Lesson 4: Есүстэй адил зааж сургах нь

Энэ хичээлийн төгсгөлд суралцагч:

(1) Есүсийг агуу багш болгосон чанаруудыг таньж мэдэх.

(2) Багшийн ажлыг сайжруулах практик аргуудад суралцах.

(3) Суралцагчид хичээлд бэлэн байхын тулд даалгавруудыг төлөвлөх.

Суралцагчид маань бүрэн бэлтгэгдсэн үедээ багш шигээ болно.

► Энэ хичээлийн төгсгөлд даалгаврыг оруулаагүй. Харин хичээлийн туршид хийх жижиг даалгавруудыг “Сурсан зүйлээ хэрэгжүүлэх” хэсэгт багтаасан. Эдгээрийн зарим нь бичих эсвэл практик үйл ажиллагаа шаардах бол бусад нь зүгээр л бодож, ярилцах даалгаврууд юм. Хичээлийн материалтай ажиллах явцдаа даалгавар нэг бүрийг хийх ёстой.

Заах талаар хэлсэн Есүсийн хамгийн гүн гүнзгий сургаалуудын нэг нь “Шавь нь багшийнхаа дээр байдаггүй. Бүрэн суралцах аваас хэн ч багш шигээ болж болно” (Лук 6:40) юм. Есүс дагалдагч нарыг сургах үед тэд Түүний зан чанарыг тусгана гэдгийг мэдэж байлаа. Тийм ч учраас Есүс арван хоёр элчийг сургахад маш их хүч зарцуулжээ.

Зарим чуулган хүүхдийн цуглаан, Ням гарагийн сургалтдаа ямар ч туршлагагүй, бэлтгэгдэж сургагдаагүй хүмүүсийг багшаар авдаг. Шинэхэн итгэгчид болон хүүхдүүдэд заах тал дээр бага хүчин чармайлт гаргадаг.

Чуулганы удирдагчдын хувьд Есүс зааж сургахад өгч байсны адил ач холбогдлыг бид зааж сургахдаа өгөх ёстой юм. Хэрэв суралцагчид багштайгаа адил байх юм бол багшлах үүрэг нь ч маш чухалд тооцогдох болно. Бид багш нарыг бэлтгэхдээ Мастер багш Есүсийн үлгэр дуурайлыг дагахад сургах ёстой.

► Есүсийн заах арга барилын талаар мэддэг зүйлсээ бодож үзээрэй. Түүнийг агуу багш болгосон гурав эсвэл дөрвөн шинж чанаруудыг жагсаа. Одоо өөрийнхөө сурч байсан үеийн хамгийн шилдэг багшийн талаар бодож үз. Энэ хүнийг агуу багш болгосон гурав эсвэл дөрвөн шинж чанаруудыг бичээрэй. Энэ хоёр жагсаалтын аль аль шинж чанарууд нь давхцаж байна вэ?

Есүсийн сургаалын агуулга нь Багшийн зан чанарт суурилдаг. Есүсийн зүрх сэтгэл Түүний сургаалын үндэс суурь болдог. Тэгвэл агуу багш хүний гол чанар юу вэ?

Мастер Багш Есүс суралцагчдынхаа хэрэгцээг ойлгож мэддэг байсан

► Лук 4:16-21 эшлэлийг унших.

Сургуулийн багш нар өдөр бүр ангид суралцах хичээлийн төлөвлөгөө гаргадаг. Хичээлийн төлөвлөгөө нь тухайн багш анги тус бүр дээр юу хийхийг харуулдаг. Хичээлийн төлөвлөгөө нь дараах зарим зүйлсийг багтаадаг. Жишээ нь:

• Зорилго: Сурагчид бутархай тоог нэмж сурах.

• Үйл ажиллагаа: Сурагчид ангийн ажлын дэвтрийн 89-р хуудасны 1-20-р бодлогуудыг хийж гүйцэтгэнэ.

Есүс үйлчлэлдээ хичээлийн төлөвлөгөөтэй байсан ч, Түүний хичээлийн төлөвлөгөө нь ажлын дэвтэр дээр хуудасны дугаартай байсангүй. Харин Есүсийн хичээлийн төлөвлөгөө нь суралцагчдынхаа хэрэгцээнд төвлөрсөн байв. Түүнийг сонсож буй хүмүүст Есүс юуг гүйцэлдүүлэхээр илгээгдсэн талаар хэлэхдээ:

• Ядууст сайнмэдээг хүргэх.

• Олзлогдогсдод эрх чөлөөг тунхаглах.

• Сохруудад хараа оруулах.

• Дарамтад байгсдыг чөлөөлөх.

• Эзэний тааламжит жилийг тунхаглах (Лук 4:18-19).

Есүсийн зорилго нь суралцагчдынхаа хэрэгцээтэй яв цав нийлж байна. Есүсийн дагалдагчид нь Йерусалим дахь Сүм дуганыг хяналтдаа байлгаж, Санхедринд улс төрийн эрх мэдлийг гартаа авсан чинээлэг садукайчууд байгаагүй. Түүний дагалдагч нар нь Ромд дарлагдаж байсан эгэл жирийн иудей хүмүүс байлаа. Тэдний зарим нь сохор эсвэл доголон байжээ. Тэдний олонхи нь өндөр татвараас болж зовж зүдэрсэн ядуу хүмүүс байв.

Есүсийн хичээлийн төлөвлөгөө нь энгийн байсан бөгөөд суралцагчдынхаа хэрэгцээтэй тохирч байлаа. Тэр олзлогдогсдыг чөлөөлөх болно. Тэрээр сохруудад хараа оруулах болно. Иудейн хуанлийн дагуу Эзэний тааламжит жил нь баяр ёслолын үе байв. Өрийг цуцалж, газрыг анхны эзэмшигч гэр бүлд буцааж олгодог, боолууд чөлөөлөгддөг жил байв. Есүс дарлагдсан хүмүүст Эзэний тааламжит жилийг авчрахаар ирсэн гэдгээ зарласан.

Есүс дэлхий дээрх үйлчлэлийнхээ туршид суралцагч нарынхаа хэрэгцээг анхаардаг байлаа. Есүс хүмүүсийн хүссэн зүйлийг үргэлж өгч байгаагүй ч, харин тэдэнд хэрэгтэй зүйлийг нь өгдөг байсан. Самари эмэгтэй ус хүссэн. Харин түүнд золих аврал хэрэгтэй байсан (Иохан 4:7-42). Петр загас барихыг хүссэн. Харин түүнд үүрэг даалгавар хэрэгтэй байсан (Матай 4:18-22). Эдгээр тохиолдол бүрд Есүс суралцагчдынхаа гүнзгий хэрэгцээнд нь анхаарч байна.

► Марк 10:17-22 эшлэлийг унших.

Есүстэй уулзахаар ирсэн нэгэн баян залуугийн түүхийг өгүүлэхдээ “Есүс түүнийг ширтэн харж, хайрлан” хэмээжээ. Ширтэн харах гэдэг үг энгийн нэг ажиглах төдий үг биш юм. Энэ нь сайтар ажиглах, тодорхой ялгах гэсэн утгатай. Есүс энэ залуугийн зүрх сэтгэлийг харсан. Бусад нь зөвхөн баян залууг л харсан байх. Есүс өлсгөлөн зүрх сэтгэлийг харжээ.

► Марк 16:1-8 эшлэлийг унших.

