుసారుడైన వ్యక్తి దేవునిని సంతోషపెట్టలేడు (8:8) మరియు మరణిస్తాడు (8:13). ఇక్కడ శరీరాన్ని గూర్చిన వివరణ రోమా 7లో వివరించిన స్థితివలెనే ఉంటుంది (7:5, 14, 18, 25 చూడండి). ఈ భావనలో శరీరానుసారుడైన వ్యక్తి పాపపు కార్యాలు చేస్తాడు, దీనికొరకు అతను ఆత్మీయ శిక్షను మరియు నిత్యమరణాన్ని పొందుతాడు (రోమా 7:5). అతనింకా రక్షణపొందలేదు.

ఒక వ్యక్తి, మారుమనసు పొందిన తరువాత కూడా, పడిపోయిన/పాపపు స్వభావం చేత ప్రభావితమవుతాడు, అయితే దానిచేత నియంత్రించబడడు. కొరింథీ సంఘపు వారు రక్షణ పొందిన తరువాత కూడా, శరీరానుసారులనే పిలవబడ్డారు (1 కొరింథీయులకు 3:1). పౌలు, 3:1లో లోకానుసారమైన జీవితం క్రీస్తునందు శిశువులైన వారికొరకు ఉద్దేశించబడిందని సూచించాడు, కానీ ఒక విశ్వాసి ఇదే స్థితిలో నిరంతరం కొనసాగడు. కొరింథీయులు, శిశువులుగానే/ పసిపిల్లలుగానే ఉన్నందుకు అతను వారిని విమర్శించాడు.

వచనాల వారీ వివరణ కొనసాగింపు

(7:6) మనం క్రీస్తునందు ధర్మశాస్త్రం విషయమై మరణించాం గనుక ధర్మశాస్త్రం మన విషయమై మృతమైనది. స్వాతంత్ర్యం అంటే మనం సేవ చేయమని కాదు; కానీ ఇప్పుడు మనం ధర్మశాస్త్ర నియమాల యొక్క ఉద్దేశ్యాలను నెరవేర్చకుండ, అవి ఆశించే వాటిని మాత్రమే నెరవేర్చడానికి ప్రయత్నించే బదులు ఇప్పుడు మనం మన ఆత్మతో సేవ చేస్తున్నాం అని అర్థం.

(7:7) ధర్మశాస్త్రం, పాపం మరింతగా ప్రబలేలా చేస్తుందని పౌలు గతంలో చెప్పాడు (5:20). ఈ లేఖన భాగంలో, మరణార్థమైన ఫలాన్ని తీసుకురావడానికి, పాపం ధర్మశాస్త్రం ద్వారా పనిచేస్తుందని ఆయన చెప్పాడు (7:5). కాబట్టి, “ధర్మశాస్త్రం పాపమా? అనే ప్రశ్న తలెత్తడం సహజం? ధర్మశాస్త్రం పాపాన్ని ఖండించేది అని చెప్పడం ద్వారా ధర్మశాస్త్రం పాపం కాదని చూపించాడు.

(7:8) పాపి యొక్క చర్యలు ఖండించబడతాయని దేవుని ధర్మశాస్త్రం చూపిస్తుంది. ఒక విధంగా చూస్తే, ధర్మశాస్త్రం, పాపాన్ని మరింత చెడ్డగాను/తీవ్రంగాను చేస్తుంది. పాపి, తాను అపరాధినని గ్రహించినప్పుడు, అతని నిరంతర పాపం (దేవుని ధర్మశాస్త్రానికి అవిధేయత చూపుట) చేతన తిరుగుబాటు అవుతుంది.

(7:9) ధర్మశాస్త్రానికి కావలసిన వాటిని చూడక మునుపు, తనకు మరణశిక్ష విధించబడిందని అతనికి తెలీదు. కానీ పాపం, దేవుని ధర్మశాస్త్రాన్ని గురించి ఎలాంటి వివరాలు తెలియని వ్యక్తిని కూడా మరణానికి నడిపిస్తుంది (2:12 మరియు 5:14 చూడండి).

