Lesson 3: Ізгі Хабардың жеделдігі

► Адам Ізгі хабарды естімей құтқарыла ала ма? Ізгі Хабарды тарату қажет пе?

Жазбада біз Исраилмен немесе қауыммен байланыста болмаған, бірақ Құдайдың рақымына ие болғандардың мысалдарын көреміз. Әйүп Мұса туылғанға дейін және Жазбаның бірінші беті жазылмай тұрып, әділ болды және зұлымдықтан аулақ жүрді. Балағам Құдаймен қарым-қатынаста болды және Құдайдан тікелей хабар алатын көріпкел ретінде танымал болды. Ыбырайым «бұл жердегілер Құдайдан қорықпайды» деп ойлағанымен, Әбумәлік Ыбырайымнан да әділетті іс жасады. Римдіктерге 1:21-32 үзіндісінде азғын басқа ұлттықтар туралы айтылады. Бұл олар Құдай туралы ешқашан білмегендіктен емес, бірақ олар білетін нәрселерден бас тартқандықтан болды.[1]

«Иеміз Өзін қастерлейтіндерге сырын Ашады және білдіреді Келісімін.».[2] Келісім - бұл Құдайдың рақымын көрсететін Құдайдың адаммен қарым-қатынасының шарттары. Егер адам Құдайды дәріптесе, Құдай оған Онымен қарым-қатынас орнатудың жолын көрсетеді.

Киелі кітапта Исадан басқа құтқара алатын ешқандай есім жоқ делінген.[3] Алайда, Көне өсиетте құтқарылған адамдар Исаның есімін білмеді. Олар Құдайдың құтқару мен кешірім беру туралы уәдесіне сенді және Құдай оны Иса арқылы берді. Сол сияқты, Исаның есімін әлі естімеген адамдар Құдайдың Иса арқылы құтқаратынына сене алады.

Сонымен, құтқара алатын басқа ешқандай есім жоқ деген нені білдіреді? Бұл құтқарудың балама құралы жоқ дегенді білдіреді. Адам басқа ешқандай жолмен құтқарыла алмайды. Сондай-ақ Иса туралы білетін адам Одан бас тартпауы керек, өйткені Одан бас тарту құтқарудан бас тартуды немесе құтқарудың басқа жолын іздеу дегенді білдіреді.

Иса: “Оның еркін орындағысы келген әркім, ілімді білетін болады”,— деді. Бұл уәде адам Құдайды шынайы іздесе, Құдай оған білуі керек нәрсені ашып көрсетеді дегенді білдіреді. «Әр адамға сәулесін түсіретін шынайы Нұр бұл дүниеге келе жатты».[4] Киелі Рух тіпті Иса туралы естімегендерге де Исаның нұрын әкеледі.

Көптеген адамдар мәсіхшілерден Ізгі хабарды естімес бұрын белгілер немесе басқа да ерекше аяндар арқылы Құдайдың жолына түсті. Мысалы, қазіргі уақытта көптеген мұсылмандар Құдайдан аян/хабар алғаннан кейін сенімге келіп жатыр.

► Ізгі хабарды түсінбей тұрып Құдайдан ерекше аян алған адам туралы естідіңіз бе?

Демек, біз адам Құдайды таба алатынын және тіпті мәсіхшілер арқылы Ізгі хабарды естімей-ақ құтқарыла алатынын көреміз. Алайда Киелі кітап Ізгі хабарды әрбір адам жедел тыңдауы керек хабар ретінде сипаттайды.

[5]Римдіктерге арналған хатта Ізгі хабардың жеделдігі сипатталады. Елші Ізгі хабар «адамдарды құтқаратын Құдайдың құдіреті»[6] екенін және Ізгі хабарды жариялау оның парызы[7] екенін айтты. Сондай-ақ елші Құдайдың кешіремін деген уәдесіне сену арқылы Оның алдында ақталғанымыз туралы шындықты растайды.[8]

Содан кейін Ізгі хабардың жеделдігі сезіледі. Пауыл былай дейді: «Олар Иемізге сенбесе, қалай Оған сиынады? Ол туралы естімесе, қалай сенеді? Оны ешкім уағыздамаса, қайдан естиді?».[9] «Сенім хабарды естуден келеді, ал естудің өзі Мәсіхтің сөзін жариялаудан болады».[10] Құдай тыңдаушыларда сенім қалыптастыру үшін Ізгі хабарды пайдаланады. Ізгі хабарды уағыздау — Құдайдың күнәкарларды құтқару әдісі.

Егер оларды Ізгі хабарсыз құтқару мүмкін болса, Ізгі хабар неге соншалықты маңызды?

