Kà Nyɔ Ké Kɛ́ɖɛ́ì-Ɖeín-Nà-Fɛ̀ɛ̀ Cĩ́ɛ Nyuɛ

Tɛ̀mɛ̀ìn-ɖɛ̀ nìà kɛ cɛ̃ kà nyɔ ké wíɖí peɖeɛ nyu ɖé zùǔn wɛ̃ɛ jè, ké ɔ cɛ̃ gbo-kpɔ̃ìn-kpɔ̃ìn nì ɓó nyɔ ɓě pṹa kɛ kè kà à ké nyɔ tɔ̀ɔ̀ ɓě múin kpáa nyuɛ kè gbo-kpɔ̃ìn-kpɔ̃ìn nì ɓó à kè à gɔ̌mànàɔ̀ pṹa kɛ, kè kpé ɓě ɓɛ́ nyɔǔn-dyù ɓéɖéɛ ɔ kè ɖɛ tɔ̀ɔ̀ ɓě ɓɛ́ìn nyuɛ ɓɛ́ à ké Kɛ́ɖɛ́ì-ɖeín-nà-fɛ̀ɛ̀ cĩ́ɛɛ jè.

Cɛ̃́ɛ́-ɖɛ̀ séínɛ̀ da-zà-zàɔ̀ céè ɖé céè-dyèɖè (gbìàìn dyi ɓě) mú.

Bɛ̃̌ nìà kɛ ► céè ɓó dyi-diè-ɖɛ̀ ɓě ɓɛ́ ɖɛ-cɛ̃́-nyɔ̀ ɓěɔ̀ ké dɔ́ɔ́ kɔ̃in dèìn nyɛɛ ɖeín.  Tɛ̀mɛ̀ìn-ɖɛ̀ɔ̀  nàìn-nyɔ̀ɔ̀ mɛ diè ɖɛ-cɛ̃́-nyɔ̀ ɓěɔ̀ dyi, ɓɛ́ ɔ ké wa ti nyí, ɓɛ́ wa ké dyi-diè-ɖɛ̀ɔ̀ gɔ̃̌-jǔ-wùɖùɔ̀ jè dɔ́ɔ́ kɔ̃in dèìn. Ɔ jǔ ké ɖɛ-cɛ̃́-nyɔ̀ ɓěɔ̀ dyúáɖò dyi nyɔ kĩ́ín-kĩ́ín jǔ ɓɛ́ ɔ ké gɔ̃̌-jǔ-wùɖù tò kánáá pū ní, mɔɔ ɔ jǔ ké wa ɖíɛ́ ɓě ní wùɖù fɔɔ ní, nìí, waà nàìn-nyɔ̀ɔ̀ ɓɛ́ìn wa ɖò dyi dièɛ̀, ɔ hwɔìn kà: “Màajè, ɖɛ́ mɔ̀ dyi-diè-ɖɛ̀ nìà kɛ gɔ̌ jǔ-wùɖùɔ̀ kɛ́?”

À nyùìn vɔ́sì ɓě kũ̀à mú ɖé Tɛ̀mɛ̀ìn-ɖɛ̀ɔ̀ mú. Ɔ jǔ ké ti ɖò dyi ɓó nyini ɓɛ́ ɖɛ-cɛ̃́-nyɔ̀ ɓěɔ̀ ké Báɓòɔ̀ dà ɖò wuɖuún zà ní, nìí, wa muɛ dyí dyuòùn dyììn ɖé ɖɛ-da-zà-zà muà ɓó nììn nyɛɛ mú. Ɔ hwɔìn kà: Ɖɛ-cɛ̃́-nyɔ̀ ɖò mɛ zà Wóɖómà 6 wuɖuún, ɓɛ́ nyɔ tɔ̀ɔ̀ ɓěɔ̀ ké ɔ gbo ɖùǔ tò. Ti ɖíɛ́ ɓě ní, nì mu vɔ́sì ɖíɛ́ ɓě dyéìn ɓɛ́ ɖɛ ɖò ké wa wɔ̃ gbǎìn, ɔ hwɔìn kà: (1 Kɔ̀ɖéíntĩ̀ɔ̀ 12:15). Vɔ́sì ɓě nìà kɛ taɓa Báɓòɔ̀ dɛ̀ nyɔɔ̀ muà wuɖuún zàǔn nììn nyɛɛ ɓá ɓo ɖeín. Nyɔɔ̀ se ɓéɖé ɓɛ́ ɔ ké vɔ́sì ɓě nìà ɖɛ gmɔìn dyéɖéín sɔ̃́ɔ̀ múɛɛ wuɖuún zà wɛ̃́ɛ́ ti séín. 

M̀ se ɓéɖé ɓɛ́ m̀ ké vɔ́sì ɓě nìà ɖé ɖɛ gmɔìn dyéɖéín sɔ̃́ (------) nìà kɛ múɛɛ wuɖuún zà wɛ̃́ɛ́.

