Lesson 6: ਵਿਆਹ ਲਈ ਤਿਆਰੀ

ਇਸ ਪਾਠ ਦੇ ਅੰਤ ਵਿੱਚ, ਵਿਦਿਆਰਥੀ ਹੇਠਾਂ ਦੱਸੇ ਕੰਮ ਕਰਨ ਦੇ ਯੋਗ ਹੋਣੇ ਚਾਹੀਦੇ ਹਨ:

(1) ਇੱਕ ਜੀਵਨ ਸਾਥੀ ਦੀ ਸਮਝਦਾਰੀ ਨਾਲ ਚੋਣ ਕਰਨ ਦੇ ਮਹੱਤਵ ਨੂੰ ਜਾਣਨਾ।

(2) ਬਾਈਬਲ ਦੀਆਂ ਤਰਜੀਹਾਂ ਅਤੇ ਸਿਧਾਂਤਾਂ ਦੇ ਅਧਾਰ ’ਤੇ ਉਸ ਵਿਅਕਤੀ ਦੀ ਕਿਸਮ ਦੀਆ ਵਿਆਖਿਆ ਕਰਨਾ ਜੋ ਇੱਕ ਵਿਸ਼ਵਾਸੀ ਦਾ ਜੀਵਨ ਸਾਥੀ ਬਣਨ ਦੇ ਯੋਗ ਹੈ।

(3) ਵਿਆਹ ਤੋਂ ਪਹਿਲਾਂ ਰਿਸ਼ਤਿਆਂ ਵਿੱਚ ਮਾਪਿਆਂ ਦੀ ਸ਼ਮੂਲੀਅਤ ਬਾਰੇ ਬਾਈਬਲ ਦੇ ਸਿਧਾਂਤਾਂ ਨੂੰ ਲਾਗੂ ਕਰਨਾ।

(4) ਵਿਆਹ ਤੋਂ ਪਹਿਲਾਂ ਦੋਸਤੀਆਂ ਵਿੱਚ ਸਮਝਦਾਰੀ ਦੇ ਫੈਸਲੇ ਲੈਣਾ।

ਪ੍ਰੀਤੀ ਭਾਰਤ ਵਿੱਚ ਇੱਕ ਮਸੀਹੀ ਪਰਿਵਾਰ ਦੇ ਵਿੱਚ ਜੰਮੀ-ਪਲੀ ਹੋਈ ਸੀ। ਇੱਕ ਦਿਨ ਉਸ ਦੇ ਪਰਿਵਾਰ ਨੇ ਉਸ ਨੂੰ ਇੱਕ ਜਵਾਨ ਪ੍ਰਚਾਰਕ ਸੰਜੇ ਬਾਰੇ ਦੱਸਿਆ ਜੋ ਵਿਆਹ ਕਰਾਉਣਾ ਚਾਹੁੰਦਾ ਸੀ। ਉਨ੍ਹਾਂ ਨੇ ਉਸ ਬਾਰੇ ਸੰਜੇ ਦੇ ਨਾਲ ਵੀ ਗੱਲ ਕੀਤੀ। ਪ੍ਰੀਤੀ ਨੇ ਆਖਿਆ ਕਿ ਉਹ ਉਸ ਨੂੰ ਮਿਲਣਾ ਨਹੀਂ ਚਾਹੁੰਦੀ ਸੀ। ਇੱਕ ਦਿਨ ਉਹ ਸ਼ਾਮ ਨੂੰ ਘਰ ਆਈ ਅਤੇ ਉਸ ਨੇ ਵੇਖਿਆ ਕਿ ਸੰਜੇ ਉਸ ਨੂੰ ਮਿਲਣ ਲਈ ਕਈ ਘੰਟਿਆਂ ਤੋਂ ਉਡੀਕ ਕਰ ਰਿਹਾ ਸੀ। ਉਹ ਉਸ ਨੂੰ ਵੇਖ ਕੇ ਖੁਸ਼ ਨਹੀਂ ਹੋਈ, ਪਰ ਉਹ ਬੈਠ ਗਈ ਤਾਂ ਕਿ ਸੰਜੇ ਉਸ ਨਾਲ ਗੱਲ ਕਰ ਸਕੇ। ਉਸ ਨੇ ਆਖਿਆ, “ਮੈਂ ਬਾਈਬਲ ਇੰਸਟੀਟਿਊਟ ਦੇ ਵਿੱਚ ਪੜ੍ਹਾਉਂਦਾ ਹਾਂ। ਮੇਰੀ ਤਨਖਾਹ ਜ਼ਿਆਦਾ ਨਹੀਂ ਹੈ। ਮੈਂ ਖੁਸ਼ ਖਬਰੀ ਦਾ ਪ੍ਰਚਾਰ ਕਰਨ ਲਈ ਮੁਸ਼ਕਲ ਸਥਾਨਾਂ ਦੀ ਯਾਤਰਾ ਵੀ ਕਰਦਾ ਹਾਂ, ਅਤੇ ਕਈ ਵਾਰ ਮੈਂ ਬਾਹਰ ਜ਼ਮੀਨ ਉੱਤੇ ਸੌਂਦਾ ਹਾਂ। ਕੀ ਤੂੰ ਮੇਰੇ ਨਾਲ ਦੁੱਖ ਉਠਾਉਣ ਲਈ ਤਿਆਰ ਹੈਂ?” ਜਦੋਂ ਉਸ ਨੇ ਇਹ ਆਖਿਆ ਤਾਂ ਪ੍ਰੀਤੀ ਰੋਣ ਲੱਗੀ ਕਿਉਂਕਿ ਉਸ ਨੂੰ ਮਹਿਸੂਸ ਹੋਇਆ ਕਿ ਪਰਮੇਸ਼ੁਰ ਉਸ ਨੂੰ ਦੱਸ ਰਿਹਾ ਸੀ ਕਿ ਇਹੋ ਉਹ ਆਦਮੀ ਹੈ ਜਿਸ ਨਾਲ ਉਸ ਨੂੰ ਵਿਆਹ ਕਰਾਉਣਾ ਚਾਹੀਦਾ ਹੈ। ਉਸ ਗੱਲਬਾਤ ਤੋਂ ਬਾਅਦ, ਵਿਆਹ ਤਕ ਉਹ ਇੱਕ ਦੂਸਰੇ ਨੂੰ ਘੱਟ ਹੀ ਮਿਲੇ, ਅਤੇ ਕਦੇ ਵੀ ਇਕੱਲੇ ਨਹੀਂ ਮਿਲੇ। ਹੁਣ ਉਹ ਸੇਵਕਾਈ ਦੇ ਵਿੱਚ ਕਈ ਸਾਲਾਂ ਦੀ ਸੇਵਾ ਕਰ ਚੁੱਕੇ ਹਨ।

ਸਾਵਧਾਨੀ ਨਾਲ ਚੋਣ ਕਰੋ!

ਯਿਸੂ ਨੇ ਆਖਿਆ ਕਿ ਵਿਆਹ ਪਰਮੇਸ਼ੁਰ ਦੀ ਬਣਤਰ ਦੇ ਅਨੁਸਾਰ ਜੀਵਨ ਭਰ ਦਾ ਸਮਰਪਣ ਹੈ (ਮੱਤੀ 19:6-8)। ਤੁਸੀਂ ਕਿਸੇ ਨਾਲ ਹੁਣ ਥੋੜ੍ਹੇ ਸਮੇਂ ਦੇ ਲਈ ਵਿਆਹ ਨਹੀਂ ਕਰ ਰਹੇ ਹੋ। ਤੁਸੀਂ ਵਿਆਹ ਦੁਆਰਾ ਕਿਸੇ ਨੂੰ ਤਦ ਤਕ ਲਈ ਆਪਣਾ ਜੀਵਨ ਸਾਥੀ ਬਣਾ ਰਹੇ ਜਦੋਂ ਤਕ ਤੁਹਾਡੇ ਵਿੱਚੋਂ ਕੋਈ ਇੱਕ ਮਰ ਨਹੀਂ ਜਾਂਦਾ (ਰੋਮੀਆਂ 7:2)। ਸਮਝਦਾਰੀ ਨਾਲ ਚੋਣ ਕਰੋ!

ਤੁਸੀਂ ਕੇਵਲ ਚੰਗੇ ਅਤੇ ਅਨੰਦ ਭਰੇ ਸਮਿਆਂ ਦੇ ਵਿੱਚ ਹੀ ਸਾਂਝੀ ਨਹੀਂ ਹੋਵੋਗੇ। ਤੁਸੀਂ ਮੁਸ਼ਕਲਾਂ, ਪਰੇਸ਼ਾਨੀਆਂ, ਸੰਕਟਾਂ, ਅਤੇ ਜੀਵਨ ਦੀਆਂ ਬਿਪਤਾਵਾਂ ਦੇ ਵਿੱਚ ਵੀ ਸਾਂਝੀ ਹੋਵੋਗੇ। ਤੁਹਾਨੂੰ ਨਹੀਂ ਪਤਾ ਕਿ ਤੁਸੀਂ ਕਿਸ ਪ੍ਰਕਾਰ ਦੇ ਦੁੱਖ ਦਾ ਸਾਹਮਣਾ ਕਰੋਗੇ। ਇੱਕ ਚੰਗੇ ਅਤੇ ਈਸ਼ੁਰੀ ਜੀਵਨ ਸਾਥੀ ਨਾਲ ਵਿਆਹੇ ਹੋਣ ਕਾਰਣ ਮੁਸ਼ਕਲ ਸਮਿਆਂ ਵਿੱਚ ਬਹੁਤ ਅਸੀਸਾਂ ਮਿਲਦੀਆਂ ਹਨ। ਪਰ ਬੁਰੇ ਸਮੇਂ ਉਦੋਂ ਬਦਤਰ ਹੋ ਜਾਂਦੇ ਹਨ ਜਦੋਂ ਤੁਹਾਡਾ ਜੀਵਨ ਸਾਥੀ ਪ੍ਰਭੂ ਵਿੱਚ ਮਜ਼ਬੂਤ ਨਹੀਂ ਹੈ। ਤੁਸੀਂ ਆਪਣੇ ਬਾਕੀ ਦੇ ਜੀਵਨ ਲਈ ਕਿਸੇ ਨਾਲ ਵਿਆਹ ਕਰ ਰਹੇ ਹੋ – ਸਾਰੇ ਹਾਲਾਤਾਂ ਦੇ ਲਈ। ਇੱਕ ਜੀਵਨ ਸਾਥੀ ਦੀ ਚੋਣ ਸਾਵਧਾਨੀ ਦੇ ਨਾਲ ਕਰੋ!

[1]ਤੁਸੀਂ ਜਿਸ ਨਾਲ ਵਿਆਹ ਕਰ ਰਹੇ ਹੋ ਉਸ ਨਾਲ ਤੁਸੀਂ ਪਰਿਵਾਰ ਨੂੰ ਵਧਾਉਣਾ ਹੈ। ਤੁਸੀਂ ਆਪਣੇ ਬੱਚਿਆਂ ਲਈ ਮਾਤਾ ਜਾਂ ਪਿਤਾ ਦੀ ਚੋਣ ਕਰ ਰਹੇ ਹੋ ਅਤੇ ਆਪਣੇ ਵੰਸ਼ਜਾਂ ਦੇ ਲਈ ਦਾਦਾ ਜਾਂ ਦਾਦੀ ਦੀ ਚੋਣ ਕਰ ਰਹੇ ਹੋ। ਤੁਸੀਂ ਉਸ ਦੀ ਚੋਣ ਕਰ ਰਹੇ ਹੋ ਜਿਸ ਦਾ ਆਤਮਿਕ ਜੀਵਨ ਤੁਹਾਡੇ ਬੱਚਿਆਂ ਦੇ ਆਤਮਿਕ ਜੀਵਨ ਉੱਤੇ ਵੱਡਾ ਪ੍ਰਭਾਵ ਪਾਵੇਗਾ। ਤੁਸੀਂ ਉਸ ਦੀ ਚੋਣ ਕਰ ਰਹੇ ਹੋ ਜਿਸ ਦੇ ਚਰਿੱਤਰ, ਆਦਤਾਂ ਅਤੇ ਜਿਸ ਦੇ ਵਿਹਾਰਾਂ ਦੀ ਤੁਹਾਡੇ ਬੱਚੇ ਨਕਲ ਕਰਨਗੇ (ਅਫ਼ਸੀਆਂ 5:1)। ਤੁਸੀਂ ਜਿਸ ਦੀ ਚੋਣ ਕਰ ਰਹੇ ਹੋ ਉਹ ਮਿਸਾਲ ਅਤੇ ਬੋਲਣ ਦੇ ਦੁਆਰਾ ਤੁਹਾਡੇ ਬੱਚਿਆਂ ਨੂੰ ਸਿਖਲਾਈ ਦੇਵੇਗਾ (ਕਹਾਉਤਾਂ 23:26)। ਕਿਸੇ ਅਜਿਹੇ ਦੀ ਚੋਣ ਕਰੋ ਜੋ ਤੁਹਾਡੇ ਬੱਚਿਆਂ ਦਾ ਪਾਲਣ-ਪੋਸ਼ਣ ਕਰੇਗਾ ਅਤੇ ਉਨ੍ਹਾਂ ਨੂੰ ਪਿਆਰ ਕਰੇਗਾ, ਜੋ ਉਨ੍ਹਾਂ ਦੀ ਅਗਵਾਈ ਕਰੇਗਾ ਅਤੇ ਚੌਕਸੀ ਅਤੇ ਪਿਆਰ ਨਾਲ ਉਨ੍ਹਾਂ ਨੂੰ ਦਿਲੋਂ ਅਨੁਸ਼ਾਸ਼ਿਤ ਕਰੇਗਾ। ਤੁਸੀਂ ਉਸ ਦੀ ਚੋਣ ਕਰ ਰਹੇ ਹੋ ਜੋ ਪੀੜ੍ਹੀਆਂ ਨੂੰ ਪ੍ਰਭਾਵਿਤ ਕਰੇਗਾ – ਭਲਾਈ ਦੇ ਲਈ ਜਾਂ ਨੁਕਸਾਨ ਦੇ ਲਈ। ਸਮਝਦਾਰੀ ਦੇ ਨਾਲ ਚੋਣ ਕਰੋ!

► ਵਿਦਿਆਰਥੀਆਂ ਨੂੰ ਸਮੂਹ ਲਈ ਕਹਾਉਤਾਂ 14:1, ਕਹਾਉਤਾਂ 24:3-4, ਅਤੇ ਕਹਾਉਤਾਂ 31:10-12, 30 ਨੂੰ ਪੜ੍ਹਨਾ ਚਾਹੀਦਾ ਹੈ।

ਜੀਵਨ ਸਾਥੀ ਦੀ ਚੋਣ ਕਰਨਾ ਤੁਹਾਡਾ ਦੂਸਰਾ ਸਭ ਤੋਂ ਮਹੱਤਵਪੂਰਣ ਫੈਸਲਾ ਹੈ ਜੋ ਤੁਸੀਂ ਕਦੇ ਲਵੋਗੇ; ਪਹਿਲਾ ਫੈਸਲਾ ਯਿਸੂ ਨੂੰ ਆਪਣਾ ਪ੍ਰਭੂ ਅਤੇ ਮੁਕਤੀਦਾਤਾ ਮੰਨਣ ਦਾ ਫੈਸਲਾ ਹੈ। ਤੁਹਾਡੀ ਚੋਣ ਤੁਹਾਡੇ ਜੀਵਨ ਨੂੰ ਬਦਲ ਦੇਵੇਗੀ, ਪਰ ਇਹ ਹੋਰ ਬਹੁਤ ਸਾਰੇ ਲੋਕਾਂ ਨੂੰ ਵੀ ਪ੍ਰਭਾਵਿਤ ਕਰੇਗੀ। ਸਮਝਦਾਰੀ ਨਾਲ ਕੀਤੀ ਗਈ ਇੱਕ ਚੋਣ ਤੁਹਾਨੂੰ ਅਤੇ ਹੋਰ ਬਹੁਤ ਸਾਰੇ ਲੋਕਾਂ ਨੂੰ ਅਸੀਸ ਦੇਵੇਗੀ। ਮੂਰਖਤਾ ਭਰੀ ਇੱਕ ਚੋਣ ਤੁਹਾਨੂੰ ਅਤੇ ਹੋਰ ਬਹੁਤ ਸਾਰੇ ਲੋਕਾਂ ਨੂੰ ਨੁਕਸਾਨ ਪਹੁੰਚਾਵੇਗੀ। ਪ੍ਰਾਰਥਨਾ ਦੇ ਨਾਲ ਚੋਣ ਕਰੋ!