Миссионер Стив Хайт бұл сұраққа (Миссионерлер не үшін қажет?) былай деп жауап берді:

Қарапайым жауап: Адамдар Нұрды көрсе де, Оны қабылдамады. Жохан 1:9 Исаның “әр адамға сәулесін түсіретін шынайы Нұр” екенін айтады. Бірақ сол тарауда біз мынадай қорқынышты сөздерді оқимыз: «Нұр түнекте жарқырайды, ал түнек Нұрды жеңе алған емес»,[1] дәлірек айтқанда Нұрға ие болу үшін Оны ұстап қалған жоқ. Пауыл Құдайды Оның жаратқан нәрселерінен байқап, білуге болатынын[2] және тіпті адамдар “Құдай туралы білсе де, Оны Құдай деп дәріптеп, шүкірлік етпегендерін”[3] айтады. Жохан бұл жағдайды былай сипаттайды: «Соттың мәні мынадай: «Құдайдың Нұры» жерге келді, бірақ адамдар Одан гөрі түнекті жақсы көрді».[4] Адамның бұзылған жүрегі түнекті ұнатады. Алдамшы әрі жазылмайтындай бүлінген,[5] күнәкар жүрек Құдайдан бет бұрады.

Сондықтан миссионерлер нұрды қайтадан әкелуі керек! Екінші мүмкіндікті беретін Құдай «оларды қара түнектен нұрға бұрулары»[6] үшін Ізгі хабардың жанып тұрған алауымен елшілерін жібереді.

Иса шәкірттерін Ізгі хабарды уағыздауға жібергенде, егер қала олардың хабарын қабылдамаса, қаладан шыққан кезде аяқтарындағы шаң-тозаңды қағып тастау керектігін және бұл шаңның сотта оларға қарсы айғақ болатынын айтты. Аяқтарындағы шаң олардың қаласында Ізгі хабар жеткізушісі болғанының дәлелі болды. Ізгі хабарды естімегендерден гөрі оны қабылдамағандарға ауыр үкім шығарылады. Иса: «Олардың тартатын жазасынан Содом халқының жазасы жеңілірек болады», - дейді. Бұл бізге Ізгі хабардың оны естігендерге үлкен пайда әкелетінін айтады.[7]

Пастор Эрик Хамлик миссионерлер не үшін керек деген сұраққа былай деп жауап берді:

Біз миссионерлерді жібереміз, өйткені Ізгі хабар қарым-қатынас арқылы жақсы жеткізіледі. Ізгі хабардың ақиқаты Құдай туралы немесе діни сенімдер туралы фактілердің жиынтығы емес, ол Иса Мәсіхтің тұлғасында бейнеленген. Миссионерлер – Мәсіхтің өкілдері. Олар Ізгі хабарды жеткізіп, Құдаймен татуласуға шақырады.[8]

Миссионерлер қажет, өйткені Ізгі хабарды тікелей, жеке түрде жеткізбесе, ол жоғалуы мүмкін. Әрекетсіздігіміздің кесірінен адамдардың өлгенін біз қаламаймыз және Римдіктерге 10:13-15 аяттарда: «Оны ешкім уағыздамаса, қайдан естиді?» деп анық айтылған. Өкінішке орай, олар естімейді. Миссионерлерді жіберу және оларға қолдау көрсету – бұйрық. Құдай бізді шақырған істі Құдайдың Өзі біз үшін жасайды деп үміттену шешім емес. Құдай Ұлы тапсырманы бізге берді және кімге көп нәрсе берілген болса, содан көп нәрсе талап етіледі. Біз миссионерлерді Құдайдың рақымына жауап ретінде және Құдай жер жүзінде адамдарды Өзіне шақыру арқылы әрекет етеді деген сеніммен жібереміз»

Ізгі хабар — Құдайдың адасқандарды құтқару үшін жасаған тиімді құралы. Бұл «адамдарды құтқаратын Құдайдың құдіреті». [1]Сұрақты қайта қарастырайық: Егер адам Ізгі хабарды естімей-ақ құтқарыла алатын болса, миссионерлерді жіберудің не қажеті бар? Осыған ұқсас сұрақтарды қарастырайық. Егер адам менің дұғамсыз құтқарыла алатын болса, мен неге ол үшін дұға етуім керек? Егер адам Ізгі хабарды бір-ақ рет тыңдау арқылы құтқарылса, неге Ізгі хабарды қайталап айта беру қажет? Егер адам қауымсыз құтқарыла алатын болса, қауымдардың не керегі бар? Жауабы анық: «Иә, адам құтқарыла алады, бірақ құтқарыла алатындығының ықтималдығы айтарлықтай төмендейді». Бұл Құдайдың адамдарды құтқару үшін берген құралдары.

