Lesson 8: Загалмай ба Амилал

Энэ хичээлийн төгсгөлд суралцагч:

(1) Зовлонгийн долоо хоногийн үеэр Есүсийн үйлчлэлд өгсөн ялгаатай хариу үйлдлүүдийг ойлгох.

(2) Инжрийн модыг хараасан нь амьд сургаалт зүйрлэл байсныг ойлгох.

(3) Петрийг бүтэлгүйтэхэд хүргэсэн сул талыг ойлгох.

(4) Загалмай ба амилал нь Христэд итгэгчийн амьдрал, үйлчлэлийн суурь гэдгийг үнэлж цэгнэх.

Үр нөлөөтэй бүхий л үйлчлэл загалмай ба амиллын хүчээр хийгдсэн байдаг.

Зовлонгийн долоо хоног бол Сайнмэдээний номуудын оргил үйл явдал юм. Сайнмэдээний номуудын 89 бүлгээс 30-д нь Есүс Йерусалим руу сүр жавхлантай орсноос амилал хүртэлх долоо хоногийн талаар өгүүлжээ. Иохан номын бараг хагас нь энэ долоо хоногийн тухай өгүүлдэг. Энэ бол Есүсийн бүхий л амьдрал үйлчлэлийн оргил үе юм. Энэ хичээлээр Есүсийн газар дээрх сүүлийн долоо хоногийн үйлчлэлээс бид амьдрал үйлчлэлдээ хэрэгжүүлэхийн тулд суралцана.

► Хичээлийг цааш үргэлжлүүлэхийн өмнө хоёр асуултыг хэлэлц.

• Загалмайн үйл явдал нь теологи болон хувь хүний талаас надад ямар утгатай вэ?

• Амилал нь теологийн болон хувь хүний талаас надад ямар утгатай вэ?

Сайнмэдээг тунхаглагчдын онцлон анхаардаг зүйлсийн нэг бол Есүстэй тааралдсан хүмүүсийн хариу үйлдэл юм. Жишээ нь Есүсийг төрсний дараа мэргэд Түүнийг хүндлэн мөргөж байсныг, өрсөлдөгчөө хөнөөхийг завдсан Херодын хариу үйлдэлтэй Матай номд харьцуулсан байдаг. Иохан номд рабби Никодемын хэрхэн асууж хариулж байгааг худгийн дэргэдэх боловсролгүй самари эмэгтэйтэй харьцуулсан байдаг.

► Матай 10:32-39 эшлэлийг унших.

Есүсийн өгүүлсэн сургаалын тухайд хэн ч төвийг сахих боломжгүй. Бид нэг бол зөвшөөрнө, эсвэл Түүнийг үгүйсгэнэ. Есүсийн үйлчлэл хүмүүсийг хоёр бүлэгт хуваах илд мэт хэмээн дүрслэгдсэн байдаг. Есүст өгсөн хариу үйлдлээрээ гэр бүлүүд ч хуваагдсан бөгөөд Есүсийн өөрийнх нь гэр бүл ч сорилттой учирч байсан юм (Иохан 7:5, Марк 3:21). Тиймээс хэн ч төвийг сахин үлдэж чадахгүй.

Есүст өгсөн эсрэг тэсрэг хариунууд Түүний нийтэд үйлчлэх сүүлийн долоо хоногт улам бүр хурц болжээ. Энэ ялгаатай байдал нь загалмай хүртэл үргэлжилсэн бөгөөд хоёр дээрэмчин ч Есүст хоёр өөр байдлаар хариу өгчээ.

Лазарын амилалд өгсөн хариу үйлдэл

► Иохан 11:1-57 эшлэлийг унших.

Лазарыг амилахаас ч өмнө шашны удирдагчид Есүсийг эсэргүүцэж байсан юм. Сүмийг ариусгасны баяраар Есүсийг Йерусалимын сүмд очих үеэр иудейн удирдагчид Түүнийг буруутгаж, чулуу нүүлгэхийг завдаж байсан. Гэхдээ тахил золиос болох цаг нь болоогүй байсан учраас Есүс зайлан явж, Йерусалим дахь шашны төвөөс хол Йордан голыг гатлан одсон ажээ (Иохан 10:22-42).

Лазарыг үхсэн тухай мэдээ ирэх үед дагалдагч нар нь Есүсийг Иудей руу буцах аюултай боллоо гэж мэджээ. Уншигчид үргэлж Томасын эргэлзээ, гутранги үзлийг элэглэдэг. Гэхдээ тэр Багшдаа үнэнч хүн байсан юм. Тэрээр Есүсийг Иудейд алагдана гэдгийг (зөв) тааварлаж байсан ч үнэнч үлджээ. Тиймээс Есүсийг Иудей рүү буцах гэж зүтгэхэд Томас бусад дагалдагч нарт “Цөмөөрөө бас явцгаая. Тэгээд Түүнтэй хамт үхье гэж хэлэв” гэж хэлж байсан юм (Иохан 11:16). Хожим нь эргэлзсэн удаа байсан ч, энэ айдастай дагалдагч үнэнч хэвээрээ үлдсэнийг бид мартаж болохгүй. Томас Энэтхэг рүү сайнмэдээ тарааж яваад амиа алдсанд гайхах зүйлгүй биш үү?

Бетан шиг жижигхэн тосгонд Лазарыг амилуулсныг нуух аргагүй. Шашны удирдагчдад ч ийм хурц үйл явдлыг нуух боломжгүй байв. Энэ гайхамшигт үйл явдлын тухайд хүмүүс янз бүрийн хариу үзүүлж байсныг Иохан номд дурдсан байдаг.

Олон түмний хариу үйлдэл

Лазарыг амилуулсан тухай мэдээ тархахад ард олон Есүсийг Йерусалимд Ромын ноёрхлыг унагааж, Давидын сэнтийг байгуулна гэж итгэжээ. Тэд Есүсийг амлагдсан Мессиа гэж итгэж байв. “Мариагийнд ирсэн иудейчүүд дундаас олон хүн Есүсийн үйлдсэнийг хараад Түүнд итгэжээ” (Иохан 11:45 and 12:11). Есүсийг асар олон хүн дагаж байсан учраас фарисайчууд “Харцгаа, Түүний араас ертөнц даяараа дагалаа” гэж хэлж байсан (Иохан 12:19). Үүнээс болоод Есүсийг илжиг унан Йерусалимд орж ирэхэд цугласан олон маш их урам зоригтой байжээ.

Шашны удирдагчдын хариу үйлдэл

Лазарын амиллаас болоод шашны удирдагчдын хувьд өөрийгөө Мессиа гэж мэдэгдсэн Есүсийн үгийг үл тоомсорлох боломжгүй болжээ. Олон түмэн Есүс рүү ханарах үед шашны удирдагчдад хоёр л сонголт байв.

1. Есүс өөрийгөө хэн гэж байгааг хүлээн зөвшөөрөх. Гэхдээ ингэвэл тэд эрх мэдлийн төлөөх хүслээ орхих шаардлагатай. Есүс тэдний хоёр нүүрт байдлыг аль хэдийн буруушаасан учраас хэрэв тэд Есүсийг Мессиа гэж хүлээн зөвшөөрвөл иудейчүүдийг удирдах шашны эрхээ алдах байв.

2. Есүсийг барьж, хөнөөх. Хэрэв тэд Есүсийг Мессиа гэж хүлээн зөвшөөрөхөөс татгалзсан бол Түүнийг хөнөөх ёстой.

Шашны удирдагчид Есүсийг хөнөөх шийдвэрээ үндэстнийхээ төлөө гэж зөвтгөж байлаа. Түүхэнд байсан сул дорой удирдагчид шиг тэд шийдвэртээ “Юу хийх вэ? Энэ хүн олон тэмдэг үйлдэж байна. Хэрэв бид Түүнийг ингээд орхивол бүх хүн Түүнд итгэнэ. Тэгвэл ромчууд ирж, манай газар болон үндэстнийг маань сүйтгэнэ” хэмээн шалтаглажээ (Иохан 11:47-48). Тэд Есүсийг Ромын эсрэг хувьсгал хийнэ хэмээн айж байв. Түүний хаанчлал сүнслэг гэдгийг тэд ойлгоогүй юм.

“Манай газар” гэсэн нь Йерусалимын сүм, “үндэстнийг маань” гэсэн нь Ромоос иудейчүүдэд олгосон эрх чөлөөг хэлсэн бололтой (Үйлс 6:13, Үйлс 21:28-г үз). Хэдийгээр Иудей Ромын мэдэлд байсан ч иудейчүүд сүмдээ мөргөл үйлдэх, шашны хуулийг дагаж мөрдөх, мөн Санхедринаараа дамжуулан зарим иргэний хэргийг шийдвэрлэх засаглалтай байхыг зөвшөөрдөг байв. Хэрэв Ром бослогыг дарвал энэ бүхэн алга болно.

Түүнчлэн Каиаф Санхедрин зөвлөлд бүх үндэстнээрээ зовсноос нэг хүн үхэх нь дээр хэмээн итгүүлсэн юм (Иохан 11:49-50). Егөөтэй нь, Есүсийг хөнөөсний дараа Санхедрины айдас биелжээ. Есүсийн үхлээс 40 жилийн дараа ромчууд иудейн шашны сүмийг сүйтгэж, иудейчүүдийн эрхийг булаан авснаар Каиафын сэргийлэх гэж оролдсон бүхнийг бодит болгожээ.

Тэд Есүсийн үйлдсэн гайхамшгуудын нотолгоог нууж чадахгүй учраас Санхедрин зөвлөл үндэстнээ хамгаалахын төлөө Есүс Лазар хоёрыг хөнөөхөөр шийдсэн байна (Иохан 11:53, Иохан 12:10). Гайхамшгаар үл итгэгчдийг итгүүлэх албагүй. Бид ихэвчлэн “Хэрэв Бурхан өөрийгөө гайхамшгаар баталсан бол бүгд итгэх байсан” гэж боддог. Гэхдээ гайхамшиг нь эргэлздэг хүмүүсийг үл итгэх байдалд нь хатууруулж болно.