ਸੰਸਾਰ ਦੇ ਵਿੱਚ ਕੋਈ ਵੀ ਸਿੱਧ ਨਹੀਂ ਹੈ। ਤੁਹਾਡੀਆਂ ਆਪਣੀਆਂ ਸਮੱਸਿਆਵਾਂ, ਕਮਜ਼ੋਰੀਆਂ, ਅਤੇ ਅਸਫਲਤਾਵਾਂ ਹਨ। ਤੁਹਾਡਾ ਜੀਵਨ ਸਾਥੀ ਵੀ ਸਿੱਧ ਨਹੀਂ ਹੋਵੇਗਾ ਅਤੇ ਜੀਵਨ ਭਰ ਅਸਿੱਧ ਰਹੇਗਾ। ਇਸ ਲਈ ਇੱਕ ਸਿੱਧ ਜੀਵਨ ਸਾਥੀ ਦੀ ਭਾਲ ਨਾ ਕਰੋ। ਇਸ ਦੇ ਬਜਾਏ, ਅਜਿਹੇ ਜੀਵਨ ਸਾਥੀ ਦੀ ਭਾਲ ਕਰੋ ਜੋ ਬਿਨਾਂ ਬਿਨਾਂ ਸੰਕੋਚ ਪਰਮੇਸ਼ੁਰ ਨੂੰ ਪਿਆਰ ਕਰਦਾ ਹੋਵੇ। ਕਿਸੇ ਅਜਿਹੇ ਵਿਅਕਤੀ ਦੀ ਭਾਲ ਕਰੋ ਜੋ ਐਨਾ ਹਲੀਮ ਹੈ ਕਿ ਉਹ ਆਪਣੀਆਂ ਗਲਤੀਆਂ ਅਤੇ ਕਮੀਆਂ ਨੂੰ ਮੰਨ ਸਕੇ ਅਤੇ ਸੁਧਾਰ ਕਰ ਸਕੇ। ਅਜਿਹਾ ਜੀਵਨ ਸਾਥੀ ਤੁਹਾਡੇ ਲਈ ਇੱਕ ਬਰਕਤ ਹੋਵੇਗਾ, ਅਤੇ ਤੁਸੀਂ ਕਮਜ਼ੋਰੀਆਂ ਦੇ ਖੇਤਰ ਵਿੱਚ ਇੱਕ ਦੂਸਰੇ ਦਾ ਸਾਥ ਦੇ ਸਕਦੇ ਹੋ ਅਤੇ ਇੱਕ ਦੂਸਰੇ ਦੀ ਮਦਦ ਕਰ ਸਕਦੇ ਹੋ।

► ਵਿਦਿਆਰਥੀਆਂ ਨੂੰ ਸਮੂਹ ਲਈ ਕਹਾਉਤਾਂ 11:14, ਕਹਾਉਤਾਂ 12:15, ਕਹਾਉਤਾਂ 13:18, ਅਤੇ ਕਹਾਉਤਾਂ 23:22 ਨੂੰ ਪੜ੍ਹਨਾ ਚਾਹੀਦਾ ਹੈ।

ਸਮਝਦਾਰੀ ਦੇ ਨਾਲ ਚੁਣੋ। ਜੀਵਨ ਭਰ ਲਈ ਚੁਣੋ। ਈਸ਼ੁਰੀ ਲੋਕਾਂ ਅਤੇ ਆਪਣੇ ਮਾਪਿਆਂ ਤੋਂ ਸਲਾਹ ਲਵੋ। ਉਨ੍ਹਾਂ ਦੀਆਂ ਚੇਤਾਵਨੀਆਂ ਨੂੰ ਸੁਣੋ। ਆਪਣੀਆਂ ਖੁਦ ਦੀਆਂ ਭਾਵਨਾਵਾਂ ਨੂੰ ਨਾ ਸੁਣੋ। ਇਹ ਚੋਣ ਕਰਨਾ ਤੁਹਾਡੇ ਲਈ ਬਹੁਤ ਜ਼ਿਆਦਾ ਮਹੱਤਵਪੂਰਣ ਹੈ, ਇਸ ਲਈ ਲਾਪਰਵਾਹ ਨਾ ਬਣੋ।

ਇੱਕ ਅਵਿਸ਼ਵਾਸੀ ਨਾਲ ਵਿਆਹ ਨਾ ਕਰੋ

ਇੱਕ ਗੱਲ ਜੋ ਪਰਮੇਸ਼ੁਰ ਦੇ ਲਈ ਬਹੁਤ ਮਹੱਤਵਪੂਰਣ ਹੈ, ਉਹ ਇਹ ਹੈ ਕਿ ਲੋਕ ਸਾਥੀ ਵਿਸ਼ਵਾਸੀਆਂ ਦੇ ਨਾਲ ਹੀ ਵਿਆਹ ਕਰਨ। ਇਸ ਦਾ ਕਾਰਣ ਹੈ ਕਿ ਪਰਮੇਸ਼ੁਰ ਦੇ ਨਾਲ ਰਿਸ਼ਤਾ ਸਾਰੇ ਜੀਵਨ ਅਤੇ ਸਦੀਪਕਤਾ ਦੇ ਵਿੱਚ ਸਭ ਤੋਂ ਜ਼ਿਆਦਾ ਮਹੱਤਵਪੂਰਣ ਹੈ। ਵਿਆਹ ਮਨੁੱਖੀ ਰਿਸ਼ਤਿਆਂ ਵਿੱਚੋਂ ਸਭ ਤੋਂ ਕਰੀਬੀ ਰਿਸ਼ਤਾ ਹੈ, ਸੋ ਇਹ ਇੱਕ ਵਿਅਕਤੀ ਦੇ ਪਰਮੇਸ਼ੁਰ ਨਾਲ ਰਿਸ਼ਤੇ ਨੂੰ ਪ੍ਰਭਾਵਿਤ ਕਰਦਾ ਹੈ। ਜਦੋਂ ਇੱਕ ਵਿਸ਼ਵਾਸੀ ਦਾ ਜੀਵਨ ਸਾਥੀ ਅਵਿਸ਼ਵਾਸੀ ਹੁੰਦਾ ਹੈ ਤਦ ਉਸ ਵਿਸ਼ਵਾਸੀ ਲਈ ਪਰਮੇਸ਼ੁਰ ਦੇ ਨਾਲ ਨੇੜਤਾ ਅਤੇ ਚੌਕਸੀ ਨਾਲ ਚੱਲਣ ਨੂੰ ਬਣਾਈ ਰੱਖਣਾ ਹੋਰ ਮੁਸ਼ਕਲ ਹੋ ਜਾਂਦਾ ਹੈ।

ਇਸ ਤੋਂ ਅੱਗੇ, ਮਾਤਾ ਜਾਂ ਪਿਤਾ ਦਾ ਅਵਿਸ਼ਵਾਸ ਬੱਚਿਆਂ ਨੂੰ ਮਸੀਹ ਦੇ ਵਿਰੋਧ ਵਿੱਚ ਜਾਣ ਲਈ ਪ੍ਰਭਾਵਿਤ ਕਰਦਾ ਹੈ। ਜਿਨ੍ਹਾਂ ਪਰਿਵਾਰਾਂ ਦੇ ਵਿੱਚ ਮਾਤਾ ਜਾਂ ਪਿਤਾ ਅਵਿਸ਼ਵਾਸੀ ਹੁੰਦੇ ਹਨ, ਉਨ੍ਹਾਂ ਪਰਿਵਾਰਾਂ ਵਿੱਚ ਇਹ ਘੱਟ ਹੀ ਹੁੰਦਾ ਹੈ ਕਿ ਸਾਰੇ ਬੱਚੇ ਪਰਮੇਸ਼ੁਰ ਦੀ ਸੇਵਾ ਕਰਨ। ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਅਸੀਂ ਉਸ ਦੀ ਸੇਵਾ ਕਰੀਏ, ਅਤੇ ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਅਸੀਂ ਆਪਣੇ ਬੱਚਿਆਂ ਦੀ ਅਜਿਹੀ ਪਰਵਰਿਸ਼ ਕਰੀਏ ਤਾਂ ਜੋ ਉਹ ਉਸ ਦੀ ਸੇਵਾ ਕਰਨ। (ਉਤਪਤ 18:19; ਬਿਵਸਥਾ ਸਾਰ 6:2, 7; ਮਲਾਕੀ 2:15)।

ਪੁਰਾਣੇ ਨੇਮ ਵਿੱਚ, ਇਸਰਾਏਲੀਆਂ ਨੂੰ ਵਿਸ਼ਵਾਸ ਦੇ ਪਰਿਵਾਰ ਤੋਂ ਬਾਹਰ ਕਿਸੇ ਨਾਲ ਵਿਆਹ ਕਰਾਉਣ ਦੀ ਅਨੁਮਤੀ ਨਹੀਂ ਸੀ।[2] ਪਰਮੇਸ਼ੁਰ ਜਾਣਦਾ ਸੀ ਕਿ ਅਵਿਸ਼ਵਾਸੀਆਂ ਦੇ ਨਾਲ ਵਿਆਹ ਕਰਨਾ ਲੋਕਾਂ ਨੂੰ ਹੋਰ ਦੇਵਤਿਆਂ ਦੀ ਪੂਜਾ ਕਰਨ ਵੱਲ ਲੈ ਜਾਵੇਗਾ ਅਤੇ ਇੱਕੋ ਸੱਚੇ ਪਰਮੇਸ਼ੁਰ ਦੇ ਨਾਲ ਉਨ੍ਹਾਂ ਦੇ ਰਿਸ਼ਤੇ ਨੂੰ ਬਰਬਾਦ ਕਰ ਦੇਵੇਗਾ! ਪੁਰਾਣਾ ਨੇਮ ਸਾਨੂੰ ਪੂਰੀ ਤਰ੍ਹਾਂ ਉਹੋ ਵਿਖਾਉਂਦਾ ਹੈ ਜੋ ਇਸਰਾਏਲ ਦੇ ਵਿੱਚ ਹੋਇਆ ਸੀ।[3]

ਅੱਜ ਵੀ, ਵਿਸ਼ਵਾਸੀਆਂ ਨੂੰ ਵਿਸ਼ਵਾਸੀਆਂ ਦੇ ਨਾਲ ਹੀ ਵਿਆਹ ਕਰਨਾ ਚਾਹੀਦਾ ਹੈ। ਇਸ ਬਾਰੇ ਸਮਝੌਤਾ ਨਾ ਕਰੋ। ਇੱਕ ਅਵਿਸ਼ਵਾਸੀ ਦੇ ਨਾਲ ਇੱਕ ਰੋਮਾਂਟਿਕ ਰਿਸ਼ਤਾ ਨਾ ਰੱਖੋ।

► ਵਿਦਿਆਰਥੀਆਂ ਨੂੰ ਸਮੂਹ ਲਈ 2 ਕੁਰਿੰਥੀਆਂ 6:14-18 ਅਤੇ 1 ਕੁਰਿੰਥੀਆਂ 7:39 ਨੂੰ ਪੜ੍ਹਨਾ ਚਾਹੀਦਾ ਹੈ।

ਜਦੋਂ ਤੁਹਾਡਾ ਜੀਵਨ ਸਾਥੀ ਵਿਸ਼ਵਾਸੀ ਨਹੀਂ ਹੈ

ਪਰਮੇਸ਼ੁਰ ਨਹੀਂ ਚਾਹੁੰਦਾ ਕਿ ਇੱਕ ਅਣਵਿਆਹਿਆ ਵਿਸ਼ਵਾਸੀ ਇੱਕ ਅਵਿਸ਼ਵਾਸੀ ਦੇ ਨਾਲ ਵਿਆਹ ਕਰੇ। ਇਹ ਪੱਕਾ ਹੈ। ਪਰ ਜਦੋਂ ਇੱਕ ਅਵਿਸ਼ਵਾਸੀ ਪਰਿਵਾਰ ਵਿੱਚੋਂ ਇੱਕ ਜੀਵਨ ਸਾਥੀ ਮੁਕਤੀ ਲਈ ਮਸੀਹ ਦੇ ਕੋਲ ਆਉਂਦਾ ਹੈ, ਉਸ ਨੂੰ ਆਪਣੇ ਅਵਿਸ਼ਵਾਸੀ ਜੀਵਨ ਸਾਥੀ ਦੇ ਨਾਲ ਆਪਣਾ ਵਿਆਹੁਤਾ ਰਿਸ਼ਤਾ ਬਣਾਈ ਰੱਖਣਾ ਚਾਹੀਦਾ ਹੈ, ਜੇ ਅਵਿਸ਼ਵਾਸੀ ਜੀਵਨ ਸਾਥੀ ਉਸ ਨਾਲ ਰਹਿਣ ਤੋਂ ਇਨਕਾਰ ਨਹੀਂ ਕਰਦਾ (1 ਕੁਰਿੰਥੀਆਂ 7:12-16)। ਕੁਝ ਮਸਲਿਆਂ ਵਿੱਚ, ਇੱਕ ਅਵਿਸ਼ਵਾਸੀ ਜੀਵਨ ਸਾਥੀ ਆਪਣੇ ਮਸੀਹੀ ਜੀਵਨ ਸਾਥੀ ਦੇ ਵਿਸ਼ਵਾਸ ਦੇ ਕਾਰਣ ਮੁਕਤੀ ਲਈ ਜਿੱਤਿਆ ਜਾਂਦਾ ਹੈ (1 ਕੁਰਿੰਥੀਆਂ 7:14, 16; 1 ਪਤਰਸ 3:1-2)। ਪਰ ਮਸੀਹੀ ਕੁਆਰਿਆਂ ਨੂੰ ਕਿਸੇ ਅਜਿਹੇ ਨਾਲ ਵਿਆਹ ਕਰਾਉਣ ਬਾਰੇ ਸੋਚਣਾ ਵੀ ਨਹੀਂ ਚਾਹੀਦਾ ਜੋ ਵਿਸ਼ਵਾਸੀ ਨਹੀਂ ਹੈ।

ਸੰਭਾਵੀ ਜੀਵਨ ਸਾਥੀ ਵਿੱਚ ਕਿਹੜੇ ਗੁਣ ਵੇਖਣੇ ਚਾਹੀਦੇ ਹਨ

ਵਿਆਹ ਲਈ ਤਿਆਰੀ ਦੇ ਦੌਰਾਨ, ਲੋਕਾਂ ਨੂੰ ਚਰਿੱਤਰ ਦੇ ਉਨ੍ਹਾਂ ਗੁਣਾਂ ਨੂੰ ਵਿਕਸਤ ਕਰਨਾ ਚਾਹੀਦਾ ਹੈ ਜੋ ਉਨ੍ਹਾਂ ਦੀ ਇੱਕ ਚੰਗਾ ਜੀਵਨ ਸਾਥੀ ਬਣਨ ਵਿੱਚ ਮਦਦ ਕਰਨਗੇ। ਜਦੋਂ ਉਹ ਵਿਆਹ ਕਰਾਉਣ ਲਈ ਕਿਸੇ ਦੀ ਭਾਲ ਵਿੱਚ ਹਨ, ਉਨ੍ਹਾਂ ਨੂੰ ਕਿਸੇ ਅਜਿਹੇ ਦੀ ਭਾਲ ਕਰਨੀ ਚਾਹੀਦੀ ਹੈ ਜੋ ਚਰਿੱਤਰ ਦੇ ਇਨ੍ਹਾਂ ਗੁਣਾਂ ਵਿੱਚ ਹੀ ਵਧ ਰਿਹਾ ਹੋਵੇ।

[4]1. ਕਿਸੇ ਅਜਿਹੇ ਵਿਅਕਤੀ ਨਾਲ ਵਿਆਹ ਕਰੋ ਜਿਸ ਦਾ ਮਸੀਹ ਨਾਲ ਰਿਸ਼ਤਾ, ਤੁਹਾਡੇ ਮਸੀਹ ਨਾਲ ਰਿਸ਼ਤੇ ਵਿੱਚ ਤੁਹਾਨੂੰ ਉਤਸ਼ਾਹਿਤ ਕਰੇਗਾ ਅਤੇ ਤੁਹਾਡੇ ਆਤਮਿਕ ਵਾਧੇ ਦਾ ਕਾਰਣ ਬਣੇਗਾ (2 ਪਤਰਸ 1:5-9, 2 ਪਤਰਸ 3:18)।

2. ਕਿਸੇ ਅਜਿਹੇ ਨਾਲ ਵਿਆਹ ਕਰੋ ਜਿਸ ਦਾ ਚਰਿੱਤਰ ਚੰਗਾ ਹੈ। ਅਫ਼ਸੀਆਂ 5:33 ਪਤਨੀਆਂ ਨੂੰ ਹੁਕਮ ਦਿੰਦੀ ਹੈ ਕਿ ਉਹ ਆਪਣੇ ਪਤੀਆਂ ਦੇ ਚਰਿੱਤਰ ਦੀ ਪਰਵਾਹ ਕੀਤੇ ਬਿਨਾਂ ਉਨ੍ਹਾਂ ਦਾ ਆਦਰ ਕਰਨ, ਪਰ ਇਹ ਤਦ ਬਹੁਤ ਸੌਖਾ ਹੋ ਜਾਂਦਾ ਹੈ ਜਦੋਂ ਉਹ ਆਦਰ ਦੇ ਯੋਗ ਪੁਰਸ਼ਾਂ ਦੇ ਨਾਲ ਵਿਆਹੀਆਂ ਹੁੰਦੀਆਂ ਹਨ। ਚੰਗੇ ਚਰਿੱਤਰ ਵਿੱਚ ਇਸ ਤਰ੍ਹਾਂ ਦੇ ਵਿਹਾਰ ਸ਼ਾਮਲ ਹਨ ਜਿਵੇਂ ਕਿ ਮਾਫ਼ੀ ਦੇਣਾ, ਸੰਜਮ ਰੱਖਣਾ, ਹਲੀਮ ਹੋਣਾ, ਮਿਹਨਤੀ ਅਤੇ ਜ਼ਿੰਮੇਵਾਰ ਹੋਣਾ, ਅਤੇ ਇੱਕ ਸਿਖਾਉਣ ਯੋਗ ਆਤਮਾ ਦਾ ਹੋਣਾ। ਜਿਸ ਵਿਅਕਤੀ ਨਾਲ ਤੁਸੀਂ ਵਿਆਹ ਕਰਦੇ ਹੋਏ ਸਿੱਧ ਨਹੀਂ ਹੋਵੇਗਾ ਪਰ ਉਸ ਨੂੰ ਇਨ੍ਹਾਂ ਵਿਹਾਰਾਂ ਦੇ ਵਿੱਚ ਵਧਣਾ ਚਾਹੀਦਾ ਹੈ।