రోమా 7:7-25లో, రక్షించబడని పరిసయ్యునిగా పౌలు తన అనుభవాన్ని గురించి మాట్లాడుతూ, క్రీస్తు పట్ల తనకున్న అవసరాన్ని చివరికి తానెలా చూశాడో వివరించాడు. రోమా 7లో, పరిశుద్ధాత్ముడు తన హృదయంలో ఉన్న దురాశను చూడడానికి తన మనోనేత్రాలు తెరిచే వరకు, తాను ఎంత పరిపూర్ణంగా ధర్మశాస్త్రాన్ని పాటించానని పౌలు అనుకున్నాడో చెబుతున్నాడు. ఫిలిప్పీయులకు 3:6లో “ధర్మశాస్త్రమువలని నీతివిషయము అనింద్యుడనై యుంటిని” అని చెప్పినప్పుడు, ఆయన సాక్ష్యాన్ని చూడండి. ఫిలిప్పీయులకు 3:9లో చెప్పినట్లు, ఒక పరిసయ్యునిగా తన నీతిని ధర్మశాస్త్రం నుండి పొందుతున్నాడని భావించాడు. పరిశుద్ధాత్ముడు, తన హృదయంలో ఉన్న దురాశను అతనికి వెల్లడిపరిచినప్పుడు, తాను ఆత్మీయంగా మరణించానని భావించాడు (రోమా 7:9). ఇది స్పష్టంగా తులనాత్మక ప్రకటన: ఒకప్పుడు తాను, ధర్మశాస్త్రాన్ని పాటించడం ద్వారా ఆత్మీయంగా జీవించే ఉన్నాడని అనుకున్నాడు; దురాశ విషయంలో తాను అపరాధినని, ధర్మశాస్త్రాన్ని పాటించలేదని గ్రహించినప్పుడు, తాను వాస్తవానికి చనిపోయానని అర్థం చేసుకున్నాడు. పౌలు రోమా 7:14-25 వచనాల్లో, తన చరిత్రను గురించి చెప్పడం కొనసాగించాడు. దురాశపడకుండా ఉండడానికి ప్రయత్నించాడు, కానీ అతని వల్ల కాలేదు. తాను పూర్తిగా ఓడిపోవడం మరియు పాపానికి దాసత్వంపూర్తి సాక్ష్యం. రోమా 7:25లో యేసుక్రీస్తు ద్వారానే విడుదల వస్తుందని ఆయన మనకు చెప్పాడు.[1]

(7:10) ధర్మశాస్త్రం, జీవిత విధానాన్ని చూపించడానికి ఉద్దేశించబడింది. ధర్మశాస్త్రం, రక్షణకు మార్గం కాదు, కానీ ఇది దేవునిని ఎరిగిన వారు జీవించడానికి ఒక దిశానిర్దేశం/మార్గం. కానీ ప్రకృతి సంబంధియైన మనిషి, తన పతన స్వభావాన్ని బట్టి దానిని అనుసరించలేడు, అది జీవార్థమైనదిగా ఉండడానికి బదులు, మరణార్థమైందిగా మారుతుంది.

(7:11) పాపం, ప్రయోజనకరమైందిగా, సంతోషమిచ్చేదిగా, హానికరం కానిదిగా కనబడడం ద్వారా మోసం చేస్తుంది. ఒక వ్యక్తి పాపం చేయడానికి శోధనకు లోబడినప్పుడు, తన పాపపు ఫలితాన్ని తగ్గించడంలో విజయం సాధించినప్పటికినీ, అతను శిక్షను పొందుతాడు; ఎందుకంటే దేవుని తీర్పు పాపపు పర్యవసానాలను బట్టి కాక, ధర్మశాస్త్రాన్ని బట్టి ఉంటుంది.[2]

(7:12) ధర్మశాస్త్రం, దేవుని స్వభావాన్ని వెల్లడి చేస్తుంది - ఆయన వలె ధర్మశాస్త్రం కూడా పరిశుద్ధమైంది, నీతిగలది, మంచిది, న్యాయమైనది.

(7:13) ధర్మశాస్త్రం చెడ్డది కాదు, కానీ పాపం ధర్మశాస్త్రానికి విరోధంగా స్పందించినప్పుడు, చెడు ఫలితాలు వస్తాయి. ప్రతి వ్యక్తిని, మరణశిక్ష క్రిందకు తీసుకొని రావడానికి పాపం ధర్మశాస్త్రాన్ని వాడుకుంది. ధర్మశాస్త్రం ద్వారా, పాపం నిజంగా చెడ్డదైనట్లు కనబరచబడింది.

రోమా 7:14-25 వచనాలు, ఒక సాధారణ విశ్వాసిని గురించి వివరిస్తున్నాయని చాలామంది భావిస్తారు, కానీ వివరణ గురించి ఆలోచించండి.

ఒక బానిసలాగా పాపానికి అమ్మబడడం అంటే, అతను విమోచించబడలేదని అర్థం (7:14). ఏది సరైందో అతనికి తెలుసు, కానీ దానిని చేయలేడు (7:18). అతను బంధకాల్లో ఉన్నాడు గాని, విడుదలపొందిన వాడు కాదు (7:23). అతను ధౌర్భాగ్యుడై, విడుదల కొరకు మొరపెడుతున్నాడు (7:24).

7:5-24లో, “ఏలయనగా మనము శరీరసంబంధులమై యుండినప్పుడు” (7:5) అనే మాటతో ప్రారంభమై, “నన్నెవడు విడిపించును?” అనే ప్రశ్నతో (7:24) ముగుస్తుంది. క్రీస్తు, పరిశుద్ధాత్మ, కృప, జీవితం లేదా విజయం మొదలగు విషయాలను గూర్చిన ప్రస్తావన లేదు; కానీ ఉత్తమ పురుషముకు (నేను, నా, నాది) 52 వాక్యాలు మరియు ధర్మశాస్త్రానికి 16 వాక్యాలు మరియు పాపానికి 15 వాక్యాలు ఉన్నాయి.