Құдай Сөзі — күнәкарларды Құдайға әкелу үшін Киелі Рух қолданатын құрал. Киелі кітапта адамдардың Құдай Сөзі арқылы қайта туылатыны айтылған.[2]

Миссионерлер Ізгі хабарды естімей тұрып құтқарылған дерлік ешкімді таба алмайды . Құдайдың шынайы адамды Ізгі хабарсыз құтқаратыны Оның әділдігін көрсетеді, бірақ бұл біздің Оның берген құралдарына немқұрайлы қарағанымызды ақтамайды. Жалпы, Ізгі хабарды естімегендер құриды. «Ізгі хабарды уағыздамасам, қасіретке қалам ».[3]

► Матай 9:35—38 оқып шығыңыз.

Иса адамдарға жанашырлық танытты. Ол қалалар мен ауылдарды аралап, уағыз айтып, адамдарды сауықтырып жүрді.

Иса адамдардың рухани қажеттіліктеріне көбірек көңіл бөлді. Ол олардың құтқарылып, Құдайды танығанын қалады. Бұл үзіндіде Исаның адамдарға қарап, олардың рухани қажеттіліктеріне үлкен жанашырлық танытқанын оқимыз. Иса олардың бақташысы жоқ қой сияқты екенін көрді. Сондай-ақ ол қызметті егінмен салыстырып, орақтың көп, ал жұмысшылардың аз екеніне қынжылды.

Шәкірттеріне қарап, Иса олардан Құдайдың егін жинауға жұмысшыларды жіберуі үшін дұға етулерін сұрады.

► Неліктен Иса шәкірттерінен осы үшін дұға етсін деп өтінді? Өйткені Құдай дұға етсек те, етпесек те солай істегісі келеді емес пе?

Біз Құдайдан жұмысшылар жіберуін сұрағанда, Құдайдың еркіне сай дұға етеміз. Сондықтан Құдайдың дұғамызға жауап беретінін білеміз.

Сенушілердің неге осылай дұға ету керектігінің тағы бір себебі бар. Иса шәкірттерінің жанашыр болып, Ізгі хабарды таратқандарын қалады. Егер олар осы үшін жиі дұға етсе, егіннің де қамын көп ойлайтын еді. Олар осы жұмысты өздері істеп, басқаларды да осыған тартатын еді.

Біз де Иса ойлаған нәрселердің қамын ойлауға тырысуымыз қажет. Оның шәкірттеріне берген дұғасы бізге де солай әсер етуі үшін дұға етуіміз керек

Миссионерлер тобы түрмедегі лагерьге уағыз айтуға барды. Онда мыңдаған тұтқындар болды, олардың көбісі қанішерлер мен лаңкестер еді. Миссионерлер ашық аспан астындағы алаңда уағыз айтты. Оларды қорғау үшін алаңның айналасына қарулы күзетшілер қойылды. Ізгі хабар уағызының соңында уағыздаушы: «Тұтқындардың арасынан Жаңа Өсиетті алу үшін алға шыққысы келетіндер бар ма?» - деп сұрады. Отыз адам алға шықты.

Бірнеше аптадан кейін миссионерлер лагерьге тағы да барды. Уағыздың алдында күзетші оларға Жаңа өсиетті қабылдаған отыз адамның барлығын басқа тұтқындар өлтіргенін айтты. Миссионерлер тағы да Ізгі хабарды уағыздап, соңында жаңа өсиетті алға шығатын кез келген адамға беретіндерін айтты. Үш жүз адам алға шықты. Олар Ізгі хабарды қабылдау үшін отыз адамның өлгенін білді, бірақ Ізгі хабар сол адамдарға құнды болғандықтан, олар өз өмірлерін қатерге тігуге дайын болды. Өйткені тұтқындар естіген хабардың қандай құнды екенін түсінді.

(1) Осы екі сұрақтың әрқайсысына жауапты бірнеше сөйлеммен жазыңыз. Ізгі хабарды ешқашан естімеген адам құтқарыла алады ма? Неліктен біз миссионерлер мен Ізгі хабар таратушыларды жіберуіміз керек?

(2) Жүністің кітабын оқыңыз. Ізгі хабар таратушының жеделдігіне назар аударыңыз. Бұл әңгімеде Құдайды не алаңдатты? Жүністі ше? Ойыңызды 1-2 бетпен жазыңыз.