ਕਲੀਸਿਯਾ ਦੇ ਆਗੂਆਂ ਅਤੇ ਉਨ੍ਹਾਂ ਦੀਆਂ ਪਤਨੀਆਂ ਦੇ ਲਈ ਪਰਮੇਸ਼ੁਰ ਦੇ ਮਿਆਰ ਉੱਚੇ ਹਨ (1 ਤਿਮੋਥਿਉਸ 3:2-4, 8-9, 11-12; ਤੀਤੁਸ 1:6-8)। ਜੇ ਕਲੀਸਿਯਾ ਦਾ ਆਗੂ ਇੱਕ ਬੁਰੇ ਚਰਿੱਤਰ ਵਾਲੇ ਜੀਵਨ ਸਾਥੀ ਨਾਲ ਵਿਆਹਿਆ ਹੋਇਆ ਹੈ, ਤਾਂ ਸੇਵਕਾਈ ਦੇ ਵਿੱਚ ਵੱਡੀ ਰੁਕਾਵਟ ਆਵੇਗੀ।

3. ਅਜਿਹੇ ਵਿਅਕਤੀ ਨਾਲ ਵਿਆਹ ਕਰੋ ਜੋ ਸ਼ੁੱਧ ਅਤੇ ਚੰਗੇ ਵਿਹਾਰ ਲਈ ਆਪਣੀ ਸ਼ਾਖ ਨੂੰ ਬਣਾ ਰਿਹਾ ਹੈ (1 ਤਿਮੋਥਿਉਸ 2:9-10, 1 ਤਿਮੋਥਿਉਸ 3:7, 2 ਤਿਮੋਥਿਉਸ 2:19, ਤੀਤੁਸ 1:15, ਤੀਤੁਸ 2:4-5)।

4. ਅਜਿਹੇ ਵਿਅਕਤੀ ਨਾਲ ਵਿਆਹ ਕਰੋ ਜੋ ਬਾਈਬਲ ਦੇ ਅਨੁਸਾਰ ਸੋਚਣਾ ਸਿੱਖ ਰਿਹਾ ਹੈ (ਜ਼ਬੂਰ 119:66)। ਜਦੋਂ ਪਰਤਾਵੇ, ਡਰ, ਇੱਕ ਗਲਤ ਰਵੱਈਏ ਜਾਂ ਗਲਤ ਪ੍ਰੇਰਣਾ ਦੇ ਨਾਲ ਸਾਹਮਣਾ ਹੁੰਦਾ ਹੈ, ਤਾਂ ਉਹ ਪਰਮੇਸ਼ੁਰ ਦੇ ਵਚਨ ਨੂੰ ਯਾਦ ਰੱਖਣਾ, ਵਿਸ਼ਵਾਸ ਕਰਨਾ, ਅਤੇ ਵਚਨ ਦੀ ਪਾਲਣਾ ਕਰਨਾ ਸਿੱਖ ਰਹੇ ਹਨ (ਕਹਾਉਤਾਂ 4:4-6, ਯਹੋਸ਼ੁਆ 1:7-8)। ਜਦੋਂ ਲੋੜ, ਖਤਰੇ, ਬਿਪਤਾ, ਜਾਂ ਕਿਸੇ ਪ੍ਰਕਾਰ ਦੀ ਸਮੱਸਿਆ ਦੇ ਨਾਲ ਸਾਹਮਣਾ ਹੁੰਦਾ ਹੈ, ਤਾਂ ਉਹ ਪਰਮੇਸ਼ੁਰ ਉੱਤੇ ਕੇਂਦਰਿਤ ਰਹਿਣਾ ਸਿੱਖ ਰਹੇ ਹਨ ਅਤੇ ਉਸ ਮਦਦ ਨੂੰ ਉਸ ਦੇ ਵਚਨ ਵਿੱਚ ਪਾਉਂਦੇ ਹਨ ਜਿਸ ਦੀ ਉਨ੍ਹਾਂ ਨੂੰ ਲੋੜ ਹੈ (ਜ਼ਬੂਰ 119:50, 92, 114)।

5. ਅਜਿਹੇ ਵਿਅਕਤੀ ਨਾਲ ਵਿਆਹ ਕਰੋ ਜੋ ਤੁਹਾਡੇ ਬੱਚਿਆਂ ਲਈ ਚੰਗਾ ਪਿਤਾ ਬਣੇਗਾ ਜਾਂ ਚੰਗੀ ਮਾਂ ਬਣੇਗੀ: ਕੋਈ ਅਜਿਹਾ ਜੋ ਉਨ੍ਹਾਂ ਨੂੰ ਪਰਮੇਸ਼ੁਰ ਦੇ ਰਾਹ ਸਿਖਾਵੇਗਾ ਅਤੇ ਉਨ੍ਹਾਂ ਦੇ ਸਾਹਮਣੇ ਇਕਸਾਰ ਮਸੀਹੀ ਜੀਵਨ ਬਿਤਾਵੇਗਾ (ਕਹਾਉਤਾਂ 6:20-23, ਅਫ਼ਸੀਆਂ 6:4, 2 ਤਿਮੋਥਿਉਸ 1:5, 2 ਤਿਮੋਥਿਉਸ 3:14-15)।

6. ਅਜਿਹੇ ਵਿਅਕਤੀ ਨਾਲ ਵਿਆਹ ਕਰੋ ਜਿਸ ਨੇ ਈਸ਼ੁਰੀ ਮਿੱਤਰਾਂ ਅਤੇ ਗੁਰੂਆਂ ਤੋਂ ਪ੍ਰਭਾਵਿਤ ਹੋਣ ਦੀ ਚੋਣ ਕੀਤੀ ਹੈ (ਜ਼ਬੂਰ 119:63, 2 ਤਿਮੋਥਿਉਸ 2:22)।

7. ਅਜਿਹੇ ਵਿਅਕਤੀ ਨਾਲ ਵਿਆਹ ਕਰੋ ਜੋ ਅਧਿਕਾਰ ਦੇ ਅਧੀਨ ਹੈ। ਇੱਕ ਪੁਰਸ਼ ਅਜਿਹੀ ਪਤਨੀ ਨੂੰ ਭਾਲਣ ਲਈ ਸਮਝਦਾਰ ਹੈ ਜੋ ਉਸ ਦੇ ਅਧੀਨ ਰਹਿੰਦੀ ਹੈ (ਅਫ਼ਸੀਆਂ 5:22)। ਇਸੇ ਤਰ੍ਹਾਂ ਹੀ ਇੱਕ ਔਰਤ ਨੂੰ ਅਜਿਹੇ ਵਿਅਕਤੀ ਦੇ ਨਾਲ ਵਿਆਹ ਕਰਨਾ ਚਾਹੀਦਾ ਹੈ ਜੋ ਪਰਮੇਸ਼ੁਰ ਦੇ ਅਧੀਨ ਹੈ ਅਤੇ ਉਨ੍ਹਾਂ ਦੇ ਅਧੀਨ ਹੈ ਜਿਨ੍ਹਾਂ ਨੂੰ ਪਰਮੇਸ਼ੁਰ ਨੇ ਕਲੀਸਿਯਾ, ਉਸ ਦੀ ਨੌਕਰੀ, ਸਰਕਾਰ ਵਿੱਚ ਉਸ ਉੱਤੇ ਅਧਿਕਾਰੀ ਠਹਿਰਾਇਆ ਹੈ (ਰੋਮੀਆਂ 13:1, ਅਫ਼ਸੀਆਂ 6:5-8, ਇਬਰਾਨੀਆਂ 13:17, 1 ਪਤਰਸ 5:5)। ਜਦੋਂ ਉਸ ਦਾ ਪਤੀ ਪਰਮੇਸ਼ੁਰ ਦੇ ਅਧੀਨ ਹੁੰਦਾ ਹੈ, ਤਾਂ ਉਸ ਦੀ ਰੱਖਿਆ ਹੋਵੇਗੀ ਅਤੇ ਉਹ ਧੰਨ ਹੋਵੇਗੀ।

► ਚਰਿੱਤਰ ਦੇ ਉੱਪਰ ਦਿੱਤੇ ਗੁਣਾਂ ਵਿੱਚੋਂ, ਕਿਹੜਾ ਤੁਹਾਨੂੰ ਸਭ ਤੋਂ ਜ਼ਿਆਦਾ ਮਹੱਤਵਪੂਰਣ ਲੱਗਦਾ ਹੈ? ਕਿਹੜੀਆਂ ਉਦਾਹਰਣਾਂ ਤੁਸੀਂ ਵੇਖੀਆਂ ਹਨ ਜੋ ਚਰਿੱਤਰ ਦੇ ਇਨ੍ਹਾਂ ਗੁਣਾਂ ਦੇ ਮਹੱਤਵ ਨੂੰ ਵਿਖਾਉਂਦੀਆਂ ਹਨ?

ਬਹੁਤ ਸਾਰੇ ਸੱਭਿਆਚਾਰਾਂ ਵਿੱਚ ਇਹ ਆਮ ਗੱਲ ਹੈ ਕਿ ਮਾਪੇ ਆਪਣੇ ਬੱਚਿਆਂ ਦੇ ਵਿਆਹ ਰਚਾਉਂਦੇ ਹਨ। ਉਦਾਹਰਣ ਦੇ ਲਈ ਇੱਕ ਵੱਡੇ ਦੇਸ ਵਿੱਚ ਮਾਪੇ ਆਪਣੇ ਬੱਚੇ ਲਈ ਸੰਭਾਵੀ ਜੀਵਨ ਸਾਥੀ ਨੂੰ ਭਾਲਦੇ ਹਨ ਅਤੇ ਸੰਭਾਵੀ ਜੀਵਨ ਸਾਥੀ ਦੇ ਮਾਪਿਆਂ ਨਾਲ ਗੱਲ ਕਰਦੇ ਹਨ। ਆਮ ਤੌਰ ’ਤੇ, ਫਿਰ ਉਹ ਪੁੱਤਰ ਅਤੇ ਪੁੱਤਰੀ ਦੇ ਇੱਕ ਦੂਸਰੇ ਨਾਲ ਮਿਲਣ ਦਾ ਪ੍ਰਬੰਧ ਕਰਦੇ ਹਨ। ਜਵਾਨ ਲੋਕ ਇੱਕ ਵਾਰ, ਜਾਂ ਸ਼ਾਇਦ ਦੋ ਜਾਂ ਤਿੰਨ ਵਾਰ ਇੱਕ ਦੂਸਰੇ ਨੂੰ ਮਿਲ ਸਕਦੇ ਹਨ, ਵਿਆਹ ਕਰਨ ਦਾ ਫੈਸਲਾ ਲੈਣ ਤੋਂ ਪਹਿਲਾਂ। ਸ਼ਾਇਦ ਬੱਚਿਆਂ ਨੂੰ ਅਨੁਮਤੀ ਹੁੰਦੀ ਹੈ ਕਿ ਉਹ ਮਾਪਿਆਂ ਦੁਆਰਾ ਚੁਣੇ ਗਏ ਵਿਅਕਤੀ ਨਾਲ ਵਿਆਹ ਕਰਾਉਣ ਦੀ ਚੋਣ ਕਰ ਸਕਦੇ ਹਨ, ਪਰ ਉਨ੍ਹਾਂ ਨੂੰ ਇੱਕ ਦੂਸਰੇ ਨੂੰ ਚੰਗੀ ਤਰ੍ਹਾਂ ਜਾਣਨ ਦਾ ਸਮਾਂ ਨਹੀਂ ਮਿਲਦਾ।

ਇਨ੍ਹਾਂ ਸੱਭਿਆਚਾਰਾਂ ਵਿੱਚ ਮਸੀਹੀ ਮਾਪੇ ਜਦੋਂ ਆਪਣੇ ਬੱਚਿਆਂ ਦੇ ਲਈ ਜੀਵਨ ਸਾਥੀ ਦੀ ਖੋਜ ਕਰਦੇ ਹਨ, ਤਾਂ ਉਨ੍ਹਾਂ ਨੂੰ ਬਾਈਬਲ ਦੀਆਂ ਕਦਰਾਂ ਕੀਮਤਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਨੂੰ ਆਪਣੇ ਬੱਚਿਆਂ ਲਈ ਈਸ਼ੁਰੀ, ਸਮਝਦਾਰ, ਅਤੇ ਪਰਿਪੱਕ ਜੀਵਨ ਸਾਥੀਆਂ ਦੀ ਖੋਜ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਨੂੰ ਅਜਿਹੇ ਲੋਕਾਂ ਦੀ ਭਾਲ ਕਰਨੀ ਚਾਹੀਦੀ ਹੈ ਜੋ ਪਰਮੇਸ਼ੁਰ ਨੂੰ ਆਪਣੇ ਜੀਵਨਾਂ ਵਿੱਚ ਪਹਿਲਾ ਸਥਾਨ ਦਿੰਦੇ ਹਨ। ਇਹ ਗੱਲਾਂ ਕਿਸੇ ਦੀ ਪੜ੍ਹਾਈ, ਕਿੱਤੇ, ਸਮਾਜਿਕ ਰੁਤਬੇ, ਜਾਂ ਆਰਥਿਕ ਪੱਧਰ ਤੋਂ ਵਧਕੇ ਮਾਪਿਆਂ ਦੀ ਚੋਣ ਨੂੰ ਪ੍ਰਭਾਵਿਤ ਕਰਨੀਆਂ ਚਾਹੀਦੀਆਂ ਹਨ।

ਵੱਡੇ ਹੋ ਚੁੱਕੇ ਬੱਚਿਆਂ ਦੇ ਮਾਪਿਆਂ ਲਈ ਬੁੱਧੀ ਜੋ ਜੀਵਨ ਸਾਥੀਆਂ ਦੀ ਚੋਣ ਕਰ ਰਹੇ ਹਨ

ਕੁਝ ਸਮਾਜਾਂ ਅਤੇ ਸੱਭਿਆਚਾਰਾਂ ਦੇ ਵਿੱਚ, ਜਵਾਨ ਬਾਲਗਾਂ ਦੇ ਲਈ ਇਹ ਆਮ ਗੱਲ ਹੈ ਕਿ ਉਹ ਮਾਪਿਆਂ ਤੋਂ ਜ਼ਿਆਦਾ ਅਗਵਾਈ ਪ੍ਰਾਪਤ ਕੀਤੇ ਬਿਨਾਂ ਆਪਣੇ ਜੀਵਨ ਸਾਥੀਆਂ ਦੀ ਚੋਣ ਕਰਨ, ਇਨ੍ਹਾਂ ਵਿੱਚ ਯੂਰਪ ਅਤੇ ਉੱਤਰੀ ਅਮਰੀਕਾ ਸ਼ਾਮਲ ਹਨ।

ਇਨ੍ਹਾਂ ਸੱਭਿਆਚਾਰਾਂ ਦੇ ਵਿੱਚ ਮਸੀਹੀ ਮਾਪੇ ਸੋਚਦੇ ਹਨ ਕਿ ਉਨ੍ਹਾਂ ਨੂੰ ਆਪਣੇ ਵੱਡੇ ਹੋ ਚੁੱਕੇ ਅਤੇ ਜੀਵਨ ਸਾਥੀ ਦੀ ਭਾਲ ਕਰ ਰਹੇ ਬੱਚਿਆਂ ਨੂੰ ਪ੍ਰਭਾਵਿਤ ਨਹੀਂ ਕਰਨਾ ਚਾਹੀਦਾ ਜਾਂ ਉਹ ਸੋਚਦੇ ਹਨ ਕਿ ਪ੍ਰਭਾਵਿਤ ਨਹੀਂ ਕਰ ਸਕਦੇ। ਮਾਪੇ ਮਹਿਸੂਸ ਕਰਦੇ ਹੋਣਗੇ ਕਿ ਭਾਵੇਂ ਉਹ ਉਸ ਵਿਅਕਤੀ ਲਈ ਸਹਿਮਤ ਨਹੀਂ ਹਨ ਜਿਸ ਨਾਲ ਉਨ੍ਹਾਂ ਦਾ ਬੱਚਾ ਵਿਆਹ ਕਰਨ ਲਈ ਸੋਚ ਰਿਹਾ ਹੈ, ਪਰ ਫਿਰ ਵੀ ਉਨ੍ਹਾਂ ਨੂੰ ਕੋਈ ਇਤਰਾਜ਼ ਨਹੀਂ ਪਰਗਟ ਕਰਨਾ ਚਾਹੀਦਾ। ਉਨ੍ਹਾਂ ਨੂੰ ਡਰ ਹੋ ਸਕਦਾ ਹੈ ਕਿ ਅਲੋਚਨਾ ਕਰਨ ਦੇ ਕਾਰਣ ਭਵਿੱਖ ਵਿੱਚ ਉਨ੍ਹਾਂ ਦੇ ਆਪਣੇ ਬੱਚੇ ਨਾਲ ਜਾਂ ਨੂਹ/ਜਵਾਈ ਨਾਲ ਰਿਸ਼ਤਿਆਂ ਸੰਬੰਧੀ ਸਮੱਸਿਆਵਾਂ ਆ ਸਕਦੀਆਂ ਹਨ।

ਭਾਵੇਂ ਜਦੋਂ ਮਸੀਹੀ ਮਾਪੇ ਆਪਣੇ ਬੱਚਿਆਂ ਦੇ ਵਿਆਹ ਆਪ ਨਹੀਂ ਰਚਾਉਂਦੇ ਹਨ, ਪਰ ਫਿਰ ਵੀ ਉਨ੍ਹਾਂ ਨੂੰ ਚਾਹੀਦਾ ਹੈ ਕਿ ਜੀਵਨ ਸਾਥੀ ਦੀ ਚੋਣ ਕਰਨ ਵਿੱਚ ਆਪਣੇ ਬੱਚਿਆਂ ਨੂੰ ਪ੍ਰਭਾਵਿਤ ਕਰਨ। ਮਾਪਿਆਂ ਨੂੰ ਆਪਣੇ ਬੱਚਿਆਂ ਨਾਲ ਤਦ ਹੀ ਇਨ੍ਹਾਂ ਗੱਲਾਂ ਬਾਰੇ ਗੱਲ ਕਰਨੀ ਚਾਹੀਦੀ ਹੈ ਜਦੋਂ ਉਹ ਛੋਟੇ ਹੀ ਹੁੰਦੇ ਹਨ। ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਉਹ ਉਦੇਸ਼ਪੂਰਣ ਢੰਗ ਦੇ ਨਾਲ ਆਪਣੇ ਬੱਚਿਆਂ ਦੀ ਸੋਚ ਅਤੇ ਕਦਰਾਂ ਕੀਮਤਾਂ ਨੂੰ ਆਕਾਰ ਦੇਣ (ਬਿਵਸਥਾ ਸਾਰ 6:5-9)। ਮਾਂ ਜਾਂ ਪਿਓ ਹੋਣ ਦੇ ਨਾਤੇ ਤੁਸੀਂ ਇਹ ਕਿਵੇਂ ਕਰ ਸਕਦੇ ਹੋ?