ఈ వ్యక్తి, రోమా 6లో విడుదల పొందిన వ్యక్తి కాదు. ఆ అధ్యాయం, విశ్వాసి పాపానికి బానిస కాదని పదే పదే చెబుతుంది. రోమా 7లో పౌలు వివరిస్తున్న వ్యక్తి అధ్యాయం ప్రారంభంలో పరిచయం చేసినట్లు ధర్మశాస్త్రం క్రింద ఉన్న వ్యక్తి (7:1, 5-6). 7:14వ వచనం, అధ్యాయంలో మిగిలిన భాగమంతా, 7:1, 5-6 లో చెప్పబడిన అదే స్థితిని వివరిస్తుందని చూపే ఒక అనుసంధానం.

శిక్షావిధి పొందని వ్యక్తి, క్రీస్తుయేసులో ఉన్న వ్యక్తి అని రోమా 8:1 చెబుతుంది. ఈ వ్యక్తి శరీరాన్ని అనుసరించి జీవించడని 8:4-5 వచనాలు చెబుతున్నాయి. శరీరాన్ని అనుసరించి జీవించే వ్యక్తి (7:25 మరియు 7:5లో ఉన్నట్లుగా) శిక్షావిధి క్రింద ఉన్న వ్యక్తి. శిక్షావిధి పొందిన వ్యక్తి నిజమైన విశ్వాసి కాదు. రోమా 7లో ఉన్న వ్యక్తి, నిస్సహాయత కలిగివాడు, శరీరం చేత నియంత్రించబడే వ్యక్తి.

ధర్మశాస్త్రం క్రింద బలహీనమైన స్థితి ముగిసిందని 8:3వ వచనం చెబుతుంది; కాబట్టి, రోమా 7లో వివరించిన నిస్సహాయ స్థితి, విశ్వాసి యొక్క స్థితి కాదు.

శరీరానుసారమైన మనసు మరణమని, అది దేవునికి విరోధమైనదని 8:6-7 వచనాలు చెబుతున్నాయి. కానీ 7:14వ వచనం, శరీరానుసారమైన మనసును వివరిస్తారంభిస్తుంది. ఈ సందర్భంలో ఉద్దేశించినట్లే, శరీరానుసారమైన వ్యక్తి, యదార్థంగా యేసును వెంబడించే వ్యక్తి కాదు.[1]

అయితే, ఈ వివరణలో పౌలు తనని గురించి ఎందుకు ప్రస్తావించాడు? 7:7వ వచనం నుండి ధర్మశాస్త్రం యొక్క దోషనిర్ధారణ క్రిందకు వచ్చే పాపిని గూర్చి వివరిస్తుంది. మిగిలిన అధ్యాయమంతా ఆయన గత అనుభవాన్ని అంటే ధర్మశాస్త్రాన్ని అనుసరించడం ద్వారా దేవునిని సంతోషపెట్టాలనే యదార్థమైన తన ప్రయాసను వివరిస్తుంది. అది అతనికి నిత్యజీవాన్ని ఇవ్వలేదు మరియు ఏవిధమైన సంతృప్తిని అందించలేదు. రోమా 8లో జయజీవితాన్ని గురించి వివరించడం ప్రారంభించాడు. 8:1-4లో వివరించిన వ్యక్తి, రోమా 7లో ప్రస్తావించిన స్థితిలోనే ఉండడం అసాధ్యం.

కాబట్టి, రోమా 7వ వచనం, తాను దేవుని ధర్మశాస్త్రం ద్వారా ఖండించబడతానని ఎరిగి, దానికి విధేయత చూపలేని, దానికి తగ్గట్లుగా జీవించలేని, పునరుజ్జీవనం పొందని వ్యక్తి గురించి వివరిస్తుంది.

► ఈ భాగంలో వివరించిన విషయాలను మీ స్వంత మాటల్లో క్లుప్తీకరించండి. ఈ పాఠములో మరింతగా ఋజువులు ఇవ్వబడతాయి గనుక, ఇప్పుడే ఈ విషయాన్ని గురించి వాదించనవసరం లేదు.

వచనాల వారీ వివరణ కొనసాగింపు

(7:15) చాలా మంది సరైన పనులు చేయడంలో తాము మెరుగుగా ఉండాలని ఆశిస్తారు. ఆ కోరిక ఉండటం మాత్రమే వారు క్రైస్తవులు అనే అర్థం కాదు. ఎవరికైనా ఆ కోరిక ఉండి, సరిగ్గా జీవించే శక్తి లేకపోతే, అది వారు పాపశక్తి నుంచి ఇంకా విమోచింపబడలేదని చూపిస్తుంది.

