Lesson 4: Сайнмэдээний үндсэн ойлголтууд

Ойлголт тус бүрийг тодотгосон Бичвэрийн эшлэлийг аль нэг суралцагч уншина. Дараа нь тухайн санааг тайлбарласан хэсгийг мөн нэг суралцагчаар уншуулна. Тэгээд хэлэлцэх асуулт бүрээр суралцагчдыг товч байдлаар яриулаарай.

Дараах санаанууд нь сайнмэдээний үндсэн ойлголт юм. Хэн нэгэн эдгээрийг бүрэн ойлгохгүйгээр итгэлд ирсэн байж болох юм. Гэсэн хэдий ч эдгээр ойлголтуудын аль нэгийг үгүйсгэх нь сайнмэдээний үндэс суурийг үгүй болгож байгаатай адил юм. Эдгээр үндсэн ойлголтын аль нэгийг үгүйсгэх аливаа хүн, байгууллага нь өөр сайнмэдээг дэлгэрүүлж, улмаар авралын худал хуурмаг арга хэрэгсэлд итгэл найдвараа тавьдаг.

Та хэн нэгэнтэй сайнмэдээг хуваалцах үед тухайн хүний аль хэдийн итгэсэн алдаатай итгэл үнэмшлээс болоод зарим санаа ойлголтууд нь маш онцгой чухал болж болох юм. Жишээлбэл, хэрэв тухайн хүн авралыг зөвхөн тодорхой нэг байгууллагаар дамжуулан хүлээн авдаг гэж үздэг бол тухайн байгууллагын гишүүнчлэлийн шаардлага нь авралд гарцаагүй шаардлагатай гэж итгэх боломжтой. Харин тэр хүний хувьд Бурхантай хувьчилсан шууд харилцаагаар дамжуулан, уучлалыг хүлээн авдаг гэдгийг мэдэх хэрэгтэй болж байна.

(1) Бурхан эрэгтэй, эмэгтэй хүмүүстэй харилцахын тулд Өөрийн дүр төрхөөр бүтээжээ (Эхлэл 1:27, Үйлс 17:24-28).

Энэхүү үнэн бидний оршин байгаа учир шалтгаан болон авралын зорилгыг тусган харуулдаг. Мөн энэ үнэн нь бодгаль шинж чанартай Бурханд итгэдэггүй шашнуудтай зөрчилддөг. Түүнчлэн энэхүү үнэн нь Бурхантай харилцдаггүй хүмүүсийн бодит асуудлыг ч харуулдаг.

► Хэрэв хүн Бурхан өөрт нь хайртай гэдэгт итгэдэггүй бол яах вэ?

(2) Анхны хүмүүс нүгэл үйлдэж, Бурханаас тусгаарлагдсан (Эхлэл 3:3-6).

Энэ нь нүглийн гарал үүсэл, дэлхий ертөнцийн нөхцөл байдлын жинхэнэ шалтгаан болдог. Дэлхий ертөнц бол нүглийн улмаас зовж шаналан буй газар юм. Бурханы бүтээлийн загвар ёсоор баяр хөөр, зорилго байсаар байгаа ч энэ дэлхий ертөнц нь Бурханы төлөвлөсөн шиг биш байгаа юм.

► Хэрэв хүн нүглийг дэлхийн ертөнцийн жинхэнэ асуудал гэж итгэдэггүй бол яах вэ?

(3) Хүн бүр Бурханаас тусгаарлагдсан, Түүнд дуулгаваргүй байдалд төрдөг болсон (Ром 3:10, 23).

Хүн бүр Бурханы эсрэг санаатай нүгэл үйлдсэн гэм буруутай. Үргэлж зөв зүйл хийдэг хүн гэж байдаггүй.

► Хүн хийсэн зүйлээ зөвтгөж чадна гэж бодож байвал яах вэ?

(4) Өршөөл уучлалыг нь хүлээн аваагүй нүгэлтэн бүр Бурханаар шүүгдэж, мөнхийн шийтгэлийг авах болно (Еврей 9:27, Ром 14:12, Илчлэл 20:12).

Энэ нь үл итгэгч хүний авралын хэрэгцээ ямар ноцтой бөгөөд яаралтай байдалд байгааг харуулдаг.

► Хэрэв хүн түүний нүглээс болж уурсан буй зөв шударга Бурхан байдаг гэж итгэдэггүй бол яах вэ?

(5) Хүн Бурханы эсрэг үйлдсэн нүглээ цайруулахын тулд юу ч хийж чадахгүй (Ром 3:20, Ефес 2:4-9).

Сайн үйлс хийж, бэлэг өгснөөр нүглийн төлөөсийг төлж чадахгүй. Учир нь нүгэл бол хязгааргүй Бурханы эсрэг тэрслэл бөгөөд аль хэдийн бүх зүйл Түүнд хамаатай болсон.

► Хэрэв хүн өөрийгөө өршөөгдөх зохистой болгож чадна гэж үзвэл яах вэ?

(6) Бурхан зөв шударга бөгөөд нүгэл нь ноцтой зүйл учраас уучлах үндэслэл байх ёстой (Ром 3:25-26).

Бурхан уучлахыг хүсдэг. Гэхдээ хэрэв Тэр нүглийг үндэслэлгүйгээр зүгээр л уучилсан бол энэ нь Бурхан шударга бус, нүгэл тийм ч ноцтой биш гэдгийг илтгэх байсан.

► Христийн үхэл яагаад зайлшгүй шаардлагатай байсан бэ?