Баян эр Лазар хоёрын тухай (амилсан Лазар биш) түүхэнд баян эр Абрахамаас Лазарыг өөр рүү нь явуулахыг гуйхад Абрахам “Хэрэв тэд Мосе ба Эш үзүүлэгчдийг сонсдоггүй юм бол үхэгсдээс хэн нэг нь амилсан ч тэд үнэмшихгүй биз дээ” (Лук 16:31) гэж хариулсан байдаг. Бичвэр өөрөө үнэнийг хангалттай гэрчилдэг. Хэрэв бид Бичвэрээс татгалзвал бусад нотолгоо биднийг итгүүлж чадахгүй.

Есүст үзүүлсэн хариу үйлдэл: Мариа

► Матай 26:6-13 ба Иохан 12:1-11 эшлэлийг унших.

Есүсийг газар дээрх үйлчлэлийнх нь туршид дагалдсан хайртай дагалдагчдын нэг нь Лазар, Марта хоёрын дүү Мариа байв. Өмнө нь Мариаг Есүсийн хөлд суугаад сургаал сонсож байхад Марта зочлох ажлаасаа болж гомдоллосон удаатай. Тэгэхэд Есүс “Өөрөөс нь булаагдашгүй сайныг сонгон авчээ” хэмээн Мариаг магтсан юм (Лук 10:42).

Үхэхээсээ долоо хүрэхгүй хоногийн өмнө Есүс дагалдагч нартайгаа уяман өвчтэй байсан Симоны гэрт очжээ. Лазар ба дүү охид нь энэ бүлэгт уригджээ. Хоолны үеэр Мариа Есүсийн толгой, хөл дээр үнэтэй тос асгав. Энэ тос нь гурван зуун денар буюу нэг жилийн цалинтай тэнцэх үнэтэй эд байв. Банк гэж байхгүй цаг үед тэр нь Мариагийн хадгаламж байсан болов уу.

Дагалдагчид мөнгө дэмий үрлээ хэмээн Мариад уурласан боловч (Матай 26:8, Марк 14:5), Мариа зөвхөн Есүсийн санаа бодлыг л анхаарч байлаа. Мариа бусдын санаа бодлыг үл хайхран, хайраар ийн үйлджээ. Түүнд тос ямар үнэтэй, хүмүүс юу гэж бодох нь хамаагүй байв. Тэрээр Эзэнийгээ мөргөн хүндэтгэж байсан бөгөөд юу ч хамаагүй байлаа.

Дагалдагчид Мариагийн үйлдлийг эсэргүүцэхэд, Есүс тэднийг зэмлэж, “Түүнийг орхи … Энэ эмэгтэй Надад сайныг үйлдэв” (Марк 14:6) гэжээ. Загалмай үхэл хэдхэн хоногийн дараа байгааг мэдэж байсан Есүс Мариагийн энэ үйлдлийг бэлгэдэл хэмээн үзэж, “Энэ эмэгтэй... Намайг оршуулгад минь бэлтгэв” (Матай 26:12) гэсэн юм. Тэрээр өөрийгөө умартан хамгийн сайнаа өргөж, хүндэтгэн мөргөж буй тэр эмэгтэйг хүндэлжээ.

Мариа ийнхүү Есүсийг тосолсон тухай бид уншихдаа “Би Есүст хэр их хайртай вэ? Би Түүнийг илүү анхаардаг уу, хажуугийн хүмүүсийн санаа бодлыг илүү анхаардаг уу?” хэмээн өөрсдөөсөө асуух учиртай. Мариа Есүст үнэхээр хайртай байсан.

Есүст үзүүлсэн хариу үйлдэл: Сүр жавхлантай ирэлт

► Матай 21:1-11 ба Иохан 12:12-19 эшлэлийг унших.

Ням гарагт Есүс илжиг унасаар Йерусалим хотод орж иржээ. Энгийн өдөр бол үүнд ямар нэг онцгой зүйл байхгүй. Галилын нэг багш цөөн хэдэн дагалдагчаа дагуулаад Йерусалим хотод Алгасал баяр тэмдэглэхээр орж ирж байгаа төдий. Гэвч энэ удаагийн ирэлт ердийн бус байв. Лазарыг амилуулсан үйл явдал нь тухайн Алгасал баярын мөргөлийг шашин, улс төрийн мэдэгдэл болгон өөрчилсөн хэрэг.

Матай номд Есүсийн ийнхүү Йерусалимд орж ирсэн үйл явдлыг шашны талаас онцлон харуулсан. Матай үүгээр Есүсийн сүр жавхлантай ирэлт нь Зехариагийн эш үзүүллэгийн биелэл хэмээн харуулжээ. Хурсан олны үг нь Дуулал 118, Алгасал баярын Дуулалаас авсан бөгөөд Йерусалимд сүр жавхлантай орж ирж буй тухай дүрсэлсэн байдаг (Матай 21:4-11, Зехариа 9:9, Дуулал 118:26).

Энэхүү цуваа улс төрийн далд утгаар дүүрэн байв.

• Хаанд захирагдахаа илэрхийлэн олон түмэн зам дээр хувцсаа дэлгэн тавьжээ (Матай 21:8, 2 Хаад 9:13).

• Маккабигийн үеэс дал модны мөчир нь дайснаа ялахын бэлгэдэл болж байв (Иохан 12:13, 1 Маккаби 13:51).

• “Хосанна!” нь “биднийг авраач” хэмээн аврал гуйсан үг юм.

• “Давидын Хүүд” хаан удмын Мессиаг дуудах нэр өргөмжлөл байжээ.

Хүмүүс Есүсийг Ромын дарлалыг устгаж, хаанчлалаа байгуулахаар Йерусалимд орж ирлээ гэж итгэж байв. Давидын удмын хааныг хүлээсэн удаан хугацааны хүлээлт дууслаа. Эш үзүүлэгчдийн амласан амлалтууд удахгүй биелэхээр болов.

Эдгээр хашхирч байсан хүмүүсийн дундаас олон хүн хэдхэн хоногийн дараа “Түүнийг цовдол!” хэмээн хашхирсан юм. Яагаад? Яагаад гэвэл тэд Есүсийг буруу шалтгаанаар дэмжиж байсан хэрэг. Тэд Есүсийг Ромыг түлхэн унагана гэж итгэж байсан, гэтэл Түүнд цэргийн бослого удирдах бодол байсангүй. Хүмүүс улс төрийн хаанчлалыг хүсэж байхад, харин Есүс сүнслэг хаанчлалыг авчирчээ. Урам нь хугарсан олон түмэн тун удалгүй Есүсийн эсрэг эргэсэн юм.

Улс төрийн хувьд хүчирхэг, нийгмийн элит гишүүдээс бүрдсэн Санхедрин зөвлөлийнхөн Есүсийг хөнөөхөөр хэдийн шийдсэн байв. Хүчгүйчүүд ч тун удалгүй Түүний эсрэг эргэх болно. Өмнө нь юу хүлээж байгааг мэдэж байсан тул Есүс өөрийг нь үгүйсгэх тэр хотын хувь заяаны төлөө уйлсан юм (Лук 19:41-44). Есүс сүр жавхлантайгаар Йерусалимд орж ирсэн нь улмаар загалмай руу хөтөлнө гэдгийг мэдэж байсан. Хурсан олон Дуулал 118:26-г эш татан “ЭЗЭНий нэрээр Ирэгч нь ерөөлтэй еэ!” гэж хашхирч байсан ч Есүс тэрхүү дууллын дараах мөр болох “Тахилын ширээний эврэнд тахилыг уяагаар холбогтун” гэсэн байдгийг мэдэж байлаа (Дуулал 118:27). Есүс удалгүй тахилын ширээнд холбогдож, Ромын загалмай дээр тахил золиос болохоор Йерусалим хотод орж иржээ.

► Марк 11:12-25 эшлэлийг унших.

Синоптик Сайнмэдээний номууд тус бүрд Есүс олон түмэнд үйлчлэх сүүлийн долоо хоногтоо үржил шимгүй инжрийн модыг харааж байсан түүхийг багтаасан байдаг. Есүс Бетанд хоносны дараа Даваа гарагт Йерусалим руу ирж явахдаа тэр инжрийн модыг хараасан юм. Ердөө 24 цагийн дотор мод хатсан байхыг Мягмар гарагт дагалдагчид харжээ.

Хэдийгээр инжрийн цаг болоогүй (Марк 11:13) байсан ч, навч байгаа л бол ногоон инжир байх ёстой гэсэн үг. Инжрийн модны жимс нь навч гарсны дараа богино хугацаанд ургадаг. Тиймээс инжрийн модонд эрт ургацын инжир гараагүй бол тэр мод тэр жилдээ үр жимсээ өгдөггүй байжээ.

Энэ түүх бол үр жимс ургуулах Израилын тухай амьд сургаалт зүйрлэл юм.[1] Израил бол Бурханы ерөөхөөр сонгосон үндэстэн (Эхлэл 12:3).

Гэтэл Израил ИАВЭгийн нэрд ичгүүр авчирчээ. Йерусалимын сүм бол бүх үндэстний залбирлын гэр болох ёстой байв (Исаиа 56:7). Гэтэл энэ сүмд хүчирхэг тахилчид ядуу хүмүүсийг хуурч мөлждөг дээрэмчдийн үүр болжээ. Инжрийн мод үр жимсгүй, Израил ч бас үр жимсгүй болжээ. Инжрийн мод гологдсон, Израил ч удалгүй гологдох болно.

Есүс олны дунд үйлчлэх сүүлийн долоо хоногийнхоо үеэр шүүлтийн тухай ярьсан цуврал сургаалын нэг нь хараагдсан инжрийн мод юм.

1. Жимсгүй инжрийн модны тухай сургаалт зүйрлэл (Марк 11:12-14, 20-25).

2. Сүмийг цэвэрлэсэн нь (Марк 11:15-19).

3. Итгэмжгүй түрээслэгчдийн тухай сургаалт зүйрлэл (Марк 12:1-12).

4. Шашны удирдагчидтай маргалдсан нь (Марк 12:13-40).

5. Есүс сүмийн сүйрлийг зөгнөсөн нь (Марк 13:1-37).

Есүст үзүүлсэн хариу: Шашны удирдагчид

► Матай 21:23-22:46 эшлэлийг унших.

