Lesson 2: Kà nyɔ ké Gèɖèpɔ́ɔ̀ Wuɖu nyuɛ nyu kɛ

Ɖé cɛ̃́ɛ́-ɖɛ̀ nìà kɛ mánáín nyɛɛ, ɖɛ-cɛ̃́-nyɔ̀ɔ̀ mɛ ɓɛ́ìn kpé:

(1) Ɓɛ́ ɔ ké kà Kɛ́ɖɛ́ì-ɖeín-nà-nyɔ̀ɔ̀ ɓéɖé ɓɛ́ ɔ ké nyɔǔn mú ɖɛ̀ɓɛ̀ kɛ kè kà ɔ ɓéɖé ɓɛ́ ɔ ké ɔ mìɔùn nììn Kɛ́ɖɛ́ì-ɖeín-nà-fɛ̀ɛ̀ɔ̀ mú ɖɛ̀ɓɛ̀ kɛɛ dyí dyuò.

(2) Ɓɛ́ ɔ ké ɖɛ ɓaɖa-bùè ɓě ɓɛ́ jǎà-po-nyɔ̀ ɓě mɛ nyu ɓɛ́ wa ké fɛ̀ɛ̀ kɔ̃̀ jè Báɓòɔ̀ cɛ̃à kɛ cĩ́ɛɛ dyí dyuò.

(3) Ɓɛ́ ɔ ké xwíníín ɓě kɔ̃̀ jè Kɛ́ɖɛ́ì-ɖeín-nà-nyɔ̀ ɓě se ɓéɖé ɓɛ́ wa kéà Zùǔn-ɖɛ̀ ɓěɔ̀ wa mìɔùn nììn mɔ́ɔ́-ɖɛ̀ mú nyùìn nyɛɛ sɔ̃́ kɔ̃in zaìn.

(4) Ɓɛ́ ɔ ké jǎà-ɖɛ̀ mɛ̀nɛ̌ìn-hĩinyɛ ɓě (ɓɛ́ wa nìà ɖé vɔ́sì ɓěɔ̀ mú) ɓá ɖɛ ɓě m̀ ké gã ɖé nì fɛ̀ɛ̀ múɛɛ dú poɛ ɓɛ́ìn.

Màa ɖò nì ma nɔ̄ Áféɖékà-ɓòɖòɛ̀ kɔ̃ɛɛ ɓéɖé ma dyú-gàà ɖò. Wé ɖòɛ̀ ɓaɖaa, ɔ dyú-gààɔ̀ mu ma ɓó cu ɖò xwíɖíi ɓɛ́ ɔ ké péé nyu, ké ɔ ɖeɔ̀ mu ma ɓó ɓɛ́ ɔ ké ɔ dyí gmɔ̀. Ti màaɔ̀ gmɔ̀ ma ɖé cuɔ̀ dya kɛɛ, ɔ giniìn ma dyi cá, sepóɛɖé ɔ dyé ma ɖé cɛ̃́-sɛ̀ ɖò, ké sɛɔ̀ beè ma ɓó ɔ dyú-gààɔ̀ dúɔ̀ kɔ̃in jɛ́ɛ́. Ɔ hwɔìn kà sɛɔ̀ mɔ́ ɓɛ́ ɔ ké ma dyú-gbɔ́ɔ̀ numu kɛ. Màaɔ̀ dyuòɛ̀ kà ɔ jǔ ké ɔ dyiɛ ma ɔ dyúɔ̀ gbo cɛ̃ kà sɛ nì ɔ kɔ̃in nyɛɛ ní, nìí, gàa-dyùɔ̀ mu ma dyií gmɔ̀ùn wɛ̃. Ɔ jèɛɛ, ɔ cɛ̃ɛ ma ɔ gbo, ké ɔ ɖá, “Ní dyú, sí ɓíɖíi wàɖà, ɓɛ́ m̀ ké ɓó ɓóɖó-kpàɔ̀ kɔ̃ dyi pɛ̃́.” Gàa-dyù gɔ́ɔ̀ giniìn ma dyi dyɛo, kɛɛ sepóɛɖé ɔ ɖe ɖǎ ma wuɖu-nyu-nyu tɛ̀mɛ̀ìn jèɛɛ, ɔ sí ma zɔ̃̌ wàɖà, ké ɔ pɛ̃́ ma ɓó ɓíɖíi dyi. Hwɛ̀ ké ɔ ɖeɔ̀ cɛ̃ɛ ma ɔ gbo ɖe, ké ɔ ɖá, “Ɓɔ́ dú dyií ɖúɛ, ɓɛ́ m̀ ké cìnìɛ̀n dyà nɔ̄ ḿ gbo.” Ké gàa-dyùɔ̀ nyuɛ ma náa ɖe, ké ɔ pó ma sɛɔ̀ xwaún.

Xwíníínɔ̀ nyɛ́ kɔ̃̀ jè gàa-dyù gbɔ́ɔ̀ se ɖɛ ɔ ɖe kpàìn ma hwòɖǒɛɛ dyí dyuò, kɛɛ ɔ dyià ɔ wuɖu nyu kɛ́? Ɔ mɔ̀, ɔ dyé ma ɔ ɖe kpéín mìɔ, sepóɛɖé ɔ ɖe ɖǎà ma ɔ tɛ̀mɛ̀ìn kà ɔ ké ná-wùɖù dyi kpɔ̃ɔ nyuɛ kè kà ɓɛ́ ɔ dyi ma ɖɛ xwa bĩ ní, ɔ ɖe sɛ́ɖɛ́ìn ma ɔ dyí kɛ. Ké ɖeɛɛ, ɔ dè ma ɔ ɖe hwòɖǒ kɔ̃, sepóɛɖé ɔ dyuòɛ̀ kà ɓɛ́ ɔ ɖe ɖɛ̀ɓɛ̀ ma ɔ mú kɛ. À mɛ nyu Gèɖèpɔ́ɔ̀ wuɖu gàná cá, ké à mɛ ɓɔ́ ɔ dyi fɛ̃̀ìn ɓó ɖɛ ɓě à bĩ xwaa dyí sɛ́ɖɛ́ìn jè ɖòùn, kɛɛ à mɛ nyu ɔ wuɖu, sepóɛɖé à dyuòɛ̀ kà ɓɛ́ ɔ ɖɛ̀ɓɛ̀ à mú kɛ.

► Ɔ jǔ ké nyɔ ɖò dyi Gèɖèpɔ́ɔ̀ mú ɖɛ̀ɓɛ̀ mìɔ ní, ɖɛ́ mɔ̀ ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ gbo-wóɖó-ɖɛ̀ ɖíɛ́ ɓě kɛ́? M̀ ɓɛ́ìn dyi-diè-ɖɛ̀ɔ̀ gɔ̃̌ jǔɛ dyììn ɖé wuɖu nìà kɛ dúí-jaɖa-jaɖa mú: “Ɔ jǔ ké ḿ dyiɔ́ Gèɖèpɔ́ɔ̀ mú ɖɛ̀ɓɛ̀ mìɔ ní, nìí, ní muɔ́ má...”

Pɔ́ɔ̀ dè kpáná ɖò nì Gèɖèpɔ́ɔ̀ mú-ɖɛ̀ɓɛ̀-ɖɛ̀ɓɛ̀ múɛɛ mɛ ɖé Fèɖópĩ̀ɔ̀ 1:9-11 mú, ké ɔ ɖá:

Ɖɛ kɔ̃̀ jè ḿ ɓaà kɛɛ, ɔ kɛ. Ɔ mɔ̀, ɓɛ́ ɓěɛ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ kè ɓěɛ̀ ɖɛ-dyí-dyuò-dyuòɔ̀ ɔ kè ɓěɛ̀ ɖɛ séín múin-wɔ̃́-wɔ̃́ɔ̀ ké kɔ̃ kpáuń nì tee, ɓɛ́ ɓě ké ɖɛ mɔ̀ ɖɛ nɔ̀mɔ̀ dyíin nyɛɛ dyí dyuòɛ̀ ɓɛ́ìn. Nìí, bɛ̃̌ kè kɛɛ ɖò se ɓě bũ̌ nìɛ̌ mu ɖé Kɛ́ɖɛ́ì nììn wéɔ̀ mú. Dyí-sɛ́ɖɛ́ìn-ɖɛ̀ ɓě nyu-nyu ɓɛ́ ɔ dyììn ɖé Jízɛ̀ Kɛ́ɖɛ́ì múɛɛ mu ɖé ɓě mú bãùn mìɔ, ɓɛ́ Gèɖèpɔ́ɔ̀ ké dĩ́ín-dĩ̀ìn kè ɓàìn-ɓàìn ɓéɖé.