Есүсийг үгүйсгэснийхээ дараа Петр ямар ичгүүртэй байсныг төсөөлж үзээрэй. Тахиа донгодохыг санасан ичгүүрээсээ болж Петр Эзэнийхээ амилалд ч бүрэн гүйцэд баярлан баясч чадахгүй байв. Ийм нөхцөл байдалд тэнгэрэлч Мариад хандан “Харин явж, Түүний шавь нарт болон Петрт ‘Тэр та нараас түрүүнд Галил уруу явсан тул айлдсаных нь дагуу тэнд та нар Түүнийг харах болно’ гэж хэл гэв.” Бүх дагалдагч нараас илүү Петрт тайтгарал, баталгаа хэрэгтэй байсныг Есүс мэдэж байлаа. Бусад нь Эзэнээ үгүйсгэсэн хулчгар нэгнийг харсан бол Есүс сэргээгдэх шаардлагатай унасан дагалдагчаа харсан.

Бид суралцагчдыг ойлгохоос нааш тэдэнд зааж чадахгүй гэдгийг Есүс мэддэг. Суралцагчийн зүрх сэтгэлийг эзэмдэхийг хүсвэл суралцагчтай адил бодох хэрэгтэй. Та заадаг хүмүүсийнхээ зүрх сэтгэлийг ойлгож мэдэх учиртай. Багш хүний хувьд заах сэдвээ сайн судлах хэрэгтэй ч, үүнээс илүүтэйгээр суралцагч нараа судалж мэдэх хэрэгтэй. Та суралцагчдынхаа хэрэгцээг ойлгох ёстой.

Сурсан зүйлээ хэрэгжүүлэх

► Зааж сургаж буй хүмүүсийнхээ (албан болон албан бусаар) талаар бодож үз. Бэрхшээлтэй тулгарч байгаа оюутанд анхаарлаа хандуулаарай. Энэ оюутны хэрэгцээнд туслахын тулд хийж болох практик зүйлсийг жагсаан бич.

Мастер Багш Есүс тэвчээртэй байсан

Есүс өөрийг нь эсэргүүцсэн хүмүүст тэвчээртэй хандсан.

► Иохан 6:41-71 эшлэлийг унших.

Энэ түүх Есүсийн үйлчлэлийн нэгэн чухал шилжилтийн мөчлөгт өрнөдөг. Өмнөх жил нь Есүс маш их нэр хүндийг олжээ. Хүмүүс Түүний гайхамшгуудыг биширч, талх, загасыг нь идэж баярлаж байлаа. Одоо Тэрээр тэдэнд хандаж “Амийн талх бол Би байгаа юм” гэжээ. Түүнчлэн сонсогчдынхоо сэтгэлийг түгшээх зүйлсийг Тэр өгүүлсэн. “Үнэнээр үнэнээр Би та нарт хэлье. Хэрэв та нар Хүний Хүүгийн махыг идэж, цусыг нь уухгүй л бол та нарын дотор амь байхгүй.” Үүнээс болж Түүний дагалдагчдаас олноороо буцаж, цаашид Түүнтэй хамт явсангүй.

Есүс мянга мянган хүмүүст зааж сургаж байсан ч, олон хүн Түүний сургаалыг хүлээн зөвшөөрөхгүй гэдгийг мэдэж байлаа. Хэдийгээр нэг нь диавол гэдгийг мэдэж байсан ч, Тэр арван хоёрт зааж сургасан юм (Иохан 6:70). Есүс тэвчээртэй багш байжээ.

Есүс өөрийг нь ойлгоогүй хүмүүст тэвчээртэй ханддаг байсан.

► Марк 8:27-33 эшлэлийг унших.

Суралцахдаа удаан хүмүүст Есүс тэвчээртэй ханддаг байсан. Сайнмэдээний номуудад дагалдагч нарынх нь эргэлзсэн, харалган байдлын талаар хэдэн удаа дурдсаныг анзаарч үзээрэй. Петр “Та бол Христ…” гэж таньсан ч энэ нь юу гэсэн үг болохыг тэр үнэхээр ойлгоогүй байв. Хэдхэн эшлэлийн дараа Есүс түүний буруу бодлыг зэмлэжээ.

► Иохан 3:1-21 эшлэлийг унших.

Есүс сургаалыг нь ойлгоогүй фарисай хүнд тэвчээртэй хандсан. Никодем эргэлзэхэд Есүс гайхаж “Чи Израилийн багш атлаа үүнийг ойлгохгүй байна гэж үү?” гэж асуусан. Израил ус ба Сүнсээр төрөх өдрийн талаар Езекиел урьдаас өгүүлснийг Никодем мэдэх ёстой байжээ. Гэсэн ч Есүс бууж өгсөнгүй, тэвчээртэйгээр Никодемд заасан юм.[1]

Хэр зэрэг тэвчээртэй багш гэдгээ мэдэхийг хүсвэл: “Бууж өгөлгүйгээр үргэлжлүүлэн зааж сургасан тохиолдол маань хэр олон удаа вэ?” гэж асууж болно. Есүс дагалдагч нартаа тэвчээртэйгээр дахин давтан зааж сургадаг байжээ. Хэрвээ суралцагчид нь Түүний сургаалд нээлттэй байвал Есүс үргэлжлүүлэн заасаар байдаг байж. Мастер Багш Есүс тэвчээртэй байсан.

Сурсан зүйлээ хэрэгжүүлэх нь

► Та удаан суралцагч нараас залхаж, бууж өгөхөөр соригдож байна уу? Таныг заахад тэд хариу үйлдэхгүй таныг бухимдуулдаг уу? Та зааж сургаж буй хүмүүстээ хэрхэн Мастер Багшийн тэвчээрийг харуулж чадах вэ?

Мастер Багш Есүс суралцагч нараа хайрласан.

► Марк 6:30-34 эшлэлийг унших.

Есүс дагалдагч нарын хамтаар Галил нуурыг гаталж, олон хүн болон үйлчлэлийн байнгын дарамт ачааллаас түр амсхийх зэлүүд газрыг олохоор явав. Олон мянган хүмүүс Түүний явж байгааг хараад Есүстэй уулзахаар эрэг дагуу гүйлдсэн. Есүсийг эрэгт хүрэхэд 5,000 эрчүүд дээр нь эмэгтэйчүүд хүүхдүүдээс бүрдсэн олон тооны хүмүүс цугласан байлаа. Есүс олныг хараад “Тэднийг өрөвдөв. Учир нь тэд хоньчингүй хонь мэт байв. Тэр тэдэнд олон зүйлийг зааж эхлэв” (Марк 6:34) гэжээ. Мастер Багш Есүс өөрийн суралцагчдыг хайрласан учраас тэдэнд зааж сургажээ.

Энэ хичээлийн эхэнд бид Есүсийг дагах өртгийг төлөлгүйгээр явж одсон баян залуугийн гунигт түүхийг уншсан (Марк 10:17-22). “Есүс түүнийг ширтэн харж, хайрлан” (Марк 10:21). Хэдийгээр өөрийг нь орхиод явсан ч Мастер Багш суралцагчаа хайрласан.

Есүс олон түмнийг, хувь хүмүүсийг, тэр ч байтугай өөрөөс нь татгалздаг хүмүүсийг ч өрөвдөн хардаг байжээ. Нэгэн номлогч “Есүсийн хайрласан дагалдагч Иудас” гэсэн гарчигтай номлол хийжээ. Энэ номлогч Есүс Иудасыг ч хүртэл хайрласан гэдгийг ойлгож мэджээ. Иудасыг өөрөөс нь урвахыг мэдсэн ч Есүс дагалдагчаа эцсээ хүртэл хайрласан юм.