(7:16) వాళ్ళు ఉత్తమంగా జీవించి ఉండాలనే భావన, వాళ్ళు ధర్మశాస్త్రాన్ని విధేయత చూపకపోయినా, అది మంచిదని వాళ్ళకు తెలుసని తెలియజేస్తుంది.

(7:17-23) పాపం, మనిషి చిత్తాన్ని నియంత్రించేదిగా చెప్పబడింది. భ్రష్టుడైన వ్యక్తి/పతనమైన వ్యక్తి, దేవుడు సృష్టించిన మొదటి మానవుడు కలిగి ఉన్న స్వేచ్ఛాయుత చిత్తాన్ని స్వభావసిద్ధంగా కలిగి ఉండలేడు. మనిషి చిత్తం ఎంతగా బలహీనమైందంటే, దేవుడు తన కృప ద్వారా ఒక పాపి చిత్తాన్ని పునఃస్థాపించే వరకు పాపి దేవునిని ఎంపిక చేసుకోలేడు.

ముందస్తు కృప అనేది, ఇంకా తనకు స్పందించని వారిని చేరుకోవడానికి దేవుని చర్య. ప్రతి వ్యక్తికి విస్తరించబడిన దేవుని కృపలో స్వేచ్ఛాయుత చిత్త పునరుద్ధరణ, దేవుని కొరకు ఉన్న కోరిక భాగంగా ఉన్నాయి గనుక ప్రతి వ్యక్తి రక్షించబడాలా వద్దా అనే విషయాన్ని నిజంగా ఎంపిక చేసుకుంటాడు.

దేవుడు, ప్రతి వ్యక్తి కొరకు రక్షణ కార్యాన్ని ప్రారంభించాడు (యోహాను 6:44; ఎఫెసీయులకు 2:4-5, 12-13, 17; తీతు 2:11, తీతు 3:3-5), కానీ ఒక వ్యక్తి దేవునికి ప్రతిస్పందించే వరకు రక్షణ పొందలేడు.

(7:24) ఒక వ్యక్తి తనని తాను రక్షించుకోవడంలో తన సంపూర్ణ అసమర్థతను చూసిన తరువాత కలిగే నిరాశ, నిస్పృహలతో కూడిన కేక. ఇది రక్షించబడిన వ్యక్తి యొక్క రోదన కాదు.

(7:25) ఇక్కడ స్తుతి ఆరాధన నిరాశా నిస్పృహలతో నిండిన పాపి అంధకార జీవితములో వెలుగుగా లోపలికి ప్రవేశించింది.

తరువాత లేఖనభాగాన్ని క్లుప్తీకరించే వాక్యం వస్తుంది. మారుమనసు పొందని వ్యక్తి ధర్మశాస్తం సరైందనే మానసిక అంగీకారానికి వచ్చి, తానున్న వాస్తవ స్థితి కంటే ఉత్తమంగా ఉన్నట్లు నటించే ప్రయత్నం చేస్తాడు; కానీ అతని పాప కోరికలు అతన్ని పాపంలోనే ఉంచుతాయి. ఒక వ్యక్తి, తన మనసుతోను, శరీరంతోను పాపానికి సేవ చేసినందుకు శిక్షావిధి పొందుతాడు (7:5, 8:3).

ఈ లేఖనభాగంలో పౌలు, అవిశ్వాసి జీవితంలో, స్వతంత్రించుకున్న భ్రష్టత్వపు శక్తి (పాప నియమము) గురించి మాట్లాడాడు. పౌలు, మేల్కొలపబడిన పాపియైనా, తనలోనే పోరాటాన్ని కలిగి ఉన్నాడు.[1]

పౌలు శరీరంలో ఉన్న పాపపు నియమం, ఈ క్రింది ఫలితాలను కలిగించింది:

• తాను అసహ్యించుకొనే దానిని అతను చేస్తాడు (7:15).

• ఇచ్చయింపనిది అతడు చేస్తాడు (7:16).

• సరైంది చేయాలనే కోరిక ఉంటుంది, గాని చేయడానికి శక్తి ఉండదు (7:18).

• పాప నియమం, తన మనసునందున్న నియమాన్ని ప్రతిఘటిస్తుంది (7:23).

• అతను పాప నియమానికి చెరపట్టబడ్డాడు (7:23).

• అతను విభజించబడిన వ్యక్తి: అతని మనసు దేవునికి సేవ చేస్తుంది, కానీ అతని శరీరం పాప నియమానికి పరిచర్య చేస్తుంది (7:25).