Vɔ́sì ɓě nìà kɛ cɛ̃ ɖɛ ɓě nì kpáuń ɖé jǎà-po-nyɔ̀ɔ̀ fɛ̀ɛ̀ múɛɛ jè. Ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ mɛ nì kɔ̃ kpáuń kánáá pū. Kà ɔ Gèɖèpɔ́ɔ̀ mú ɖɛ̀ɓɛ̀-ɖɛ̀ɓɛ̀ɔ̀ mu kɔ̃ kpáuń nììn nyɛɛ, kǎà ɔ ɖɛ mɔ̀ ɖɛ nɔ̀mɔ̀ dyíin nyɛɛ jè hwìɖǐi-poìn-poìnɔ̀ mu dyi kuùn, ɓɛ́ ɔ ké dyai ɓúá. Ké ɔ jǔ ké ɔ ɖɛ-hwìɖǐi-poìn-poìnɔ̀ dyi dyi ku ní, ɔ mu ɖɛ mɔ̀ ɖɛ nɔ̀mɔ̀ dyíin ɓá ɔ fɛ̀ɛ̀ɔ̀ jè dyíɛɛ dyí dyuòùn. Kɛ́ɖɛ́ì-ɖeín-nà-nyɔ̀ɔ̀ ɓéɖé ɓɛ́ ɔ ké kà ná cĩ́ tee, ɓɛ́ ɔ ké ɖɛ mɔ̀ ɖɛ sɛ́ɖɛ́ìn dyíɛɛ nyu, ɓɛ́ ɔ ké se kɛɛ ɖò ɓéɖé.

Dyú-pɛ̀ɖɛ̀ bèɖě dyi wóɖó ní, ɖɛ nì ɖé ɔ dyúa ɖé ɔ fɛ̀ɛ̀ múɛɛ mɔ̀ ɓɛ́ ɔ ké ɖɛ cɛ̃́ kè ɓɛ́ ɔ ké ɓúá. Kà dyúáɖòɔ̀, kǎà ti ɓɛ́ à dyi Kɛ́ɖɛ́ì gboɛɛ, à se jǎà-ɖɛ̀ séín ɓě ké à dyí gmɔ̀ ɖé à fɛ̀ɛ̀ múɛɛ dyí dyuòɛ̀ ɓɛ́ìn. Ɖé vɔ́sì ɓě nìà ɖé dyiíɛ múɛɛ, Pɔ́ɔ̀ céè ma nyɔ ɓě ɓɛ́ wa ɖǎ ma Kɛ́ɖɛ́ì-ɖeín-nà-nyɔ̀ ɓě jǔ ɓó ti gbɛ̀ǐ-gbɛ̀ǐ xwíníín nyɛɛ gbo. Kɛɛ wɛ̃́ɛ́ kɛɛ, Pɔ́ɔ̀ ɓaà ma wa bìì ɓɛ́ wa ké ma Gèɖèpɔ́ɔ̀ mú ɖɛ̀ɓɛ̀ tee, ɓɛ́ dyììn ɖé ɖɛ̀ɓɛ̀ǐn-ɖɛ̀ɓɛ̀ǐn nìàǒ wɛ múɛɛ, wa ké ma kpé ɓɛ́ìn ɓɛ́ wa ké ɖɛ mɔ̀ Gèɖèpɔ́ɔ̀ mɔ́ɔ́-ɖɛ̀ kɛɛ múin wɔ̃́ nɔ̀mɔ̀ dyíin, ɓɛ́ wa kéɛ nyu.

À ɓéɖé ɓɛ́ à ké fɛ̀ɛ̀ ɓɛ́ ɔ dè Gèɖèpɔ́ɔ̀ hwìɖǐiɛɛ cĩ́, kà Gèɖèpɔ́ɔ̀ mu à fɔ̀nɔ̀-hwòɖǒ nyíìn nyɛ. Gèɖèpɔ́ɔ̀ mɔ́ ɓɛ́ à ké ɔ wuɖu nyu ɖé ɖɛ séín mú, ké ɔ se ɖɛ ɓɛ́ à ké ɓièɛ̌n mu wɛ̃́ɛ́ hwɛ̀ kɛ.

À mɛ ɓɔ́ɔ hwìɖǐi poɛ̀n kà ɓɛ́ à ɖǎ ɖɛ séín ɓě ɓɛ́ à kɔ̃̀ à ké dyí dyuò ɓá kà à ké cĩ́ɛ nyuɛɛ dyí dyuòɛ̀ hwɔ kɛ. À mɛ ɓɔ́ɔ hwìɖǐi poɛ̀n kà ɓɛ́ à ɖǎ ɖɛ séín ɓɛ́ à mɔ́, ɓɛ́ à ké kà à fɛ̀ɛ̀ɔ̀ páún poɛɛ ɓéɖéɛ hwɔ kɛ.

(1) M̀ mɛ ma mú ɓɛ́ ɖɛ ɓě se jǎà kɛɛ ní kɔ̃̀ ɖà m̀ wuɖuí kɔ̃̀ (Nɔ́ɔ́ 22:1; Máfíò 5:14-16)

Ɖɛ ɖíɛ́ ɓě nì ɓó ké nì nyu wa xwai, ké ḿ se mɔ́ ɓɛ́ nyɔ tɔ̀ɔ̀ ɓě mɔ̀ùn ké ɖò nyuù? Nì hwòɖǒ mu ɖé ɖei kpáùn ɔ jǔ ké m̀ dyi nì pásɔ̀ɖɔ̀ɔ̀ ɖɛ ɓě nì nyuà kɛɛ nyuɛ dyé ɖekè níì?

(2) Nyɔ mìɔùn dyí-kpɔ̃-kpɔ̃ (Nɔ́ɔ́ 16:32, 25:28; Gàɖézìà 5:22-23)

Nì kpɔ̃ m̀ mìɔùn dyí gàná cá, ké nì nyu ɖɛ ɓě m̀ kɔ̃̀ ɓɛ́ m̀ ké nyuɛɛ̀, mɔɔ ti ɖíɛ́ ɓě ní, m̀ se m̀ mìɔùn dyí kpɔ̃ɔ ɓɛ́ìn, ké nì nyu ɖɛ ɓě jǎà-po-nyɔ̀ se ɓéɖé ɓɛ́ ɔ kéɔ́ nyuɛɛ̀?

(3) M̀ mɛ kɔ̃̀ ɖé nì kpóɖó-dyùàɔ̀ jè gbo (1 Kɔ̀ɖéíntĩ̀ɔ̀ 6:19, 10:31)

M̀ kɔ̃̀ ɖé nì kpóɖó-dyùɔ̀ jè gbo, ké m̀ poɛ jǎà kà ɓɛ́ ɔ se dè bɛ̃̌ǐn ɖò ɓéɖé, ké ɔ ɖǎ wáká kpá ɓɛ́ ɔ ké Gèɖèpɔ́ɔ̀ bìì kũ̀à nyu kɛɛ̀? Kà ɓɛ́ nì kpóɖó-dyùàɔ̀ mɔ̀à Gèɖèpɔ́ɔ̀ kɔ̃̀ɔ̀-ɖɛ̀ kɛɛ, m̀ se ɓéɖé ɓɛ́ m̀ kéɛ dyíin nyìnììn. Ké m̀ se ɓéɖé ɓɛ́ m̀ kéɛ gbà-kà kpɔ̃.