Хичээлдээ эрт ирдэг, даалгавраа биелүүлдэг, сурах хүсэл тэмүүлэлтэй сурагчийг хайрлахад амархан байдаг. Харин биднээс урвадаг Иудас, холдон одох баян залуу, үргэлж эргэлзэж бүтэлгүйтдэг Петр шиг хүмүүсийг хайрлах нь хэцүү. Бид ийм хэцүү суралцагчдыг ч хайрлах ёстой гэдгийг Мастер Багш Есүс харуулсан юм.

Сурсан зүйлээ хэрэгжүүлэх

► Хайрлахад хэцүү суралцагчийнхаа талаар бодож үзээрэй. Магадгүй тэр таны удирдлагыг эсэргүүцдэг ажилтан чинь байж болох юм. Таныг шүүмжилдэг чуулганы тань гишүүн байж ч магадгүй. Харин та “Бурхан минь ээ, би эдгээр хүмүүсийг хайрлахад амаргүй байдгийг та мэдэх билээ. Гэхдээ Та тэдэнд хайртай гэдгийг би мэднэ. Тэднийг Таны нүдээр харахад надад туслаач. Есүс суралцагч нараа хайрласан шиг тэднийг хайрлахад надад туслаач” хэмээн залбирч эхлээрэй.

“Мастер Багшийн зүрх сэтгэл” хэсгээс бид Есүсийн зан чанарыг харсан. Есүсийн заасан бүх зүйл Түүний зан чанарт үндэслэгдсэн байв. “Мастер Багшийн гар” хэсгээс бид Есүсийн ашигласан арга барилуудаас суралцах болно. Хэрэв бид Есүс шиг зааж сургахыг хүсвэл Түүний арга барилыг дагах ёстой.

Мастер Багш Есүс зорилгоо тайлбарласан.

► Лук 5:1-11 эшлэлийг унших.

Есүс Галил нуурын эрэгт зааж байх үед олон хүн Түүнийг шахсан учраас Симон Петрийн загасчилдаг завин дээр Тэр гарчээ.[1] Сургаалаа дуусгаад Есүс Симонд хандан “Усны гүн уруу нь оч, загасчлахын тулд тороо доошлуул” (Лук 5:4) гэж хэлсэн.

Симон туршлагатай загасчин байсан бөгөөд шөнөжин загасчлаад хоосон иржээ. Тэр үед загасчлах талаар ямар нэг зүйл сэдэх нь дэмий гэж тэр мэдэж байсан ч, Есүсийн тушаасны дагуу үйлджээ. Улмаар загасчид олон тооны загас барих үед Петр гайхаж хоцров. Есүс Симонд “Үүнээс хойш чи хүмүүсийг загасчлах болно” (Лук 5:10) хэмээжээ.

Есүс бусад сайн багш нарын адил дагалдагч нартаа зорилгоо тодорхой хэлж ярьж байсан. Пэнтекостын өдөр Петр Есүсийн өөрт нь бэлдсэн зорилгыг биелүүлэхэд бэлэн байгаагаа харуулжээ.

Үр нөлөөтэй багш нар зорилгоо танилцуулдаг. Тэд суралцагч нартаа “Та нар өнөөдөр үүнийг сурах болно” гэж хэлдэг. Хичээлийн төгсгөлд тэд “Та нар өнөөдөр юу сурсан бэ?” гэж асуудаг. Тэд тухайн хичээлийн зорилго биелсэн эсэхийг суралцагч нартаа бататган харуулдаг.

Сурсан зүйлээ хэрэгжүүлэх

► Дараагийн заах хичээлдээ самбар ашиглан, суралцагчдад харагдахуйц байдлаар хичээлийн зорилгоо бич. Зорилго нь ойлгомжтой, ойлгоход хялбар байгаа эсэхийг шалга. Хичээлийн эхэнд зорилгоо танилцуулаарай. Хичээлийн төгсгөлд суралцагчдаас “Бид зорилгоо биелүүлсэн үү?” гэж асууна.

Мастер Багш Есүс зааврын дагуу дадлага хийх боломжийг олгосон.

Үр нөлөөтэй заах нь лекц уншихаас илүү юм. Жинхэнэ суралцах үйл явц нь дадлагыг шаарддаг.

► Лук 10:1-24 эшлэлийг унших.

Эдгээр дагалдагч нар бүрэн бэлтгэгдээгүй байсан ч, Есүс тэдэнд зааж байсан хичээлүүдийг хэрэгжүүлэхийг зөвшөөрчээ. Дагалдагчид энэ үйлчлэлийн аяллаас буцаж ирэхдээ Есүст тайлан тавьсан. Тэд сурсан зүйлээ ойлгохгүй байгааг Есүс хараад илүү зааврыг өгчээ. Тэр бас тэднийг урамшуулж “Та нарын харж буй зүйлсийг харагч нүд ерөөлтэй” (Лук 10:23) гэж хэлсэн. Есүс тэдний дадлага ажлыг зааварчилсан.

Дадлага хийх боломж олгох нь хангалтгүй. Дадлага ажлыг нь үнэлж, дараа нь залгуулаад нэмэлт сургалтуудыг хийх ёстой. “Дадлага ажил төгс болгодог” хэмээх олны ярьдаг мэргэн үг байдаг. Энэ үг бүхэлдээ үнэн биш юм. Буруу дадлага ажил нь илүү сайн гүйцэтгэлийг бий болгодоггүй. Харин үүний оронд “зааварчилгаа бүхий дадлага ажил нь төгс болгодог” гэвэл илүү дээр. Үр нөлөөтэй багш суралцагчдад дадлага хийх боломж олгож, дадлага ажлыг нь суралцагчидтай хамт хянаж, улмаар суралцагчдаа урамшуулж тэдэнд заавар чиглүүлэг өгдөг.

Паул зааварчилгаа бүхий дадлага ажлын үнэ цэнийг мэддэг хүн байв. Тэрээр Тимот, Тит хоёрыг сургаж, дараа нь тэднийг үйлчлэх талбарт нь тавьжээ. Пасторуудын захидлуудад Паул Тимот, Тит хоёрт нэмэлт заавруудыг өгсөн байдаг. Тэр дагалдагч нараа түүний заасан үйлчлэлийн зарчмуудыг хэрэгжүүлэхэд нь зааварлаж чиглүүлжээ.

Өмнөд Африкийн нэгэн сургуульд сурагч бүр 1 Коринт 13-р бүлгийг цээжилж, ангидаа уншдаг байв. Нэг сурагч энэ даалгаврыг биелүүлж чадахгүй хэдэн долоо хоног болжээ. Тэр сайн цээжилж чаддаггүй, бусдын өмнө ярихаасаа их ичдэг хүүхэд байж. Харин нэг өдөр энэ сурагч цээжилсэн бүтэн бүлгийг ангидаа уншсан юм.

Түүнийг цээжээр уншиж дуусгах хүртэл ангийнхан нь босож зогсоод, түүнийг дэмжиж байлаа. Яагаад? Энэ бүлэг нь хайрын тухай бөгөөд тэдний багш сурагчдад хайр нь бусдад урам зориг өгдөг гэдгийг заасан байжээ. Ангийнхаа хүүхдийг урамшуулж байхдаа эдгээр сурагчид 1 Коринт 13-р бүлгийн хичээлээ хэрэгжүүлжээ! Үр нөлөөтэй багш нар сурсан зүйлээ хэрэгжүүлэхэд нь суралцагчдаа урамшуулдаг.