1. ਆਪ ਇੱਕ ਧਰਮੀ ਜੀਵਨ ਸਾਥੀ ਅਤੇ ਮਾਂ/ਪਿਓ ਦੀ ਇੱਕ ਚੰਗੀ ਉਦਾਹਰਣ ਬਣੋ। ਜਦੋਂ ਤਕ ਤੁਸੀਂ ਆਪ ਆਪਣੇ ਜੀਵਨ ਵਿੱਚ ਪਰਮੇਸ਼ੁਰ ਦੇ ਸਿਧਾਂਤਾਂ ਦੀ ਪਾਲਣਾ ਨਹੀਂ ਕਰਦੇ, ਤਦ ਤਕ ਤੁਹਾਡੇ ਸ਼ਾਬਦਿਕ ਨਿਰਦੇਸ਼ ਦਾ ਤੁਹਾਡੇ ਬੱਚਿਆਂ ਲਈ ਕੁਝ ਵੀ ਮਤਲਬ ਨਹੀਂ ਹੋਵੇਗਾ। ਜੇ ਤੁਹਾਡੀ ਮਿਸਾਲ ਤੁਹਾਡੇ ਕਥਨਾਂ ਦੇ ਨਾਲ ਮੇਲ ਨਹੀਂ ਖਾਂਦੀ, ਤਾਂ ਤੁਹਾਡੇ ਬੱਚੇ ਤੁਹਾਡੇ ਸ਼ਬਦਾਂ ਦੇ ਬਜਾਏ ਤੁਹਾਡੀ ਮਿਸਾਲ ਨੂੰ ਸੁਣਨਗੇ।

2. ਜੀਵਨ ਦੇ ਉਦੇਸ਼ ਲਈ, ਵਿਆਹ ਦੇ ਉਦੇਸ਼ ਅਤੇ ਅਰਥ ਲਈ, ਅਤੇ ਇੱਕ ਜੀਵਨ ਸਾਥੀ ਵਿੱਚ ਕੀ ਵੇਖਣਾ ਹੈ ਇਸ ਲਈ ਪਰਮੇਸ਼ੁਰ ਦੇ ਮਿਆਰਾਂ ਉੱਤੇ ਜ਼ੋਰ ਦੇਵੋ (ਜ਼ਬੂਰ 34:11-12)। ਜਦੋਂ ਅਸੀਂ ਸੰਸਾਰ ਦੇ ਨਿਯਮਾਂ ਨੂੰ ਵੇਖਦੇ, ਸੁਣਦੇ, ਪੜ੍ਹਦੇ, ਜਾਂ ਤੱਕਦੇ ਹਾਂ, ਤਦ ਅਸੀਂ ਆਪਣੇ ਬੱਚਿਆਂ ਨੂੰ ਸਿਖਾਉਂਦੇ ਹਾਂ ਕਿ ਸੰਸਾਰ ਸਾਡੇ ਲਈ ਨਮੂਨਾ ਹੈ, ਨਾ ਕਿ ਪਰਮੇਸ਼ੁਰ ਦਾ ਵਚਨ ਸਾਡੇ ਲਈ ਇੱਕ ਨਮੂਨਾ ਹੈ। ਇਹ ਕਰਨ ਦੇ ਬਜਾਏ, ਸਾਨੂ ਜਿਹੜੇ ਲੋਕ ਪਰਮੇਸ਼ੁਰ ਦੀਆਂ ਚੰਗੀਆਂ ਯੋਜਨਾਵਾਂ ਦਾ ਅਨੁਸਰਣ ਕਰਦੇ ਹਨ ਉਨ੍ਹਾਂ ਵੱਲ ਧਿਆਨ ਖਿੱਚਣ ਦੇ ਦੁਆਰਾ ਆਪਣੇ ਬੱਚਿਆਂ ਦੇ ਵਿੱਚ ਧਰਮੀ ਇੱਛਾਵਾਂ ਨੂੰ ਪੈਦਾ ਕਰਨਾ ਚਾਹੀਦਾ ਹੈ। ਸਾਨੂੰ ਉਨ੍ਹਾਂ ਚੰਗੇ ਨਤੀਜਿਆਂ ਵੱਲ ਇਸ਼ਾਰਾ ਕਰਨਾ ਚਾਹੀਦਾ ਹੈ ਜਿਨ੍ਹਾਂ ਦਾ ਇਹ ਲੋਕ ਪਰਮੇਸ਼ੁਰ ਦੀ ਆਗਿਆਕਾਰੀ ਕਰਨ ਦੇ ਕਾਰਣ ਅਨੰਦ ਮਾਣਦੇ ਹਨ।

3. ਆਪਣੇ ਬੱਚਿਆਂ ਨੂੰ ਸਿਖਾਓ ਕਿ ਜਦੋਂ ਉਹ ਇੱਕ ਜੀਵਨ ਸਾਥੀ ਦੀ ਚੋਣ ਕਰਦੇ ਹਨ, ਤਾਂ ਉਹ ਯਾਦ ਰੱਖਣ ਕਿ ਚਰਿੱਤਰ ਕਿਸੇ ਵੀ ਹੋਰ ਚੀਜ਼ ਨਾਲੋਂ ਵਧੇਰੇ ਮਹੱਤਵ ਰੱਖਦਾ ਹੈ। ਜਦੋਂ ਤੁਹਾਡੇ ਬੱਚੇ ਛੋਟੇ ਹਨ ਤਦ ਤੋਂ ਹੀ ਉਨ੍ਹਾਂ ਨੂੰ ਸਿਖਾਓ ਕਿ ਉਹ ਆਕਰਸ਼ਕ ਸਰੀਰਾਂ ਜਾਂ ਸਖਸ਼ੀਅਤਾਂ ਦੇ ਨਾਲੋਂ ਦੂਸਰਿਆਂ ਵਿੱਚ ਚੰਗੇ ਚਰਿੱਤਰ ਨੂੰ ਵਧੇਰੇ ਵੇਖਣ ਅਤੇ ਚੰਗੇ ਚਰਿੱਤਰ ਦੀ ਵਧੇਰੇ ਕਦਰ ਕਰਨ। ਉਨ੍ਹਾਂ ਨੂੰ ਸਿਖਾਓ ਕਿ ਉਹ ਧਿਆਨ ਦੇਣ ਕਿ ਉਨ੍ਹਾਂ ਦੇ ਸਾਥੀ ਜ਼ਿੰਮੇਵਾਰ ਜਾਂ ਆਲਸੀ ਹਨ, ਆਗਿਆਕਾਰ ਜਾਂ ਵਿਦਰੋਹੀ ਹਨ, ਇਮਾਨਦਾਰ ਜਾਂ ਧੋਖੇਬਾਜ਼ ਹਨ। ਉਨ੍ਹਾਂ ਨੂੰ ਸਿਖਾਓ ਕਿ ਉਹ ਉਨ੍ਹਾਂ ਦੀ ਦਿੱਖ ਦੇ ਨਾਲੋਂ ਉਨ੍ਹਾਂ ਦੇ ਚਰਿੱਤਰ ਉੱਤੇ ਜ਼ਿਆਦਾ ਧਿਆਨ ਦੇਣ।

ਜੇ ਮਾਪੇ ਚਾਹੁੰਦੇ ਹਨ ਕਿ ਜਦੋਂ ਉਨ੍ਹਾਂ ਦੇ ਬੱਚੇ ਜਵਾਨ ਬਾਲਗਾਂ ਦੇ ਰੂਪ ਵਿੱਚ ਆਪਣੇ ਜੀਵਨ ਸਾਥੀਆਂ ਦੀ ਚੋਣ ਕਰਦੇ ਹਨ ਤਦ ਉਹ ਉਨ੍ਹਾਂ ਦੀ ਸਹਿਮਤੀ ਲੈਣ, ਤਾਂ ਉਨ੍ਹਾਂ ਨੂੰ ਆਪਣੇ ਬੱਚਿਆਂ ਨੂੰ ਸਿਖਾਉਣਾ ਚਾਹੀਦਾ ਹੈ ਕਿ ਪਿਤਾ ਅਤੇ ਮਾਤਾ ਦੀ ਗੱਲ ਸੁਣਨਾ ਸਮਝਦਾਰੀ ਹੁੰਦੀ ਹੈ! (ਕਹਾਉਤਾਂ 1:8) ਕਿਸ਼ੋਰ ਅਵਸਥਾ ਜਾਂ ਬਾਲਗਪਣ, ਇਹ ਸਿਖਾਉਣ ਲਈ ਬਹੁਤ ਦੇਰੀ ਹੈ; ਮਾਪਿਆਂ ਨੂੰ ਇਹ ਤਦ ਹੀ ਸਿਖਾਉਣਾ ਚਾਹੀਦਾ ਹੈ ਜਦੋਂ ਉਨ੍ਹਾਂ ਦੇ ਬੱਚੇ ਛੋਟੇ ਹੁੰਦੇ ਹਨ (ਕਹਾਉਤਾਂ 4:3-9)। ਧਰਮੀ ਮਾਪਿਆਂ ਦੀ ਗੱਲ ਸੁਣਨਾ ਬੱਚਿਆਂ ਨੂੰ ਸੁਰੱਖਿਅਤ ਰੱਖਣ ਅਤੇ ਧੰਨ ਬਣਾਉਣ ਦਾ ਪਰਮੇਸ਼ੁਰ ਦਾ ਤਰੀਕਾ ਹੈ।

ਜਿਵੇਂ ਪਾਠ 4 ਵਿੱਚ ਚਰਚਾ ਕੀਤੀ ਗਈ ਹੈ, ਪਰਮੇਸ਼ੁਰ ਦੇ ਅੱਗੇ ਇਹ ਮਾਪਿਆਂ ਦੀ ਜ਼ਿੰਮੇਵਾਰੀ ਹੈ ਕਿ ਉਹ ਆਪਣੇ ਜਵਾਨ ਲੋਕਾਂ ਦੀ ਰਿਸ਼ਤਿਆਂ ਵਿੱਚ ਨੈਤਿਕ ਸ਼ੁੱਧਤਾ ਬਣਾਈ ਰੱਖਣ ਵਿੱਚ ਮਦਦ ਕਰਨ। ਇਹ ਕਰਨ ਲਈ, ਤੁਹਾਡਾ ਪਹਿਲਾਂ ਹੀ ਆਪਣੇ ਬੱਚੇ ਨਾਲ ਇੱਕ ਚੰਗਾ ਅਤੇ ਖੁੱਲ੍ਹਾ ਰਿਸ਼ਤਾ ਹੋਣਾ ਚਾਹੀਦਾ ਹੈ, ਜਿਸ ਵਿੱਚ ਉਹ ਆਪਣੀ ਇੱਛਾ ਦੇ ਨਾਲ ਤੁਹਾਡੇ ਪ੍ਰਤੀ ਜਵਾਬਦੇਹ ਹਨ ਅਤੇ ਤੁਹਾਡੀ ਸਲਾਹ ਨੂੰ ਮੰਨਦੇ ਹਨ। ਇਸ ਤਰ੍ਹਾਂ ਦਾ ਰਿਸ਼ਤਾ ਬਚਪਨ ਦੇ ਪਹਿਲੇ ਸਾਲਾਂ ਵਿੱਚ ਹੀ ਬਣਾਇਆ ਜਾਂਦਾ ਹੈ ਜਦੋਂ ਤੁਸੀਂ ਹਰ ਦਿਨ ਆਪਣੇ ਬੱਚੇ ਨੂੰ ਦਿਲੋਂ ਸਿਖਾਉਂਦੇ ਹੋ, ਸਿਖਲਾਈ ਦਿੰਦੇ ਹੋ, ਅਗਵਾਈ ਕਰਦੇ ਹੋ, ਅਤੇ ਅਨੁਸ਼ਾਸ਼ਿਤ ਕਰਦੇ ਹੋ।

ਇੱਕ ਜੀਵਨ ਸਾਥੀ ਦੀ ਚੋਣ ਕਰਨ ਲਈ ਜਵਾਨ ਵਿਅਕਤੀ ਲਈ ਬੁੱਧੀ

ਪਰਮੇਸ਼ੁਰ ਕੋਲ ਉਨ੍ਹਾਂ ਜਵਾਨ ਵਿਸ਼ਵਾਸੀਆਂ ਲਈ ਬੁੱਧੀ ਹੈ ਜਿਨ੍ਹਾਂ ਨੂੰ ਵਿਆਹ ਬਾਰੇ ਆਪ ਫੈਸਲਾ ਲੈਣਾ ਚਾਹੀਦਾ ਹੈ। ਇੱਥੇ ਚੰਗੇ ਫੈਸਲੇ ਲੈਣ ਲਈ ਸਮਝਦਾਰੀ ਦੀ ਕੁਝ ਸਲਾਹ ਦਿੱਤੀ ਗਈ ਹੈ:

(1) ਉਨ੍ਹਾਂ ਵਿਕਲਪਾਂ ਤੋਂ ਇਨਕਾਰ ਕਰੋ ਜੋ ਬਾਈਬਲ ਅਧਾਰਤ ਨਹੀਂ ਹਨ।

ਉਦਾਹਰਣ ਦੇ ਲਈ, ਅਸੀਂ ਜਾਣਦੇ ਹਾਂ ਕਿ ਇਹ ਪਰਮੇਸ਼ੁਰ ਦੀ ਇੱਛਾ ਨਹੀਂ ਹੈ ਵਿਸ਼ਵਾਸੀ ਲੋਕ ਅਵਿਸ਼ਵਾਸੀਆਂ ਦੇ ਨਾਲ ਵਿਆਹ ਕਰਾਉਣ, ਇਸ ਲਈ ਸਾਨੂੰ ਇੱਕ ਅਵਿਸ਼ਵਾਸੀ ਦੇ ਨਾਲ ਰੋਮਾਂਟਿਕ ਰਿਸ਼ਤਾ ਰੱਖਣ ਬਾਰੇ ਸੋਚਣਾ ਵੀ ਨਹੀਂ ਚਾਹੀਦਾ।