(4) M̀ mɛ dyuò ɖɛ ké m̀ múàǔn poɛɛ dyí (Kɔ̀ɖɔ́sĩ̀à 3:17; 1 Kɔ̀ɖéíntĩ̀ɔ̀ 6:12)

Ɖɛ ɓɛ́ ɔ po m̀ múàǔn wɛ̃ɛ, ti ɖíɛ́ ɓě ní ɔ nyuɛ ké m̀ dyé mú-dɔ̃̌-dɔ̃̌, ké nì poìn ɖɛ gbà hwìɖǐi, mɔɔ ké nì nyu kpeɖe gbàà? M̀ mɛ nì ɓɛ́ɖɛ́ kɔ̃ ɓó ɖɛ séín ɓě ɓɛ́ wa nyuɛ ké nàmàǔn nɔ̀mɔ̀ dya gmɔ̀ɔ̀ mɔɔ ɔ nì dyɔ́ kɛɛ jè.

(5) Kpeɖe ɓě (Wóɖómà 13:9; Kɔ̀ɖɔ́sĩ̀à 3:19; 1 Tímétè 2:8; 1 Píɖɛ̀ 3:2)

M̀ mɛ dyé nyɔ séín kpéín, sepóɛɖé Gèɖèpɔ́ɔ̀ nyu nyɔǔn-dyù kà ɔ mìɔùn nyuà nìɛ̀ kɛ, ké waà sèìn naín mɔ̀ sè-ná-sèɛ̀ fɛ̀ɛ̀. Ɖé nyɔ ɖíɛ́ ɓěɛ̀ cĩ́-cĩ́ múɛɛ, wa dyé nyɔǔn séín kpéín kánáá pū. M̀ mɛ dyé nyɔǔn kpéín, ɓɛ́ nyɔǔn ɓě ké kpeɖe nì náa dyé ɖé m̀ mú. M̀ mɛ nɔ̀mɔ̀ kpeɖeín ɖé nyɔǔn ɓě gbo, ḿ seé kɔ̃̀ kɛbì nyɔɔ̀ mɛ mɔ̀ kpeɖeɛ̀ dyíin-nyìnììn-nyɔ̀ kɛ.

(6) M̀ mɛ nyu jǎà ɖé nì ɖɛ-peɖe-peɖe mú (Nɔ́ɔ́ 20:23)

Nì nyu jǎà gàná cá ɖé nì nyuu-ɖɛ̀ séín múù? Kà ɖɛ ɖò nyu nìɛ̀ kɛɛ, kǎà nì nyuɛ mɛ dèɛ̀ɛ̀, mɔɔ kà ɔ se nìɛɛ, kǎà m̀ ɖá ɔ nì, ké nyɔǔn ɓě po nì wuɖuɔ̀ jǎà?

(7) Ɖɛ ti kɔ̃ nyùìn-nyùìn (Gàɖézìà 5:14)

Ti mɔ̀ ɖɛ kpa ɖɛ ɖò cá ɓɛ́ à kɔ̃̀ à ké kũ̀à mú nyùìn ɓó Gèɖèpɔ́ɔ̀ bìì kɛ. Nì dyé m̀ mìɔùn nììn ti mɔɔ nyɔ tɔ̀ɔ̀ ɓěɛ̀ ti kpéín, ké nì nyùìn ɖɛ ti kɔ̃ɔ̀?

(8) Ɖɔún-po-kà (1 Tímétè 2:9; 1 Píɖɛ̀ 3:3-4)

Kà m̀ nyu ɖɔún poɛ kɛɛ tɛ̀mɛ̀ìn nyɔǔn ɖɛ nɔ̀mɔ̀ dyíin ɓě nìà kɛ dyíì?

• M̀ mɛ po ɖɔún dyí-sɛ́ɖɛ́ìn-kà: Ɔ xwíníín mɔ̀ ɖɔɔ̀ mɛ ɓáìn nì kpóɖó-dyùà kɔ̃in nɔ̀mɔ̀ dyíin.

• M̀ mɛ po ɖɔún ɖé nyɔ mìɔùn ɓíɖíi-dyà-dyà mú: Ɔ xwíníín mɔ̀ m̀ mɛ ɓɔ́ ɖɔún poɛ ɓɛ́ ɔ kéɛ nyu ɓɛ́ nyɔ ɖò ké hwìǐ sɔ̀ìn mɔɔ ɓɛ́ ɔ kéɛ nyu ɓɛ́ dyéɖé séín ké m̀ gbo wáɖá.

• M̀ mɛ ɓɔ́ ɖɔ kpa wíɖí pàɖǎ mìɔ kɛɛ mú poɛ: Ɔ xwíníín mɔ̀ m̀ mɛ ɓɔ́ m̀ mìɔùn dyi pĩ́àà ɓɛ́ m̀ ké ɖɔ ɓɛ́ ɔ kpa wíɖí pàɖǎ kɛɛ dɔ̃ wɛ̃́ɛ́.

(9) Kà m̀ ké nyɔ ɓě gbo wùɖùɛ̀ nyuɛ (Kɔ̀ɖɔ́sĩ̀à 4:6, Ìfísĩ̀ɔ̀ 4:29)

Kà nì nyu nyɔǔn ɓě gbo wùɖùɛ̀ kɛɛ tɛ̀mɛ̀ìn nyɔǔn dyí kà ɓɛ́ m̀ dyé Gèɖèpɔ́ɔ̀ kè nyɔ tɔ̀ɔ̀ ɓě kpéín nyɛɛ̀? Wuɖu pàɖǎ ɓě ɓɛ́ ɓóɖó-kpàà nyɔ ɓě cɛ̃ɛ mɔ̀ wuɖu gbà ɓě ɓɛ́ Gèɖèpɔ́ɔ̀ nyɛ́ mú kɛ.

(10) Ɖɛ ɖò hwòɖǒ-kɔ̃-dè-dè (Wɛ́ɖɛ́ 61:8; Nɔ́ɔ́ 20:6, 28:20)

M̀ dyi wuɖu ɖi ɓó ɖɛ ɖò jè ní, nì kpɔ̃ nì wuɖuɔ̀ kɔ̃inǹ? Nyɔ ɓě ɓɛ́ìn m̀ hwòɖǒ kɔ̃ dèɛ̀ kà ɓɛ́ m̀ dyi ɖɛ ɖò cɛ̃ín, nì nyuɛ níɛɛ̀? M̀ dyi nyɔ ɖò ɖɛ nyɛ́nɛ́ín ɖáìn ní, mɔ̀ǔn kpɔ̃ nì wuɖuɔ̀ kɔ̃in, sepóɛɖé m̀ dyuòɛ̀ kà ɔ se m̀ kpáná ɖò dyí nyuɛ́ muɛ jèè?

Ɔ dyi nyɔ ɖíɛ́ ɓě jè jǔǐn, ɖɛ ɓɛ́ìn nyuɛ ɓɛ́ wa fɛ̀ɛ̀ ké mú zaìn nyɛɛ jè hwɔ wa kpéí kánáá pū. Wa gbìɖǐ ɖɛ Báɓòɔ̀ ɖá nyɔ mɛ nyuɛɛ ɖòùn ɖeín kánáá pū, kɛɛ ɔ sɔ̀ wa hwìɖǐi kà ɓɛ́ ɖɛ pàɖǎ nì ɓó ɓɛ́ wa kéɛ nyu hwɛ̀ ɓɛ́ Báɓòɔ̀ wuɖuɔ̀ ké jǎà kpá ɖé wa fɛ̀ɛ̀ mú kɛ.

À ɓéɖé ɓɛ́ à kéɛ dyuò kà hwɛ̀ ɓɛ́ à fɛ̀ɛ̀ ké mú zaìn nyɛɛ, à ɓéɖé ɓɛ́ à Gèɖèpɔ́ɔ̀ mú-ɖɛ̀ɓɛ̀-ɖɛ̀ɓɛ̀ɔ̀ ké kɔ̃ kpá kɛ. À ɓéɖé ɓɛ́ à ké vɔ́sì ɓě ɓɛ́ à dèìn kà cɛ̃́ɛ́-ɖɛ̀ nìà kɛ gbɔɛɛ hwìɖǐi nàìn (Fèɖópĩ̀ɔ̀ 1:9-11). Kà ɖɛ̀ɓɛ̀ǐn-ɖɛ̀ɓɛ̀ǐn ɓɛ́ à ɓéɖé ɓó Gèɖèpɔ́ɔ̀ bììɛɛ mu kɔ̃ kpáuń nììn nyɛɛ, kà dyúáɖòɔ̀, kǎà à ɖɛ-múin-wɔ̃́-wɔ̃́ kè à kpeɖe nɔ̀mɔ̀ dyíin nyu-nyu ɓéɖé ɓɛ́ ɔ ké kɔ̃ kpáuń nì.