Сурсан зүйлээ хэрэгжүүлэх

► Сурч байгаа зүйлээ хэрэгжүүлэх боломжийг суралцагч нартаа олго. Хэрэв та залуу пасторуудыг сургаж байгаа бол тэдэнд номлох, өвчтэй хүнийг эргэх эсвэл үл итгэгч хүнд сайнмэдээ хуваалцах зэрэг боломжийг олгоорой. Тэднийг хийж дууссаны дараа үйлчлэлийг нь үнэлж, сайжруулах санал хэлж, амжилттай болсон зүйлийг нь анзаарч урамшуулаарай.

Мастер Багш Есүс уян хатан байсан

Есүсийн зааж сургаж байсан газрууд, нөхцөл байдлын талаар бодож үзээрэй. Есүс заахдаа:

• Далайн эрэг дээр (Лук 5-р бүлэг)

• Салхи шуургатай үед (Лук 8:22-25)

• Суралцагчид бэрхшээлтэй нүүр тулах боломжийг олгож (Матай 14:25-33)

• Зочид сургаалыг нь тасалдуулах үед (Матай 12:46-50)

• Сүмд айлчлах үедээ (Матай 24-р бүлэг)

• Зааж сургаж байхад нь хэн нэгэн байшингийнх нь дээврийг нүхлэх үед (Лук 5:18-26)

Лук 5:18-26-д өгүүлдэг гайхамшгийн дараа гэртээ буцан ирж байгаа дагалдагчдын талаар төсөөлж үзээрэй. Тэд Есүсийн хүч чадлын тухай сурсан энэ хичээлийг хэзээ ч мартаагүй нь лавтай. Лук “Тэд бүгдээрээ гайхан цочирдож, Бурханыг алдаршуулж—Бид өнөөдөр мөн ч хачин юм үзлээ гэцгээн бүгд айдаст автсан байлаа” (Лук 5:26) хэмээн бичжээ.

Суралцагч нар нь сурахад бэлэн байх үеийг, заах тохиромжтой цаг мөчийг агуу багш мэддэг шиг Есүс уян хатан байдлыг хангалттай харуулжээ. Лук энэхүү зарчмын нэгэн жишээг дурдсан. “Нэгэн газар Түүнийг залбирч дууссаны дараа шавь нарынх нь нэг Түүнд—Эзэн... залбирахыг... бидэнд зааж өгөөч” (Лук 11:1). Есүс залбирлын талаар заахад энэ цаг мөчийг зориулжээ.

Найман настай охин Абигаил төгөлдөр хуурын хичээлээ хийхээр өрөөнд орж ирээд “Миний муур өнөө өглөө үхчихлээ!” хэмээн уйлж эхэлжээ. Абигаилд төгөлдөр хуурын дасгал, хэмжээг тоглох ямар ч сонирхол төрсөнгүй. Гэтэл багш нь түүнд “Миний дуртай бяцхан муужгай” зохиолын хэсгийг тоглуулахаар өгчээ. Харин тэр үед Абигаил “Би үүнийг муурныхаа дурсгалд зориулж сурмаар байна!” гэж хэлжээ.

Багш нар бид суралцагчдаа сонсож, тэдний нөхцөл байдалд хариулах ёстой. Мастер Багш Есүсийн адилаар бид зааж сургахдаа уян хатан байх учиртай. Бид хичээлээ суралцагчдынхаа хэрэгцээнд тохируулж өөрчлөхөд нээлттэй байх хэрэгтэй.

Сурсан зүйлээ хэрэгжүүлэх

► Та заахдаа уян хатан байдаг уу? Хичээлээ заах дор хаяж хоёр өөр аргачлалыг төлөвлө. Хэрэв та ихэвчлэн лекц уншдаг бол лекцгүй хэлэлцүүлэг эсвэл суралцагчдыг оролцуулсан үйл ажиллагаанд үндэслэн хичээлээ төлөвлөөрэй. Хэрэв та дэлгэцээр үзүүлэх болон бусад технологийг хичээлдээ байнга ашигладаг бол цахилгаан эрчим хүч ашиглахгүйгээр заах хичээлийг төлөвлөж үзээрэй. Хэрэв та ангид хичээлээ заадаг бол гадаа, байгальтай харьцах байдлаар хичээлээ заахаар төлөвлөж болно.

Мастер Багш Есүс бүтээлч байдлаар тайлбарласан

Есүс хэзээ ч сууж байгаад “Өнөөдөр бид сурах бичгийн 212-р хуудсыг унших болно. Петр, чи бидэнд эхний багц хэсгийг уншиж өгөөрэй” гэж хэлэхгүй. Харин үүний оронд Есүс бүтээлч, шинэлэг байдлаар заадаг байсан.

► Бүтээлч байдлаар заасан Есүсийн жишээ бүрийг унших:

• Лук 6:39-42. Сохор хүн өөр нэг сохор хүнийг замчилж байгаа егөөтэй явдлыг бодож үзээрэй. Нүдэндээ дүнзтэй хүн өөр нэг хүний нүдэн дэх үртсийг авах гэж байна гээд төсөөлөөд үз дээ.

• Лук 18:18-30. Бурханы хаанчлалд орохын тулд дэлхийн эд баялгийг ашиглах боломжтой юу? Тэмээг зүүний нүхээр багтаахаар шахаж байна гээд төсөөлөөд үз!

• Лук 9:46-48. Есүс даруу байдлын тухай сургахдаа хүүхдийг амьд үзүүлэн болгон заажээ.

• Лук 15:1-7. Гэртээ буцан ирж буй төөрсөн нэгэнд Бурхан хэрхэн ханддаг вэ? Есүс тариачдад хонины үнэ цэнийг сургасан.

• Лук 15:11-32. Туйлын эрх мэдэл нь эцэг хүнээр хэмжигддэг эцгийн эрхэт ёс давамгайлсан нийгэмд Есүс тэрслүү хүүгээ угтахаар гүйж буй эцгийн тухай сургаалт зүйрлэл ярихад хүмүүс цочирдож байсан нь лавтай.

Есүс асуултад шууд хариулах нь маш ховор байлаа. Үүний оронд Тэр түүх хүүрнэх эсвэл өөр асуулт асуух байдлаар хариулж байсан. Лук 10-р бүлэгт хуульч Есүсээс “Багш аа, мөнх амийг өвлөн авахын тул би яах ёстой вэ?” гэж асуухад Тэр сайн самари хүний түүхээр хариулжээ (Лук 10:25-37).

Есүс гайхалтай сайн асуулт асуухыг мэддэг байсан. Тэр энгийн “Тийм” эсвэл “Үгүй” гэж хариулагдах асуултуудыг бараг тавьдаггүй байв. Харин Тэрээр сонсогчийг шинэ боломжуудыг олж харахад нүдийг нь нээхүйц тийм асуултуудыг асуудаг байсан.

► Эдгээр жишээг унших:

• Лук 7:36-50. Өөрийг нь шүүмжилсэн фарисай хүнээс Есүс “Ихээр уучлагдсан нь уу, эсвэл багахан уучлагдсан нь уу, хэн нь хамгийн их хайрлагдах вэ?” гэж асуужээ.

• Марк 8:36. Өөрийг нь дагах талаар сургахдаа Есүс “Хүн бүх ертөнцийг олж авсан ч амиа алдвал ямар ашиг байх билээ?” хэмээн асуусан.

• Лук 6:46. Дуулгавартай байхыг хүсдэггүй хүмүүсээс Есүс “Та нар Намайг “Эзэн, Эзэн” гэж дууддаг хэрнээ юунд хэлснийг минь үйлддэггүй юм бэ?” гэж асуужээ.

Эдгээр асуултын аль нь ч амархан хариулах боломжгүй асуултууд юм. Эдгээр нь биднийг Есүсийн сургаалыг гүн гүнзгий бодож эргэцүүлэхэд хүргэдэг.