(2) ਬੁੱਧੀ ਦੇ ਲਈ ਪ੍ਰਾਰਥਨਾ ਕਰੋ (ਕਹਾਉਤਾਂ 2; ਯਾਕੂਬ 3:13, 17)।

ਜਦੋਂ ਅਸੀਂ ਆਪਣੇ ਪੂਰੇ ਦਿਲ ਨਾਲ ਪਰਮੇਸ਼ੁਰ ਦੀ ਸਮਝ ਨੂੰ ਭਾਲਦੇ ਹਾਂ, ਉਹ ਸਾਨੂੰ ਖੁਸ਼ੀ ਦੇ ਨਾਲ ਬੁੱਧੀ ਦਿੰਦਾ ਹੈ। ਬੁੱਧੀ ਨੂੰ ਪਰਮੇਸ਼ੁਰ ਦੇ ਵਚਨ ਦਾ ਧਿਆਨ ਨਾਲ ਅਧਿਐਨ ਕਰਨ ਅਤੇ ਇਸ ਦੀ ਆਗਿਆਕਾਰੀ ਕਰਨ ਦੁਆਰਾ ਪਾਇਆ ਜਾਂਦਾ ਹੈ। ਪਰਮੇਸ਼ੁਰ ਸਾਨੂੰ ਧਰਮੀ ਲੋਕਾਂ ਦੀ ਸਲਾਹ ਦੇ ਦੁਆਰਾ ਵੀ ਬੁੱਧੀ ਦਿੰਦਾ ਹੈ। ਪਰਮੇਸ਼ੁਰ ਦੀ ਬੁੱਧੀ ਨੂੰ ਅਪਣਾਉਣਾ ਸਾਨੂੰ ਪਾਪ ਅਤੇ ਹਾਨੀ ਤੋਂ ਬਚਾਉਂਦਾ ਹੈ। ਉਸ ਦੀ ਬੁੱਧੀ ਸਾਨੂੰ ਅਸੀਸ ਦਿੰਦੀ ਹੈ ਅਤੇ ਸਾਡੇ ਜੀਵਨਾਂ ਲਈ ਪਰਮੇਸ਼ੁਰ ਦੀ ਉੱਤਮ ਯੋਜਨਾ ਦਾ ਅਨੁਭਵ ਕਰਨ ਲਈ ਮੌਕਾ ਦਿੰਦੀ ਹੈ। ਸਭ ਤੋਂ ਮਹੱਤਵਪੂਰਣ, ਜਦੋਂ ਅਸੀਂ ਸਮਝਦਾਰੀ ਦੇ ਫੈਸਲੇ ਲੈਂਦੇ ਹਾਂ, ਅਸੀਂ ਸਾਡੇ ਸਵਰਗੀ ਪਿਤਾ ਦੀ ਮਹਿਮਾ ਕਰਦੇ ਹਾਂ।

(3) ਪਵਿੱਤਰ ਆਤਮਾ ਦੀ ਅਗਵਾਈ ਦਾ ਅਨੁਸਰਣ ਕਰੋ (ਜ਼ਬੂਰ 119:133, ਕਹਾਉਤਾਂ 3:5-7, ਯਿਰਮਿਯਾਹ 10:23)।

ਪਵਿੱਤਰ ਆਤਮਾ ਕਦੇ ਵੀ ਪਰਮੇਸ਼ੁਰ ਦੇ ਵਚਨ ਦੀ ਉਲੰਘਣਾ ਕਰਨ ਲਈ ਸਾਡੀ ਅਗਵਾਈ ਨਹੀਂ ਕਰੇਗਾ। ਇਸ ਦੇ ਬਜਾਏ, ਉਹ ਵਫਾਦਾਰੀ ਨਾਲ ਸਾਨੂੰ ਇਸ ਬਾਰੇ ਯਾਦ ਕਰਾਉਂਦਾ ਹੈ (ਯੂਹੰਨਾ 14:26, ਯੂਹੰਨਾ 16:13-14)। ਉਹ ਪਰਮੇਸ਼ੁਰ ਦੇ ਆਗਿਆਕਾਰੀ ਬੱਚਿਆਂ ਨੂੰ ਪਾਪ ਤੋਂ ਸੁਰੱਖਿਅਤ ਰੱਖਦਾ ਹੈ ਅਤੇ ਉਨ੍ਹਾਂ ਨੂੰ ਜੀਵਨ ਅਤੇ ਸ਼ਾਂਤੀ ਦਾ ਫਲ ਦਿੰਦਾ ਹੈ (ਰੋਮੀਆਂ 8:5-6, 13-14; ਗਲਾਤੀਆਂ 5:16, 22-25)। ਸ਼ਾਇਦ ਤੁਸੀਂ ਹਮੇਸ਼ਾ ਹਰ ਸਥਿੱਤੀ ਵਿੱਚ ਪਰਮੇਸ਼ੁਰ ਦੀ ਇੱਛਾ ਨੂੰ ਵਿਸਥਾਰ ਨਾਲ ਨਹੀਂ ਜਾਣਦੇ ਹੋਵੋਗੇ, ਪਰ ਤੁਹਾਨੂੰ ਉਸ ਦਾ ਅਨੁਸਰਣ ਕਰਨਾ ਚਾਹੀਦਾ ਹੈ ਜੋ ਤੁਸੀਂ ਨਿਸ਼ਚਤ ਤੌਰ ’ਤੇ ਜਾਣਦੇ ਹੋ। ਤੁਸੀਂ ਜਾਣਦੇ ਹੋ ਕਿ ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਤੁਸੀਂ ਆਤਮਿਕ ਅਤੇ ਨੈਤਿਕ ਤੌਰ ’ਤੇ ਵਫ਼ਾਦਾਰ ਹੋਵੋ। ਤੁਸੀਂ ਜਾਣਦੇ ਹੋ ਕਿ ਉਹ ਚਾਹੁੰਦਾ ਹੈ ਕਿ ਤੁਸੀਂ ਕੁਝ ਗੱਲਾਂ ਨੂੰ ਅਣਵੇਖਿਆ ਕਰੋ ਅਤੇ ਕੁਝ ਗੱਲਾਂ ਦਾ ਅਨੁਸਰਣ ਕਰੋ। ਜਦੋਂ ਤੁਸੀਂ ਪਰਮੇਸ਼ੁਰ ਅੱਗੇ ਅਗਵਾਈ ਦੇ ਲਈ ਪ੍ਰਾਰਥਨਾ ਕਰਦੇ ਹੋ, ਤਦ ਉਹ ਕਰੋ ਜੋ ਤੁਸੀਂ ਜਾਣਦੇ ਹੋ ਕਿ ਸਹੀ ਹੈ।

(4) ਧਰਮੀ ਲੋਕਾਂ ਦੀ ਸਲਾਹ ਵੱਲ ਚੌਕਸੀ ਨਾਲ ਧਿਆਨ ਦੇਵੋ।

ਜਿਹੜੇ ਜਵਾਨ ਲੋਕਾਂ ਦੇ ਧਰਮੀ ਮਾਪੇ ਹਨ ਉਨ੍ਹਾਂ ਨੂੰ ਉਨ੍ਹਾਂ ਤੋਂ ਸਮਝ ਲੈਣੀ ਚਾਹੀਦੀ ਹੈ। ਉਹ ਵਿਆਹ ਬਾਰੇ ਆਪਣੇ ਵਿਚਾਰਾਂ ਬਾਰੇ ਆਪਣੇ ਮਾਪਿਆਂ ਦੇ ਨਾਲ ਖੁੱਲ੍ਹੇ ਅਤੇ ਇਮਾਨਦਾਰ ਹੋਣੇ ਚਾਹੀਦੇ ਹਨ। ਉਨ੍ਹਾਂ ਨੂੰ ਉਸ ਹਰੇਕ ਚਿੰਤਾ ਦੇ ਵੱਲ ਪੂਰਾ ਧਿਆਨ ਦੇਣਾ ਚਾਹੀਦਾ ਹੈ ਜੋ ਉਨ੍ਹਾਂ ਦੇ ਮਾਪਿਆਂ ਨੂੰ ਹੈ। ਪਰਮੇਸ਼ੁਰ ਨੇ ਉਨ੍ਹਾਂ ਨੂੰ ਉਨ੍ਹਾਂ ਦੇ ਮਾਪੇ ਦਿੱਤੇ ਹਨ ਤਾਂ ਕਿ ਉਹ ਉਨ੍ਹਾਂ ਨੂੰ ਨੁਕਸਾਨ ਤੋਂ ਬਚਾਉਣ ਅਤੇ ਉਨ੍ਹਾਂ ਨੂੰ ਚੰਗਾ ਹੀ ਦੇਣ। ਜਵਾਨ ਲੋਕਾਂ ਨੂੰ ਇਨ੍ਹਾਂ ਤਰੀਕਿਆਂ ਨਾਲ ਬਰਕਤ ਪਾਉਣ ਦੇ ਮੌਕੇ ਨੂੰ ਗੁਆਉਣਾ ਨਹੀਂ ਚਾਹੀਦਾ।

ਬਹੁਤ ਸਾਰੇ ਮਸੀਹੀ ਜਵਾਨ ਲੋਕਾਂ ਨੂੰ ਪਰਿਵਾਰ ਦੇ ਵੱਡੇ ਧਰਮੀ ਲੋਕਾਂ ਦੀ ਸਲਾਹ ਨਹੀਂ ਮਿਲਦੀ ਹੈ। ਉਨ੍ਹਾਂ ਨੂੰ ਚਾਹੀਦਾ ਹੈ ਕਿ ਉਹ ਧਰਮੀ ਚਰਿੱਤਰ ਵਾਲੇ ਲੋਕਾਂ ਤੋਂ ਸਲਾਹ ਲੈਣ ਜਿਨ੍ਹਾਂ ਨੇ ਚੰਗੇ ਨਤੀਜਿਆਂ ਨਾਲ ਸਮਝਦਾਰੀ ਦੇ ਫੈਸਲੇ ਲੈਣ ਦੀ ਯੋਗਤਾ ਨੂੰ ਵਿਖਾਇਆ ਹੈ।

ਪਰ, ਜਵਾਨ ਲੋਕਾਂ ਨੂੰ ਆਪਣੇ ਮਾਪਿਆਂ ਦੀ ਸਲਾਹ ਨੂੰ ਅਣਵੇਖਿਆ ਨਹੀਂ ਕਰਨਾ ਚਾਹੀਦਾ, ਭਾਵੇਂ ਉਨ੍ਹਾਂ ਦੇ ਮਾਪੇ ਪਰਮੇਸ਼ੁਰ ਦੀ ਸੇਵਾ ਨਾ ਹੀ ਕਰ ਰਹੇ ਹੋਣ। ਇਸ ਦੀਆਂ ਕੁਝ ਉਦਾਹਰਣਾਂ ਹੋ ਸਕਦੀਆਂ ਹਨ ਜਿਨ੍ਹਾਂ ਵਿੱਚ ਇੱਕ ਜਵਾਨ ਵਿਅਕਤੀ ਨੂੰ ਪਰਮੇਸ਼ੁਰ ਦੀ ਆਗਿਆਕਾਰੀ ਕਰਨ ਲਈ ਆਪਣੇ ਅਵਿਸ਼ਵਾਸੀ ਮਾਪਿਆਂ ਦੀਆਂ ਇੱਛਾਵਾਂ ਦੇ ਵਿਰੋਧ ਵਿੱਚ ਜਾਣਾ ਪਿਆ, ਪਰ ਇਹ ਕਦੇ ਵੀ ਵਿਦਰੋਹ (1 ਸਮੂਏਲ 15;23) ਦੇ ਢੰਗ ਨਾਲ ਜਾਂ ਨਿਰਾਦਰ (ਕੂਚ 20:12) ਦੇ ਨਾਲ ਨਹੀਂ ਕੀਤਾ ਜਾਣਾ ਚਾਹੀਦਾ। ਮਾਪਿਆਂ ਦੇ ਪਰਮੇਸ਼ੁਰ ਪ੍ਰਤੀ ਸਮਰਪਣ ਦੀ ਪਰਵਾਹ ਕੀਤੇ ਬਿਨਾਂ, ਪਰਮੇਸ਼ੁਰ ਉਨ੍ਹਾਂ ਦੇ ਦਿਲਾਂ ਨੂੰ ਨਰਮ ਕਰੇਗਾ ਤਾਂ ਜੋ ਉਹ ਆਪਣੇ ਪੁੱਤਰ ਜਾਂ ਪੁੱਤਰੀ ਦੇ ਵਿਆਹ ਉੱਤੇ ਆਪਣੀ ਅਸੀਸ ਦੇਣ। ਮਾਪਿਆਂ ਦੇ ਦਿਲਾਂ ਨੂੰ ਬਦਲਣ ਲਈ ਪਰਮੇਸ਼ੁਰ ਅੱਗੇ ਪ੍ਰਾਰਥਨਾ ਕਰਨ ਅਤੇ ਉਡੀਕ ਕਰਨਾ ਇਸ ਪੁੱਤਰ ਜਾਂ ਪੁੱਤਰੀ ਦੇ ਵਿਸ਼ਵਾਸ ਨੂੰ ਪਰਖੇਗਾ ਅਤੇ ਮਜ਼ਬੂਤ ਬਣਾਵੇਗਾ।

► ਵਿਆਹ ਦੇ ਫੈਸਲੇ ਵਿੱਚ ਮਾਪਿਆਂ ਦੀ ਸ਼ਮੂਲੀਅਤ ਬਾਰੇ ਵਚਨ ਤੋਂ ਸਿਧਾਂਤਾਂ ਜਾਂ ਉਦਾਹਰਣਾਂ ਬਾਰੇ ਚਰਚਾ ਕਰੋ। ਜੀਵਨ ਸਾਥੀ ਦੀ ਚੋਣ ਕਰਨ ਦੀ ਪ੍ਰਕਿਰਿਆ ਨੂੰ ਪ੍ਰਭਾਵਿਤ ਕਰਨ ਲਈ ਮਾਪਿਆਂ ਨੂੰ ਕੀ ਕਰਨਾ ਚਾਹੀਦਾ ਹੈ? ਵਿਆਹ ਦੇ ਫੈਸਲੇ ਵਿੱਚ ਇੱਕ ਮਸੀਹੀ ਬਾਲਗ ਦਾ ਆਪਣੇ ਮਾਪਿਆਂ ਦੇ ਪ੍ਰਤੀ ਕਿਸ ਤਰ੍ਹਾਂ ਦਾ ਰਵੱਈਆ ਹੋਣਾ ਚਾਹੀਦਾ ਹੈ?

ਜੇ ਇੱਕ ਦੂਸਰੇ ਨੂੰ ਮਿਲਣਾ ਸੰਭਵ ਹੈ, ਤਾਂ ਇੱਕ ਪੁਰਸ਼ ਅਤੇ ਇਸਤਰੀ ਲਈ ਇਹ ਉੱਤਮ ਹੈ ਕਿ ਵੱਖ-ਵੱਖ ਸਥਿੱਤੀਆਂ ਵਿੱਚ ਇੱਕ ਦੂਸਰੇ ਦੇ ਨਾਲ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ। ਇਹ ਉਨ੍ਹਾਂ ਨੂੰ ਇਹ ਜਾਣਨ ਦੇ ਯੋਗ ਬਣਾਉਂਦਾ ਹੈ ਕਿ ਦੂਸਰਾ ਵਿਅਕਤੀ ਕਿਸ ਤਰ੍ਹਾਂ ਵਿਹਾਰ ਕਰਦਾ ਹੈ, ਦੂਸਰਿਆਂ ਨਾਲ ਕਿਵੇਂ ਗੱਲਬਾਤ ਕਰਦਾ ਹੈ, ਕਿਵੇਂ ਅਣਚਾਹੇ ਹਾਲਾਤਾਂ ਪ੍ਰਤੀ ਪ੍ਰਤੀਉੱਤਰ ਦਿੰਦਾ ਹੈ, ਅਤੇ ਕਿਵੇਂ ਵੱਖ-ਵੱਖ ਹਾਲਾਤਾਂ ਦੇ ਨਾਲ ਨਜਿੱਠਦਾ ਹੈ। ਇਕੱਠੇ ਬਿਤਾਇਆ ਗਿਆ ਇਹ ਸਮਾਂ ਉਨ੍ਹਾਂ ਦੀ ਇਹ ਸਮਝਣ ਵਿੱਚ ਮਦਦ ਕਰਦਾ ਹੈ ਕਿ ਕੀ ਉਹ ਵਿਆਹ ਦੇ ਲਈ ਯੋਗ ਸਾਥੀ ਹਨ ਜਾਂ ਨਹੀਂ।

ਸ਼ੁੱਧਤਾ ਦੇ ਲਈ ਸਮਰਪਣ

► ਵਿਦਿਆਰਥੀਆਂ ਨੂੰ ਸਮੂਹ ਲਈ 1 ਥੱਸਲੁਨੀਕੀਆਂ 4:1-8 ਅਤੇ 2 ਤਿਮੋਥਿਉਸ 2:19-22 ਨੂੰ ਪੜ੍ਹਨਾ ਚਾਹੀਦਾ ਹੈ।

ਪਰਮੇਸ਼ੁਰ ਨੇ ਪਿਆਰ ਨਾਲ ਆਦਮੀਆਂ ਅਤੇ ਔਰਤਾਂ ਨੂੰ ਸਰੀਰਕ ਅਤੇ ਭਾਵਨਾਤਮਕ ਨੇੜਤਾ ਲਈ ਇੱਛਾਵਾਂ ਅਤੇ ਯੋਗਤਾਵਾਂ ਦੇ ਨਾਲ ਬਣਾਇਆ ਹੈ। ਇਨ੍ਹਾਂ ਇੱਛਾਵਾਂ ਦੇ ਕਾਰਨ, ਜਿਹੜੇ ਦੋਸਤ ਭਵਿੱਖ ਵਿੱਚ ਵਿਆਹ ਦੇ ਲਈ ਅੱਗੇ ਵਧ ਰਹੇ ਹਨ ਉਨ੍ਹਾਂ ਨੂੰ ਇੱਕ ਦੂਸਰੇ ਨਾਲ ਆਪਣੇ ਰਿਸ਼ਤੇ ਵਿੱਚ ਸਾਵਧਾਨ ਰਹਿਣਾ ਚਾਹੀਦਾ ਹੈ। ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਇਨ੍ਹਾਂ ਇੱਛਾਵਾਂ ਨੂੰ ਕੇਵਲ ਵਿਆਹ ਦੇ ਜੀਵਨ ਭਰ ਦੇ ਵਿਸ਼ੇਸ਼ ਸਮਰਪਣ ਵਿੱਚ ਹੀ ਪੂਰਾ ਕੀਤਾ ਜਾਵੇ।