► Ɖɛ́ ɓɛ́ìn nyɔǔn dyí tɛ̀mɛ̀ìn kà ɓɛ́ ɖɛ ɖò zĩàìn ma gbo ɖé nì fɛ̀ɛ̀ mú ti Gèɖèpɔ́ɔ̀ tɛ̀mɛ̀àìn m̀ dyí kà ɓɛ́ kpeɖe mɔɔ nyuu-ɖɛ̀ gbà ɖò nì ma ɖé nì fɛ̀ɛ̀ múɛɛ kɛ́?

► Ɖé nì cĩ́-cĩ́ múɛɛ, ɖɛ́ mɔ̀ ɖɛ gbà ɖò m̀ dyuò ɖé dyí, ké m̀ ɓéɖé ɓɛ́ m̀ kéɛ dyi táà kɛ́? Nì muɛ dyi táàùn jǎà?

► M̀ poɛ̀n hwìɖǐiɛɛ, m̀ nì ɖɛ ɖò nyuɛń ké ɔ se Gèɖèpɔ́ɔ̀ hwòɖǒi dèè?

► M̀ dyi ɓaà ní, m̀ mɔ́ ɓɛ́ Gèɖèpɔ́ɔ̀ ké ɖɛ ɓě m̀ ɓéɖé ɓɛ́ m̀ ké gbo zĩàìn ɖé nì fɛ̀ɛ̀ múɛɛ m̀ dyí tɛ̀mɛ̀ìnǹ?

Ɓěà mɛ ku dúún ɓɛ́ ɓěà ké ɓaà wíkìɛ̀ xwíníín ɖé hwòɖǒ wáɖáá mú, ɓɛ́ Gèɖèpɔ́ɔ̀ kéɛ à dyí tɛ̀mɛ̀ìn kà ɓɛ́ ɔ kpeɖe nɔ̀mɔ̀ dyíin nyɛ ɔ kè gbo-zĩàìn-zĩàìn ɓě ɓɛ́ ɔ mɔ́ nyuɛ dyi ɖé à fɛ̀ɛ̀ mú kɛ. Nì mu dúún kuùn ɓó ɓaà-ɓaàɔ̀ jèè? Wíkì muà dyiìn nyɛɛ, ní mu m̀ dyi dièìn kɛbì m̀ nyu ma ɓaà-ɓaàɔ̀ ní.

► M̀ ɖǎa dyéɖéi hwɔ̀ìn ɖò kà ɓɛ́ gbo-zaìn-zaìn nì ɓó Kɛ́ɖɛ́ì-ɖeín-nà-nyɔ̀ ɓě pṹa kɛɛ̀? Ɔ hwɔìn kà, ɖɛ ɓě wa nyu xwaiɛ ɔ kè ɔ nyɔ ɓě wa ní nyu kɛ. Kà ɓɛ́ wa séín nyùìn kà Báɓò dyúáɖòɔ̀ kũ̀à múɛɛ, ɖɛ́ kɔ̃̀ jè wa gbo-zaìn-zaìn ɓěɛ̀ nìà ɓó wa pṹa kɛ́? Kà ɓɛ́ gbo-zaìn-zaìn kúɖúú ɓěɛ̀ nìà ɓó Kɛ́ɖɛ́ì-ɖeín-nà-nyɔ̀ ɓěɔ̀ pṹa kɛɛ, nìí, nyɔ ɖò kɔ̃̀ à zaa mú ɓá ɖɛ ɓě à nyuɛɛ jè dyíì? Ɖɛ́ kpá jèɛ́?

Kɛ́ɖɛ́ì-ɖeín-nà-nyɔ̀ séín ní nyu ɖɛ ɓɛ́ Báɓòɔ̀ cɛ̃ɛ, hwɛ̀ ḿ po níiń, jǎà-ɖɛ̀ séín ɓɛ́ Báɓòɔ̀ ɖá à mɛ kpɔ̃à dyi kɛ. Kɛɛ wɛ̃́ɛ́ kɛɛ Kɛ́ɖɛ́ì-ɖeín-nà-nyɔ̀ ɖò ɓɛ́ìn cĩ́ɛ ɖé ɖɛ ɓɛ́ ɔ mɔ̀ùn po jǎà kɛɛ jè dyi-kpɔ̃-kpɔ̃ mú hwòɖǒɛ̀-ɖé-hwɛ̀-kà.

Kpeɖe kè kà m̀ mɔ́ m̀ mìɔùn múàǔn dyi kpáìn dyiɛ ɔ kè mú-po-ɖɔ̀, wa séín mɔ̀ ɖɛ ɓě ɓɛ́ à hwòɖǒ-dyùàɔ̀ mɔ́ xwééɛ.

Jǎà-po-nyɔ̀ séín ɓɛ́ wa mɔ́ cĩ́ɛ dyi kà wa hwòɖǒ nyuɛ mɔ́ɔ kɛɛ, wa mɛ poìn jǎà-ɖɛ̀ ɓě céèà dà ɓíɖíiɛɛ jè hwìɖǐi, ɓɛ́ wa ké cĩ́-cĩ́ɔ̀ nyɔ wa ké nyuɛɛ gãa dyuò.

Jǎà-ɖɛ̀ ɓě ɓá cĩ́-cĩ́ɔ̀ nyɔ à ké gã ɖé à fɛ̀ɛ̀ múɛɛ jè dyíɛ

(1) À mɛ kpɔ̃ gma séín ɓě ɓɛ́ Báɓòɔ̀ nyíà Kɛ́ɖɛ́ì-ɖeín-nà-nyɔ̀ ɓě kɛɛ dyi.

Jízɛ̀ cɛ̃ɛ ɖéɛ Máfíò 5:19 mú, ké ɔ ɖá,

Ɔ jèɛɛ, nyɔ mɔ̀ nyɔ ɓɛ́ ɔ se gmaɔ̀ nyɔ se ɖɛ kpa ɖò nyuɛ́ mu, ké ɔ muɛ nyɔ tɔ̀ɔ̀ ɓě gbo cɛ̃ìn, ɓɛ́ wa mɔ̀ùn ké ɖɛ dyúáɖòɔ̀ nyuɛɛ, ɔ mu nyɔ se ɖɛ kpa kɛɛ jǔùn ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃. Kɛɛ nyɔ mɔ̀ nyɔ ɓɛ́ ɔ kpɔ̃ gmaɔ̀ dyi, ké ɔ cɛ̃ɛ nyɔ tɔ̀ɔ̀ ɓě gbo, ɓɛ́ wa mɔ̀ùn ké ɖɛ dyúáɖòɔ̀ nyuɛɛ, ɔ mu ɖɛ kpaùn ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃.

À se ɓéɖé ɓɛ́ à ké Báɓòɔ̀ wákáɔ̀ nyɔ ɓě ɓɛ́ à ɖá wa zià ɖɛ kpauún mìɔ kɛɛ ɖòùn dyi kpɔ̃. Ɖɛ ɓě ɓɛ́ Báɓòɔ̀ ɖá à mɛ nyuà kɛɛ ɖò se ɓó nì ɓɛ́ ɔ ké se ɖɛ kpa fɔɔ.

(2) Ɖɛ séín ɓě ɓɛ́ Gèɖèpɔ́ɔ̀ ɖá à mɛ nyuɛɛ mɔ̀ ɓó à mìɔùn nììn kpáná dyé jè.