Багш нар дараах хоёр зүйлээс болж сайн асуулт тавьж чаддаггүй.

1. Бид хэтэрхий энгийн асуулт асуудаг. Хэрэв бид суралцагчдаар гүнзгий бодуулахыг хүсэж байгаа бол тийм, үгүй гэж хариулагдах эсвэл сурах бичигт бэлэн хариулт нь байгаа асуултуудыг асуух ёсгүй юм.

2. Бид хариултыг авахдаа хангалттай удаан хүлээдэггүй. Ихэнх багш нар хариулт авахаар дараагийн суралцагч руу шилжихдээ нэг секунд ч хүрэхгүй хугацааг хүлээхэд зарцуулдаг гэсэн судалгаа бий. Суралцагч асуултыг ойлгож, хариулт үүсгэж эхлэхэд ойролцоогоор гурван секунд шаардагддаг. Асуултынхаа хэрэглээг сайжруулахын тулд та дараагийн суралцагч руу шилжихээсээ өмнө үргэлж долоон секунд хүлээж байгаарай.

Сурсан зүйлээ хэрэгжүүлэх

► Та заахдаа хэр бүтээлч вэ? Галат 6:7-8 эшлэлээр хичээл бэлтгээрэй. Суралцагчдад тарих ба хураах зарчмын талаар гүнзгий бодоход туслах асуултуудыг бэлтгэ. Та асуултуудаа бэлтгэсний дараа доорх зүүлт хэсгээс асуух боломжтой нэмэлт асуултуудыг үзнэ үү.[2]

Сургаалт зүйрлэл нь Есүсийн заах дуртай аргуудын нэг юм. Нэгэн хүн сургаалт зүйрлэлийг “Тэнгэрлэг сургамж бүхий ертөнцийн түүх” гэж тодорхойлсон байдаг. Есүс сургаалт зүйрлэлдээ танил хөдөө нутгийн байдал (тариачид, хоньчид болон хонин сүрэг), танил хүмүүс (самаричууд, тахилчид, татвар хураагчид болон фарисайчууд) болон танил нөхцөл байдлууд (төөрсөн хонь, алдагдсан зоос, гэрээсээ явсан хүү) зэргийг суралцагчдынхаа хүсэл сонирхолтой холбогдохын тулд ашигласан байдаг.

Shepherds Global Classroom байгууллагын Библийн хөрвүүлгийн зарчмууд курсэд сургаалт зүйрлэлүүдийг тайлбарлах хэсэг багтсан байдаг. Тэрхүү хичээлд заасан зарчмуудыг хураангуйлан энд оруулав. Сургаалт зүйрлэлийг судлахдаа бид дараах асуултуудыг асуух хэрэгтэй. Үүнд:

(1) Энэ сургаалт зүйрлэл яригдахад ямар асуулт эсвэл нөхцөл байдал нөлөөлсөн бэ?

Сайн самари хүний тухай сургаалт зүйрлэлийг нэгэн хуульчийн “Миний хөрш гэдэг чинь хэн бэ?” гэсэн асуултад хариулт болгон Есүс ярьсан бөгөөд “миний замд тааралдсан ямар ч гачигдалтай хүн миний хөрш бөгөөд миний үүрэг хариуцлага” (Лук 10:36-37) гэж хариулжээ.

Есүс төөрсөн хүүгийн тухай сургаалт зүйрлэлийг нүгэлтнүүдтэй хамт нөхөрлөж байгааг нь шүүмжилсэн шашны удирдагчдад хандан ярьжээ. “Татвар хураагчид ба нүгэлтнүүд бүгд Түүнийг сонсохоор ойртоцгооход, фарисайчууд болон хуулийн багш нар дургүйцэн дүнгэнэлдэж—Энэ хүн нүгэлтнүүдийг хүлээн авч тэдэнтэй хамт хооллодог гэхэд нь ийм сургаалт зүйрлэл тэдэнд айлдав” (Лук 15:1-3).

• Нэгэн хоньчин хонио алджээ. Тэр хонио олоод баярласан!

• Нэгэн эмэгтэй зоосоо гээж орхив. Тэр зоосоо олоод баярласан!

• Нэгэн эцэг хүүгээ алдсан. Тэр хүүгээ буцаж ирэхэд баярласан!

Есүс үүгээр “Намайг нүгэлтнүүдтэй хамт хооллоход та нар цочирдох ёсгүй. Нэг нүгэлтэн гэмшихэд тэнгэр баярладаг!” хэмээжээ.

Хэрэв бидний тайлбар нь Есүсийг түүх ярихад нөлөөлсөн нөхцөл байдал эсвэл асуултад хариулахгүй бол бид сургаалт зүйрлэлийн гол санааг орхигдуулсан гэсэн үг.

(2) Сургаат зүйрлэлийн үндсэн санаа (гол санаа) юу вэ?

Сургаалт зүйрлэлд өгүүлэгдэх гол дүр болгон нэг гол санааг агуулдаг. Сургаалт зүйрлэлийн үндсэн сургамж нь сургаалт зүйрлэл ярихад нөлөөлсөн нөхцөл байдал эсвэл асуулттай шууд холбоотой байдаг. Бусад сургамжуудыг яригдсан түүхийн дүр, хүмүүсээс авдаг.

Төөрсөн хүүгийн тухай сургаалт зүйрлэлд гурван дүр гардаг. Түүхийн үндсэн сургамж нь гэмшсэн нүгэлтний төлөөх тэнгэрийн баяр баясгалан гэдгийг бид өмнө нь харсан. Энэхүү сургамж нь Есүсийг түүх ярихад нөлөөлсөн нөхцөл байдлын хариулт юм. Сургаалт зүйрлэлд гардаг дүр болгон түүхийн үндсэн сургамжтай холбоотой үнэнийг зааж болно. Эцэгийн дүр бидний тэнгэрлэг Эцэгийн гайхалтай хайрыг заадаг. Төөрсөн хүүгийн дүр нүглийн өртөг болон гэмших боломжийн талаар аль алиныг нь заадаг. Бид сайн хүү мэт харагдаж байсан ч эцэгт хайрлагдсан боломж завшааныг алдаж болно гэдгийг том ахын дүр анхааруулдаг.

(3) Ахуй соёлын ямар нарийн ширийн зүйлс сургаалт зүйрлэлд чухал вэ?

Есүсийн заасан сургаалт зүйрлэлүүд нь ихэвчлэн тухайн ахуй соёл дахь ердийн хэм хэмжээтэй зөрчилддөг. Энэ нь сургаалт зүйрлэлүүдийг мартахын аргагүй болгодог. Жишээ нь, тэрслүү хүүгээ угтахаар гүйж байгаа эцэг, самари хүнийг баатар гэж харуулсан, хүчгүй бэлэвсэн эмэгтэй хүчирхэг шүүгчийг ялдаг түүх гэх мэт. Бид сургаалт зүйрлэлийн ахуй соёлын нөхцөл байдлыг сайн ойлгох тусам Есүсийн сургаалыг илүү сайн ойлгох боломжтой.

Др. Ховард Хендрикс[1] Даллас Теологийн Семинарт 60 гаруй жил багшилсан хүн юм. Багшлах хугацаандаа тэрээр 10,000 гаруй оюутнуудад хичээл заажээ. Түүний хамгийн нөлөө бүхий номуудын нэг нь “Багшийн хуулиуд” нэртэй жижиг ном юм. Эдгээр хуулиуд нь Есүсийн заах арга барилд үндэслэгджээ. Эдгээр зарчмуудыг хэрэгжүүлснээр та илүү үр нөлөөтэй багш болох болно.