ఒక వ్యక్తి ఇద్దరు యజమానులకు సేవ చేయలేడు. ఒక వ్యక్తి పాపం నుండి విడుదల పొంది, పాపానికి బానిసగా ఉండలేడు. ఒక వ్యక్తి దేవునికీ, పాపానికి దాసునిగా ఉండలేడు. రోమా 7:14-25లో ఉన్న భాష, రోమా 6లో పాప బానిసత్వం నుండి విడుదల పొందిన విశ్వాసిని గూర్చిన వ్యాఖ్యలకు పూర్తి విరుద్ధంగా ఉంటుంది. కాబట్టి, 7:14-25 వచనభాగం, పాపంతో, ధర్మశాస్త్రంతో అవిశ్వాసికున్న సంబంధాన్ని గురించి, 7:1-13లో ప్రారంభమైన వివరణకు కొనసాగింపు.

రోమా 6వ అధ్యాయం, విశ్వాసి క్రీస్తుతో సిలువవేయబడి మరియు పునరుత్థాన ఫలితంగాతనకు పాపంతో ఉన్న సంబంధాన్ని గురించి వివరిస్తుంది. రోమా 7వ అధ్యాయం, ఈ క్రింది విషయాలను వివరిస్తుంది:

• ధర్మశాస్త్రంతో పాపికి ఉన్న సంబంధం.

• అంతరంగమందున్న పాపం మరియు ధర్మశాస్త్రం యొక్క పరస్పర చర్య.

• దేవుని ధర్మశాస్త్రం ఆశిస్తున్న వాటి విషయంలో మేల్కొలపబడి, తన అంతరంగంలో ఉన్న పాపానికి బానిసగా ఉండడాన్ని బట్టి తన స్వంత శక్తిపై ఆధారపడి ధర్మశాస్త్ర విధులను నెరవేర్చలేకపోవడం వలన పాపిలో కలిగే పోరాటం.

రోమా 7:14-25 యొక్క వివరణలు మారుతూ ఉంటాయి

దృక్పథం 1: పౌలు సాధారణ క్రైస్తవ జీవితాన్ని గురించి మాట్లాడుతున్నాడని కొంతమంది పండితులు రాశారు. ఈ వాక్యభాగంలో ఉపయోగించిన క్రియాకాలాలు/క్రియాపదాలు, ప్రస్తుతానికి సంబంధించినవే గాని, గతానికి సంబంధించినవి కాదు; పౌలు దృక్కోణంలో, క్రైస్తవ జీవితం పరిష్కరించబడని విషయాలతో ఉందని వాళ్ళు నొక్కి చెబుతారు.

దృక్పథం 2: “పాపమునకు అమ్మబడి” మరియు “నేనెంత ధౌర్భాగ్యుడను” అనే వాక్యాలు రోమా 6 మరియు రోమా 8లో విశ్వాసి గురించి ఇచ్చిన వివరణతో పొందిక కలిగి లేవు గనుక పౌలు మారుమనసు పొందడానికి ముందు మనిషి స్థితిని గురించి వివరిస్తున్నాడని చాలామంది పండితులు నమ్ముతారు. రోమా 6 ప్రకారం, విశ్వాసి పాపం విషయమై మృతిబొంది, పాపం నుండి విడుదల పొంది, మరియు పాపంపై విజయం పొందడానికి క్రీస్తునందు అందుబాటులో ఉన్న స్వాతంత్ర్యాన్ని విశ్వాసం ద్వారా, దేవునికి సంపూర్ణంగా సమర్పించుకోవడం ద్వారా స్వతంత్రించుకుంటాడు. రోమా 8 ప్రకారం, శరీరానుసారంగా నడిచే వ్యక్తి దేవునిని సంతోషపెట్టలేడు మరియు క్రీస్తు ఆత్మ అతనిలో నివశించదు.

రెండవ దృక్పథం, రోమా పత్రికలో పౌలు వాదన యొక్క ప్రవాహానికి సరిపోతుందని, అతని బోధనంతటికీ ఎంతో అనుగుణంగా ఉందనేది ఈ పాఠ్యప్రణాళిక రచయితల అభిప్రాయం.

రోమా 7:14-25లో ఉన్న వ్యక్తిని గురించి తరచుగా అడిగే ప్రశ్నలు

రోమా 7:14-25లో పౌలు తన వ్యక్తిగత క్రైస్తవ జీవితాన్ని గురించి వివరిస్తున్నాడని భావించే వ్యక్తులు నుండి తరచుగా అడిగే కొన్ని ప్రశ్నలు ఇక్కడ ఉన్నాయి:

ప్రశ్న 1: తన అంతరంగపురుషుని బట్టి దేవుని ధర్మశాస్త్రమునందు నేను ఆనందించుచున్నానన్న పౌలు వ్యాఖ్యల సంగతి ఏమిటి (రోమా 7:22)? అవిశ్వాసియైన పరిసయ్యుడు దేవుని ధర్మశాస్త్రమందు ఆనందిస్తాడా?