Dìtɔ̀wáɖánámɛ̀ 10:12-13,

Óó Éézùɖùɛ̀-nyɔ̀ ɓě, ɓě tò ɖɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ́ ɓɛ́ ɓě ké nyuɛɛ gbo ɖùǔ. Ɓě mɛ fɛ̃̀ìn Bounɓoɔ̀ dyi, ɓɛ́ ɓě ké ɔ kpeɖe séín ɓěɔ̀ kíɖíí sí. Ɓě mɛ ɖɛ̀ɓɛ̀ ɔ mú, ɓɛ́ ɓě ké ɔ ɓiè hwòɖǒɛ̀-ɖé-hwɛ̀-kà. Ɓě mɛ kpɔ̃ ɔ gma séín ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyí ɓó ɓě mìɔùn nììn kpáná dyé jè.

Wɛ́ɖɛ́ 84:11,

Sepóɛɖé Bounɓo Gèɖèpɔ́ɔ̀ mɔ̀ à ce kè à dyí-zĩ̀ìn-ɖɛ̀. Ɔ po à mana kɔ̃ dyììn ɖé ɔ jĩ́á-jèɔ̀ mú, ké ɔ nyí à dya-dè-dè. Nyɔ ɓě ɓɛ́ wa nyu ɔ wuɖuɔ̀ ti séín nyɛɛ, ɔ ní ɓùɖùìn wa ɖɛín-ɖɛ̀ ɖò.

Gèɖèpɔ́ɔ̀ ní ɓùɖùìn à ɖɛ mɔ̀ ɖɛ nɔ̀mɔ̀ dyíin nyɛɛ fɔɔ, mɔɔ ké ɔ ní tò à ɖɛ ɓɛ́ìn à gǎ dyéɛ̀n nyɛɛ ɖò kɔ̃. Ɔ jǔ ké Gèɖèpɔ́ɔ̀ seɔ́ má hwìè ɓě à ké kpaa jè à gbo cɛ̃ ní, nìí, à jè muɔ́ wììn nììn mìɔ. Nyɔ ɓɛ́ doìn Gèɖèpɔ́ɔ̀ nììn hwìèɔ̀ jè múɛɛ, ɔ doìn ɔ hwòɖǒ-fɔ̀nɔ̀-fɔ̀nɔ̀ɔ̀ kè ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ jè mú ɖekè. Kà nyɔǔn ɓɛ́ìn dyí dyuòɛ̀ kà ɓɛ́ à dè Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ kè ɔ hwòɖǒ-fɔ̀nɔ̀-fɔ̀nɔ̀ɔ̀ hwòɖǒ kɔ̃ɛɛ mɔ̀, ɔ jǔ ké à dyi ɖɛ ɓě ɓɛ́ ɔ cɛ̃ à gboɛɛ nyu, ké à se nyɔǔn-dyù nììn fɔ̀nɔ̀-hwòɖǒ kíɖíí sí ní.

(3) Nyɔ ɓɛ́ Kɛ́ɖɛ́ì ɖǎ buɛ̀ kɛɛ, ɔ se buɛ̀ fɔɔ ɔ jǔ ké ɔ se Gèɖèpɔ́ɔ̀ wuɖu nyu ní.

Pɔ́ɔ̀ céè Kɛ́ɖɛ́ì-ɖeín-nà-nyɔ̀ ɓěɔ̀ gbo ɖé 1 Kɔ̀ɖéíntĩ̀ɔ̀ 9:21 mú, ké ɔ ɖá:

Ɖé nyɔ ɓě seà gmaɔ̀ ɓéɖéɛ gboɛɛ, ḿ nyu ma ḿ mìɔùn kà nyɔ seà gmaɔ̀ ɓéɖéɛɛ nìà kɛ. Ḿ nyuɛ náa pū ɓɛ́ ḿ ké nyɔ ɓě seà gmaɔ̀ ɓéɖéɛɛ Kɛ́ɖɛ́ì gbo dyà jè. Kɛɛ ɔ se ɖɛ ɓɛ́ ḿ ké se Gèɖèpɔ́ɔ̀ nììn gmaɔ̀ ɓéɖéɛ. Ḿ nì Kɛ́ɖɛ́ì gmaɔ̀ xwíɖíi.

À ɖǎ Mózèɛ̀ gmaɔ̀ xwaún buɛ̀, ké à ɖǎ dyí sɛ́ɖɛ́ìn ɓó Gèɖèpɔ́ɔ̀ dyúa, sepóɛɖé Gèɖèpɔ́ɔ̀ jĩ́ájèɔ̀ mɔ̀ nyɔ póìn à nììn, kɛɛ ɔ se Gèɖèpɔ́ɔ̀ gma ɓěɔ̀ dyi-kpɔ̃-kpɔ̃. Ké ɖeɛɛ, à ɖǎ gmaɔ̀ nyɔ zaa-dúún-wáɖá-wáɖáɔ̀ xwaún buɛ̀, sepóɛɖé Gèɖèpɔ́ɔ̀ ɖǎ nàmàǔn ɓě ɓɛ́ à nyu ma kɛɛ kɔ̃in zĩ̀ìn.

Kɛɛ buɛ̀-buɛ̀ ɓɛ́ à nyuà kɛɛ mɛ ɓɔ́ɔ nyuɛ ɓɛ́ à ké Gèɖèpɔ́ɔ̀ wuɖu mú jaɖa mɔɔ ɓɛ́ à ké se à mǔè ɓě mú ɖɛ̀ɓɛ̀ɛ̀. “Kɛɛ ḿ ɖíí ɓě, Gèɖèpɔ́ɔ̀ ɖá ɓě mɔ̀ùn, ɓɛ́ ɓě ké se gǐì jǔ, kɛɛ ɔ ní ɖá ɓɛ́ ɔ ké ɖɛ jǔ, ɓɛ́ ɔ kéɛ nyu ɓɛ́ ɓě mìɔùn nììn mɔ́ɔ́-ɖɛ̀ ké ɓě wuɖuí kɔ̃̀. Kɛɛ ɖɛ̀ɓɛ̀ǐn-ɖɛ̀ɓɛ̀ǐn mɛ nyu ɓɛ́ ɓě ké kũ̀à dyí nyuìn nyùìn.” (Gàɖézìà 5:13).[1] Kà 1 Kɔ̀ɖéíntĩ̀ɔ̀ 9:21 nyuɔ́ɔ kà à dyí tɛ̀mɛ̀ìn kĩ́ín (ɖé dyiíɛɛ), à nì Gèɖèpɔ́ɔ̀ kpé xwíɖíí. Ɖɛ mɔ̀ ɔ mɔ́ɔ́-ɖɛ̀ ɓó à bììɛɛ, ɔ tɛ̀mɛ̀ìn à nììn dyí ɖé Báɓòɔ̀ mú.

Nyɔ ɖíɛ́ ɓě ɖá ɖɛ wa mɔ̀ùn po jǎà kɛɛ ɖéɛ̀ wa po jǎà pū. Nyɔ ɖíɛ́ ɓě cɛ̃ wuɖu nìà kɛ ti wa kè wa mǔè ɓě nì dɔ́ɔ́ dèɛ̌n ɓá Gèɖèpɔ́ɔ̀ wuɖu nyu jè dyíɛ. Ɔ mu dyíin nɔ̀mɔ̀ùn ɓɛ́ à ké wuɖuɔ̀ xwíníín mú zà gàná cá. Wuɖu mɔ̀à ɖɛ ɓɛ́ mɔ́ún po jǎà kɛɛ ɖéɛ̀ ḿ po jǎà pū kɛɛ, ɔ mɔ̀ jǎà-po-ɖɛ̀ se dyí sɛ́ɖɛ́ìn ɓɛ́ nyɔǔn ɓě ɓéɖé, ké wa poɛ̀n hwìɖǐi kà ɓɛ́ Gèɖèpɔ́ɔ̀ jĩ́ájèɔ̀ ɖòùn se nyɔ póɛ̀n ɓɛ́ìn, kɛɛ hwìɖǐi-taɓa-ɖɛ̀ kà kò ɖò ɓě ɓɛ́ìn nyuɛ ɓɛ́ nyɔ ké pó ɖekèɛ. Kɛɛ wɛ̃́ɛ́ kɛɛ, ɔ se ɖɛ gbà ɓɛ́ nyɔ ɖò kéɛ múin wɔ̃́ kà ɔ ké Gèɖèpɔ́ɔ̀ ɓièɛ̀ nyu hwòɖǒɛ̀-ɖé-hwɛ̀-kà, sepóɛɖé ɔ mɔ́ ɓɛ́ ɔ ké Gèɖèpɔ́ɔ̀ hwòɖǒ dyi dè jèɛ.