Багшийн хууль

Багшийн хууль: Өнөөдөр өсөхөө боливол, маргааш багшлахаа болино.

Др. Хендрикс “Та хуучин цөөрөм эсвэл урсгал горхины алинаас нь ус уухыг илүүд үзэх вэ?” гэж асуусан байдаг. Урсгал цэнгэг ус нь тогтоол, өмхий уснаас хавьгүй дээр юм.

Зарим багш нар заадаг хичээлтэйгээ холбоотой шинэ ном уншилгүй, шинэ санаа олж авахгүй олон жил явдаг. Тэдний зааж сургах нь яг л тогтоол, өмхий устай цөөрөм адил болж хувирдаг. Пасторууд Бурханы Үгийн талаар шинэ ойлголттой болохын тулд байнга суралцдаг шиг багш нар бид үргэлжлүүлэн суралцсаар байх ёстой юм.

Сурсан зүйлээ хэрэгжүүлэх

► Нэг суралцагч танаас “Багшаа, та хамгийн сүүлд Библиэс юу сурсан бэ?” гэж асуусан гэж төсөөлье. Харин таны хариулт энэ долоо хоног, энэ сар, энэ жил, эсвэл бүр эрт дээр үеэс ирэх үү? Та Бурханы Үгийн талаарх мэдлэгээ өдөр бүр нэмэгдүүлж байна уу?

Боловсролын хууль

Боловсролын хууль: Хүмүүсийн суралцах арга зам нь та хэрхэн заахыг тодорхойлдог.

Есүс хоньчдод хонины тухай, загасчдад “хүмүүсийг загасчлах” талаар, худгийн дэргэд уулзсан эмэгтэйд усны тухай ярьж зааж байсан. Үр нөлөөтэй багш нь суралцагч бүрийнхээ хэрэгцээнд тохируулж заадаг гэдгийг Есүс мэддэг байжээ.

[2]Др. Хендрикс багшлахыг хөл бөмбөгийн дасгалжуулагчийн ажилтай зүйрлэн ярьдаг. Дасгалжуулагч тоглоом тоглодоггүй. Харин тэр тоглогчдыг догдлуулж, чиглүүлдэг. Үүний нэгэн адил шилдэг багш бүх ажлаа лекцийн аргаар хийдэггүй. Шилдэг багш суралцагч нэг бүрийг үр дүнтэй сурахад нь урам зоригоор тэтгэдэг.

Мика Библийн сургуулийн оюутан байлаа. Багш бүх оюутнуудыг шалгалтанд бэлдэхийн тулд тэмдэглэлээ анхааралтай хөтлөхийг хүсжээ. Харин Мика тэмдэглэл хөтлөхийг хүссэнгүй. Үүний оронд тэр багшийг лекц унших үед дэвтэртээ зураг зурдаг байв. Багш нь Микаг хичээлээ сонсохгүй байна гэж бодов. Хэд хэдэн удаа тэр “Мика, зураг зурахаа болиод миний зааж байгаа зүйлийг бичээрэй” гэж хэлж үзэв. Мика багшийнхаа асуусныг хийх гэж оролдсон ч тэр маш их бухимдаж байлаа.

Дараа нь багш Др. Хендриксийн “Боловсролын хууль”-ийг санасан. Тэгээд тэр “Мика, туршилт хийцгээе. Хичээл дээр миний ярьсан зүйлийг харуулж чадвал чи зургаа зурж болно” гэж хэллээ. Энэхүү туршилт амжилттай болсон юм. Мика үгсийг зураг болгон хувиргаж сурчээ. “Хүмүүсийн суралцах арга зам нь та хэрхэн заахыг тодорхойлдог” учраас багш өөрийн хүлээлтээ өөрчлөхөд суралцжээ.

Сурсан зүйлээ хэрэгжүүлэх

► Танай ангид бусад суралцагчдаас арай өөр байдлаар сурдаг хүн бий юу? Түүнийг илүү үр дүнтэй суралцахад нь та хэрхэн тусалж чадах вэ?

Үйл ажиллагааны хууль

Үйл ажиллагааны хууль: Хамгийн их оролцоо нь хамгийн их суралцах боломжийг олгодог.

[3]Өөрийнх нь зааж буй хичээлийг дагалдагчид нь хэрэгжүүлэх ёстой гэдгийг Есүс мэдэж байлаа. Тэр тэднийг үйлчлэлийн аялалд илгээх, цугласан олонд талх, загас тараахыг тушаах, залбирахын тулд эзгүй газарт аваачих зэргээр сурсан зүйлээ хэрэгжүүлэх боломжийг олгодог байсан. Үр дүн нь юу байв? Элч нар дэлхийг орвонгоор нь эргүүлсэн хүмүүс хэмээн нэрлэгджээ (Үйлс 17:6).

Сэтгэл зүйчид хэлэхдээ:

• Бид сонссон зүйлийнхээ 10 хүрэхгүй хувийг санадаг.

• Бид харж, сонссон зүйлийнхээ 50 хүрэхгүй хувийг санадаг бол

• бид харж, сонсож, хийдэг зүйлийнхээ 90 хүртэлх хувийг санадаг.

Идэвхтэй оролцоо нь илүү ихийг сурахад нөлөөлдөг.

Сурсан зүйлээ хэрэгжүүлэх

► Дараагийн хичээлээ бэлдэхдээ таны заах зарчмыг суралцагчид хэрэгжүүлэх боломжтой үйл ажиллагааг бэлтгэ.

Харилцааны хууль

Харилцааны хууль: Жинхэнээсээ зааж сургая гэвэл бид суралцагч нартайгаа холбогдох ёстой (гүүр тавих).

Багш, пасторууд бид харилцааны ажил хэрэг явуулдаг хүмүүс билээ. Бидний ажил зүгээр мэдээлэл дамжуулахаас илүү өргөн. Бид сонсогчдод үнэнийг хүргэдэг. Харилцаа холбоо нь нийтлэг ойлголцлыг шаарддаг. Бид суралцагчидтайгаа холбогдож ойлголцохын тулд гүүр тавих шаардлагатай.

Суралцагч нартайгаа гүүр тавих үлгэр жишээг Есүс өгчээ. Есүс самари эмэгтэйтэй харилцахад үндэс угсаа, шашин шүтлэг, нийгмийн олон саадуудтай тулгарсан. Есүс еврей, харин эмэгтэй самари хүн байв. Есүс эрэгтэй, тэр эмэгтэй байлаа. Есүс нэр хүндтэй рабби байсан бол эмэгтэйн өнгөрсөн амьдрал ёс суртахууны асуудалтай байжээ. Есүс эдгээр саадыг даван хэрхэн гүүр тавьж чадсан бэ? Есүс нийтлэг ойлголтыг барьж авсан. Тэд хоёулаа цангаж байв. Махбодын хэрэгцээ нь амьдралыг өөрчлөх уулзалтын гүүр болжээ (Иохан 4:1-42).

Др. Хендрикс харилцаа холбоо нь гурван түвшнийг хамарсан байх ёстой хэмээн бичжээ:

1. Мэдлэг – миний мэддэг зүйл. Энэ бол харилцааны хамгийн энгийн түвшин.

2. Хүсэл тэмүүлэл – миний мэдэрч буй зүйл. Энэ бол илүү гүнзгий харилцааны түвшин.

3. Үйлдэл – миний хийдэг зүйл. Ийм түвшний харилцаа суралцагч нарыг маань өөрчилдөг.