సమాధానం: ఏ పరిసయ్యుడైన తన హృదయంలో దేవుని ధర్మశాస్త్రమందు ఆనందిస్తానని చెప్పవచ్చు. వాళ్ళు దేవుని ధర్మశాస్త్రాన్ని అధ్యయనం చేయడానికి తమ జీవితాన్ని సమర్పించుకున్నారు మరియు ప్రతిరోజు అనేక గంటలపాటు దానిని అధ్యయనం చేసేవారు. పౌలు, తనను తాను ధర్మశాస్త్రానికి సమర్పించుకున్నాడు మరియు యదార్థంగా దానికి విధేయత చూపాలని కోరుకున్నాడు. కానీ పరిశుద్ధాత్మ దేవుడు, పౌలు హృదయానికున్న దురాశ స్వభావాన్ని అతనికి చూపించి, వాస్తవమైన తన ఆత్మీయ స్థితిని చూసేలా అతన్ని మేల్కొలిపినప్పుడు, సరైనది చేయడానికి కృప ద్వారా తన మనసు కోరుకుంటున్నప్పటికిని, తాను చేయకూడని దానిలోనే కొనసాగుతున్నాడని గ్రహించాడు. ఎలా జీవించాలో పౌలుకు ధర్మశాస్త్రం చూపించింది, కానీ దానిని చేయడానికి అవసరమైన సామర్థ్యాన్ని ధర్మశాస్త్రం అతనికి ఇవ్వలేదు.

ప్రశ్న 2: మరి రోమా 7:14-25లో ఉపయోగించిన వర్తమాన క్రియాపదాల సంగతేంటి? పౌలు, “ధర్మశాస్త్రము ఆత్మ సంబంధమైనదని యెరుగుదుము; అయితే నేను పాపమునకు అమ్మబడి శరీరసంబంధినై యున్నాను” (రోమా 7:14) అని రాశాడు.

సమాధానం: రోమా 7:7-13లో భూతకాల క్రియాపదం నుండి రోమా 7:14-25లో వర్తమానకాల క్రియాపదానికి మారడమనేది తన వ్యక్తిగత గత సాక్ష్యాన్ని ఏ విధంగాను ప్రభావితం చేయలేదు. 7:14-24లోనున్న వర్తమానకాల క్రియాపదం, ఒక పరిపక్వత కలిగిన అపొస్తలునిగాను, మిషనరీగాను రోమీయులకు ఈ పత్రికను రాస్తున్న సమయంలో పౌలుకున్న ప్రస్తుత సాక్ష్యాన్ని సూచించాల్సిన అవసరం కూడా లేదు. ఒక రచయిత, గతంలో జరిగిన సంఘటనను లేదా అనుభవాన్ని తన పాఠకులకు స్పష్టం చేయాలి అనుకున్నప్పుడు, “చారిత్రాత్మక” లేదా “నాటకీయ” వర్తమానకాల క్రియాపదాన్ని, గ్రీకులో వర్తమాన క్రియాపదంగా వాడడం సుపరిచితమైన విషయం. కాబట్టి, పౌలు మారుమనసు పొందకమునుపు, తన గతజీవితంలో వాస్తవంగా ఉన్న విషయాన్ని స్పష్టం చేయడానికి వర్తమాన కాల క్రియా పదాన్ని వాడడం, పౌలు ఇప్పటికీ పాపపు బానిసత్వంతో పోరాడుతున్నాడని వ్యాఖ్యానించదు. రోమా 6 మరియు 8లో ఒక క్రైస్తవుడు పాపపు బానిసత్వానికి అమ్మబడలేదని స్పష్టంగా పౌలు చూపించాడు (రోమా 7:14).

ప్రశ్న 3: ఈ వాక్యభాగానికి, అనేకమంది క్రైస్తవులు తమ జీవితంలో కనుగొనే పోరాటానికి మధ్యనున్న సారుప్యతలు ఏమిటి?

సమాధానం: విశ్వాసి ఎదుర్కొనే పోరాటం, భ్రష్టుడైన వ్యక్తి ఎదుర్కొనే పోరాటానికి పూర్తిగా భిన్నమైంది. రోమా 7:14-25లోనున్న ధౌర్భాగ్యుడైన వ్యక్తి పాపంలో కొనసాగుతూనే ఉంటాడు. అతను పాపానికి బానిస. నిజమైన విశ్వాసి విషయంలో పరిస్థితి భిన్నంగా ఉంటుంది. ఒక క్రైస్తవుడు పరిస్థితులనుబట్టి పోరాటాలను, వైఫల్యాలను కలిగి ఉంటాడు, కానీ అతని జీవితం పాప, మరణ నియమాలకు బానిసగా ఉన్న జీవితంలా ఉండదు. క్రైస్తవుడు క్రీస్తుతో ఐక్యపరచబడతాడు మరియు అంతరంగంలోనున్న పాపపు శక్తినుండి విడుదల పొందుతాడు (రోమా 6:1-10).