Лазарыг амилуулсны дараа шашны удирдагчид Есүсийг алахаар шийдсэн. Гэхдээ Есүс энгийн ардуудын дунд нэр хүндтэй учраас үүнийг хийх хэцүү байв. Тэд олны нүдэн дээр Есүсийг гутаах ямар нэг арга хайж байлаа. Тэгээд Есүсийг Йерусалимд сүр жавхлантай ирсэн өдөр шашны удирдагчид сүмд хэд хэдэн сөргөлдөөн зохион байгуулжээ. Тэд Есүсийг урхинд оруулах гэж оролдсон хэдий ч, дахин дахин бүтэлгүйтсээр байв. Харин Есүс мэргэн ухаанаараа олны өмнө шашны удирдагчдыг ичгүүрт оруулж байсан.

Эхлээд ахлах тахилчид ба ахлагчид Есүсээс сүмийг цэвэрлэж, тэнд сургаал заах ямар эрхтэйг шалгаажээ. Есүс тэднийг баптисч Иоханы тухай асуултаар таг болгов.

Есүс тэгээд шашны удирдагчдыг буруушаасан гурван сургаалт зүйрлэл ярьсан. Хоёр хүүгийн тухай сургаалт зүйрлэл нь шүтлэг биш, дуулгавартай байдал л Бурханы хаанчлалын харилцааг баталгаажуулна гэдгийг харуулдаг. Харин хорон муу түрээслэгчдийн тухай сургаалт зүйрлэл нь Есүсийн Мессиа гэдгийг үгүйсгэх нь ямар үр дагавартай болохыг харуулдаг. Сүүлийнх нь найранд уригдсан шашны удирдагчид гологдож, оронд нь найрын урилгад хариу өгсөн дорд хүмүүс таалал хүртэх тухай өгүүлсэн найрын тухай сургаалт зүйрлэл.

Есүсийг гутаахаар шийдсэн шашны удирдагчид Түүнийг урхинд оруулах гэж хэд хэдэн асуулт асуужээ. Тэд үнэнийг суралцах зорилгогүй, харин Есүсийг сүйрүүлэх л зорилготой байв. Тэдний үнэнийг хүсдэггүй байдлыг Есүс мэдэж байсан учраас асуултад нь шууд хариулаагүй юм.

Есүсийг үгээр нь унагах гээд чадаагүй тул шашны удирдагчид бууж өгөв. Матай энэ хэсэгт тэднийг ялагдлыг “Хэн ч хариуд нь Түүнд үг хэлж чадаагүй бөгөөд тэр өдрөөс хойш нэг ч хүн Түүнээс юм асууж зүрхэлсэнгүй” хэмээн илэрхийлсэн байна (Матай 22:46). Марк эдгээр сөргөлдөөнийг харсан энгийн хүмүүсийн баяр хөөрийг дурдаж, “Хурсан олон Түүнийг дуртайяа сонсож байв” гэсэн байдаг (Марк 12:37).

► Пастор эсвэл Христэд итгэгч удирдагчийн хувьд та хэцүү асуултуудтай байнга тулгарах болно. Та чин сэтгэлийн асуулт болон таныг урхинд оруулах асуулт хоёрыг яаж ялгах вэ? Ийм хоёр янзын асуултад өгөх хариу чинь юугаараа ялгаатай байх вэ? (Ийм ялгаа бүхий жишээг Сургаалт үгс 26:4-5–с үз)

► 1 Коринт 15:1-8 эшлэлийг унших.

Есүсийг дээш өргөгдсөнөөс хойш 20 жилийн дараа Паул Коринт хотод чуулган тарьжээ. Энэ чуулган янз бүрийн нөхцлөөс итгэсэн хүмүүсээс бүрдсэн байв. Энэ чуулганд иудей Бичвэрийг мэддэг иудейчүүд болон Бурханы тухай юу ч мэдэхгүй харь үндэстнүүд ч нэгдсэн байлаа.

Коринт чуулган хагаралд автаж, бас хуурамч сургаалын заналхийлэлд орж байсан. Эдгээр асуудалд Паул хариулахдаа анх номлосон сургаалаа сануулсан юм. Харь шүтлэг өргөн тархсан хотод хандсан Паулын анхны сургаал нь дөрвөн түүхэн үйл явдал дээр төвлөрч байсан.

• Христ бидний нүглийн учир үхсэн,

• оршуулагдан,

• гурав дахь өдөртөө амилуулагдсан.

• Тэр олны өмнө эхлээд Кеф, 12 дагалдагч нарт, улмаар 500 ахан дүүст нэг мөчид үзэгдсэн бол Иаков, бүх элч нарт, эцэст нь Паулд үзэгджээ.

Коринтчуудад бичсэн Паулын эхний үг нь загалмайн тухай “Христ бидний нүглийн учир үхсэн” гэсэн үг байв. Загалмайн тухай мэдээ бол Христэч итгэл үнэмшлийн гол цөм юм.

Хуучин гэрээнд тахилын хонь авчирсан хүн гараа хонины толгой дээр тавьж, тахилын малын үхэлтэй холбогддог байжээ. Мөргөн хүндлэгч нь тахилын толгой дээр гараа тавьснаар “Энэ мал миний өмнөөс үхэж байна. Би нүглийнхээ оронд үхэх ёстой байсан” гэсэн утгыг илтгэдэг байж. Үүний нэгэн адилаар бид нүглийхээ төлөөсөнд үхэх ёстой байсан ч, Христ бидний оронд үхсэн юм. Бид үхвэл зохих байсан ч, Тэр үхсэн учраас бид амьд үлдэх болсон.

Тэр ташуурдуулсан уу?

Тэр ташуурын ормоор биднийг эдгээхийн тулд тэгсэн юм.

Тэр буруугүй атлаа буруутгагдсан уу?

Гэм буруутай биднийг цагаатгахын тулд тэгсэн юм.

Тэр өргөст титэм өмссөн үү?

Бидэнд алдрын титэм өмсгөхийн тулд тэгсэн юм.

Тэр хувцсаа тайлсан уу?

Биднийг мөнхийн зөвт байдлын хувцсаар хувцаслахын тулд тэгсэн юм.

Тэр шоолуулж, доромжлуулсан уу?

Биднийг хүндэтгэж, ерөөхийн тулд тэгсэн юм.

Тэр хэрэгтэн мэт тооцогдож, гэмтнүүдийн дунд тоологдсон уу?

Биднийг гэмгүйд тооцож, хамаг нүглээс маань хэлтрүүлэхийн тулд тэгсэн юм.

Тэр өөрийгөө аврах боломжгүй гэж зарласан уу?

Тэр эцэстээ бусдыг аврахын тулд тэгсэн юм.

Тэр эцэстээ хамгийн шаналантай, гутамшигтай үхлээр үхсэн үү?

Эцэстээ биднийг мөнх амьдруулж, өндөрт өргөмжлөхийн тулд тэгсэн юм.”

- Жон Чарльз Райл[1]

Баривчилгаа

► Матай 26:1-5, 14-56 эшлэлийг унших.

Зовлонгийн долоо хоногийн Лхагва гарагт Есүс хоёр өдрийн дараа үхнэ гэдгээ эш үзүүлжээ. Санхедрин зөвлөлийнхөн Алгасал баярын дараа хүмүүс хотыг орхин явсан хойгуур Есүсийг баривчлахаар төлөвлөсөн нь энэ эш үзүүллэгээс даруй 9 хоногийн өмнө байв. Гэхдээ Иудас Эзэнээсээ урвахыг зөвшөөрсөн тул тэд Есүсийг дагалдагчдын нэгийнх нь тусламжтайгаар баривчлахаар болсон юм.

[1]Ахлах тахилчдад яагаад Иудас хэрэг болов? Тэд Есүсийг олон түмнээс хол байхад нь баривчлах хэрэгтэй байсан. Есүс олны дунд нэр хүндтэй байсан учраас хэрэв Түүнийг олны өмнө баривчилбал үймээн гарах нь тодорхой байв.

Есүс дагалдагч нартайгаа Алгасал баярын зоог барьсны дараа залбирахаар Гетсемани цэцэрлэг рүү явсан. Загалмай дээр тарчлах биеийн зовлон, Эцэг Бурханаас тусгаарлагдах сүнслэг шаналантай тулгарсан Есүс “Эцэг минь, болж өгвөл Надаас энэ аягыг өнгөрүүлээч. Гэвч Миний хүслээр биш, харин Таныхаар болог гэж залбирлаа” (Матай 26:39). Есүс ийм туйлын хүнд сорилтын өмнө ч Эцэгийн хүсэлд захирагдсан юм.

Тэр үдэш Иудас бөөн хүн дагуулан Есүсийг баривчлахаар ирэв.[2] Тэрээр Есүсийг үнсэлтээрээ зааж өгөхөд Есүс цэргүүдэд хандан ингэж хэлжээ. “Есүсийг тэдэнд “Тэр чинь Би байгаа юм” гэхэд тэд ухарч газар унацгаав” (Иохан 18:6). Энэ бүлэг цэрэг үхлийн хүчийг атгасан хүнээс айж байлаа. Дайснууд нь биш, харин Есүс нөхцөл байдлыг удирджээ. 19-р зууны номлогч Октав Винслов “Есүсийг хэн үхэлд тушаасан бэ? Мөнгөнд шунасан Иудас биш, айдаст хөтлөгдсөн Пилат биш, атаархсан иудейчүүд ч биш. Харин хайрынхаа төлөө Эцэг Бурхан тушаасан!”[3] гэсэн байдаг.

Шүүлт

► Матай 26:57-27:26, Лук 22:54-23:25, Иохан 18:12-19:16 эшлэлийг унших.

Есүсийг шүүх хэрэг явдалд Иудейн шүүх болон Ромын шүүх хоёулаа оролцжээ. Иудейн хууль нь эртний эрх зүйн тогтолцооны дундах хамгийн хүмүүнлэг хууль байсан. Иудейн хууль амийг хамгаалахын төлөө боломжтой бүхнийг хийдэг хууль байв. Ромын хууль харин чанд хатуу, цогц байдлаараа алдартай байлаа. Эдгээр хуулиуд эрт үеийн дэлхийн хамгийн шилдэг хууль эрх зүйн тогтолцоо байсан боловч, нүгэлтнүүд Бурханы Хүүг хөнөөх явдлаас хамгаалж чадаагүй юм.