Жоел Африкт семинарын зохион байгуулагчийн ажил хийдэг байхдаа нэгэн чинээлэг хандивлагчтай уулзаж, алсын хараа зорилгоо танилцуулжээ. Харин тэр хандивлагч Жоелын төсөөлж байснаас их хэмжээний санхүүг санал болгосон. Хандивлагч Жоелыг гайхшруулан өгөөмөр хандсаны учир вэ? Семинарын зохион байгуулагч маань гурван түвшний харилцаа холбоог бий болгож чадсан. Үүнд:

1. Мэдлэг – Тэр Африкт семинарын сургалт явуулах хэрэгцээ шаардлага байгааг мэдсэн.

2. Хүсэл тэмүүлэл – Тэр Африкт чуулганы удирдагчдыг сургахыг хүсэж байв.

3. Үйлдэл – Тэрээр Африкт амьдралаа өнгөрөөж, чуулганы удирдагчдыг бэлтгэхийн тулд маш их золиос зориулалт гаргажээ. Жоел Африкт юу хийж байгаагаа ойлгуулж чадсан.

Үр нөлөөтэй зааж сургахын тулд бид хичээлдээ дуртай, хүсэл тэмүүлэлтэй байх ёстой. Хүүхдийн цуглаан болон Ням гарагийн сургалтын үеэр ангид ийм яриа өрнөж байна гээд төсөөлж үзье:

Багш: “Өнөөдөр бид Иохан 6-р бүлгээс 5,000 хүнийг хооллосон талаар суралцах болно.”

Суралцагч: “Надад нэг асуулт байна. Библид зөвхөн эрчүүдийн тоог бичсэн байна. Яагаад тэр вэ?”

Багш: “Би мэдэхгүй байна. Энэ тийм ч чухал биш л дээ. Зүгээр л хичээлдээ анхаар.”

Библийн сэтгэл хөдөлгөм түүх гэнэт уйтгартай санагдаж эхэлнэ. Есүс 20,000 хүнийг цөөхөн талх, загасаар яаж хооллосныг мэдэхдээ хүүхдүүд дуртай байх болно. Бид энэ түүхийг ийм уйтгартай болгох гэж үү? Энэ багш мэдлэгийг ойлгуулж хүргэхгүй байна. Тэрхүү еврей бичээчид яагаад зөвхөн эрчүүдийг тоонд оруулж бичсэн талаар нэмэлт материалыг судалсангүй. Багш сэтгэл хөдөлгөм түүхийг мэдрэхгүй, хүсэл сонирхолгүй заажээ. Энэхүү хичээл багшийн өөрийнх нь амьдралд бага ч болтугай өөрчлөлт авчраагүй бол суралцагч нарынх нь амьдралд өөрчлөлт авчрах магадлал бага юм.

Сурсан зүйлээ хэрэгжүүлэх

► Хичээлээ бэлдэж байхдаа өөрийнхөө ертөнц болон суралцагчдынхаа ертөнц хоорондын зай ялгаатай байдлыг бодож цэгнээрэй. Суралцагч нартаа гүүр тавихад цаг гарга. Хичээлээ суралцагчдынхаа сонирхолтой холбох арга замыг хайж ол.

Зүрх сэтгэлийн хууль

Зүрх сэтгэлийн хууль: Үр нөлөөтэй зааж сургах нь толгойноос толгойд бус, харин зүрхнээс зүрхэнд явагддаг.

Есүсийг уулан дээрх номлолоо дуусгахад олон түмэн Түүний сургаалыг биширч, Тэр хуулийн багш нар шиг бус, эрх мэдэлтэй Нэгэний хувьд тэдэнд зааж байв (Матай 7:28-29) гэв. Есүсийн сургаал Түүний зүрх сэтгэлээс гарч, сонсогчдынх нь сэтгэл зүрхэнд хүрчээ.

Сайнмэдээний номуудад Есүсийн өр нимгэн сэтгэлийг дахин давтан харуулдаг. Түүний өр нимгэн зүрх сэтгэл нь хүмүүст хүрч байв. Түүний зүрх сэтгэл тэдний зүрх сэтгэлд хүрсэн. Үр нөлөөтэй заахад туслах зүйлсийн талаар Ховард Хендрикс бичжээ.

Багшийн зан чанар нь суралцагчид итгэлцлийг төрүүлдэг.

Хэрэв суралцагч нь багшийнхаа зан чанарт итгэдэг бол түүний зааж буй зүйлд ч итгэлтэй байдаг. Пастор, багш бидний хувьд энэ итгэлцлийг хэзээ ч үгүй хийх ёсгүй. Дахин сэргээхэд хамгийн хэцүү зүйл бол итгэлцэл юм. Ухаалаг христэч удирдагчид тэднийг ёс суртахууны болон ёс зүйн уналтад хүргэж болзошгүй бүхнээс холуур явдаг. Таны зан чанар суралцагчдад итгэлцлийг төрүүлэх ёстой.

Багшийн өр нимгэн сэтгэл суралцагчид урам зориг нэмдэг.

Суралцагч багшийнхаа энэрэнгүй сэтгэлийг мэдэрвэл сурах урам зоригтой болдог. Есүс тэднийг хайрладаг гэдгийг мэдсэн учраас дагалдагчид Түүнийг дагасан. Хэрэв та суралцагч нараа хайрладаггүй бол тэдний танаас сурах хүсэл эрмэлзэл нь бага байх болно.

Др. Хендрикс хүүхдүүдэд заадаг багш нартай ярилцах үеэрээ “Хэрэв Жоанна шинэ гуталтай болсон бол та түүний шинэ гутлыг анзаарах хэрэгтэй. Эс бөгөөс тэр таны шинэ хичээлийг хэзээ ч сонсохгүй!” гэжээ. Та суралцагчдаа анхаарал хандуулсны дараа л (таны хайрын улмаас) тэд таны зааж буй хичээлийг сурахад бэлэн байх болно.

Багшийн заах агуулга суралцагчид ойлголтыг авчирдаг.

Суралцагч сурах хүсэл эрмэлзэлтэй болсны дараа л та агуулгаа заахад бэлэн болно. Тэдний итгэлийг олж авсны дараа та өөрийн зүрх сэтгэлээс тэдний зүрх сэтгэлд ярьж чадна.

Сурсан зүйлээ хэрэгжүүлэх

► Та суралцагч нартаа хайртай юу? Хамгийн чухал нь та тэдэнд хайртай гэдгийг тэд мэддэг үү? Бурханаас танд илгээсэн суралцагч нартайгаа сэтгэлээсээ хэрхэн илүү сайн холбогдож чадах вэ?

Урам зоригийн хууль

Урам зоригийн хууль: Суралцагч сурах хүсэлтэй болж зөвөөр өдөөгдөх үед зааж сургах нь хамгийн үр дүнтэй явагддаг.

Өдөөлт (сэдэлжүүлэх) гэдэг үгийг сонсохдоо олон багш нар амттан, гэрчилгээ, дүн эсвэл суралцагчдын урмыг сэргээх бусад аргуудын талаар боддог. Эдгээр шагнал нь буруу биш бөгөөд залуу хүмүүсийн сонирхлыг татахад тусалж чадна. Гэхдээ эдгээр урамшуулал нь жинхэнэ зорилгод хамааралгүй юм. Шагнал авахын төлөө ажиллаж байгаа суралцагчийн хувьд суралцаж байгаа үнэнээрээ өөрчлөгдөх магадлал бага байдаг. Тэгэхээр багш хүн суралцагчийнхаа дотоод сэдлүүдэд хандан ярих нь илүү дээр юм.

Др. Хендрикс зарим дотоод сэдлүүдийг нэрлэжээ. Үүнд:

• Эзэмшил. “Энэ бол миний чуулган. Үүнийг өсгөхийн тулд би зочдыг урих болно.”