ਜੇ ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਜਾਣਬੁੱਝ ਕੇ ਆਪਣੇ ਆਪ ਨੂੰ ਸਾਵਧਾਨੀ ਅਤੇ ਸ਼ੁੱਧਤਾ ਦੇ ਲਈ ਸਮਰਪਿਤ ਨਹੀਂ ਕਰਦੇ ਹਨ, ਤਾਂ ਇਹ ਸੰਭਾਵਨਾ ਹੈ ਕਿ ਪਰਤਾਵੇ ਦੇ ਸਮੇਂ ਉਹ ਆਪਣੀਆਂ ਇੱਛਾਵਾਂ ਦੇ ਅਨੁਸਾਰ ਚੱਲਣ ਦੇ ਦੁਆਰਾ ਪਰਮੇਸ਼ੁਰ ਦੀ ਅਵੱਗਿਆ ਕਰਨਗੇ। ਨੈਤਿਕ ਸ਼ੁੱਧਤਾ ਦੇ ਲਈ ਪਰਮੇਸ਼ੁਰ ਦੀਆਂ ਸ਼ਰਤਾਂ ਦੀ ਉਲੰਘਣਾ ਕਰਨਾ ਬਹੁਤ ਤਰੀਕਿਆਂ ਨਾਲ ਨੁਕਸਾਨਦਾਇਕ ਹੈ ਅਤੇ ਬਹੁਤ ਸਾਰੇ ਲੋਕਾਂ ਨੂੰ ਪ੍ਰਭਾਵਿਤ ਕਰਦਾ ਹੈ, ਕੇਵਲ ਉਸ ਪੁਰਸ਼ ਅਤੇ ਇਸਤਰੀ ਨੂੰ ਹੀ ਨਹੀਂ। ਉਲੰਘਣਾ ਕਰਨ ਦੇ ਨਤੀਜੇ ਅਫਸੋਸ, ਬੰਧਨ, ਦੋਸ਼ ਭਾਵਨਾ, ਸ਼ਰਮ, ਡਰ, ਬੇਯਕੀਨੀ, ਅਤੇ ਟੁੱਟੇ ਹੋਏ ਰਿਸ਼ਤੇ ਹੁੰਦੇ ਹਨ।

[1]ਉਨ੍ਹਾਂ ਦੇ ਲਈ ਬਹੁਤ ਸਾਰੀਆਂ ਬਰਕਤਾਂ ਹਨ ਜੋ ਸ਼ੁੱਧਤਾ ਦੇ ਲਈ ਪਰਮੇਸ਼ੁਰ ਦੀ ਯੋਜਨਾ ਦੇ ਅਨੁਸਾਰ ਚੱਲਦੇ ਹਨ। ਜਿਹੜੇ ਆਗਿਆਕਾਰੀ ਦੇ ਦੁਆਰਾ ਪਰਮੇਸ਼ੁਰ ਦਾ ਆਦਰ ਕਰਦੇ ਹਨ ਉਹ ਉਸ ਹਰੇਕ ਭਲਾਈ ਨੂੰ ਅਨੁਭਵ ਕਰ ਸਕਦੇ ਹਨ ਜਿਸ ਦੀ ਪਰਮੇਸ਼ੁਰ ਨੇ ਉਨ੍ਹਾਂ ਲਈ ਯੋਜਨਾ ਬਣਾਈ ਹੈ। ਉਲੰਘਣਾ ਕਰਨ ਦੇ ਨਤੀਜਿਆਂ ਦੇ ਬਜਾਏ, ਉਹ ਅਨੰਦ ਅਤੇ ਸ਼ਾਂਤੀ ਪਾਉਣਗੇ। ਉਹ ਇੱਕ ਦੂਸਰੇ ਉੱਤੇ ਭਰੋਸਾ ਕਰਨ ਦੇ ਯੋਗ ਹੋਣਗੇ। ਉਹ ਪਰਮੇਸ਼ੁਰ ਨਾਲ ਅਤੇ ਇੱਕ ਦੂਸਰੇ ਦੇ ਨਾਲ ਇੱਕ ਭਰਪੂਰ ਕਰਨ ਵਾਲਾ ਰਿਸ਼ਤਾ ਰੱਖਣ ਦੇ ਯੋਗ ਹੋਣਗੇ।

[2]ਇਹ ਬਰਕਤਾਂ ਸ਼ੁੱਧਤਾ ਦੇ ਲਈ ਪਰਮੇਸ਼ੁਰ ਦੀ ਯੋਜਨਾ ਅਨੁਸਾਰ ਚੱਲਣ ਲਈ ਦ੍ਰਿੜ੍ਹ ਪ੍ਰੇਰਣਾ ਹਨ। ਹਾਲਾਂਕਿ, ਇਸ ਖੇਤਰ ਵਿੱਚ ਚੌਕਸੀ ਰੱਖਣ ਲਈ ਵਿਸ਼ਵਾਸੀਆਂ ਦੀ ਸਭ ਤੋਂ ਵੱਡੀ ਪ੍ਰੇਰਣਾ ਇਹ ਹੋਣੀ ਚਾਹੀਦੀ ਹੈ ਕਿ ਉਨ੍ਹਾਂ ਨੇ ਆਪਣੇ ਜੀਵਨ ਦੇ ਹਰੇਕ ਖੇਤਰ ਵਿੱਚ ਪ੍ਰਭੂ ਯਿਸੂ ਨੂੰ ਆਦਰ ਦੇਣਾ ਹੈ। ਇੱਕ ਜੋੜਾ ਜੋ ਇੱਕ ਦੂਸਰੇ ਦੇ ਨਾਲ ਮਿਲ ਰਿਹਾ ਹੈ ਉਸ ਨੂੰ ਇਹ ਪੁੱਛਣਾ ਚਾਹੀਦਾ ਹੈ, “ਅਸੀਂ ਆਪਣੇ ਰਿਸ਼ਤੇ ਵਿੱਚ ਕਿਵੇਂ ਉੱਤਮ ਢੰਗ ਨਾਲ ਪਰਮੇਸ਼ੁਰ ਨੂੰ ਆਦਰ ਦੇ ਸਕਦੇ ਹਾਂ? ਅਸੀਂ ਕਿਵੇਂ ਯਿਸੂ ਨੂੰ ਸਭ ਤੋਂ ਜ਼ਿਆਦਾ ਮਹਿਮਾ ਦੇ ਸਕਦੇ ਹਾਂ?”

ਅਸ਼ੁੱਧ ਕਿਰਿਆਵਾਂ ਤੋਂ ਬਚਣ ਲਈ, ਇੱਕ ਜੋੜਾ ਜੋ ਇੱਕ ਦੂਸਰੇ ਨੂੰ ਮਿਲ ਰਿਹਾ ਹੈ ਉਨ੍ਹਾਂ ਨੂੰ ਕਿਸੇ ਵੀ ਪ੍ਰਕਾਰ ਦੇ ਸਰੀਰਕ ਸੰਪਰਕ ਦੇ ਲਈ ਸਾਵਧਾਨੀ ਵਰਤਣੀ ਚਾਹੀਦੀ ਹੈ। ਉਨ੍ਹਾਂ ਨੂੰ ਅਜਿਹੇ ਸਥਾਨਾਂ ਉੱਤੇ ਇਕੱਲੇ ਲੰਬਾ ਸਮਾਂ ਬਿਤਾਉਣ ਤੋਂ ਬਚਣਾ ਚਾਹੀਦਾ ਹੈ ਜਿੱਥੇ ਉਹ ਮਹਿਸੂਸ ਕਰਦੇ ਹਨ ਕਿ ਇੱਥੇ ਕੋਈ ਵੀ ਨਹੀਂ ਜਾਣਗੇ ਕਿ ਉਹ ਕੀ ਕਰਦੇ ਹਨ। ਜਦੋਂ ਜੋੜਿਆਂ ਦੇ ਰਿਸ਼ਤੇ ਵਿੱਚ ਸਰੀਰਕ ਸੰਪਰਕ ਗੱਲਬਾਤ ਦੇ ਨਾਲੋਂ ਜ਼ਿਆਦਾ ਮਹੱਤਵਪੂਰਣ ਬਣ ਜਾਂਦਾ ਹੈ ਤਾਂ ਉਹ ਪਰਤਾਵੇ ਦੇ ਨਾਲ ਸੰਘਰਸ਼ ਕਰਦੇ ਹਨ। ਉਹ ਸ਼ਾਇਦ ਆਤਮਕ ਅਤੇ ਸੰਬੰਧਕ ਮਸਲਿਆਂ ਦੇ ਨਾਲ ਚੰਗੀ ਤਰ੍ਹਾਂ ਨਜਿੱਠ ਨਹੀਂ ਸਕਣਗੇ ਕਿਉਂਕਿ ਉਨ੍ਹਾਂ ਦੇ ਮਨਾਂ ਅਤੇ ਦਿਲਾਂ ਉੱਤੇ ਸਰੀਰਕ ਇੱਛਾ ਦਾ ਨਿਯੰਤਰਣ ਹੈ। ਰਿਸ਼ਤੇ ਦੀ ਸ਼ੁਰੂਆਤ ਵਿੱਚ ਮਿਲਕੇ ਇਹ ਫੈਸਲਾ ਕਰੋ ਕਿ ਤੁਸੀਂ ਵਿਆਹ ਤੋਂ ਪਹਿਲਾਂ ਆਪਣੇ ਰਿਸ਼ਤੇ ਵਿੱਚ ਕਿਹੜੇ ਵਿਸ਼ੇਸ਼ ਕੰਮ ਕਰੋਗੇ (ਅਤੇ ਨਹੀਂ ਕਰੋਗੇ)। ਤੁਹਾਡੀ ਯੋਜਨਾ ਤੁਹਾਡੇ ਵਿੱਚੋਂ ਹਰੇਕ ਨੂੰ ਪਾਪ ਤੋਂ ਬਚਾਵੇ, ਤੁਹਾਡੇ ਭਵਿੱਖ ਵਿਚਲੇ ਜੀਵਨ ਸਾਥੀਆਂ ਨੂੰ ਪਿਆਰ ਕਰਨ ਵਿੱਚ ਮਦਦ ਕਰੇ, ਅਤੇ ਤੁਹਾਨੂੰ ਪਰਮੇਸ਼ੁਰ ਦਾ ਆਦਰ ਕਰਨ ਦੇ ਯੋਗ ਬਣਾਵੇ। ਆਪਣੇ ਆਪ ਨੂੰ ਆਪਣੀ ਯੋਜਨਾ ਦੇ ਪ੍ਰਤੀ ਸਮਰਪਿਤ ਕਰੋ। ਧਰਮੀ ਗੁਰੂਆਂ ਦੇ ਪ੍ਰਤੀ ਜਵਾਬਦੇਹ ਬਣੋ ਅਤੇ ਉਨ੍ਹਾਂ ਦੁਆਰਾ ਦਿੱਤੀ ਸਲਾਹ ਅਤੇ ਦੱਸੀਆਂ ਗਈਆਂ ਸਾਵਧਾਨੀਆਂ ਨੂੰ ਸੁਣੋ। ਧਰਮੀ ਦੋਸਤਾਂ ਅਤੇ ਪਰਿਵਾਰਕ ਮੈਂਬਰਾਂ ਦੇ ਨਾਲ ਇਕੱਠੇ ਸਮਾਂ ਬਿਤਾਓ।

ਕਿਰਿਆਵਾਂ ਜੋ ਉੱਨਤੀ ਨੂੰ ਵਧਾਉਂਦੀਆਂ ਹਨ

ਇੱਕ ਦੂਸਰੇ ਨੂੰ ਮਿਲਣ ਦਾ ਸਮਾਂ ਇੱਕ ਦੂਸਰੇ ਬਾਰੇ ਜਾਣਨ ਦਾ ਸਮਾਂ ਹੈ, ਪਰ ਇਹ ਉੱਨਤੀ ਦਾ ਸਮਾਂ ਵੀ ਹੋਣਾ ਚਾਹੀਦਾ ਹੈ। ਇੱਥੇ ਕੁਝ ਕਿਰਿਆਵਾਂ ਦੇ ਸੁਝਾਅ ਦਿੱਤੇ ਗਏ ਹਨ ਜਿਨ੍ਹਾਂ ਨੂੰ ਉਹ ਜੋੜਾ ਮਿਲਕੇ ਕਰ ਸਕਦਾ ਹੈ ਜੋ ਇੱਕ ਦੂਸਰੇ ਨੂੰ ਮਿਲ ਰਿਹਾ ਹੈ:

• ਕੰਮ ਦੇ ਪ੍ਰੋਜੈਕਟ ਕਰੋ।

• ਇੱਕ ਹੁਨਰ ਸਿੱਖੋ ਜੋ ਤੁਹਾਡੇ ਦੋਵਾਂ ਦੇ ਲਈ ਨਵਾਂ ਹੈ।

• ਚੰਗੀਆਂ ਕਿਤਾਬਾਂ ਨੂੰ ਪੜ੍ਹੋ ਅਤੇ ਉਨ੍ਹਾਂ ਬਾਰੇ ਚਰਚਾ ਕਰੋ।

• ਦੋਵੇਂ ਵਚਨ ਦੇ ਇੱਕੋ ਜਿਹੇ ਭਾਗਾਂ ਦਾ ਅਧਿਐਨ ਕਰੋ ਜਾਂ ਇਨ੍ਹਾਂ ਨੂੰ ਯਾਦ ਕਰੋ, ਫਿਰ ਉਨ੍ਹਾਂ ਬਾਰੇ ਚਰਚਾ ਕਰੋ।

• ਮਿਲਕੇ ਸੇਵਕਾਈ ਦੇ ਕੰਮਾਂ ਦੀ ਯੋਜਨਾ ਬਣਾਓ ਅਤੇ ਉਨ੍ਹਾਂ ਕੰਮਾਂ ਨੂੰ ਮਿਲਕੇ ਪੂਰਾ ਕਰੋ।

• ਮਿਲਕੇ ਬੱਚਿਆਂ ਦੀ ਦੇਖਭਾਲ ਕਰੋ।

• ਇੱਕ ਦੂਸਰੇ ਦੇ ਪਰਿਵਾਰ ਨਾਲ ਸਮਾਂ ਬਿਤਾਓ।

ਇਹ ਕਿਰਿਆਵਾਂ:

• ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਦੀ ਇੱਕ ਦੂਸਰੇ ਨੂੰ ਜਾਣਨ ਵਿੱਚ ਮਦਦ ਕਰਨਗੀਆਂ।

• ਉਨ੍ਹਾਂ ਦੀ ਇਹ ਜਾਣਨ ਵਿੱਚ ਮਦਦ ਕਰਨਗੀਆਂ ਕਿ ਉਹ ਇੱਕ ਦੂਸਰੇ ਲਈ ਯੋਗ ਸਾਥੀ ਹਨ ਜਾਂ ਨਹੀਂ।

• ਉਨ੍ਹਾਂ ਦੀ ਇੱਕ ਦੂਸਰੇ ਨਾਲ ਚੰਗੀ ਤਰ੍ਹਾਂ ਗੱਲਬਾਤ ਕਰਨ ਦੀ ਯੋਗਤਾ ਨੂੰ ਵਧਾਉਣਗੀਆਂ।

• ਉਨ੍ਹਾਂ ਦੀ ਉੱਨਤੀ ਕਰਨ ਵਿੱਚ ਮਦਦ ਕਰਨਗੀਆਂ।

► ਇੱਕ ਦੂਸਰੇ ਨੂੰ ਮਿਲਣ ਬਾਰੇ ਇਨ੍ਹਾਂ ਸਿਧਾਂਤਾਂ ਅਤੇ ਵਿਚਾਰਾਂ ਵਿੱਚੋਂ ਕਿਹੜਾ ਤੁਹਾਡੇ ਲਈ ਨਵਾਂ ਸੀ? ਤੁਹਾਡੇ ਸੰਦਰਭ ਵਿੱਚ ਵਿਸ਼ਵਾਸੀਆਂ ਨੂੰ ਵਿਆਹ ਤੋਂ ਪਹਿਲਾਂ ਰਿਸ਼ਤਿਆਂ ਵਿੱਚ ਸ਼ੁਧਤਾ ਅਤੇ ਪਰਮੇਸ਼ੁਰ ਦਾ ਆਦਰ ਕਰਨ ਲਈ ਬਾਈਬਲ ਅਧਾਰਤ ਸਿਧਾਂਤਾਂ ਨੂੰ ਕਿਵੇਂ ਲਾਗੂ ਕਰਨਾ ਚਾਹੀਦਾ ਹੈ?