Есүсийг баривчилснаас хойших хэдэн цагийн туршид зургаан удаа шүүхийн сонсгол хийжээ. Үүнд иудейн шашны шүүх, Ромын шүүх багтаж байв. Иудейн хуулийн дагуу бол Есүсийг шүүсэн иудейчүүдийн шүүх нь хууль бус байсан гэж түүхчид үздэг. Есүсийг буруутгах гэж яарсандаа Санхедрин зөвлөлийнхөн дараах алхмуудыг хийсэн.

• Шөнө шүүх ажиллагаа явуулсан (хууль бус)

• Есүсийг баривчлахаас өмнө албан ёсоор буруутгаагүй (хууль бус)

• Есүсийг өмгөөлөх гэрч нарыг дуудаагүй (хууль бус)

• Иудейн хуулинд зааснаас илүү хурдан яаралтай шүүх хурал хийсэн (хууль бус)

Егөөтэй нь, тэд Алгасал баяраас өмнө Есүсийг цовдолж, баяраас өмнө биеийг нь зайлуулахын тулд энэ бүхэн тохиолдсон юм. Тэд Алгасан баярын хургыг зохих ёсоор нь идэх гээд Бурханы Хургыг алжээ!

Шүүх ажиллагааны явц

(1) Аннасын өмнөх иудейн шүүх хурал (Иохан 18:12-14, 19-23)

Аннас насан туршдаа тэргүүн тахилч байжээ. Ромчууд Аннасыг хүргэн Кайафаар нь сольсны дараа ч ихэнх иудейчүүд Аннасыг “тэргүүн тахилч” гэх цолоор нь дууддаг байв. Тиймээс Аннасын өмнөх сонсгол нь албан бус бөгөөд ямар нэг ял тулгаагүй, гэрч оролцоогүй юм.

(2) Санхедрин зөвлөлийн өмнөх иудейн шүүх хурал (Матай 26:57-68)

Санхедрин зөвлөлийн бүрэн бүрэлдэхүүний өмнөх анхны шүүх хурал өглөөний 02:00 цагт болсон бололтой. Тэд албан ёсны шүүх хурлыг нар мандахаас өмнө хийж чадахгүй байсан хэдий ч, иудейн удирдагчид илүү хурдан явуулахыг хүсэж байв. Шөнийн шүүх хурал албан бус байсан ч, Санхедрин зөвлөлийнхөн албан бус шүүх сонсгол явуулж, Бурханыг доромжилсон хэргээр Есүсийг яллаж, үхэх ял оногдуулах ёстой хэмээн үзсэн байна.

(3) Санхедрин зөвлөлийн өмнөх албан ёсны шүүх хурал (Лук 22:66-71)

Өглөө болоход зөвлөлийнхөн албан ёсны шүүх хурал хийв. Энэ хурал дээр тэд Есүсийг Бурханыг доромжилсон хэмээн албан ёсоор буруутгажээ.

(4) Пилатын өмнөх Ромын эхний шүүх хурал (Лук 23:1-5, Иохан 18:28-38)

Ромчууд Санхедрин зөвлөлд гэмт хэрэгтнүүдийг цаазаар авах эрх олгодоггүй байв (Иохан 18:31). Тэд цаазын ялыг Пилатаар гаргуулах гэсэндээ Бурханыг доромжилсон хэмээн Есүсийг буруутгаж байснаа, улс төрийн бослогын ял болгон өөрчилжээ. Тиймээс Есүсийг “манай үндэстнийг төөрөгдүүлэн, Цезарьт татвар төлөхийг хорьж, Өөрийгөө Христ, Хаан гэж байхыг нь бид харсан гэсэнд” (Лук 23:2) хэмээн буруутгасан юм.

Алгасал баярын өдрүүдэд иудейчүүд бузартвал баярын зоогийг идэж чадахгүй болдог учраас үүнээс зайлсхийж, Ромын ямар нэг байшинд ордоггүй байжээ. Тэд ордонд орохгүй учраас Пилат ордны хаалганы гадаа зам дээр шүүхийн сонсголыг явуулсан юм.

(5) Херод Антипасын өмнөх Ромын шүүх хурал (Лук 23:6-12)

Есүсийг гэмгүй гэдгийг Пилат мэдэж байв. Гэхдээ иудей удирдагчдын уурыг хүргэхийг хүссэнгүй. Пилат Есүсийн тухайд “Галилаас эхлэн энэ газрыг хүртэл, Иудейн бүх нутгаар сургаалаа заан ард олныг өдөөн хатгаж байна гэж шаардангуй” хэлэхийг сонсоод (Лук 23:5) энэхүү хүнд байдлаас зайлсхийхээр шийджээ. Алгасал баярын долоо хоногийн үеэр Галилын захирагч Херод Антипас Йерусалимд ирсэн байв.[4] Есүс Галилаас гаралтай тул Пилат энэ хэргийг Херодоор шүүлгэхийг хүсжээ. Тэгээд Пилат Есүсийг Херод руу явуулсан боловч Херод энэ хэрэгт оролцохыг хүссэнгүй.

(6) Пилатын өмнөх сүүлчийн шүүх хурал (Матай 27:15-26, Лук 23:13-25, Иохан 18:39-19:16)

Есүсийг буцаагаад авчрах үед Пилат өөр шийдэл хайж байлаа. Тэрээр Есүсийг гэмгүй гэдгийг мэдэж байсан тул “та нарын өмнө Түүнийг байцаагаад, Түүний эсрэг та нарын мэдүүлээд байгаа гэм бурууг энэ хүнээс би ер олсонгүй” гэжээ (Лук 23:14). Пилат гэмгүй Есүсийг яллахыг хүсээгүй юм.

Иудейн удирдагчид Пилатыг үнэнч бус байсан гэж Цезарьт мэдэгдэнэ хэмээн заналхийлсэн учраас Пилат тэдний шаардлагад бууж өгөв. Пилат сул дорой удирдагч байсан. Өмнө нь Пилат цэргүүдэд эзэн хааны дүрсийг бариулан Йерусалим руу оруулж, үүнээс болоод үймээн гарахад хүрч байв. Иудейчүүд Пилатын ордны гадаа 5 хоног хуран цуглаж эсэргүүцэл илэрхийлжээ. Пилат жагсагчдыг ална гэж заналхийлэхэд жагсагчид ариун хотод Цезарийн дүрсийг залснаас үхсэн дээр хэмээн зарласан аж. Тиймээс Пилат ухрахаас өөр аргагүй болж байжээ.

Ийм явдал тохиолдож байсан учраас Пилат иудейчүүдээс айж байлаа. Ялангуяа Ром дахь дээд захирагч Сежанус нь Иудейг захирах Пилатын чадварт итгэхгүй байв. Тиймээс хэрэв Есүсийг суллавал Цезарьт гомдол гаргана гэсэн иудейн удирдагчдын заналхийллээс болоод Пилат тэдэнд Түүнийг цовдлуулахаар өгчээ (Иохан 19:16). Пилат Есүсийг гэмтэй гэдэгт итгэсэндээ үхэх ял оноогоогүй, харин өөрийнхөө сул дорой байдлаас болж ийнхүү зөвшөөрчээ.

Шүүх хурал болох зуур Петр Есүсийг үгүйсгэв.

Алгасал баярын зоогийн үеэр Есүс Петрт “Үнэнээр үнэнээр Би чамд хэлье. Тахиа донгодохоос өмнө чи Намайг гурвантаа үгүйсгэх болно” гэж хэлж байсан (Иохан 13:38). Ингээд Есүсийг шүүгдэж байх үед Петр Есүсээс гурвантаа урважээ.

Петрийн ичгүүртэй уналтын тухай уншиж байхдаа бид Петрийг тэр шөнө урвасан цорын ганц хүн биш гэдгийг санах хэрэгтэй. Зөвхөн Петр Иохан хоёр л шүүх хурлын дэргэд байсан. Харин бусад дагалдагчид айсандаа зугтаасан шүү дээ.

Петр Есүст хайртай байсан нь тодорхой. Тэгвэл Петр яагаад унав? Бид өмнөх бүлгээр Есүсийн сорилтын талаар болон сорилтын үед яах ёстой талаар суралцсан. Харин Петрийн уналтаас сорилт тулгарах үед бидэнд тус болох сэрэмжлүүлгийг харж болно. Петрийн уналтад нөлөөлсөн багадаа хоёр шинж байсныг харж болно.

(1) Хэт өөртөө итгэлтэй байх

Сатаны дайралтыг Есүс сэрэмжлүүлэх үед Петр “Би Тантай хамт үхэх ёстой болсон ч Таныг үгүйсгэхгүй” гэж бардамнажээ (Матай 26:35). Бид өөртөө хэт итгэлтэй байх үедээ унаж бүдэрдэг. Бид зөвхөн Сүнсний хүчээр л ялалттай итгэгчийн амьдралаар амьдардаг. Хэт их итгэлтэй байх нь сүнслэг уналтын эхний алхам юм.

(2) Залбиралгүй байх

Гетсемани цэцэрлэгт байхдаа Есүс дагалдагч нартаа “Та нар уруу татагдахгүйн тулд залбирцгаа” гэж сануулсан (Лук 22:40). Айсуй сорилттой тулгарах хүч чадлын төлөө залбирахын оронд Петр унтаж байсан.

Залбиралгүй байх нь сүнслэг талаар уналтад ороход нөлөөлдөг. Идэвхитэй залбиралгүйгээр ялалттай итгэгчийн амьдралаар амьдрах боломжгүй. Сатан Христэд итгэгч ажилчдыг залбирах цаггүй болтол нь олон үйл ажиллагаанд татан оролцуулахыг оролддог. Хэрэв бид залбирах завгүй явах юм бол тун удахгүй унах болно гэдгийг Тэр мэднэ.

► Өөрийнхөө христитгэлийн амьдрал, үйлчлэлийг эргээд хараарай. Сорилтод орж байсан талбар, унахад ойрхон очсон үеэ бодоорой. Уналтад ороход ямар хүчин зүйл нөлөөлсөн бэ? Хэт итгэлтэй болоход хүргэсэн үйлчлэлийн ямар нэг амжилт танд байсан уу? Залбиралд хангалттай цаг зарцуулаагүйгээс уналтад хүргэсэн тун завгүй үе танд байсан уу? Ирээдүйд анхааруулга болох өөр хүчин зүйлс байв уу?