• Хэрэгцээ. “Сорилтыг ялан дийлэхийн тулд надад Бурханы Үг хэрэгтэй. Тиймээс би Бичвэрийг цээжлэх болно.”

• Хүлээн зөвшөөрөл. “Би багшдаа хайртай, түүнийг баярлуулахыг хүсэж байна. Тиймээс би хичээлээ судлах болно.”

Эдгээр сэдэл нь амттан эсвэл дүнтэй харьцуулбал хамаагүй удаан настай. Эдгээр сэдэлжүүлэх хэрэгслүүдийг ашигласнаар бид суралцагчдыг урт удаан хугацааны туршид суралцахад нь урамшуулдаг.

Сурсан зүйлээ хэрэгжүүлэх

► Суралцагч нараа сэдэлжүүлэх зүйлсийн жагсаалт гарга. Суралцахын ашиг тусын талаар та тэднийг хэрхэн өдөөх вэ?

Бэлэн байдлын хууль

Бэлэн байдлын хууль: Суралцагч, багш хоёулаа хангалттай бэлтгэсэн үед зааж сургах нь хамгийн үр дүнтэй байдаг.

Энэ нь танай чуулганы ердийн Ням гарагийн хичээл шиг сонсогдож байна уу?

Багш: “Өнөөдөр бид Ефес 5-р бүлгээс сурах болно. Библиэ нээцгээнэ үү.”

Суралцагчид бодохдоо: “Бид яагаад Ефес 5-р бүлгийг судлах хэрэгтэй вэ?”

Багш Ефес 5-р бүлгийг нэг цаг орчим заалаа. Тэр бол сайн багш. Хичээлийн төгсгөл хэсэг ойртож, суралцагчид Паулын сургаалаас урам зориг авч байна. Хичээл дуусч, суралцагчид гэртээ харилаа. Долоо хоногийн дараа бид дахиад дараах яриаг сонсож болох юм:

Багш: “Өнөөдөр бид Ефес 6-р бүлгээс сурах болно. Библиэ нээцгээнэ үү.”

Суралцагчид бодохдоо: “Бид яагаад Ефес 6-р бүлгийг судлах хэрэгтэй вэ?”

Суралцагчид хичээл эхлэхээс өмнө Ефес 6-р бүлгийг сурсан бол хичнээн сайн байх байв! Хичээлд ирэхдээ тэд асуултуудаа жагсаан бичээд ирсэн бол хичээл илүү үр дүнтэй байх байсан уу? Мэдээжийн хэрэг! Та үүнийг яаж гүйцэлдүүлж чадах вэ? Профессор Хендрикс суралцагч нартаа хичээлдээ бэлтгэх даалгавар өгөхийг санал болгож байна. Жишээ нь:

• Суралцагчийг дараагийн долоо хоногт судлах хичээлээ бодохуйц тийм даалгавар өг. “Ирэх Ням гарагаас өмнө Үйлс 19-р бүлгийг уншаад Паул Ефес дэх чуулганыг хэрхэн эхлүүлж байсныг мэдэж авах.”

• Хичээлтэй холбоотой нэмэлт мэдээллийг олж авахуйц даалгавар өг. “Ирэх Ням гарагаас өмнө Ефес дэх Артемисийн сүмийн талаар Библийн толь бичгээс уншиж мэдэх. Энэ нь Паул Ефес 6:10-20-д сүнслэг тулааныг онцолсныг тайлбарлахад туслах болно.”

• Суралцагчид бие даан суралцах чадвараа хөгжүүлэхүйц даалгавар өг. “Ефес 6-р бүлгийг энэ долоо хоногт өдөр бүр нэг удаа уншина. Уншиж байхдаа энэ бүлгийн талаар асуух нэг асуулт бичээд ирээрэй. Ирэх Ням гарагт бид чиний асуултын дагуу ярилцах болно.”

Сурсан зүйлээ хэрэгжүүлэх

► Заах дараагийн ангидаа тэрний дараагийн хичээлд бэлтгэх даалгавар өг. Даалгавар нь тэднийг судлах хичээлээ илүү сайн ойлгоход бэлтгэж байгаа эсэхийг нягтлаарай.

Есүс “Бүрэн суралцах аваас хэн ч багш шигээ болж болно” (Лук 6:40) гэдгийг мэддэг байсан. Түүний дагалдагч нар энэ зарчмыг харуулсан. Төгс хайрын үлгэр дуурайлаар сургагдсан тул “Аянгын хүү” гэгдэх Иохан “Хайрын элч” Иохан болжээ. Итгэлийн үлгэр дуурайлаар сургагдсан тул “Эргэлзэгч Томас” “Энэтхэгийн төлөөх элч” болжээ. Дагалдагчид бүрэн суралцахдаа тэд Багш шигээ болсон юм.

Багш хүний хийх анхны алхам бол суралцагчдаа ямар болоосой гэж хүсдэг тэр хүн байх явдал юм. Хэрэв Есүс тогтвортой байдлын үлгэр дуурайл байгаагүй бол тогтворгүй Петрийг “Хад” болгож чадахгүй байсан. Бид суралцагч нараа ямар байгаасай гэж хүсдэг тэр хүн байх ёстой.

Паул энэ зарчмыг ойлгодог байжээ. Тэр коринтчуудад “Би Христийг дуурайдаг шиг намайг дуурайгчид бай” (1 Коринт 11:1) гэж хэлсэн юм. Тэр ямар зоригтой хэлнэ вэ! Энэ нь Паул “Хэрэв та зөв амьдралаар амьдрахыг хүсвэл намайг хуулбарла” гэсэнтэй адил юм. Паул Христийг дагаж байсан тул коринтчуудын хувьд Паулыг дагах нь аюулгүй байжээ.

Хэрэв миний суралцагчид над шиг болвол “Суралцагчид маань надаас хуулбарлахад ичихээр тийм зан чанарыг би харуулдаг уу?” гэж асуух ёстой юм. Хэрэв би суралцагч нартаа ууртай, тэвчээргүй байдлаар хандсан бол суралцагч нар маань “бүрэн суралцахдаа” бусдад уурлаж, тэвчээргүй хандвал би гайхах ёсгүй.

Багшийн хувьд зан чанар бол гол зүйл мөн. Та өөрийн амьдралдаа хөгжүүлж хэвшүүлээгүй зан чанаруудыг суралцагч нартаа хөгжүүлж чадахгүй. Багш хүний хувьд агуу боловсролоо харуулахаас илүүтэй бурханлаг зан чанарыг харуулах нь хавьгүй илүү чухал байдаг. Бид суралцагч нараа ямар байгаасай гэж хүсдэг тэр хүн байх ёстой.

Сурсан зүйлээ хэрэгжүүлэх

► Есүстэй адил зааж сургах нь гэсэн энэхүү хичээлийн төгсгөлд, суралцагч нар тань танаас хуулбарлаасай гэж хүсэхгүй тэдгээр зан чанаруудыг харуулахыг Бурханаас та хүсээрэй. Таны суралцагч нар бүрэн суралцахдаа Бурханы зан чанар тэдний амьдралд тусгагдан харагдахын тулд өөрчлөх шаардлагатай нигүүлслийг Бурханаас гуй.

Энэ хичээлийн даалгаврууд хичээлийн туршид өгөгдсөн. Хэрэв та хичээлийн үеэр хийх ёстой үйл ажиллагаа бүрийг гүйцэтгэсэн бол 4-р хичээлд нэмэлт даалгавар өгөгдөхгүй.

3-р хичээлээс сурсан зүйлээ хэрэгжүүлэх PDF