ਵਿਆਹ ਤੋਂ ਪਹਿਲਾਂ ਚਰਚਾ ਕਰਨ ਲਈ ਵਿਸ਼ੇ

ਜਿਹੜੇ ਸੱਭਿਆਚਾਰਾਂ ਵਿੱਚ ਜੋੜਿਆਂ ਨੂੰ ਮੌਕਾ ਮਿਲਦਾ ਹੈ ਕਿ ਉਹ ਫੈਸਲਾ ਲੈਣ ਦੇ ਲਈ ਇੱਕ ਦੂਸਰੇ ਨੂੰ ਜਾਣਨ, ਉਨ੍ਹਾਂ ਦੇ ਲਈ ਮਹੱਤਵਪੂਰਣ ਮਸਲੇ ਹਨ ਜਿਨ੍ਹਾਂ ਬਾਰੇ ਵਿਆਹ ਤੋਂ ਪਹਿਲਾਂ ਚਰਚਾ ਕਰਨੀ ਚਾਹੀਦੀ ਹੈ।

ਕੁਝ ਸੱਭਿਆਚਾਰਾਂ ਵਿੱਚ, ਜਿੱਥੇ ਵਿਆਹ ਮਾਪਿਆਂ ਦੁਆਰਾ ਰਚਾਏ ਜਾਂਦੇ ਹਨ, ਇੱਕ ਜੋੜੇ ਨੂੰ ਮੌਕਾ ਨਹੀਂ ਮਿਲਦਾ ਕਿ ਉਹ ਇੱਕ ਦੂਸਰੇ ਨੂੰ ਚੰਗੀ ਤਰ੍ਹਾਂ ਜਾਣ ਸਕਣ। ਉਨ੍ਹਾਂ ਦੇ ਕੋਲ ਇਹ ਮੌਕਾ ਨਹੀਂ ਹੁੰਦਾ ਕਿ ਉਹ ਹਰੇਕ ਮਹੱਤਵਪੂਰਣ ਮਸਲੇ ਬਾਰੇ ਵਿਆਹ ਤੋਂ ਪਹਿਲਾਂ ਚਰਚਾ ਕਰ ਸਕਣ। ਇਸ ਸਥਿੱਤੀ ਵਿੱਚ, ਇਹ ਉੱਤਮ ਹੁੰਦਾ ਹੈ ਜੇ ਪੁਰਸ਼ ਅਤੇ ਇਸਤਰੀ ਦੇ ਮਾਪੇ ਇੱਕ ਦੂਸਰੇ ਦੇ ਨਾਲ ਜਾਣਕਾਰੀ ਸਾਂਝੀ ਕਰਨ ਅਤੇ ਇਹ ਯਕੀਨੀ ਬਣਾਉਣ ਕਿ ਜਵਾਨ ਜੋੜਾ ਇੱਕ ਦੂਸਰੇ ਦੇ ਯੋਗ ਹੈ।

ਜਿਨ੍ਹਾਂ ਮਾਮਲਿਆਂ ਵਿੱਚ ਵਿਆਹ ਕਰਾਉਣ ਵਾਲੇ ਦੋ ਲੋਕ ਇੱਕ ਦੂਸਰੇ ਬਾਰੇ ਬਹੁਤ ਘੱਟ ਜਾਣਦੇ ਹਨ, ਉਹ ਵਿਆਹ ਤੋਂ ਬਾਅਦ ਇਨ੍ਹਾਂ ਮਸਲਿਆਂ ਦੇ ਨਾਲ ਨਜਿੱਠਦੇ ਹਨ, ਪਰ ਇਹ ਮਸਲੇ ਉਨ੍ਹਾਂ ਦੀ ਚੋਣ ਨੂੰ ਪ੍ਰਭਾਵਿਤ ਨਹੀਂ ਸਕਦੇ, ਕਿਉਂਕਿ ਉਨ੍ਹਾਂ ਨੇ ਪਹਿਲਾਂ ਹੀ ਇੱਕ ਦੂਸਰੇ ਦੇ ਪ੍ਰਤੀ ਅਤੇ ਪਰਮੇਸ਼ੁਰ ਦੇ ਪ੍ਰਤੀ ਇੱਕ ਸਮਰਪਣ ਕਰ ਲਿਆ ਹੈ।

ਜਿੰਨਾ ਜ਼ਿਆਦਾ ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਦੇ ਵਿਸ਼ਵਾਸ, ਪਿਛੋਕੜ, ਸੱਭਿਆਚਾਰ, ਜੀਵਨ ਦੇ ਟੀਚੇ, ਅਤੇ ਕਦਰਾਂ ਕੀਮਤਾਂ ਮੇਲ ਖਾਂਦੀਆਂ ਹਨ, ਓਨਾ ਜ਼ਿਆਦਾ ਉਹ ਵਿੱਚ ਇੱਕ ਦੂਸਰੇ ਦੇ ਲਈ ਯੋਗ ਹੋਣਗੇ। ਜੇ ਸੰਭਵ ਹੋਵੇ, ਤਾਂ ਇੱਕ ਜੋੜਾ ਜੋ ਵਿਆਹ ਕਰਾਉਣ ਬਾਰੇ ਸੋਚ ਰਿਹਾ ਹੈ ਉਨ੍ਹਾਂ ਨੂੰ ਇਹ ਚਰਚਾ ਕਰਨ ਲਈ ਸਮਾਂ ਬਿਤਾਉਣਾ ਚਾਹੀਦਾ ਹੈ:

• ਉਨ੍ਹਾਂ ਦੇ ਜੀਵਨ ਦੇ ਟੀਚੇ

• ਉਹ ਕਦਰਾਂ ਕੀਮਤਾਂ ਜੋ ਦੋਵਾਂ ਵਿੱਚੋਂ ਹਰੇਕ ਲਈ ਮਹੱਤਵਪੂਰਣ ਹਨ

• ਉਨ੍ਹਾਂ ਦਾ ਆਪਣਾ ਬਚਪਨ ਅਤੇ ਜਿਸ ਤਰ੍ਹਾਂ ਉਨ੍ਹਾਂ ਦਾ ਪਾਲਣ-ਪੋਸ਼ਣ ਹੋਇਆ ਸੀ

• ਉਨ੍ਹਾਂ ਦੇ ਮਾਪਿਆਂ ਅਤੇ ਹੋਰ ਰਿਸ਼ਤੇਦਾਰਾਂ ਦੇ ਨਾਲ ਉਨ੍ਹਾਂ ਦੇ ਰਿਸ਼ਤੇ

• ਉਨ੍ਹਾਂ ਦੇ ਨਿੱਜੀ ਸਿਧਾਂਤਕ ਵਿਸ਼ਵਾਸ ਅਤੇ ਵਿਸ਼ਵਾਸ ਦੇ ਅਭਿਆਸ, ਜਿਵੇਂ ਕਿ ਨਿੱਜੀ ਆਤਮਿਕ ਅਨੁਸ਼ਾਸ਼ਨ, ਕਲੀਸਿਯਾ ਦੇ ਵਿੱਚ ਹਾਜਰੀ, ਅਤੇ ਸੇਵਾ ਅਤੇ ਸੇਵਕਾਈ ਦੇ ਕੰਮ

• ਬੱਚਿਆਂ ਦੀ ਪਰਵਰਿਸ਼ ਬਾਰੇ ਉਨ੍ਹਾਂ ਦੀਆਂ ਸਮਝਾਂ ਅਤੇ ਧਾਰਨਾਵਾਂ, ਜਿਨ੍ਹਾਂ ਵਿੱਚ ਬੱਚਿਆਂ ਨੂੰ ਸਿਖਾਉਣਾ, ਸਿਖਲਾਈ ਦੇਣਾ, ਅਨੁਸ਼ਾਸ਼ਿਤ ਕਰਨਾ, ਅਤੇ ਮਸੀਹ ਨੂੰ ਜਾਣਨਾ ਅਤੇ ਉਸ ਦੀ ਆਗਿਆਕਾਰੀ ਕਰਨਾ ਸਿਖਾਉਣਾ, ਸ਼ਾਮਲ ਹੈ।

• ਪੈਸੇ ਬਾਰੇ ਉਨ੍ਹਾਂ ਦੇ ਵਿਚਾਰ, ਜਿਨ੍ਹਾਂ ਵਿੱਚ ਖਰਚ ਕਰਨਾ, ਬਚਤ ਕਰਨਾ, ਅਤੇ ਮੁਸ਼ਕਲ ਸਮਿਆਂ ਦੇ ਵਿੱਚ ਜੀਣਾ ਸ਼ਾਮਲ ਹੈ

• ਕੋਈ ਵੀ ਸਰੀਰਕ ਜਾਂ ਮਾਨਸਿਕ ਸਿਹਤ ਸੰਬੰਧੀ ਸਮੱਸਿਆ ਜਾਂ ਕੋਈ ਅਪੰਗਤਾ ਜੋ ਉਨ੍ਹਾਂ ਨੂੰ ਹੈ, ਅਤੇ ਉਹ ਸਿਹਤ ਸੰਬੰਧੀ ਸਮੱਸਿਆਵਾਂ ਜੋ ਉਨ੍ਹਾਂ ਦੇ ਪਰਿਵਾਰਾਂ ਵਿੱਚ ਆਮ ਹਨ

ਰਿਸ਼ਤੇ ਦੇ ਇਸ ਹਿੱਸੇ ਦੇ ਦੌਰਾਨ, ਤੁਹਾਨੂੰ ਜੀਵਨ ਦੇ ਮੁਸ਼ਕਲ ਅਤੇ ਗੁੰਝਲਦਾਰ ਵਿਸ਼ਿਆਂ ਬਾਰੇ ਗੱਲ ਕਰਨੀ ਚਾਹੀਦੀ ਹੈ। ਇੱਕ ਵਾਰ ਜਦੋਂ ਤੁਸੀਂ ਪਰਮੇਸ਼ੁਰ ਨਾਲ ਅਤੇ ਇੱਕ ਦੂਸਰੇ ਨਾਲ ਵਾਇਦਾ ਕਰ ਲਿਆ ਹੈ, ਫਿਰ ਭਾਵੇ ਭਲਾ ਹੋਵੇ ਜਾਂ ਬੁਰਾ ਤੁਸੀਂ ਵਿਆਹੇ ਹੋਏ ਹੋ। ਇੱਕ ਵਿਆਹੁਤਾ ਰਿਸ਼ਤੇ, ਇੱਕ ਪਤੀ ਅਤੇ ਇੱਕ ਪਤਨੀ ਇੱਕ ਦੂਸਰੇ ਨਾਲ ਉਹ ਸਭ ਸਾਂਝਾ ਕਰਦੇ ਹਨ ਜੋ ਉਹ ਹਨ, ਇਸ ਲਈ ਵਿਆਹ ਦੇ ਵੱਲ ਅਗਵਾਈ ਕਰਦੀ ਹੋਈ ਇੱਕ ਇਮਾਨਦਾਰ ਗੱਲਬਾਤ ਬਹੁਤ ਮਹੱਤਵਪੂਰਣ ਹੈ। ਚਰਚਾਵਾਂ ਖੁੱਲ੍ਹੀਆਂ ਅਤੇ ਡੂੰਘੀਆਂ ਹੋਣੀਆਂ ਚਾਹੀਦੀਆਂ ਹਨ ਅਤੇ ਇਨ੍ਹਾਂ ਦਾ ਖੁੱਲ੍ਹਾ ਹੋਣਾ ਅਤੇ ਡੂੰਘਾ ਹੋਣਾ ਵਧਦਾ ਜਾਣਾ ਚਾਹੀਦਾ ਹੈ। ਜੇ ਉਹ ਵਿਅਕਤੀ ਜਿਸ ਨਾਲ ਤੁਸੀਂ ਵਿਆਹ ਕਰਾਉਣਾ ਹੈ ਇਨ੍ਹਾਂ ਮਹੱਤਵਪੂਰਣ ਮਸਲਿਆਂ ਬਾਰੇ ਗੱਲ ਨਹੀਂ ਕਰਨਾ ਚਾਹੁੰਦਾ, ਤਾਂ ਇਹ ਗੰਭੀਰ ਖਤਰੇ ਦਾ ਨਿਸ਼ਾਨ ਹੈ।

ਉਨ੍ਹਾਂ ਦੇ ਵਿਆਹ ਤੋਂ ਬਿਲਕੁਲ ਪਹਿਲਾਂ, ਇੱਕ ਜੋੜੇ ਨੂੰ ਵਿਆਹ ਵਿੱਚ ਲਿੰਗਕ ਰਿਸ਼ਤੇ ਬਾਰੇ ਆਪਣੇ ਵਿਸ਼ਵਾਸਾਂ, ਉਮੀਦਾਂ, ਅਤੇ ਇੱਛਾਵਾਂ ਬਾਰੇ ਚਰਚਾ ਕਰਨੀ ਚਾਹੀਦੀ ਹੈ। ਰਿਸ਼ਤੇ ਵਿੱਚ ਲਿੰਗਕ ਸੰਬੰਧਾਂ ਬਾਰੇ ਬਹੁਤ ਪਹਿਲਾਂ ਚਰਚਾ ਕਰਨਾ ਬੇਲੋੜੇ ਪਰਤਾਵੇ ਦਾ ਕਾਰਣ ਬਣ ਸਕਦਾ ਹੈ, ਪਰ ਵਿਆਹ ਤੋਂ ਪਹਿਲਾਂ ਇਸ ਬਾਰੇ ਗੱਲ ਕਰਨਾ ਮਹੱਤਵਪੂਰਣ ਹੈ।

ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਜੋ ਇੱਕ ਦੂਸਰੇ ਨਾਲ ਵਿਆਹ ਕਰ ਰਹੇ ਹਨ, ਇਹ ਉਨ੍ਹਾਂ ਲਈ ਮਦਦਗਾਰ ਹੋਵੇਗਾ:

• ਬੌਧਿਕ ਤੌਰ ’ਤੇ ਇੱਕੋ ਜਿਹੇ ਹੋਣ ਲਈ।

• ਵਿਆਹੁਤਾ ਜੀਵਨ ਦੇ ਲਈ ਇੱਕੋ ਜਿਹੀਆਂ ਉਮੀਦਾ ਰੱਖਣ ਦੇ ਲਈ।

• ਇੱਕੋ ਜਿਹੇ ਸਿਧਾਂਤਕ ਵਿਸ਼ਵਾਸ ਅਤੇ ਆਤਮਿਕ ਅਭਿਆਸ ਰੱਖਣ ਦੇ ਲਈ।

• ਪੈਸੇ ਅਤੇ ਸਮੇਂ ਦੀ ਵਰਤੋਂ ਸੰਬੰਧੀ ਇੱਕੋ ਜਿਹੀਆਂ ਕਦਰਾਂ ਕੀਮਤਾਂ ਅਤੇ ਅਭਿਆਸ ਰੱਖਣ ਦੇ ਲਈ।

• ਜੀਵਨ ਅਤੇ ਬੱਚਿਆਂ ਦੀ ਪਰਵਰਿਸ਼ ਬਾਰੇ ਵਿਸਥਾਰਾਂ ਦੀ ਸਾਂਝੀ ਸਮਝ ਰੱਖਣ ਵਿੱਚ।

ਇੱਕ ਦੂਸਰੇ ਨੂੰ ਮਿਲਣ ਵਿੱਚ ਖਤਰੇ ਦੇ ਨਿਸ਼ਾਨ

ਜੋਹਨ ਡ੍ਰੇਸਚਰ ਅੱਠ ਸਮੱਸਿਆਵਾਂ ਦੀ ਸੂਚੀ ਦਿੰਦੇ ਹਨ ਜੋ ਜਿਨ੍ਹਾਂ ਦੇ ਕਾਰਣ ਇੱਕ ਪੁਰਸ਼ ਜਾਂ ਇਸਤਰੀ ਨੂੰ ਗੰਭੀਰਤਾ ਦੇ ਨਾਲ ਇੱਕ ਦੂਸਰੇ ਨੂੰ ਮਿਲਣ ਦਾ ਰਿਸ਼ਤਾ ਖਤਮ ਕਰ ਦੇਣਾ ਚਾਹੀਦਾ ਹੈ:[3]

1. ਤੁਸੀਂ ਅਤੇ ਤੁਹਾਡਾ ਮਿੱਤਰ ਇੱਕ ਦੂਸਰੇ ਨਾਲ ਲਗਾਤਾਰ ਬਹਿਸ ਕਰਦੇ ਹੋ।

2. ਤੁਸੀਂ ਸੰਵੇਦਨਸ਼ੀਲ ਵਿਸ਼ਿਆਂ ਬਾਰੇ ਚਰਚਾ ਕਰਨ ਤੋਂ ਬਚਦੇ ਹੋ ਕਿਉਂਕਿ ਤੁਸੀਂ ਆਪਣੇ ਮਿੱਤਰ ਨੂੰ ਭਾਵਨਾਤਮਕ ਤੌਰ ’ਤੇ ਠੇਸ ਨਹੀਂ ਪਹੁੰਚਾਉਣਾ ਚਾਹੁੰਦੇ। ਜੇ ਤੁਸੀਂ ਆਪਣੇ ਆਪ ਨੂੰ ਦੱਸਦੇ ਹੋ, “ਬਿਹਤਰ ਹੈ ਕਿ ਮੈਂ ਇਸ ਬਾਰੇ ਗੱਲ ਨਾ ਕਰਾਂ” – ਇਹ ਇੱਕ ਖਤਰੇ ਦਾ ਨਿਸ਼ਾਨ ਹੈ। ਵਿਆਹ ਦਾ ਅਰਥ ਹੈ ਕਿ ਤੁਹਾਨੂੰ ਦਲੇਰੀ ਅਤੇ ਪਿਆਰ ਨਾਲ ਬਹੁਤ ਸਾਰੀਆਂ ਗੱਲਾਂ ਬਾਰੇ ਚਰਚਾ ਕਰਨ ਦੀ ਲੋੜ ਹੋਵੇਗੀ।