Шүүлтийн үеэр Иудас амиа хорлов.

Матай Петрийн үгүйсгэлийн тухай өгүүлээд залгуулаад Иудасын амиа хорлолтын тухай хэлдэг. Иудас урвалтаа хараад бодлоо өөрчилж, 30 мөнгөн зоосыг ахлах тахилч, ахлагчдад аваачиж өгөөд “Би гэм зэмгүй цуснаас урваснаараа нүгэл үйлдлээ” (Матай 27:3-4) гэсэн. Иудас урвасныхаа хөлсөнд авсан мөнгөө шидээд, явж өөрийгөө дүүжилжээ (Матай 27:5). Иудас насан туршдаа гэм буруу үүрч явснаас амиа хорлохыг илүүд үзсэн аж.

Матай номд Петрийн гэмшил, Иудасын харуусал хоёрыг зэрэгцүүлэн харуулсан байдаг. Петр Иудас хоёр хоёулаа хийсэн зүйлдээ гэмшиж байсан. Гэхдээ Матай Иудасын тухай өгүүлэхдээ гэмшлийг илэрхийлдэг жирийн үг биш, харин бодлоо өөрчилснийг илэрхийлдэг үгийг ашигласан байна. Энэ ялгаа нь хүмүүс нүглийн буруутгалд ямар хариу үзүүлдгийг ойлгоход тустай.

Паул ч (нүглийн үр дүнд) үүссэн харуусал, гэмшил хоёрын ялгааг (нүгэлдээ харамсаж, чиглэлээ өөрчлөх) бичсэн байна. Элч маань захидалдаа “Бурханы дагуух гашуудал нь авралд хүргэдэг гэмшлийг бий болгодог. Харин ертөнцийн гашуудал үхлийг бий болгодог” (2 Коринт 7:10) гэжээ.

Бурханлаг гашуудал нь жинхэнэ гэмшлийг авчирч аврал, амь руу хөтөлнө. Дэлхийн уй гашуу нь зөвхөн буруутгал, үхэл рүү хөтөлнө. Петр, Иудас хоёр хоёулаа харамссан хэдий ч, зөвхөн Петр л гэмшжээ.

Иудас урвалтынхаа үр дагаврыг хараад ичгүүр, буруутгалыг биш үхлийг сонгосон. Тэрээр гашуудаж байсан ч гэмшээгүй юм. Харин Петр уналтынхаа үр дүнг хараад жинхэнэ гэмшлийг сонгосон. Иудасын гашуудал үхэлд, Петрийн гашуудал гэмшил ба насан туршийн үр нөлөөтэй үйлчлэлд хүргэжээ.

► Та нүглээсээ болоод харуусаж байгаа боловч жинхэнээсээ гэмшээгүй хүнийг харсан уу? Үр дүн нь ямар байсан бэ? Бид номлолоороо дамжуулан хүмүүсийг яаж жинхэнэ гэмшил рүү хөтлөх вэ?

Загалмай

► Матай 27:27-54 эшлэлийг унших.

Иудей нь Ромын цэргүүдийн хувьд аймшигтай цэг байв. Хүмүүс нь Ромын цэргүүдийг үзэн яддаг, зеалот бүлгийнхэн нь цэргүүдийг хороохоор төлөвлөдөг тийм газар байсан аж. Алгасал баярын үеэр бослогоос сэрэмжилж цэргүүд бэлэн байдалд байна. Цэргүүдийн хувьд үүнээс муу даалгавар гэж байгаагүй байх. Тиймээс иудей хоригдлыг цаазаар аваачих үедээ цэргүүд уг хэрэгтэнд үзэн ядалтаа гаргадаг байв.

Үүрэг даалгавраа үзэн ядаж хатуурсан, тэрхүү ард түмнийг үзэн яддаг цэргүүдийн харгислал, Есүст хандсан хандлагаас нь харагддаг. Өөрөөр хэлбэл, буцаагаад хариу өгч чадахгүй хүнийг цохиж, доромжилж, өргөст титэм өмсгөж, үүндээ баясаж байснаас нь харагддаг. Есүс энэ бүгдээс болж тарчилж байсан ч, тэр цэргүүдийн өөдөөс уурласан нэг ч үг хэлээгүй юм.

Загалмайн түүхийг судалж байсан олон эрдэмтэн Есүсийн загалмай дээр хэлсэн 7 үгийг анхаардаг. Хүний сүүлчийн үг тухайн хүнд юу чухал байсныг илэрхийлдэг. Есүс үхэлтэй тулгарах үедээ юу хэлсэн бэ?

Уучлалын үгс

Цэргүүд Есүсийг загалмай дээр хадаж байх үед Тэрээр “Аав аа, тэднийг уучлаач. Учир нь тэд юу хийж байгаагаа мэдэхгүй байна” гэсэн (Лук 23:34). Эцэслэхийн өмнө ч Есүс хайр, уучлалаа харуулсан билээ.

Үхвэл зохих дээрэмчинд Есүс “Үнэнээр Би чамд хэлье. Өнөөдөр чи Надтай хамт Диваажинд байх болно” гэж амласан юм (Лук 23:43).

Энэрлийн үгс

Есүс ээжийгээ Иоханд хариуцуулж “Эмэгтэй, хараач, хүү чинь” гэж хэлээд Иоханд “Хараач, эх чинь” гэсэн (Иохан 19:26-27). Урьд нь Есүс гэр бүлийн хамгийн гүн хэлхээ холбоо нь сүнслэг байдал юм хэмээн зааж сургасан “Харагтун, Миний эх ба ахан дүүс энд байна. Тэнгэр дэх Эцэгийн минь хүслийг биелүүлэгч хэн боловч Миний эх, ах эгч, дүүс мөн гэж айлдав” (Матай 12:49-50).

Есүсийг үхэх үед дүү нар нь итгэгч биш байсан тул Түүний сүнслэг гэр бүлийн нэг хэсэг байгаагүй юм. Тиймээс Есүс ээжийгээ сүнслэг дүү хайрт Иоханыхаа асрамжинд үлдээжээ.

Биеийн тарчлалын үгс

Бурханы Хүү байлаа гээд Есүс загалмай дээрх махбодын тарчлалаас ангид байсангүй. Тэрээр гэмт хэрэгтэн мэт бүхий л биеэрээ тарчлан зовсон юм. Аймшигтай халуунд усгүй хэдэн цаг болсны дараа Есүс “Би цангаж байна” гэж хэлсэн (Иохан 19:28).

Сүнслэг шаналлын үгс

Есүсийн загалмай дээр хэлсэн зүрх зүсэм үгсийг Матай болон Марк тэмдэглэжээ: “Бурхан минь, Бурхан минь, юунд Та Намайг орхив?” (Матай 27:46 ба Марк 15:34, Дуулал 22:1-ээс эш татсан).

Есүс хүмүүн чанарынхаа хувьд Давидын мэдэрсэнтэй адил орхигдох мэдрэмжийг амссан. Хүмүүс Давидыг шоолж, түүн рүү толгой сэгсэрч байсан шиг (Дуулал 22:7), тэд Есүсийг шоолж толгой сэгсэрч байлаа (Матай 27:39). “Тэр цаг мөчид Бурханд хаягдсанаа Давид сэтгэл санаагаараа мэдэрсэн шиг Есүс, “Бурхан минь, Бурхан минь, юунд Та Намайг орхив?” хэмээн хашхирчээ.

Гэсэн хэдий ч Бурхан өөрийг нь орхиогүйг Давид олж мэдсэн. Тэр энэ талаар хожим нь Дуулалд гэрчилсэн байдаг. "Учир нь, Тэр зовогсдын зовлонг жигшээ ч үгүй, үзэн ядаа ч үгүй. Тэр нүүрээ нуугаа ч үгүй. Харин тусламж гуйн түүнийг хашхирахад Тэр сонссон юм” (Дуулал 22:24).

Үүнтэй адилаар Бурхан өөрийг нь орхиогүйг Есүс мэдэж байлаа. Есүсийн загалмай дээр хэлсэн дараагийн үг нь Эцэгтээ хандсан хашхираан байв. Эцэг нь Түүнийг орхиогүйг мэдээд Есүс “Аав аа, Таны гарт Би сүнсээ даатгая” (Лук 23:46) хэмээн залбирсан.

Есүс хүмүүн чанарынхаа хувьд бидний адил Бурхан залбирлыг сонсохгүй байгаа мэт санагдах хоосон мэдрэмжийг амссан юм. Гэвч бидний тэнгэрлэг Эцэг хүүхдүүдээ хэзээ ч орхидоггүй тэрхүү бодит байдлыг Есүс бас амсаж туулсан. Бид Түүний оршихуйг мэдрэхгүй байсан ч Тэр биднийг сонсдог гэдгийг мэдэж, Түүнд хандан хашхирч чадна.

Дуулгавартай байдлын үгс

“Аав аа, Таны гарт Би сүнсээ даатгая” (Лук 23:46) Есүс амьдралынхаа туршид Эцэгтээ итгэмжтэй амьдарсан. Тэгээд загалмайтай тулгарах үедээ Тэрээр “харин Таныхаар болог гэж” (Матай 26:39) хэлсэн. Тэрбээр Эцэгийн хүсэлд дуулгавартай байж, эцсийн үгээ ийнхүү хэлсэн юм.

Ялалтын үгс

“Гүйцэлдлээ” (Иохан 19:30). Есүс өөрийг нь илгээсэн Эцэгийнхээ даалгаврыг гүйцэтгэсэн гэдгээ энэ үгээр тунхагласан юм. Нүглийн шийтгэл төлөгдөж, Сатан ялагдсан. Исаиа 53-р бүлэгт буй Хуучин гэрээний хургаар эш үзүүлсэн цагаатгал ийнхүү биелж, амлалт гүйцэлджээ.