(7) Бурханы хүү Есүс нүгэлгүй амьдралаар амьдарч, бидний нүглийг уучлахын тулд золиос тахил болж үхсэн (Иохан 3:16, Ром 5:8-9).

Есүс Бурханы хүү учраас Түүний золиос тахил нь хязгааргүй үнэ цэнтэй бөгөөд энэ дэлхийн хэнийг ч уучлах үндэслэл болдог. Хэрэв Тэр зүгээр л хүн байсан бол түүний золиос тахил нь хязгаарлагдмал үнэ цэнтэй байх байв. Есүсийн цус нь бидний төлөө өгсөн Түүний амийг төлөөлдөг. Түүний цусгүйгээр аврал байх боломжгүй (Еврей 9:22). Хэрэв Тэр Бурхан биш байсан бол биднийг бүрэн аварч чадахгүй байсан. Түүнчлэн бидэнд найдвар байхгүй бөгөөд авралын өөр арга замыг бид хайх байв.

► Яагаад зарим шашинд хүн үйлсээр аврагдах ёстой гэж үздэг вэ?

(8) Есүс үхэгсдээс амилснаараа Бурханы хүү гэдгээ баталж, мөнх амийг өгөх хүчтэй болохоо харуулсан (Иохан 20:24-28, Илчлэл 1:18).

Есүсийн амиллыг үгүйсгэдэг тэрс үзлүүдэд ихэвчлэн Түүний Бурхан чанарыг үгүйсгэж, авралын төлөөх тахил золиос нь хангалтгүй хэмээн сургадаг. Улмаар тэд авралын өөр арга замыг санаачилдаг.

► Есүс үхэгсдээс амилсан учраас бидний мэдэх ёстой зүйлс юу байж болох вэ?

(9) Есүсийн золиос тахил нь бүх нүглийг уучлахад хангалттай юм (1 Иохан 1:9, 1 Иохан 2:2).

Хэрэв хүн энэ үнэнийг үгүйсгэвэл үйлсээр аврагдах сайнмэдээнд итгэх болно. Олон шашинд хүн авралынхаа тодорхой хэсгийг өөрөө олж авах талаар номлодог. Энэ нь хүмүүсийг аврагдахын тулд юу хийх ёстойг нь хэлж өгдөг аливаа шашны байгууллагын хяналт дор оруулдаг.

► Яагаад зарим хүмүүс өөрсдийн шашны байгууллагагүйгээр аврагдахгүй гэж боддог вэ?

(10) Нүгэлтэй гэдгээ хүлээн зөвшөөрч, гэмшиж, түүнийг уучлах амлалтад нь итгэдэг хүн бүрийг Бурхан уучлан өршөөдөг (Марк 1:15, 1 Иохан 1:9).

Хүний бий болгосон ямар ч байгууллага авралын өөр арга замыг санал болгох, авралд тавигдах шаардлагад нэмэлт зүйл оруулах эрхгүй юм.

► Уучлагдаж өршөөгдсөн хүн гэж ямар хүнийг хэлэх вэ?

(11) Гэмшил гэдэг нь хүн нүгэл үйлдсэндээ харамсаж, нүглээ орхиход бэлэн байна гэсэн утгатай (Исаиа 55:7, Езекиел 18:30, Езекиел 33:9-16, Матай 3:8).

Гэмшил гэдэг бол хүн Бурханы уучлалыг хүртэхээс өмнө зам мөрөө засан Бурханы өмнө өөрийгөө зөвт болгоно гэсэн үг биш. Зөвхөн Бурхан түүнийг нүглийн хүчнээс чөлөөлж чадна. Гэмшил гэдэг нь хүн өөрийнхөө нүглүүдэд ихэд харамсаж, тэдгээрийг орхиход бэлэн байгааг хэлнэ. Хэрэв хүн нүглээ орхих хүсэлгүй бол түүнийг уучлах боломжгүй. Хэрэв хүн санаатайгаар нүгэл үйлдсээр байвал тэр хүн гэмшээгүй хүн юм.

► Яагаад гэмших шаардлагатай вэ?

(12) Гэмшиж, итгэсэн нүгэлтэн Бурханд залбирч, Түүний уучлалыг гуйх үедээ өршөөлийг хүлээн авдаг (Ром 10:13, Үйлс 2:21).

Есүсийн улмаас хүн бүр Бурханы нигүүлслийг хүртэх боломжтой болсон. Хүн Бурханы уучлалыг хүлээн авахын тулд ямар ч байгууллага эсвэл хүн, зуучлагч хэрэггүй юм. Хүн үүнийг хувьчлан хүлээн авч, Бурхантай шууд харилцаж эхэлдэг.

► Хүн хормын дотор итгэлд ирж чадна гэдгийг бид яаж мэдэх вэ?

(1) Эдгээр ойлголтуудаас нэг юм уу хоёр нь таныг итгэлд ирэх үед онцгой чухал байсан талаар хэдэн догол мөр болгон бичиж, тайлбарлана уу.

(2) Судалгаа хийхийн тулд христитгэлээс өөр нэг шашин эсвэл тэрс үзлийг сонгоорой. Тэд сайнмэдээний зарим чухал ойлголтыг хэрхэн үгүйсгэж байгааг 2-3 хуудсанд багтаан тайлбарлана уу. Тэдний номлодог хуурамч сайнмэдээг дүрсэлж, энэ нь хэрхэн буруу онол сургаал дээр үндэслэгдэж байгааг тодорхойл. Та тэдэнд үнэнийг Бичвэрийн нотолгоотойгоор тайлбарлана уу.