ముగింపు: రోమా 7:14-25లో ప్రస్తావించిన ధౌర్భాగ్యుడైన వ్యక్తి, దేవునిని సంతోషపెట్టడానికి పోరాడే యదార్థవంతుడైన పరిసయ్యునిలా కనబడతాడు. ఒక వ్యక్తి పాపానికి బానిసగా ఉంటూనే, పాపం నుండి విడుదల పొందలేడు. ఒక వ్యక్తి దేవునికి, పాపానికి బానిసగా ఉండలేడు, ఎందుకంటే “ఎవడును ఇద్దరు యజమానులకు దాసుడుగా నుండనేరడు” (మత్తయి 6:24, లూకా 16:13) యేసు చెప్పాడు. రోమా 7:14-25లో పాపంతోను, మోషే ధర్మశాస్త్రంతోను సంబంధం కలిగి, నూతనంగా జన్మించని వ్యక్తిని గూర్చిన వివరణ, రోమా 7:7-13లో ప్రారంభమైన వివరణకు కొనసాగింపు.

► పైన పేర్కొన్న వివరాలను, వివరణలను జాగ్రత్తగా పరిగణలోనికి తీసుకొంటూ, రోమా 7లోనున్న వ్యక్తి గుర్తింపుని గూర్చిన అంశాన్ని చర్చించండి.

అపొస్తలుడు, రోమా 7:7లో, ధర్మశాస్త్రం పాపాన్ని వెల్లడి చేస్తుందని మనకు చెప్పాడు. సౌవార్తీకరణకు ధర్మశాస్త్రం ప్రయోజనకరమైనది ఎందుకంటే ఒక వ్యక్తి తాను దేవుని ధర్మశాస్త్రం ద్వారా శిక్షించబడతానని గ్రహించినప్పుడు, రక్షణ పట్ల తనకున్న అవసరతను చూడగలుగుతాడు. సంఘ చరిత్ర అంతటా, ప్రభావవంతమైన సువార్తీకులందరూ, ఆవిశ్వాసులు రక్షణను ఆశించేలా చేయడానికి దేవుని ధర్మశాస్త్రాన్ని ఉపయోగించారు.

సువార్తీకులు, ధర్మశాస్త్రాన్ని ఉపయోగించడాన్ని గురించి ఏం చెప్పారో ఈ క్రింది ఉల్లేఖనాలు/వ్యాఖ్యలు వెల్లడి చేస్తాయి.

► వంతులవారీగా ఉల్లేఖనాలను/వ్యాఖ్యలను చదవండి మరియు బృందంలోని ఇతర సభ్యుల సహాయంతో వాటిని వివరించండి.

చార్లెస్ స్పర్జన్ నుండి[1]

ధర్మశాస్త్రాన్ని తొలగించడం ద్వారా, మీరు పాపాన్ని కూడా తీసివేశారు, ఎందుకంటే ధర్మశాస్త్రాన్ని అతిక్రమించడమే పాపం; ధర్మశాస్త్రం లేని చోట, అతిక్రమం లేదు. మీరు పాపాన్ని తొలగించినప్పుడు, మీరు రక్షకుడిని, రక్షణను కూడా తొలగిస్తారు, ఎందుకంటే ఏవిధంగాను అవి అవసరమైనవి కాదు. మీరు పాపాన్ని తక్కువ స్థాయికి తగ్గిస్తే, యేసుక్రీస్తు ఈ లోకానికి అందించడానికి వచ్చిన గొప్ప, మహిమాయుక్తమైన రక్షణ యొక్క అవసరత ఏమిటి?

ప్రజలు న్యాయమైన, పరిశుద్ధమైన దేవుని ధర్మశాస్త్రం ఎదుట భయపడనంత వరకు వాళ్ళు కృపను అంగీకరించలేరు; కాబట్టి, ధర్మశాస్త్రం, అత్యంత ఆవశ్యకమైనదిగాను, దీవెనకరమైన ఉద్దేశ్యాన్ని కలిగిందిగాను పనిచేస్తుంది.[2]

చార్లెస్ ఫిన్ని నుండి[3]

ఒక వ్యక్తి తన శిక్షావిధి యొక్క వాస్తవాన్ని, న్యాయాన్ని చూడనంతవరకూ, అనుభవించనంతవరకూ, ఆ వ్యక్తి ఆలోచనపూర్వకంగాను, హృదయపూర్వకంగాను క్షమాపణను అడగలేడు లేదా అంగీకరించలేడు.

పాపి యొక్క స్వనీతి నిర్మూలించబడే వరకు ధర్మశాస్త్రం యొక్క ఆధ్యాత్మికత అతని మనస్సాక్షికి అన్వయించబడుతూనే ఉండాలి మరియు అతను పరిశుద్ధుడైన దేవుని ఎదుట మాట్లాడలేనివాడిగాను, స్వీయ-శిక్షావిధిని పొందినవాడిగాను ఉంటాడు.