Бурхан загалмай дээр нүглийг үл мэдэгч Түүнийг нүгэл болгосон учир бид Түүний дотор Бурханы зөвт байдал болох юм (2 Коринт 5:21). Исаиа 53-р бүлэгт бидний нүглийг үүрэх зовлонт Зарцын талаар эш үзүүлэгч ярьжээ (Исаиа 53:4-12). Энэхүү орлуулах эвлэрүүлэл нь загалмай дээр хийгдсэн гэдгийг Паул харуулдаг.

Түүний дотор бид Бурханы зөвт байдал болохын тулд Есүс бидний төлөө нүгэл болжээ (2 Коринт 5:21). Бид нүглийн боолчлолд амьдрахаа нэгэнт больсон. Христийн үхлээр бид зөвт болгогдсон юм. Бид зөвхөн Түүний дотор зөвт байхаар дуудагдсан гэж Паул хэлээгүй. Харин оронд нь бид Түүний дотор Бурханы зөвт байдал болно гэжээ. Загалмай дээрх Христийн ажлаар дамжуулан жинхэнэ хувьсан өөрчлөлт бий болдог. Биднийг зөвт болгохын тулд Христ нүгэл болсон юм.

Өө тэнгэрлэг хайр минь, өршөөж биднийг хэлтрүүлсэн гэж үү!

Өө тэнгэрлэг хайр минь, өршөөж биднийг хэлтрүүлсэн гэж үү!

Өнө мөнхийн Бурхан миний төлөө үхсэн гэж үү!

Өрлөг Эцэгийн мөнхийн Хүү

Өрөвдөлт миний бүх нүглийг модон дээр үүрчээ.

Өнө мөнхийн Бурхан миний төлөө үхжээ:

Өө миний Эзэн, миний Хайр цовдлогдсон юм!

Өрийг нь өвтгөж эсэргүүцсэн биднийг Бурханд буцаахаар

Өргөст миний болон чиний төлөө цовдлогджээ.

Өө итгэгтүн, итгэгтүн

Өр нимгэн Есүсийн цус бүгдийг нь худалдан авсанд

Өөрийн зүгээс бүгдийг уучилсан гэдэг үнэнд

Өө миний Эзэн, миний Хайр цовдлогдсон юм!

Өнгөрөн одож холдолгүй

Өөдөө Түүнийг хараарай,

Өршөөлт Ханхүү

Өөрийн цусаа урсган байж амь ба амар тайвныг өгсөн юм!

Өө ирэгтүн, харагтун

Өршөөн Аврагчийн үхлийг,

Өө хэлэгтүн, зарлагтун

Өөр илүү гасланг Түүн шиг тээсэн нь үгүй

Өө ирэгтүн, мэдрэгтүн

Өр зүрхэнд цутгагдах Түүний цусыг

Өө миний Эзэн, миний Хайр цовдлогдсон юм!

- Чарльз Весли

Оршуулга

► Матай 27:57-61 эшлэлийг унших.

Паул Коринт захидалдаа Есүс бидний нүглийн төлөө үхэж, оршуулагдсан хэмээн тунхагласан байдаг (1 Коринт 15:3-4). Паул болон анхны чуулганыхны хувьд оршуулга маш чухал байлаа.

Зовлонгийн долоо хоногийн олон зан үйлийг орчин үед Ивээлт Баасан гарагаас Амилсны баярын Ням гараг хүртэл сахидаг болжээ. Гэхдээ чуулганы түүхэнд ихэвчлэн “Ариун Бямба гараг” нь Амиллын баярын чухал хэсэг гэж тооцогдож ирсэн. Тэгвэл Есүсийн оршуулга ямар ач холбогдолтой вэ?[1]

Түүхэн ач холбогдол

Есүс үнэхээр үхсэн гэдгийг оршуулга нь харуулдаг. Түүнийг дараа нь сэрсэн гэж үздэг исламын шашныхны мэдэгдлийн эсрэг зүйл юм. Энэ нь Тэр үнэхээр үхсэн учраас оршуулагдсан гэдгийг харуулдаг. Ромчууд ял авсан хэрэгтнийг яаж хөнөөхөө сайн мэддэг байсан. Тэр үед хүнийг үхэхээс нь өмнө загалмайнаас авах ямар ч боломж байдаггүй байв.

Цаашилбал хүнд чулуу, харуулууд гээд хэн ч булшнаас зугтах аргагүй нь баталгаатай байна. Тэр ч бүү хэл Ромын цэргүүд Есүсийг үхэхээс нь өмнө андуураад оршуулсан гэж бодлоо гэхэд загалмай дээр олон цаг шаналсан хүн биеийг нь ороосон боолтыг ураад, хүнд чулууг түлхэж зайлуулаад, мэргэшсэн харуулуудыг дийлээд гарч явна гэдэг төсөөлшгүй зүйл шүү дээ. Оршуулга болсон нь Назарын Есүс үхсэн гэдэг түүхэн үнэнийг баталж байна.

Эш үзүүллэгийн ач холбогдол

Алагдахаар яваа хурганы тухай эш үзүүлэгч Исаиа “Булшийг нь буруутуудын хамт товлосон ч үхэлд Тэрээр баян хүнтэй хамт байв” хэмээн эш үзүүлсэн байдаг (Исаиа 53:9). Есүсийн оршуулга нь авралын эш үзүүллэгийг биелүүлсэн юм.

Есүсийг үхсэний дараа Ариматын Иосеф Түүний биеийг Пилатаас авахаар очжээ. Иосеф Санхедрины гишүүн байсан боловч, Есүсийг яллахыг зөвшөөрөөгүй юм. Иудейн удирдагчдын ихэнх нь Есүсийг эсэргүүцэж байсан ч, зарим нь Бурханы хаанчлалыг хайж байлаа. Иосеф бол эдгээр нууц дагалдагчдын нэг юм. Тэрээр Никодемийн хамт Есүсийн цогцсыг Иосефын булшинд оршуулжээ (Матай 27:57-60, Марк 15:42-46, Лук 23:50-54, Иохан 19:38-42).

Үүнд ямар их зориг шаардагдаж байсныг бодоод үзээрэй. Дагалдагч нар нь хүртэл Есүсийг орхин явсан байхад Иосеф яллагдсан гэмт хэрэгтний төлөө алхам хийсэн. Олны өмнө хийсэн энэхүү алхам нь Иосефын зөвлөл дээрх, мөн нийгэм дэх байр суурийг нь эрсдэлд оруулсан. Цаашлаад Иосеф Пилатын уур хилэнд өртөх ч боломжтой байв. Ромын албан тушаалтнууд цовдлогдсон ялтны цогцсыг найз нөхөд, хамаатнуудад нь өгөхийг бараг зөвшөөрдөггүй байжээ. Хэрэгтний цогцсыг олны өмнө үзүүлж, бусдад сануулга болгодог байсан хэрэг. Харин тэрээр Пилатаас зөвшөөрөл авч чадсан нь Есүсийг ямар нэг гэмт хэрэгт буруугүй гэдгийг мэдсэний бас нэг нотолгоо болдог.

Теологийн ач холбогдол

Паул бидний баптисмыг Есүсийн оршуулгатай ийнхүү адилгасан байна.

Христ Есүс уруу баптисм хүртсэн бид цөмөөрөө Түүний үхэл уруу баптисм хүртсэн гэдгийг та нар мэдэхгүй гэж үү? Тиймд бид үхэл уруу баптисм хүртсэнээрээ Түүнтэй хамт оршуулагдсан учраас Эцэгийн алдраар Христ үхэгсдээс амилуулагдсаны адил, бид мөн шинэ амийн дотор явах юм (Ром 6:3-4).

Оршуулга бол Есүсийн үхлийн олон нийтийн өмнөх баталгаа юм. Үүнчлэн баптисм ч бас Есүсийн үхлийг олон нийтийн өмнө гэрчилж байгаа явдал юм. Баптисмаар бид хуучин амьдралаасаа салж үхсэн гэдгийг тунхагладаг.

Оршуулга бол хэн нэгний үхлийг мэдэх сүүлчийн алхам юм. Баруунд гашуудагчид “баяртай” хэмээн энэ дэлхий дээрх эцсийн мөчийг илэрхийлэн авс руу шороо шиддэг. Паул биднийг нүгэлд үхэж эцэслэсэн гэдгийг онцолсон бөгөөд Христ үхсэн шиг бид ч бас нүгэлд үхсэн юм. Христтэй хамт үхсэн атлаа нүгэлдээ буцах нь үхсэн цогцсыг ухаад гаргаж буйтай адил.[2] Бид Христтэй хамт оршуулагдсан, тиймээс бид нүглийн хувьд амьд биш.

Паул загалмайн тухай, Христ бидний нүглийн улмаас үхэж, оршуулагдсан хэмээн коринтынхонд номлосон. Тэгээд Паул амиллын тухай бас номлож, Христ гурав дахь өдөртөө амилан, олон гэрч нарт үзэгдсэн гэжээ (1 Коринт 15:3-8). Амилал бол христитгэлийн цөм юм.

► Матай 27:62-28:15 эшлэлийг унших.

Шашны удирдагчид Пилатаас загалмай дээр бичсэн үгсийг өөрчлөхийг хүсэхэд тэр татгалзсан. Тэрээр Есүсийг “Назарын Есүс, Иудейчүүдийн Хаан” гэж бичсэн самбарын доор цовдолсон юм (Иохан 19:19). Энэ цолыг шийтгүүлж байгаа хэрэгтэнд ашигласнаараа Пилат дургүйг нь хүргэдэг иудейчүүдийг шоолж байсан хэрэг.

Есүсийг цовдолсны дараа шашны удирдагчид Пилат руу дахин ирж, булшийг мануулах Ромын харуулуудыг гаргаж өгөхийг гуйжээ.

Эрхэм ээ, тэр мэхлэгч амьд байхдаа “Би гурав хоногийн дараа амилна” гэж хэлж байсныг бид санаж байна. Тиймээс шавь нар нь ирж, Түүнийг хулгайлаад, ард олонд “Тэр үхэгсдээс амилав” гэж хэлүүлэхгүйн тул гурав дахь өдөр нь хүртэл булшийг хамгаалахыг тушаагаач. Эс бөгөөс сүүлчийн мэхлэл нь эхнийхээсээ ч дор муу юм болно гэцгээлээ (Матай 27:63-64).