"Ké ɓě ɖǎ nàmàǔn xwaún pó, ké ɓě mɔ̀ǎ dyí-sɛ́ɖɛ́ìn-sɛ́ɖɛ́ìn gǐì" (Wóɖómà 6:18).

(4) À dyi Gèɖèpɔ́ɔ̀ mú ɖɛ̀ɓɛ̀ ní, à mɛ mɔ́ ɔ mɔ́ɔ́-ɖɛ̀ dyí dyuòɛ̀ dyi ɖekè, ké à mɛ ɓɔ́ɔ dyi ɓàɖàìn.

1 Jɔ̃́ɔ́ 5:2-3 ɖá

Kà à nyuɛ dyí dyuòɛ̀ kà à ɖɛ̀ɓɛ̀ Gèɖèpɔ́ɔ̀ dyú ɓě múɛɛ, ɔ kɛ̀. Ɔ mɔ̀, ɔ jǔ ké à dyi Gèɖèpɔ́ɔ̀ mú ɖɛ̀ɓɛ̀, ké à dyi ɖɛ ɓě ɔ cɛ̃ɛ nyuín. Sepóɛɖé ɖɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ nyɔ ɓéɖé ɓó Gèɖèpɔ́ɔ̀ bììɛɛ xwíníín nyɛɛ, ɔ kɛ̀. Ɔ mɔ̀, à nyu ɖɛ ɓě ɓɛ́ ɔ cɛ̃ɛ. Ké ɖɛ ɓě ɓɛ́ ɔ cɛ̃ɛ, wa se à bìì xwa kuɛń zi.[2]

Jɛ̀ɖèmádyà 31:33 ɖá, “Dèè-wùɖù ɖìè ɓɛ́ ḿ kè Éézùɖùɛ̀-dyù ɓěɔ̀ muà dèìn ɓó tia ɓaɖaa kɛà kɛ̀. Ní mu ní gmaɔ̀ ɖé waà hwòɖǒ bũ̌ poùn. Ní muɛ ɖéɛ wa hwòɖǒ bũ̌ céèìn…”

Nyɔ ɓɛ́ ɔ ɖɛ̀ɓɛ̀ Gèɖèpɔ́ɔ̀ múɛɛ se ɖɛi dièɛ̌ mu kĩ́ín, ɓɛ́ ɔ ké níiń, “Gèɖèpɔ́ɔ̀ mu ḿ zaa kpɔ̃̀ìn ɓó ɖɛ nìà kɛ nyu jèè? Kɛɛ ɔ mɛ diè ɖɛi, ɓɛ́ ɔ ké níiń, “Ɖɛ́ Gèɖèpɔ́ɔ̀ hwòɖǒ dèìn múin mìɔ kɛ́? Mɔɔ “Ɖɛ́ mɔ̀ ɖɛ kpa ɖɛ mìɔ kɛ́” (Fèɖópĩ̀ɔ̀ 1:10; Tátɔ̀ 3:8).

(5) Báɓòɔ̀ zàìn ɖɛ ɓě à ké nyuín, ɓɛ́ à ké à fɛ̀ɛ̀ ɓěɔ̀ nàìn nɔ̀mɔ̀ dyíin nyɛɛ à da.

Báɓòɔ̀ se hwìè ɓě à ké kpaa mú sṹìn ɓɛ́ ɔ kéɛ ɓóɛ à dyúa dyi pɛ̃́ìn ɖòùn pū. Báɓòɔ̀ wáká ɖíɛ́ ɓě nyí à nyuu-ɖɛ̀ ɓě ɓɛ́ à ké nyuín, à ké mú ma ɓɛ́ à ké Kɛ́ɖɛ́ì bìì cĩ́ kɛ. Ké ɔ wáká ɖíɛ́ ɓě tò ɖɛ jɛ́ɛ́ ɓě jìì, ɓȧ kà Kɛ́ɖɛ́ì-ɖeín-nà-nyɔ̀ ké cĩ́ɛ nyuɛɛ jè dyí.

(6) Gma ɓě ɓá ɖɛ kpa ɖɛ ɓě ɓɛ́ à ké nyu ɖé à fɛ̀ɛ̀ múɛ jè dyíɛɛ se ɖɛ kpa ɖé à gbo.

Fáɖòsíì-nyɔ̀ ɓěɔ̀ bĩ ma ɖɛ nìà kɛ xwa, ké wa hwòɖǒ gmɔ̀ìn ma ɖɛ ɓě se ɖɛ kpa kɛɛ gbo. Ɖé Máfíò 23:23 múɛɛ, Jízɛ̀ cɛ̃ɛ wa gbo, ké ɔ ɖá

Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě nyí Gèɖèpɔ́ɔ̀ ɓěɛ̀ cɔ́ɔ́-zɔ̃̌ìn-ɖɛ̀ ɓě mɔ̀à vàǎ-dù kò-kò ɓěɔ̀ kɛɛ ɓàɖàìn-bùè, kɛɛ ɓě wã̀ìn gmaɔ̀ nyɔ kpa ɖɛ ɓě dyéɖé kɔ̃in. Ɔ mɔ̀ gma ɓě cɛ̃à ɓɛ́ ɓě kéà ɓě mǔè ɖò jǎà-ɖɛ̀ bũ̌ nyu, ɓɛ́ ɓě kéà ɔ wìǐn dyé, ɓɛ́ ɔ kéà ɓě hwòɖǒ kɔ̃ dèɛ̀ ɓɛ́ìn nyɛ. Gma ɓě nìà kɛ kè gma tɔ̀ɔ̀ ɓěɔ̀, ɖéɛ̀ ɓě ɓéɖé ɓě kéɔ́ dyi kpɔ̃.

Vɔ́sì nìà kɛ seɛ cɛ̃ kà ɓɛ́ jǎà ɖíɛ́ ɓě nì ɓó ké ɔ se ɖɛ kpa kɛ. Gbào, ɔ seɛ náa cɛ̃. Ɖɛ ɔ nìà cɛ̃iń nyɛɛ mɔ̀ kà ɖɛ ɖíɛ́ ɓě kpa ɖɛ ké wa zi ɖɛ tɔ̀ɔ̀ ɓě dyíɛ. Ké à ɓéɖé ɓɛ́ à ké ɖɛɔ̀ nyɔ ɓě zi ɖɛ kpauń mìɔ kɛɛ jè cɛ̃.

(7) Gma ɓě dyi-kpɔ̃-kpɔ̃ ɖòùn se à Gèɖèpɔ́ɔ̀-wuɖu-nyu-nyɔ̀ mɔɔ Gèɖèpɔ́ɔ̀ mú-ɖɛ̀ɓɛ̀-nyɔ̀ mú nyuɛ ɓɛ́ìn.

Jízɛ̀ mu dyúa ɖe, ké ɔ cɛ̃ɛ Fáɖòsíì-nyɔ̀ ɓěɔ̀ gbo ɖé vɔ́sì 25 mú, ké ɔ ɖá,

Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě wɔɔ̀ kópòɔ̀ kè péɖétèɔ̀ kɔ̃ún dyi, kɛɛ ɓě dyíìn wa ɖii-ɖɛ̀ kè náá-ɖɛ̀ ɓě ɓɛ́ ɓě zàìn nyɔǔn gana xwa dyììn ɖé ɓě mìɔùn jè kàmà-kàmà múɛɛ múin.