3. ਤੁਹਾਡਾ ਰਿਸ਼ਤਾ ਸਰੀਰਕ ਹੁੰਦਾ ਜਾ ਰਿਹਾ ਹੈ। ਇੱਕ ਅਣਵਿਆਹੇ ਜੋੜੇ ਦੇ ਰੂਪ ਜਿੰਨਾ ਜ਼ਿਆਦਾ ਤੁਸੀਂ ਸਰੀਰਕ ਤੌਰ ’ਤੇ ਸ਼ਾਮਲ ਹੋਵੋਗੇ, ਓਨਾ ਘੱਟ ਤੁਸੀਂ ਇੱਕ ਦੂਸਰੇ ਨਾਲ ਸ਼ਬਦਾਂ, ਆਵਾਜ਼ ਦੇ ਸੁਰ, ਚਿਹਰੇ ਦੇ ਹਾਵ-ਭਾਵ, ਅਤੇ ਸਰੀਰ ਦੀ ਭਾਸ਼ਾ ਦੁਆਰਾ ਗੱਲ ਕਰਨਾ ਸਿੱਖੋਗੇ। ਜ਼ਿਆਦਾ ਸਪਰਸ਼ ਕਰਨਾ ਅਤੇ ਘੱਟ ਗੱਲ ਕਰਨਾ ਇੱਕ ਅਸਲ ਖਤਰੇ ਦਾ ਨਿਸ਼ਾਨ ਹੋ ਸਕਦਾ ਹੈ।

4. ਤੁਸੀਂ ਮਹਿਸੂਸ ਕਰਦੇ ਹੋ ਕਿ ਤੁਸੀਂ ਕਿਸੇ ਪ੍ਰਕਾਰ ਦੇ ਡਰ ਕਾਰਨ ਰਿਸ਼ਤੇ ਵਿੱਚ ਰਹਿ ਰਹੇ ਹੋ। ਉਦਾਹਰਣ ਦੇ ਲਈ, “ਮੈਂ ਇਸ ਰਿਸ਼ਤੇ ਨੂੰ ਖਤਮ ਕਰਨਾ ਚਾਹੁੰਦਾ ਹਾਂ, ਪਰ ਮੈਂ ਕਿਸੇ ਨੂੰ ਨਿਰਾਸ਼ ਨਹੀਂ ਕਰਨਾ ਚਾਹੁੰਦਾ।”

5. ਤੁਹਾਡਾ ਦੋਸਤ ਉਸਾਰੂ ਅਲੋਚਨਾ ਨੂੰ ਸੁਣ ਨਹੀਂ ਸਕਦਾ ਹੈ। ਜਦੋਂ ਤੁਹਾਡਾ ਮਿੱਤਰ ਗਲਤ ਹੁੰਦਾ ਹੈ, ਤਾਂ ਕੀ ਉਹ ਗਲਤੀ ਨੂੰ ਮੰਨ ਕੇ ਮਾਫ਼ੀ ਮੰਗਣ ਤੋਂ ਇਨਕਾਰ ਕਰਦਾ ਹੈ? ਇਹ ਹੁਣ ਵਿਨਾਸ਼ਕਾਰੀ ਹੈ, ਅਤੇ ਇਹ ਬਾਅਦ ਵਿੱਚ ਹੋਰ ਵੀ ਵਿਨਾਸ਼ਕਾਰੀ ਹੋਵੇਗਾ, ਜੇ ਤੁਸੀਂ ਇੱਕ ਦੂਸਰੇ ਨਾਲ ਵਿਆਹ ਕਰਦੇ ਹੋ ਤਾਂ।

6. ਮਾਪਿਆਂ ਨੂੰ ਜਾਂ ਮਹੱਤਵਪੂਰਣ ਦੋਸਤਾਂ ਨੂੰ ਤੁਹਾਡੇ ਰਿਸ਼ਤੇ ਅਤੇ ਤੁਹਾਡੇ ਸੰਭਾਵੀ ਵਿਆਹ ਬਾਰੇ ਇਤਰਾਜ਼ ਹਨ। ਇਹ ਨਿਸ਼ਚਤ ਤੌਰ ’ਤੇ ਖਤਰੇ ਦਾ ਇੱਕ ਨਿਸ਼ਾਨ ਹੋ ਸਕਦਾ ਹੈ ਅਤੇ ਤੁਹਾਨੂੰ ਰਿਸ਼ਤੇ ਨੂੰ ਖਤਮ ਕਰਨ ਬਾਰੇ ਵਿਚਾਰ ਕਰਨਾ ਚਾਹੀਦਾ ਹੈ। ਇਹ ਸੱਚ ਹੈ ਕਿ ਤੁਸੀਂ ਕੇਵਲ ਇੱਕ ਵਿਅਕਤੀ ਦੇ ਨਾਲ ਨਹੀਂ ਕਰਦੇ, ਪਰ ਇੱਕ ਪਰਿਵਾਰ ਦੇ ਵਿੱਚ ਵਿਆਹ ਕਰਦੇ ਹੋ ਜਿਸ ਦਾ ਤੁਹਾਡੇ ਵਿਆਹੁਤਾ ਰਿਸ਼ਤੇ ਦੀ ਸੁਰੱਖਿਆ ਅਤੇ ਸਫ਼ਲਤਾ ਉੱਤੇ ਵੱਡਾ ਪ੍ਰਭਾਵ ਹੋਵੇਗਾ।

7. ਤੁਹਾਡਾ ਮਿੱਤਰ ਲੋੜ ਤੋਂ ਜ਼ਿਆਦਾ ਈਰਖਾਲੂ ਜਾਂ ਸ਼ੱਕੀ ਹੈ। ਉਦਾਹਰਣ ਦੇ ਲਈ, ਜੇ ਤੁਹਾਡਾ ਮਿੱਤਰ ਤੁਹਾਡੇ ਸ਼ਬਦਾਂ ਉੱਤੇ ਸਵਾਲ ਚੁੱਕਦਾ ਹੈ, ਜਾਂ ਹੋਰ ਤਰੀਕਿਆਂ ਨਾਲ ਤੁਹਾਡੇ ਉੱਤੇ ਭਰੋਸਾ ਨਹੀਂ ਕਰਦਾ ਹੈ, ਤਾਂ ਇਹ ਇੱਕ ਖਤਰੇ ਦਾ ਨਿਸ਼ਾਨ ਹੈ। ਭਰੋਸੇ ਦਾ ਨਾ ਹੋਣਾ ਕਿਸੇ ਵੀ ਵਿਆਹੁਤਾ ਰਿਸ਼ਤੇ ਨੂੰ ਮਾਰ ਦੇਵੇਗਾ। ਇਸ ਲਈ, ਜੇ ਤੁਹਾਡਾ ਮਿੱਤਰ ਲੋੜ ਤੋਂ ਜ਼ਿਆਦਾ ਈਰਖਾਲੂ ਜਾਂ ਭਰੋਸਾ ਕਰਨ ਵਾਲਾ ਨਹੀਂ ਹੈ, ਤਾਂ ਜਦੋਂ ਸੰਭਵ ਹੈ ਆਪਣੇ ਰਿਸ਼ਤੇ ਨੂੰ ਖਤਮ ਕਰ ਦੇਵੋ।

8. ਰਿਸ਼ਤੇ ਦੇ ਬਾਰੇ ਤੁਹਾਨੂੰ ਇੱਕ ਅਣਸੁਖਾਵੀਂ ਭਾਵਨਾ ਹੈ; ਖਾਸ ਕਰਕੇ ਜਦੋਂ ਤੁਸੀਂ ਆਪਣੇ ਮਿੱਤਰ ਦੇ ਨਾਲ ਇਕੱਲੇ ਹੁੰਦੇ ਹੋ। ਤੁਹਾਨੂੰ ਅਜਿਹੇ ਖਿਆਲ ਆਉਂਦੇ ਹਨ ਜਾਂ ਤੁਹਾਨੂੰ ਅਜਿਹਾ ਜਾਪਦਾ ਹੈ, “ਕੁਝ ਤਾਂ ਗਲਤ ਹੈ।” ਉਸ ਅੰਦਰੂਨੀ ਸ਼ਾਂਤੀ ਦੀ ਘਾਟ ਵੱਲ ਧਿਆਨ ਦਿਓ।

ਕਹਾਉਤਾਂ 24:3-4, “ਬੁੱਧ ਨਾਲ ਘਰ ਬਣਾਈਦਾ ਹੈ, ਅਤੇ ਸਮਝ ਨਾਲ ਉਹ ਅਸਥਿਰ ਰਹਿੰਦਾ ਹੈ। ਗਿਆਨ ਦੇ ਰਾਹੀਂ ਉਹ ਦੀਆਂ ਕੋਠੜੀਆਂ ਸਭ ਪਰਕਾਰ ਦੇ ਅਣਮੁੱਲ ਅਤੇ ਮਨ ਭਾਉਂਦੇ ਪਦਾਰਥਾਂ ਨਾਲ ਭਰਦੀਆਂ ਹਨ।”

ਇੱਕ ਜੀਵਨ ਸਾਥੀ ਦੀ ਚੋਣ ਕਰਨਾ ਸਭ ਤੋਂ ਜ਼ਿਆਦਾ ਮਹੱਤਵਪੂਰਣ ਚੋਣ ਹੈ ਜੋ ਕੋਈ ਕਰ ਸਕਦਾ ਹੈ। ਪਰਮੇਸ਼ੁਰ ਤਦ ਆਪਣੇ ਬੱਚਿਆਂ ਦੀ ਸਮਝਦਾਰੀ ਨਾਲ ਚੋਣ ਕਰਨ ਵਿੱਚ ਮਦਦ ਕਰਨ ਵਿੱਚ ਪ੍ਰਸੰਨ ਹੁੰਦਾ ਹੈ ਜਦੋਂ ਉਹ ਸੰਭਾਵੀ ਜੀਵਨ ਸਾਥੀਆਂ ਬਾਰੇ ਵਿਚਾਰ ਕਰਦੇ ਹਨ ਅਤੇ ਉਨ੍ਹਾਂ ਨੂੰ ਜਾਣਦੇ ਹਨ।

► ਇਸ ਪਾਠ ਵਿੱਚ ਕਿਹੜਾ ਵਿਸ਼ਾ ਤੁਹਾਡੇ ਲਈ ਨਵਾਂ ਸੀ? ਇਹ ਮਹੱਤਵਪੂਰਣ ਕਿਉਂ ਹੈ? ਇਸ ਨੂੰ ਸਮਝਣਾ ਕਿਵੇਂ ਤੁਹਾਡੇ ਰਿਸ਼ਤਿਆਂ ਵਿੱਚ ਤੁਹਾਡੀ ਮਦਦ ਕਰੇਗਾ? ਇਸ ਨੂੰ ਸਮਝਣਾ ਦੂਸਰਿਆਂ ਪ੍ਰਤੀ ਤੁਹਾਡੀ ਸੇਵਕਾਈ ਨੂੰ ਕਿਵੇਂ ਪ੍ਰਭਾਵਿਤ ਕਰੇਗਾ?

ਸਵਰਗੀ ਪਿਤਾ,

ਸਾਡੀ ਅਗਵਾਈ ਕਰਨ ਅਤੇ ਸਾਡੇ ਲਈ ਮੁਹੱਈਆ ਕਰਾਉਣ ਵਾਸਤੇ ਤੇਰਾ ਧੰਨਵਾਦ। ਉਨ੍ਹਾਂ ਸਿਧਾਂਤਾਂ ਦੇ ਲਈ ਤੇਰਾ ਧੰਨਵਾਦ ਜੋ ਤੂੰ ਸਾਨੂੰ ਆਪਣੇ ਵਚਨ ਵਿੱਚ ਦਿੱਤੇ ਹਨ ਜੋ ਜੀਵਨ ਵਿੱਚ ਮਹੱਤਵਪੂਰਣ ਫੈਸਲੇ ਲੈਣ ਬਾਰੇ ਸਮਝਦਾਰੀ ਨਾਲ ਚੋਣ ਕਰਨ ਵਿੱਚ ਸਾਡੀ ਮਦਦ ਕਰਦੇ ਹਨ।

ਜਦੋਂ ਅਸੀਂ ਇੱਕ ਜੀਵਨ ਸਾਥੀ ਦੀ ਖੋਜ ਕਰਦੇ ਹਾਂ ਤਦ ਸਾਡੀ ਮਦਦ ਕਰ ਕਿ ਅਸੀਂ ਤੇਰੀਆਂ ਤਰਜੀਹਾਂ ਉੱਤੇ ਧਿਆਨ ਦੇ ਸਕੀਏ। ਸਾਡੀ ਉਹ ਪੁਰਸ਼ ਅਤੇ ਇਸਤਰੀਆਂ ਬਣਨ ਵਿੱਚ ਮਦਦ ਕਰ ਜੋ ਤੂੰ ਚਾਹੁੰਦਾ ਹੈਂ ਕਿ ਅਸੀਂ ਬਣੀਏ। ਸਾਡੀ ਮਦਦ ਕਰ ਕਿ ਅਸੀਂ ਹਲੀਮ ਬਣੀਏ ਅਤੇ ਧਰਮੀ ਲੋਕਾਂ ਦੀ ਸਲਾਹ ਨੂੰ ਸੁਣੀਏ।

ਅਸੀਂ ਪਵਿੱਤਰ, ਵਫ਼ਾਦਾਰ ਜੀਵਨ ਜੀਣਾ ਚਾਹੁੰਦੇ ਹਾਂ ਜੋ ਤੈਨੂੰ ਆਦਰ ਦੇਣ।

ਆਮੀਨ

(1) ਆਪਣੀ ਸੇਵਕਾਈ ਦੇ ਸੰਦਰਭ ਵਿੱਚ ਸਿਖਾਉਣ ਲਈ ਇਸ ਪਾਠ ਦੇ ਹਿੱਸੇ ਦੀ ਚੋਣ ਕਰੋ। ਤੁਸੀਂ ਇੱਕ ਵਿਅਕਤੀ ਨੂੰ ਜਾਂ ਜਵਾਨ ਲੋਕਾਂ ਦੇ ਸਮੂਹ ਨੂੰ ਸਿਖਾ ਸਕਦੇ ਹੋ। ਜਦੋਂ ਤੁਸੀਂ ਕਲਾਸ ਦੇ ਬਾਹਰ ਇਹ ਸਿੱਖਿਆ ਦਿੰਦੇ ਹੋ ਤਾਂ ਆਪਣੀ ਕਲਾਸ ਦੇ ਆਗੂ ਨੂੰ ਇਸ ਬਾਰੇ ਦੱਸੋ।

(2) ਲਿਖਤੀ ਰੂਪ ਵਿੱਚ, ਆਪਣੇ ਸੱਭਿਆਚਾਰ ਵਿੱਚ ਇੱਕ ਧਰਮੀ ਪੁਰਸ਼ ਅਤੇ ਇਸਤਰੀ ਦੇ ਰਿਸ਼ਤੇ ਦੇ ਗੁਣਾਂ ਦਾ ਵਰਣਨ ਕਰੋ ਜੋ ਵਿਆਹ ਬਾਰੇ ਵਿਚਾਰ ਕਰ ਰਹੇ ਹਨ ਜਾਂ ਵਿਆਹ ਕਰਨ ਦੀ ਯੋਜਨਾ ਬਣਾ ਰਹੇ ਹਨ।

(3) ਭਾਵੇਂ ਤੁਸੀਂ ਵਿਆਹੇ ਹੋਏ ਹੋ ਜਾਂ ਨਹੀਂ, ਇੱਕ ਸੰਭਾਵੀ ਜੀਵਨ ਸਾਥੀ ਵਿੱਚ ਵੇਖਣ ਲਈ ਚਰਿੱਤਰ ਦੇ ਗੁਣਾਂ ਦੀ ਸੂਚੀ ਦੀ ਸਮੀਖਿਆ ਕਰੋ। ਵਚਨ ਦੇ ਦਿੱਤੇ ਗਏ ਹਰੇਕ ਹਵਾਲੇ ਨੂੰ ਪੜ੍ਹੋ। ਪਰਮੇਸ਼ੁਰ ਤੋਂ ਮੰਗੋ ਕਿ ਉਹ ਵਿਖਾਵੇ ਕਿ ਤੁਹਾਨੂੰ ਕਿਵੇਂ ਵਧਣ ਦੀ ਲੋੜ ਹੈ।

(4) ਜੇ ਤੁਸੀਂ ਕੁਆਰੇ ਹੋ ਅਤੇ ਭਵਿੱਖ ਵਿੱਚ ਵਿਆਹ ਕਰਾਉਣ ਦੀ ਯੋਜਨਾ ਬਣਾ ਰਹੇ ਹੋ, ਇਹ ਵਰਣਨ ਕਰਦੇ ਹੋਏ ਇੱਕ ਸੂਚੀ ਬਣਾਓ ਕਿ ਤੁਸੀਂ ਆਪਣੇ ਜੀਵਨ ਸਾਥੀ ਵਿੱਚ ਕੀ ਵੇਖ ਰਹੇ ਹੋ। ਤੁਹਾਨੂੰ ਇਹ ਆਪਣੀ ਕਲਾਸ ਦੇ ਆਗੂ ਨਾਲ ਸਾਂਝਾ ਕਰਨ ਦੀ ਲੋੜ ਨਹੀਂ ਹੈ, ਪਰ ਤੁਸੀਂ ਬੱਸ ਉਸ ਨੂੰ ਦੱਸੋ ਕਿ ਤੁਸੀਂ ਇਹ ਕਾਰਜ ਪੂਰਾ ਕੀਤਾ ਹੈ।