Ингээд Пилатын зөвшөөрлөөр тэд булшийг лацдаж, цэцэрлэгт Есүсийг баривчилсан хүмүүсээс харуулд гаргажээ. Гэнэт:

маш хүчтэй газар хөдлөлт болов. Учир нь Эзэний тэнгэрэлч тэнгэрээс буун ирж, чулууг зайлуулаад дээр нь суужээ. Түүний үзэгдэх төрх аянга лугаа адил, хувцас нь цас мэт цагаан байв. Харуулууд түүнээс айн чичирч, үхдэл мэт болжээ (Матай 28:2-4).

Есүс амилжээ!

► Иохан 20:1-29 эшлэлийг унших.

Сайнмэдээний номуудад Есүс амиллынхаа дараа хэд хэдэн удаа үзэгдсэн талаар тэмдэглэсэн байдаг. Тэрээр олон хүнд янз бүрийн орчинд харагдсан юм.

Үл итгэгчид заримдаа “Булшин дээр очсон эмэгтэйчүүд хий юм харсан. Тэд хармаар байгаагаа л харсан хэрэг” гэдэг. Гэхдээ тэдгээр гэрч эмэгтэйчүүд Есүсийг үхсэн гэдгийг мэдэж байсан учраас Түүнийг амьдаар нь харна гэж бодоогүй. Тэд амиллын тухай эш үзүүллэгийг хараахан ойлгоогүй байсан (Иохан 20:9). Тэр ч байтугай Есүсийг харсан эхний гэрч нарын үгэнд ч дагалдагчид эргэлзэж байсан шүү дээ (Марк 16:13). Тэд Есүсийг үхлээс амилна гэж бодоогүй байсан.

Тэр Магдалын Мариад харагдсан, (Иохан 20:11-18), хоёр дагалдагчтай цуг Еммау тосгон руу алхсан (Лук 24:13-32), арван нэгэн элч (Иохан 20:19-31), тэгээд 500 хүнд зэрэг харагдсан (1 Коринт 15:6) бөгөөд ийнхүү Есүсийн дагалдагчид Түүнийг үнэхээр амилсан болохыг аажмаар ойлгожээ. Ингээд анхны чуулганыхан “Тэр амилсан, Тэр үнэхээр амилсан” гэж хүндэтгэн мөргөдөг болжээ.

Олон либерал теологичид амиллыг домог мэтээр тайлбарлахыг оролдсон юм. Гэсэн хэдий ч элч нарын итгэл Есүсийн амьдралын мөнхийн нөлөөний тухай сайхан түүх дээр биш, харин Түүний үхэл, амиллын баттай баримтууд дээр үндэслэжээ. Элч нар Есүсийг үхээд амилсан гэдийг мэдсэн билээ. Энэ нь тэднийг хавчлага, бүр үхлийн өмнө ч итгэл зоригтой байлгасан юм. Есүсийн үхэл амилал өнөөдрийн үйлчлэлд яаж нөлөөлөх вэ?

Загалмайн хүчээр үйлчлэх нь

► 1 Коринт 1:17-2:5 эшлэлийг унших.

Сайнмэдээний хоёр дахь аяндаа Паул Коринт хотоос Афиныг зорьж, тэндээ Арейпагт номложээ. Афинд үйлчилсэн Паулын үйлчлэл үр дүн багатай байсан гэж харагддаг (Үйлс 17:16-34). Тэрээр Афинд чуулган тариагүй бөгөөд тэндхийн гүн ухаантнууд амиллын тухай мэдээг шоолж байлаа. Ингээд Паул Афинаас явж, тэндээс 75 км зайд байх, Ахай мужийн хамгийн нөлөө бүхий хот Коринт руу очжээ.

Паул дараалсан гурван хот болох Тесалоник, Берой, Афинд эсэргүүцэл амссаныхаа дараа Коринтод ирсэн. Магадгүй үүнээс болоод тэрээр “Мөхөсдөл, айдас, үлэмж чичрэл дор би та нартай хамт байсан” (1 Коринт 2:3) гэж бичсэн байх. Хэдийгээр грек сонсогчид уран яруу хэллэг, ухаалаг цэцэн байдлыг хүсэж байсан ч, Паул зөвхөн загалмайн тухай номлохоор шийдсэн байна. Түүний номлолын хүч уран яруу үгээс биш, харин загалмайнаас өөрөөс нь гарсан юм. Паул “Христийн загалмайг дэмий хоосон зүйл болгохгүйн тулд, үгийн мэргэн цэцнийг хэрэглэлгүй” номложээ (1 Коринт 1:17).

Коринт хотод Паул “та нарын дунд би Есүс Христ буюу цовдлогдсон Түүнээс өөр юу ч мэдэхгүй байхаар шийдсэн юм” гэсэн бөгөөд (1 Коринт 2:2) тэрхүү номлол олон хүний дургүйг хүргэнэ гэж Паул мэдэж байлаа.

Учир нь иудейчүүд нь тэмдэг шаардаж, грекүүд нь мэргэн ухааныг хайдаг. Бид харин цовдлогдсон Христийг тунхагладаг. Энэ нь иудейчүүдэд бүдрүүлэх саад, харийнханд мунхаглал болдог агаад… (1 Коринт 1:22-23).

Энэ мэдээ иудейчүүдийн хувьд бүдрүүлэх чулуу, бөөн шуугиан болсон юм. Тэд Мессиагийн тэмдэг гайхамшгийг хайж байсан хүмүүс. Тэдний бодлоор бол цовдлогдсон хүн нь сонгогдсон Мессиа байна гэдэг нь утгагүй зүйл байжээ. Иудейн хуулинд “Модон дээр өлгөгдсөн хүн бүр Бурханы хараал болой” (Дэд хууль 21:23) гэсэн байдаг. Тиймээс цовдлогдсон Есүсийг Мессиа гэж тунхаглах нь иудейн сонсогчдын хувьд дуулиантай асуудал юм.

Загалмайн тухай үг нь харь үндэстнүүдийн хувьд мунхаглал байв. Грекчүүд амиа зориулагчийн нэр төртэй үхлийг хүндэтгэдэг байжээ. Хэрэв Есүс Ромын өөдөөс тулалдаж байгаад үхсэн бол грек сэтгэгчдийн хувьд эр зоригийг нь хүндэтгэх зүйл байлаа. Гэвч загалмай дээр үхэх нь тухайн хүнийг хүндлэлгүй болгодог учраас нэр төртэй үхэлд тооцогдохгүй. Загалмай дээр үхсэн хүнийг ердийн ёсоор оршуулахаас татгалздаг байсан. Тийм хүний цогцсоор шувуу, харх хооллож, ясыг нь хогийн нүх рүү шиддэг байжээ. Тиймээс цовдлогдсон иудей тариачинг “Эзэн” гэж тунхаглах нь өөр үндэстний хүмүүст хачин утгагүй зүйл байв.

Загалмай нь иудейчүүдийн хувьд дуулиан, харь үндэстнүүдийн хувьд мунхаглал байсан ч, Паул загалмайн тухай мэдээг эргэлзэлгүйгээр тунхагласан. Паулын жишээ бидэнд үлгэр дуурайл болж байна. Өнөөдөр ч загалмай нь 1-р зууны үеийн адилаар зарим хүмүүсийн дургүйг хүргэж, заримд нь тэнэг санагдаж болох ч, бид энэ мэдээг тунхаглах ёстой.

Үйлчлэгч, чуулганы удирдагчдын хувьд бидний итгэлтэй байдал чадвараас маань ирээгүй, харин бидний итгэл загалмайн мэдээн дээр суурилдаг. Паул гайхалтай боловсролтой, хурц ухаантай, тухайн үеийнхээ хамгийн оюунлаг хүмүүстэй маргаж чаддаг хүн байв. Гэхдээ түүний туйлын итгэлтэй байдал нь загалмайн мэдээнд суурилсантай холбоотой. Бид хүмүүсийг ятгаж чадлаа гэвэл, тэдний итгэл хүний мэргэн ухаанд түшиглэнэ. Харин бид тэдэнд загалмайн тухай ойлгуулбал, тэдний итгэл Бурханы хүчинд суурилна (1 Коринт 2:5).

Амиллын хүчээр үйлчлэх нь

► Үйлс 2:22-36 эшлэлийг унших.

Амилал нь анхны христитгэлийн номлолын гол сэдэв байсныг Үйлс ном харуулж байна. Пэнтекостын баяраар Петр Есүсийн амиллыг эш үзүүлэгчдийн амласан амлалтуудын биелэл байсан гэдгийг нотолсон байдаг.

Паул өөрийгөө Агрип хааны өмнө өмгөөлөхдөө “Би энд Бурханаас манай өвөг дээдэст өгч, манай 12 овгийн хүртэхийг найддаг тэрхүү амлалтын найдвараас болж шүүгдэж байна” гэсэн байна. Тэгвэл тэр амлалт нь юу вэ? Амилал. “Хэрэв Бурхан үхэгсдийг амилуулдаг бол энэ нь яагаад та нарын дунд үнэмшмээргүй хэмээгдэнэ вэ?” (Үйлс 26:6-8).

► 1 Коринт 15:12-34 эшлэлийг унших.

1 Коринт номд Паул үйлчлэлээ зөвхөн загалмайн хүч дээр төдийгүй, бас амиллын хүч дээр үндэслэсэн гэж хэлсэн байдаг. Тэрээр амилал байхгүй бол үйлчлэл нь утгагүй гэдгийг “Христ амилуулагдаагүй бол бидний тунхаглал хоосон, та нарын итгэл ч хоосон болно” гэж илэрхийлжээ. (1 Коринт 15:14). Амилалгүйгээр Есүс ч бас нэг хуурамч Мессиа л болох байсан. Амилалгүйгээр Есүс зүгээр нэг эмгэнэлт амиа өргөгч болохоос биш, амлагдсан Мессиа байж таарахгүй.

Амилал бол христитгэлийн суурь юм. “Христ амилуулагдаагүй бол та нарын итгэл хоосон агаад та нар ч нүгэлдээ байсаар байна” (1 Коринт 15:17). Загалмай дээр бидний нүглийн төлөөсийг Христ төлсөн бол, амилал нь Христийг үхэл ба нүглээс илүү хүчтэй гэдгийг батлан харуулдаг. Хэрэв амилал байхгүй бол Паулын хэлдгээр таны итгэл хоосон бөгөөд та нүглийнхээ боолчлолд байсаар байна гэсэн үг.