Nyɔ ɖòɛ̀ cĩ́-cĩ́ ɓɛ́ìn dyí sɛ́ɖɛ́ìn ɖé nyɔǔn dyéɖéín, ɓɛ́ nyɔɔ̀ ké se Gèɖèpɔ́ɔ̀ mú ɖɛ̀ɓɛ̀ mɔɔ ɓɛ́ ɔ ké se Gèɖèpɔ́ɔ̀ wuɖu nyu gàná cá kɛ. Ké ɖeɛɛ, nyɔ ɖò mɔ̀ùn ɓɛ́ìn Gèɖèpɔ́ɔ̀ mú ɖɛ̀ɓɛ̀ɛ̀ hwòɖǒ-ɖé-hwɛ̀-kà, ɓɛ́ ɔ ké se xwíníín kɔ̃̀ jè ɔ ké mú-hwɛ̀-kpèɖè tɔ̀ɔ̀ ɓě nyuɛɛ ɓéɖé. Ɔ dyi ná nìǐn, nìí, ɔ se Gèɖèpɔ́ɔ̀ bìì kũ̀à nyuɛ́ nì ɖé zùǔn.

(8) Ɔ jǔ ké à dyi ɖɛ ɓɛ́ nyɔ tɔ̀ɔ̀ ɓě cɛ̃ɛ hwòɖǒ kɔ̃ dè ní, nìí, ɔ se ɖɛ ɓɛ́ wa nììn cĩ́í-fɛ̀ɛ̀ ké ɖɛ kpa ɓɛ́ ɔ ké à mɔ̀ùn dyí ziɛɛ jè.

Pɔ́ɔ̀ diè Kɛ́ɖɛ́ì-ɖeín-nà-nyɔ̀ ɓěɔ̀ dyi ɖé Wóɖómà 14:10 mú, ké ɔ ɖá,

Gàa wè, ɖɛ́ kɔ̃̀ jè m̀ wáɖáà m̀ ɖíí-gààɔ̀ zaa dúún wɛ̃́? Ɖɛ́ kɔ̃̀ jè m̀ zàìn kà m̀ ɖíí-gààɔ̀ zùǔn wɛ̃́? Sepóɛɖé à séín mu ɓó Gèɖèpɔ́ɔ̀ zaa-wɔ̃-pòìn-naínɔ̀ dyi nyànàùn.

Ɖɛ vɔ́sì nìà kɛ nìà cɛ̃iń nyɛɛ mɔ̀, kà Kɛ́ɖɛ́ì-ɖeín-nà-nyɔ̀ ɓě nyu ɖɛ ɓě ɓɛ́ nyɔǔn nyu xwaiɛɛ dya gmɔ̀ɔ̀ kɛ. Nyɔǔn ɓě se wuɖuún dyi wɔ̃́ìn ɓȧ ɖɛ Kɛ́ɖɛ́ì-ɖeín-nà-nyɔ̀ ɓě ɓéɖé ɓɛ́ wa ké nyuɛ kè ɖɛ ɓě wa se ɓéɖé wa ké nyuɛɛ jè dyí.

Jǎà-po-nyɔ̀ ɖò ɓɛ́ìn ɓó nìɛ̀ ɓɛ́ ɔ ké se kà à mɔ̀ùn nyu Báɓòɔ̀ wáká ɖò xwíníín mú zàà kɛɛ jè gbo wɔ̃́ìn mɔɔ ɓɛ́ ɔ ké se ɖɛ gbà ɓáa dyí kɔ̃̀ jè à mɔ̀ùn seà dyi kpɔ̃ kɛɛ dyé. Nyɔɔ̀ ɓɛ́ìn náa nyuɛ, sepóɛɖé ti ɖòɛ̀ ɓaɖaín, Gèɖèpɔ́ɔ̀ nì ɖɛ kò-kò ɓě dyí sɛ́ɖɛ́ǐn ɖé ɔ fɛ̀ɛ̀ mú mɔɔ Gèɖèpɔ́ɔ̀ nyuɛ ké ɔ nììn jǎà-po-ɖɛ̀ kò ɓó à nììnɔ̀ gbo. Ɖɛ nìà kɛ seɛ xwíníín mɔ̀ ɓɛ́ nyɔɔ̀ ké se Kɛ́ɖɛ́ì-ɖeín-nà-nyɔ̀ jɛ́ɛ́ kɛ.

► Ɖɛ́ m̀ poìn hwìɖǐi ɓá wuɖu nìà kɛ jè dyíɛ́? Wuɖuɔ̀ mɔ̀, “Gèɖèpɔ́ɔ̀ mu Kɛ́ɖɛ́ì-ɖeín-nà-nyɔ̀ séín kà wa ké cĩ́ɛ nyuɛɛ da zàìn jɛ́ɛ́ cá, ɔ jèɛɛ, Kɛ́ɖɛ́ì-ɖeín-nà-nyɔ̀ séínɛ̀ kpeɖe mɛ nì dyúáɖò.

Kɛ́ɖɛ́ì-ɖeín-nà-nyɔ̀ ɓěɔ̀ séín séè kpeɖe ɓě ɓɛ́ nyɔ nyu xwai ɖé fɛ̀ɛ̀ múɛɛ jè gbo wɔ̃́ìn ɖò. Nyɔ ɓě ɓɛ́ wa ɖɛ̀ɓɛ̀ Gèɖèpɔ́ɔ̀ mú, ké wa cĩ́ kà Gèɖèpɔ́ɔ̀ nyuɛ mɔ́ɔ kɛɛ, wa séín ní kpɔ̃ tɛ̀mɛ̀ìn-ɖɛ̀ séín jè dyi pū. Ɔ ná nì jèɛɛ, à se ɓéɖé ɓɛ́ à kéɛ cɛ̃ kà ɓɛ́ nyɔ ɖíɛ́ ɓě se Kɛ́ɖɛ́ì-ɖeín-nà-nyɔ̀, sepóɛɖé wa zà Báɓòɔ̀ xwíníín mú mɔɔ wa tɛ̀mɛ̀ìn nyɔǔn ɖé hwìè kò-kò ɓě mú jèɛ. À mɛ kpɔ̃ wa jè dyi, ɓɛ́ à kéɛ jǎà po kà ɓɛ́ wa mɔ̀ Kɛ́ɖɛ́ì-ɖeín-nà-nyɔ̀ ɓě jɛ́ɛ́ kɛ, kɛbì à mɛ poɛ̀n hwìɖǐi kà ɓɛ́ waà tɛ̀mɛ̀ìn-ɖɛ̀ ɓěɔ̀ se jǎà kɛ. Kũ̀à ɓɛ́ Zùù Hwɛ̀ǐn-hwɛ̀ǐnɔ̀ nyuà ɖé à múɛɛ seɛ nyuɛ ɓɛ́ìn ɓɛ́ Kɛ́ɖɛ́ì-ɖeín-nà-nyɔ̀ séínɛ̀ cĩ́í-kpèɖè ké hwɔìn.

À mɛ dyé ti ɓɛ́ à ké Kɛ́ɖɛ́ì-ɖeín-nà-nyɔ̀ tɔ̀ɔ̀ ɓě nììn fɔ̀nɔ̀-hwòɖǒ dyi kpɔ̃ ɖekè. À dyi à mìɔùn dyí ɓúáìn ní, nìí, ɔ muɛ nyuùn ɓɛ́ à kéɛ hwìɖǐi poìn kà ɓɛ́ à dyuò cɔ́cì jè dyí mìɔ mɔɔ à zà Báɓòɔ̀ xwíníín mú dyí-sɛ́ɖɛ́ìn-kà mìɔ ké à zi nyɔ tɔ̀ɔ̀ ɓě dyí kɛ. Ɔ jǔ ké zùù nìà ɖé à múɛɛ dyi wɔ̃́ ɓɛ́ à ké à mìɔùn ɓíɖíi dyà, ɓɛ́ à ké nyɔ tɔ̀ɔ̀ ɓě ɖɛ tɛ̀mɛ̀ìn ɔ kè ɓɛ́ à ké nyɔ tɔ̀ɔ̀ ɓě nììn wuɖu ɖùǔ gbo tò ní, nìí, à mú Kɛ́ɖɛ́ì-ɖeín-nà-nyɔ̀ nɔ̀mɔ̀ dyíin ɓě jǔùn, ɓɛ́ à kéɛ nyu ɓɛ́ gbo-kpɔ̃ìn-kpɔ̃ìn ké ɓó Kɛ́ɖɛ́ì kpóɖó-dyùà mɔ̀à cɔ́cì-nyɔ̀ ɓěɔ̀ kɛɛ pṹa nì.