Cɛ̃́ɛ́-ɖɛ̀ séín ɓéɖé taún-kũ̀à ɓě ɖéɛ mánáín. Wa mɛ nyu taún-kũ̀à ɓěɔ̀, ɓɛ́ wa ké wa dyà ɓó cɛ̃́ɛ́-ɖɛ̀ɔ̀ nyɔ mu ɓó dyi kɔùn wɛ̃ɛ gbɔ-dè-tìǐn. Ɔ jǔ ké ɖɛ-cɛ̃́-nyɔ̀ ɖò se ɔ nììn tɛ̀mɛ̀ìn-ɖɛ̀ɔ̀ mɔɔ ɔ taún-kũ̀àɔ̀ nyuɛ hwɔ ní, nìí, ɔ ɓɛ́ìn nyuɛ ɖe. Kɛɛ wɛ̃́ɛ́, kɛɛ waà nàìn-nyɔ̀ɔ̀ mɛ kùùn ɖɛ-cɛ̃́-nyɔ̀ ɓěɔ̀ hwòɖǒǔn ɓɛ́ wa ké ti kɔ̃ nì, ké ɔ muɛ nyuùn ɓɛ́ wa ké ɖɛ pàɖǎ cɛ̃́. À po céè-ɖɛ̀-mì ɖò páún ɖé Tɛ̀mɛ̀ìn-ɖɛ̀ɔ̀ dúí-jɛ̀ɖɛ̀ìn-naín, ɓɛ́ m̀ ké ɓó taún-kũ̀àɔ̀ nyɔ ɓɛ́ ɖɛ-cɛ̃́-nyɔ̀ ɓěɔ̀ ɖǎ gbo hwɛ̀ kɛɛ nyɛ́nɛ́ céè. 

Xwíníín ɓě kɔ̃̀ jè à céèà tɛ̀mɛ̀ìn-ɖɛ̀ nìà kɛɛ ɖò mɔ̀; ɓɛ́ ɔ ké ɖɛ-cɛ̃́-nyɔ̀ ɓěɔ̀ gbo kpá, ɓɛ́ wa mɔ̀ùn ké ɖɛ-tɛ̀mɛ̀ìn-nyɔ̀ ɓě jǔ ɖekè. Tɛ̀mɛ̀ìn-ɖɛ̀ɔ̀ nàìn-nyɔ̀ɔ̀ mɛ nyí ɖɛ-cɛ̃́-nyɔ̀ ɓěɔ̀ ti ɓɛ́ wa ké kà wa ké ɖɛ tɛ̀mɛ̀ìn nyuɛɛ cɛ̃́. Ɔ hwɔìn kà, ɔ mɛ nyí ɖɛ-cɛ̃́-nyɔ̀ ɓěɔ̀ ɖò-ɖò ti ɓɛ́ ɔ ké cɛ̃́ɛ́-ɖɛ̀ɔ̀ wáká xwã́ún-xwã́ún ɖò ɔ mǔè ɓěɔ̀ tɛ̀mɛ̀ìn. 

Ɖé cɛ̃́ɛ́-ɖɛ̀  séín dúí-jɛ̀ɖɛ̀ìn-naín nyɛɛ, à ɓéɖé ɖé dà ɖò ɓɛ́ nyɔ ɓě ké wa mìɔùn kpoo mú po, ɓɛ́ wa kéɛ dɔ́ɔ́ kɔ̃in dèìn nyɛ. Tɛ̀mɛ̀ìn-ɖɛ̀ɔ̀ nàìn-nyɔ̀ɔ̀ ɓɛ́ìn ti jĩ̀ kà wa ké ɖɛɔ̀ dɔ́ɔ́ kɔ̃in dèìn nyɛɛ dyí sɔ́ɔ. Cɛ̃́ɛ́-ɖɛ̀ ɓěɔ̀ pàɖǎ ɓéɖé dɔ́ɔ́-kɔ̃in-dèìn-ɖɛ̀ kúɖúú ɓě.

Ké cɛ̃́ɛ́-ɖɛ̀ séínɛ̀ dúí-jɛ̀ɖɛ̀ìn-naín ɖeɛɛ, à ɓéɖé ɖé ɓaà-wùɖù xwã́ún-xwã́ún ɖò, ɓɛ́ ɖɛ-cɛ̃́-nyɔ̀ ɓěɔ̀ ké, Gèɖèpɔ́ɔ̀ dyi diè, ɓɛ́ ɔ ké wa jǎàɔ̀ dyí tɛ̀mɛ̀ìn ɖé wa fɛ̀ɛ̀ mú. Tɛ̀mɛ̀ìn-ɖɛ̀ɔ̀ nàìn-nyɔ̀ɔ̀ ɓɛ́ìn ɖɛ-cɛ̃́-nyɔ̀ ɓěɔ̀ ɖò dyi dièɛ̀ ɓɛ́ ɔ ké ɓaà-wùɖùɔ̀ wuɖuún zà ɓó wa séín bìì.