ధర్మశాస్త్రం సువార్తకు మార్గాన్ని ఎప్పుడూ సిద్ధపరుస్తూనే ఉండాలి. ఆత్మలకు సూచించేటప్పుడు ఈ విషయాన్ని నిర్లక్ష్యం చేయడం అంటే తప్పుడు నిరీక్షణలో నడిపించడం అంటే క్రైస్తవ అనుభవానికి తప్పుడు ప్రమాణాన్ని పరిచయం చేయడం, సంఘాన్ని నకిలీ విశ్వాసులతో నింపడమే అవుతుంది.[4]

మార్టిన్ లూథర్ నుండి[5]

కానీ సాతాను... సంఘం నుండి పది ఆజ్ఞలను తీసివేయాలని బోధించే ఒక గుంపును లేపాడు, మరియు వ్యక్తులు ధర్మశాస్త్రాన్ని బట్టి భయపడకూడదు, కానీ క్రీస్తు కృపను గూర్చిన బోధ చేత మృదువైన ఉపదేశాన్ని పొందాలి.[6]

జాన్ బన్యన్ నుండి[7]

ధర్మశాస్త్ర స్వభావం గురించి, వారు దాని క్రింద ఉన్నారనే విషయాన్ని గురించి ప్రజలు నిర్లక్ష్యంతో ఉన్నంతవరకూ - అంటే దానికి విరోధంగా చేసే వారి పాపం ద్వారా, శాపం క్రింద, శిక్షను విధించే దాని శక్తి క్రింద ఉన్నంతవరకూ, సువార్త యొక్క నిజమైన జ్ఞానాన్ని విచారణ చేసే విషయంలో అజాగ్రత్తతోను, నిర్లక్ష్యంతోను ఉంటారు.

ధర్మశాస్త్రాన్ని ఎరుగని వ్యక్తి, తన చర్యలోను, సత్యంలోను తాను పాపిననే విషయాన్ని తెలుసుకోడు మరియు ఒక రక్షకుడు ఉన్నాడనే విషయాన్ని కూడా తెలుసుకోలేడు.[8]

జొనాతన్ ఎడ్వర్డ్స్ నుండి[9]

మనం పాపం చేస్తున్నామా లేదా అని తెలుసుకోవడానికి, తన నైతిక ధర్మశాస్త్రాన్ని తెలుసుకోవడమే ఏకైక మార్గం[10]

జాన్ వెస్లీ నుండి[12]

పాపిని చంపడమే, ధర్మశాస్త్రం యొక్క మొదటి ఉపయోగం; అంటే అతను నమ్మిన జీవాన్ని, బలాన్ని నాశనం చేస్తుంది మరియు అతను మరణపు శిక్షక్రింద మాత్రమే కాదు కానీ దేవుని విషయమై చనిపోయి, ఆత్మీయ జీవితం లేకుండా, తన పాపముల చేతను, అపరాధములచేతను చచ్చిన స్థితిలో (ఎఫెసీయులకు 2:1) ఉన్నాడని ఒప్పింపజేస్తుంది. తాను జీవించునట్లు జీవం నొద్దకు, క్రీస్తునొద్దకు తీసుకొని రావడం రెండవ ఉపయోగం.

దేవుని కృపను గూర్చిన ఈ ఆశీర్వాదకరమైన సాధనాన్ని గురించి (ధర్మశాస్త్రం) తేలిగ్గా ఆలోచించకూడదు లేదా మాట్లాడకూడదు. దానికి బదులుగా, అది ఎవరి యొద్ద నుండి వచ్చిందో, ఎవరి యొద్దకు నడిపిస్తుందో వారి కొరకు దానిని ప్రేమించండి, దానికి విలువనివ్వండి.[13]

► బోధకులు, పాపాన్ని తీవ్రంగా పరిగణించని వ్యక్తులతో కేవలం దేవుని ప్రేమను గురించి, క్షమాపణను గురించి మాట్లాడినట్లయితే ఎలాంటి సమస్యలు తలెత్తుతాయి?

(1) పాతనిబంధన ఆచార, పౌర నియమాలు ఇప్పటికీ ప్రాముఖ్యం అని చెప్పడానికి రెండు కారణాలను రాయండి.

(2) ధర్మశాస్త్ర విషయమై మరణించడం అంటే అర్థం ఏమిటి?

(3) శరీరంలో అనే మాట యొక్క రెండు ఉపయోగాలు ఏమిటి?

(4) ధర్మశాస్త్రం, పాపాన్ని మరింత చెడ్డదిగా ఎలా చేస్తుంది?

(5) సౌవార్తీకరణకు ధర్మశాస్త్రం ఎందుకు ప్రయోజనకరంగా ఉంటుంది?

ఈ పాఠంలో పేర్కొన్నవి కాకుండా పాత నిబంధన నియమాలకు ఉదాహరణలను ఒక పేజీలో రాయండి. అవి ఆచార, పౌర లేదా నైతికమైనవా అనే విషయాన్ని వివరించండి; నేడు క్రైస్తవులు వాటిని ఎలా అన్వయించుకోవాలో వివరించండి.