(9) À dyi hwòɖǒ sɔ̃́ ɓéɖé ɖé à nyuu-ɖɛ̀ ɓě mú ní, nìí, kã̀fĩ́á ɖò se nìɛ̀ ɓɛ́ìn ɓó à bìì fɔɔ.

“Nyɔ séín mɛ dyuò ɖɛ kɔ̃̀ jè wa ɓéɖéà hwìɖǐǐ-taɓa-taɓaa dyí ɖé wa mìɔùn nììn fɔ̀nɔ̀-hwòɖǒ mú” (Wóɖómà 14:5b).

“Kɛɛ nyɔ mɔ̀ nyɔ ɓɛ́ ɔ dyià ɖɛ ɖò ɖiín, ɔ ɓéɖéà kɛɛ ɖé ɔ hwòɖǒ bũ̌ɛɛ, zaa wáɖá ɔ dúún, sepóɛɖé ɔ hwìɖǐǐ-taɓa-taɓaɔ̀ seɛ nyu ɓɛ́ ɔ kéɛ náa nyu. Ké ɖɛ séín ɓɛ́ ɔ se hwìɖǐǐ-taɓa-taɓa mú sɔ̀ìn nyɛɛ,

ɔ mɔ̀ nàmàǔn” (Wóɖómà 14:23).

Ɔ jǔ ké nyɔ ɖò dyi ɖɛ ɖò nyu ké ɔ hwòɖǒ-xwíníín-hwòɖò-dyùàɔ̀ seɛ náa ɔ gbo cɛ̃ ní, nìí, ɔ mɔ̀ fã̀à-ɖɛ̀ mìɔ. Ɔ jǔ ké nyɔ ɖò dyiɛ gbɔ po ɓɛ́ ɔ ké ɖɛ ɓɛ́ ɔ ɖáìn ɖɛ gbà kɛɛ nyu ní, nìí, zàà kpɔ̃ ɔ ɓó nàmàǔn nyu jè. Ɔ jǔ ké à dyi ɖé ce ɓɛ́ Gèɖèpɔ́ɔ̀ ɖǎà à nyíɛɛ mú cĩ́ ní, nìí, mana ɖò nì ɖé ɓó à bìì. (1 Jɔ̃́ɔ́ 1:7).

Ɓě se fũ̀à-fṹá ɖò kpɔ̃ɔ́ mu ɓó dɔ́ɔ́-dè-dè nìà kɛ gbɔ dè jè. Ɖɛ-cɛ̃́-nyɔ̀ ɖíɛ́ ɓě muɛ dyɛ̀ jìì kɔ̃ nɛ́ìn kà ɓɛ́ ɔ mu dyíin nɔ̀mɔ̀ùn ɓɛ́ cɔ́cì ɓěɔ̀ ké gma ɖò po ɓá nyɔǔn-dyùɛ̀ kpeɖe jè dyíɛ. Ké ɖíɛ́ ɓě mɔ̀ùn muɛ dyɛ̀ cɛ̃ìn kà ɓɛ́ nyɔ ɖò dyi ɖɛ gbà ɖò nyu ní, wa mɛ zĩ̀ìn ɔ kɔ̃in nyɛ.

Vɔ̃ ɓɛ́ m̀ ké jǎà-ɖɛ̀ mɛ̀nɛ̌ìn-hĩinyɛ ɓě céèà ɖé dyiíɛɛ dyi kpɔ̃ ɖé hwìè ɓɛ́ ɔ sɛ́ɖɛ́ìn dyíɛɛ mú.

► M̀ poɛ̀n hwìɖǐiɛɛ, jǎà-ɖɛ̀ ɓě nìà kɛɛ nyɛ́ kɔ̃̀ jè sɔ̀ nyɔ pàɖǎ hwìɖǐi kɛ́?

► Jǎà-ɖɛ̀ ɓě nìà kɛɛ nyɛ́ kɔ̃̀ jè ɓɛ́ìn dyɛ̀ mɔ̀ùn hwìɖǐi sɔ̀ɔ̀ wàɖà kɛ́?

À Ɓǎ, mɔ̀ nìà ɖé dyɔún wɛ̃,

Ḿ mɔ́ ɓɛ́ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ḿ ɓéɖéà ɓó m̀ bììɛɛ ké kɔ̃ kpá kánáá pū. Ḿ mɔ́ ɓɛ́ ḿ ké ɖɛ mɔ̀ nì mɔ́ɔ́-ɖɛ̀ kɛɛ jè múin wɔ̃́.

Nyuɛ ɓɛ́ ḿ ké ɖɛ dè m̀ hwìɖíi mìɔ kɛɛ dyí dyuò, nìí ɓɛ́ ḿ ké fɛ̀ɛ̀ hwɛ̀ mú, ɓɛ́ nàmàǔn ɖò se mú nìɛɛ cĩ́ɛ ɓɛ́ìn.

Kpá ḿ gbo ɓɛ́ ḿ ké nyuu-ɖɛ̀ ɓě kè kpeɖe ɓě mɔ́ gbo-zĩàìn-zĩàìn ɖé ḿ múɛɛ dyí dyuò, nìí ɓɛ́ ḿ ké nyuu-ɖɛ̀ kè kpeɖeɔ̀ nyɔ ɓɛ́ìn nyuɛ ɓɛ́ m̀ ké dĩ́ín-dĩ̀ìn ɓéɖéɛɛ dyí ɖú.

Ḿ mɔ́ ɓɛ́ ḿ ké ɓo tòɖò ɓó Gèɖèpɔ́ɔ̀ dĩ́ín-dĩ̀ìnɔ̀ jè.

Kǎà ɔ mɛ nì

(1) Cɛ̃́ 1 Kɔ̀ɖéíntĩ̀ɔ̀ 13. Céè-ɖɛ̀ɔ̀ wuɖu-kpà nìà kɛ dè nyɔ ɓɛ́ ɔ ɖɛ̀ɓɛ̀ ɔ mǔè ɓě mú hwòɖǒɛ̀-ɖé-hwɛ̀-kà kɛɛ mɛ. Gèɖèpɔ́ɔ̀ mɛ nyuɛ ɓɛ́ m̀ kéɛ dyuò kà ɔ mɔ́ nì fɛ̀ɛ̀ɔ̀ ɖɛ̀ɓɛ̀ǐn-ɖɛ̀ɓɛ̀ǐn múin dyíɛ̀n dyi gàná cá kɛ. Zɛɖɛ ɖɛ ɖíɛ́ ɓě ɓɛ́ m̀ mɔ́ Gèɖèpɔ́ɔ̀ ké m̀ gbo kpá, ɓɛ́ m̀ ké gbo zĩàìn ɖé nì fɛ̀ɛ̀ mú kɛ.

(2) Cɛ̃́ vɔ́sì ɓě nìà dà ɓíɖíiɛ, sepóeɖé wa cɛ̃ ɖɛ tĩ́ín-tĩ́ín ɓě ɓá kà Kɛ́ɖɛ́ì-ɖeín-nà-nyɔ̀ɛ̀ kpeɖe ké nìɛ̀ nyuɛɛ jè dyíɛ:

• 1 Kɔ̀ɖéíntĩ̀ɔ̀ 6:19-20

• 1 Kɔ̀ɖéíntĩ̀ɔ̀ 10:31

• 1 Kɔ̀ɖéíntĩ̀ɔ̀ 11:14-15

• 1 Tímétè 2:9-10

• 1 Píɖɛ̀ 3:3-4

• Wɛ́ɖɛ́ 19:14

• Wɛ́ɖɛ́ 101:3

Céè ɖɛ mɔ̀ ɖɛ ɓɛ́ céè-ɖɛ̀ ɓěɛ̀ ɖò-ɖò cɛ̃à kɛ xwíníín nyɛɛ ɓíɖíi. Dè cĩ́í-kpèɖè ɓě kɔ̃̀ jè céè-ɖɛ̀ ɓěɛ̀ cɛ̃à kɛɛ nyɔ m̀ mɔ́ nyuɛ dyiɛɛ mɛ.