Амилал бол бидний итгэлийн суурь юм. “Учир нь үхэл нэг хүнээр ирсэн тул үхэгсдийн амилал мөн нэг хүнээр иржээ. Адам дотор бүгд үхдэгчлэн Христ дотор бүгд амьд болгогдоно” (1 Коринт 15:21-22). Христ үхлээс амилсан учраас тэдэнд амиллын найдвар бий гэж Паул коринтчуудад батлан хэлжээ.

2-р зууны грекийн зохиолч Лусиан Христэд итгэгчдийг дахин амилалд итгэдэг гэж шоолж “Хөөрхийс, мөнх амьдарна гэж итгэдэг. Тийм учраас үхлийг үл тоомсорлож, итгэлийнхээ төлөө амиа өгөхөд бэлэн байдаг” гэсэн байдаг. Хэдийгээр Лусиан итгэгчдийг шоолж хэлсэн ч, тэрээр үнэн байдлыг хэлжээ. Үнэхээр Лусианы хэлснээр 2-р зууны итгэгчид үнэхээр мөнх амьдарна гэдэгтээ итгэдэг байсан. Тэрхүү итгэлээсээ болж, тэд итгэлийнхээ төлөө үхэхэд бэлэн байсан юм.

Энэ үнэн өнөөгийн бидний хувьд ч хэвээрээ байх ёстой. Хэрэв бид Христийг үхлээс амилсан гэдэгт үнэхээр итгэдэг бол, энэ итгэл маань биднийг хавчлага, бүр үхлийн өмнө ч бат итгэлтэй байлгаж чадна. Амилал бол бидний итгэлийн суурь юм.

Амилал бол бидний христитгэлт амьдралын суурь юм. Паул амиллын тухай онол сургаалыг бодитоор хэрэгжүүлэн “Хэрэв үхэгсэд амилуулагдахгүй л юм бол ‘Маргааш бид үхэх юм чинь идэж ууцгаая!’ …Та нар зөв ухааралд ир. Нүгэл үйлдэхээ боль” гэсэн байдаг (1 Коринт 15:32, 34). Паулын хэлснээр амилал нь бидэнд бурханлаг амьдралаар амьдрах шалтгааныг өгдөг. Хэрэв амилал гэж байхгүй бол, бид магадгүй Епикурын хэлсэн шиг “Удахгүй үхэх юм чинь идэж ууцгаая” хэмээн амьдарч болох юм. Хэрэв амилал гэж байхгүй бол мөнх амьдрах шалтгаан гэж байхгүй. Гэхдээ Паулын үргэлжлүүлэн хэлснээр нэгэнт амилал гэж байгаа тул, бид сэрж, нүглээс ангид амьдрах ёстой. Амилалд баттай итгэх нь нүглийг ялсан бидний ялалтыг зоригжуулж байдаг.

Үйлчлэлд бэрхшээл тулгарах үед амиллын тухай түүх бидний итгэл багатайг зэмлэдэг. Залбиралд маань хариу ирэхгүй байна гэж бид хичнээн удаа бодсон бол? Яагаад вэ? Яагаад гэвэл бид амиллын хүчийг мартсан байна. Бид ялна гэсэн итгэл багатайгаар хэр олон сорилттой тулгардаг бол? Яагаад тэр вэ? Яагаад гэвэл бид Паулын хэлсэн амлалтыг мартдаг. Тэрээр “Мөн үхэгсдээс Есүсийг амилуулсан Нэгэний Сүнс та нарын дотор оршвоос, Христ Есүсийг үхэгсдээс амилуулсан Тэр та нарын дотор оршдог Өөрийн Сүнсээр дамжин үхлийн биест чинь амь өгнө” гэсэн юм (Ром 8:11).

Хэрэв Христ бидний дотор амьдарч байгаа бол, бид махбодоороо амьдрахаа болино. Бид нүглийн хоригдол байхаа болино. Энэ бол амиллын хүч доторх амьдрал юм. Есүсийг булшнаас амилуулсан тэр хүч бидэнд нүглийг ялах өдөр бүрийн ялалтыг өгдөг. Үүнийг амиллын хүчээр амьдарч, үйлчлэх гэнэ.

Таны үйлчлэл Христийнх адил байна уу?

“Дагалдагчдыг Антиохт анх удаагаа Христитгэгчид гэж нэрлэх болов” гэж Лук бичжээ (Үйлс 11:26). Хүмүүс Антиохын итгэгчдийг ажиглаж байгаад “Эдгээр хүмүүс Христтэй адил үйлдэж байна. Тэднийг Христэд итгэгчид гэж нэрлэе” хэмээн ярьж эхэлсэн байна. Та энэ эшлэлийг унших үедээ “Манай хөршүүд миний зан ааш, үг, хандлагыг хараад “итгэгч” гэдгийг минь мэдэх болов уу? Би Христтэй адил харагдаж байгаа болов уу?” гэж өөрөөсөө асуугаарай. Антиохын итгэгчдийн амьдрал олон талаар Христийг тусган харуулж байв. Тэд жинхэнэ итгэгчид байлаа.

Олон жилийн туршид пастороор үйлчилсэн Др. Х. Б. Лондон одоо залуу пасторуудад зөвлөгчөөр үйлчилдэг. Тэрээр пасторуудад тулгарч буй сүнслэг аюулын талаар анхааруулан “Хүн ариун байхгүйгээр ариун зүйлсийн дэргэд байж болно. Өршөөлийн тухай номлосон ч өөрөө уучлахгүй байх боломжтой. Үйлчлэгч нар үйлчлэлдээ маш их чармайлт гаргах атлаа өөрсдийнхөө сүнсний эрүүл мэндийг хайхрахгүй байх нь ч бий” гэж хэлжээ.[1] Бусдад номлосон ч өөрөө тэнцэхгүй байх боломжтой юм (1 Коринт 9:27).

Др. Лондон пасторуудад бусдыг удирдан чиглүүлэхийн зэрэгцээ сүнслэг тал дээр бүтэлгүйтэхээс зайлсхийхэд туслах хэдэн практик зөвлөгөөг санал болгожээ. Эдгээр нь Христтэй адил амьдралаа хадгалахад туслах хэдэн арга юм. Тэрээр ингэж бичжээ.

• Номлосон шигээ амьдар. Өөрөө амьдралдаа хэрэгжүүлээгүй зүйлээ бусдад бүү номло.

• Өөрийнхөө сүнслэг байдлыг анхаар. Зарим эмч нар эрүүл биш байдаг. Тэд бусдыг анхаарах атлаа өөрийнхөө эрүүл мэндийг үл хайхарна. Зарим пасторууд сүнслэг талаараа эрүүл бус байдаг. Пасторын хувьд тэд сүнслэг эрүүл мэнддээ ч анхаарах ёстой.

• Өөрийгөө даруусга. Пастор бол банкны ерөнхийлөгч биш, хоньчин гэдгийг сана. Үйлчлэгч бай.

• Урам хугарч сур. Та үйлчлээд сэтгэл дундуур байх болно. Таны зөвлөсөн хүн төөрч будилна. Дотны найз чинь таны эсрэг болно. Чуулганы гишүүд танаас татгалзана. Гэхдээ урам хугаралт таны итгэл найдварыг алдагдуулж болохгүй. Иудас Есүсээс урвасан. Дем Паулаас урвасан. Нулимсаа урсган өөрөө өсөж, сүргээ сайн хариул.

Таны үйлчлэл Христийнх адил байна уу?

Есүсийн амьдрал, үйлчлэлийн тухай эдгээр хичээлээс бид Түүний үйлчлэлийн олон шинж чанарыг олж харсан. Эдгээр шинж чанар таны үйлчлэлээс харагдаж байна уу?

Үйлчлэлээ үнэлж дүгнэх зарим асуултыг энд орууллаа.

• Нүгэлтнүүд аврагдаж байна уу? Есүсийг номлох үед хүмүүс шинэ амьдралыг хүлээн авдаг байсан. Та хүмүүсийг шинэ амьдралд хөтөлж байна уу?

• Итгэгчид сүнсээр дүүрч байна уу? Есүс хүүхдүүддээ Сүнсийг илгээнэ гэж амласан. Энэ амлалт таны үйлчилж байгаа хүмүүсийн дунд биелж байна уу?

• Сатан ялагдаж байна уу? Сатаны бэхлэлтүүд нурж байна уу? Есүсийн үйлчлэл сүнслэг эрх мэдлээрээр ялгарч байсан юм.

• Шархалсан хүмүүс эдгэж байна уу? Хагаралдсан гэр бүл эвлэрч байна уу? Тасарсан харилцаа сэргэж байна уу? Есүс биеэр, сэтгэлээр, сүнсээр, сэтгэл хөдлөлөөр, сүнсээр шархалсан хүмүүсийг эдгээж байсан.

• Хүмүүс нигүүлсэл ба үнэнийг харж байна уу? Та хүмүүсийг Есүс рүү татаж байна уу эсвэл Есүсээс холдуулж байна уу? Есүс үнэнийг итгэлтэйгээр, нигүүлсэл дүүрэн номлодог байсан.

► Та нар эдгээр асуултыг хэлэлцэх зуураа өөрийнхөө үйлчлэлийг Христийнхтэй адил өсгөх талбаруудыг олоорой. Үйлчлэгч бүрд өсөх орон зай бий гэдгийг санаж, энэ жагсаалтыг өөрийгөө буруутгах бус, харин өсөлтөд хүргэх сорил гэж хараарай.

(1) “Загалмай дээрх долоон үгийн тухай” номлол эсвэл Библийн хичээл бэлтгэ. Есүсийн үгээс өнөөгийн итгэгчдэд зориулсан санааг тодруулан онцол.

(2) Амиллын утга учрын тухай өнөөгийн Христэд итгэгчдийн амьдралд зориулсан номлол эсвэл Библийн хичээл бэлтгэ. 1 Коринт 15:15-17 дахь амиллын тухай сайнмэдээ болон Паулын үгийг аль алиныг ашиглаж бэлтгээрэй.